Karoa 8

Tura Korikoridia be Edena Bamona Lau Davaridia Diba?

MERO ta ladana Ronny be mai ena lalohisihisi ida ia gwau: “Ena be lagani 8 lalodiai inai gabu ai lau sikuli noho, to ta ese lau ia tura henia lasi!” Reana nega haida oi danu oi laloa oi be hegeregere lasi oi be ma ta ida do umui turana karaia. Tura korikoridia be edena bamona taudia? Edena bamona oi davaridia diba?

Hereva Lada-isidia 17⁠:17 ia gwau: “Tau ta ena turana ese nega iboudiai ia lalokau henia, bona nega dikadia ai ena tadikaka hegeregerena ai ia lao.” (The Bible in Basic English) To, ena be oiemu lalohisihisi be taunimanima ta oi hamaorolaia diba, to reana ia be oiemu turana korikorina lasi. Haneulato ta ladana Marvia ia gwau: “Reana ta do oi gwauraia oiemu turana, to oi kara kerere murinai do ia gwau, ‘Lau be guna lau diba unai kerere do oi davaria, to do oi badu garina lau gari dainai oi lau hamaoroa lasi.’ To tura korikorina ena kara be inai: Ena be ia diba ena hereva do oi moalelaia lasi reana, to oi ia itaia dala kererena ai oi lao gwauraia neganai, oi ia hadibaia toho.”

Oiemu namo ia tahua tauna ena hereva momokani ese oiemu lalona ia hahisia dainai unai tau do oi dadaraia, a? Hereva Lada-isidia 27⁠:6 ia gwau: “Oi ia lalokau henia tauna ese oi ia henia berodia oi abidadama henia diba, to oi ia inai henia tauna ena kisi momo oi abidadama henia diba lasi.” (Byington) Namona be ia laloa maoromaoro bona ia hereva maoromaoro tauna oi tahua oiemu turana ai do oi halaoa totona.

Tura Koikoidia bona Tura Korikoridia

Haneulato ta ladana Peggy ia gwau: “Lauegu mauri sivaraina ese ia hamomokania ta ena ‘turana’ haida ese ena namo idia tahua lasi.” Peggy be kekeni badana neganai ena tamana sinana be ruma amo idia lulua. To, Iehova ena Witness taudia rua, Bill mai ena adavana Lloy, ese idia tura henia bona Baibel amo idia stadi henia. Peggy ia gwau: “Lau tura henidia negana lalonai lau moale bada bona lalo-maino lau davaria danu.” To ia rakatanidia, ia hedavari henidia uhaudia bona ulatodia haida do ia tura henidia totona.

Peggy be ma ia gwau: “Lauegu ‘turadia’ matamatadia ese kara momo lau idia hadibalaia​—⁠kaset rikoda henaoa dalana, seke moni koikoilaia karana, mariuana ania karana, bona drag ania kava totona dina ta ta iboudiai 200 dola davaria dalana.” Ena mauri laganidia be 18 neganai, tauhau ta ladana Ray ese ia hamaoroa, ia gwau ia ania diba drag iboudiai do ia henia davana lasi. Peggy ia gwau: “Unai neganai lau laloa, do lau henao lou lasi bona do lau koikoi lou lasi, badina be lauegu lalo-hekwarahi iboudiai idia ore.” To Ray ese ariara karana ia hadibalaia. Gabeai Peggy ese unai siti bona ena “turadia,” unai lebulebu taudia unai, ia heautanidia.

Ena noho gabuna matamatana ai, Iehova ena Witness hahinedia rua be ena ruma dekenai idia lao. Peggy ia gwau: “Unai hahine lau rosidia bona lauegu matana ranu ia diho, lau moale dainai. Lauegu ‘turadia’ gunadia edia koikoi lau badulaia, to lau itaia unai hahine edia turana karana be mai momokanina.” Vadaeni, Peggy ese ena Baibel stadi ia hamatamaia lou.

To, Dirava ena ura hegeregerena ia raka be mai ena hekwarahi. Kuku ania karana ia hadokoa be auka herea. To, ena turana ta, Witness hahinena ese ia hamaoroa, ia gwau: “Kuku oi ania murinai Dirava oi noia lasi oiemu kerere do ia gwauatao, to oi ura kuku do oi ania neganai, oi noia emu lalona do ia hagoadaia.” Peggy ia gwau: “Unai heduru herevana ese lau ia durua. . . . Unai neganai lauegu lalona ia goeva bona egu mauri dalana lau moalelaia, to lagani gunadia be unai bamona lasi.”

Peggy ena sivarai ese Hereva Lada-isidia 13⁠:20 ia hamomokania: “Aonega taudia ida ia raka hebou tauna be do ia aonega, to kavakava taudia ia bamodia tauna ese dika do ia davaria.” Peggy ia gwau: “Dirava idia lalokau henia taudia bema guna lau bamodia noho, hari lau laloa lou gaudia dikadia lau davaridia lasi.”

Tura Davaridia Dalana

Tura namodia, Dirava idia lalokau henia taudia unai, be edeseniai oi davaridia diba? Keristen kongregesen lalonai. Idia gwau Dirava idia abidadama henia bona edia kara amo unai idia hamomokania memerodia bona kekenidia oi tahudia. (Iakobo 2⁠:26 itaia.) Bema unai bamona memerodia bona kekenidia oi davaridia diba lasi, Keristen taudia badadia oi tura henidia. Baibel ese David bona Ionatan edia hetura karana namona ia gwauraia; ena be Ionatan ena mauri laganidia be David ena tamana ena hegeregeredia, to idia ruaosi idia hetura heheni.​—⁠1 Samuel 18⁠:1.

Vadaeni, ta be edena bamona oi tura henia matamaia diba?

Haida edia Namo Tahua

Iesu ena hetura karana be goada herea dainai, ena turadia edia lalona be hegeregere ia dainai do idia mase. Badina be Iesu ese taunimanima edia namo ia tahua. Durudia dalana ia tahua bona ia “ura” do ia durudia. (Mataio 8⁠:3) Oibe, taunimanima be oiemu turadia ai oi halaodia totona, kara ginigunana be edia namo oi tahua.

Mero ta ladana David ia gwau, taunimanima be iena turadia ai ia halaodia diba, badina “taunimanima ia lalokau henidia bona edia namo ia tahua.” To kalatau tauna bamona taunimanima oi gado namo henidia kava lasi. Iesu be “manau tauna,” ia be kalatau tauna lasi. (Mataio 11⁠:​28, 29) Bema mai emu momokani ida taunimanima edia namo oi tahua, unai ese do ia veridia, oi do idia tura henia totona. Bema oi boiridia oi ida do umui aniani hebou totona, eiava bema oi durudia gaukara ta do idia karaia totona, unai ese emui hetura karana do ia habadaia.

Emu Kamonai Dalana

Iesu ia gwau: “Emui kamonai umui naria namonamo.” (Luka 8⁠:18) Iesu be Dirava ena hereva kamonaia karana ena namo ia gwauraia unai, to unai hereva be mai anina hetura karana havaraia dalana dekenai danu. Ta oi tura henia totona, namona be ena hereva oi kamonaia.

Bema mai eda momokani ida taunimanima edia hereva ita kamonaia, ita do idia ura henia. Namona be ‘haida edia namo do oi tahua, to oiemu namo sibona do oi tahua lasi.’ (Filipi 2⁠:⁠4) Unai ena anina ta be, oi herevalaia gwauraia gaudia mo sibodia do oi laloa lasi.

Oi Badinadia

Iesu ese ena turadia ia badinadia. “Ia lalokau henidia ia lao bona dokona.” (Ioane 13⁠:1) Tauhau ta ladana Gordon ese ena turadia be unai bamona ia kara henidia; ia gwau: “Ta ena turana korikorina ese nega dikana ai ia badinaia noho. Haida be mai edia koikoi ida lau idia gwauraia dika neganai, egu turana ese edia hereva ia koua, bona lau ese ia unai bamona lau durua danu.”

To, tura koikoidia be mai edia koikoi ida idia hadikaia heheni. Hereva Lada-isidia 18⁠:24 ia gwau: “Bamona haida idia hadikaia heheni gwauraia.” Haida ese emu turana ena ladana do idia gwauraia dika neganai oi danu do oi gwauraia dika a, eiava do oi badinaia bona edia hereva do oi hakoikoia, a?

Emui Lalona edia Mamina Umui Hahedinarai Heheni

Taunimanima ese Iesu idia lalokau henia badina iena lalona ena mamina ia hahedinaraia. Nega haida ia hahedinaraia “ia bogahisihisi,” eiava ta “ia ura henia,” eiava ena “lalona ia hisihisi bada.” Nega ta “ia tai.” Iesu ese ena lalona ena mamina be ia abidadama henia taudia dekenai ia hahedinaraia, unai kara hemaraina ia hemarai lasi.​—⁠Mataio 9⁠:36; 26⁠:38; Mareko 10⁠:21; Ioane 11⁠:35.

Momokani, emu lalona ena mamina be taunimanima haida sibodia dekenai unai bamona oi gwauraia hedinarai diba, to iboudiai dekenai oi hereva momokani diba. Ta oi diba namonamo bona oi abidadama henia neganai, emu lalona ena mamina ibounai be ia dekenai oi gwauraia hedinarai diba. Danu, ma haida oi hebogahisi henidia bona “umui ta ta dekenai durua do umui henia” be mai anina bada emui hetura karana dekenai.​—⁠1 Petero 3⁠:8.

Kara Goevadae Oi Tahua Lasi

Turana namona oi davaria neganai, emu lalona dekenai oi gwau lasi emui hetura karana do ia namo herea momokani. “Ita ibounai ese nega momo kerere ita karaia. To bema tau ta ese iena hereva dekena amo kerere ta ia karaia lasi, ia be goeva bona namo momokani.” (Iakobo 3⁠:2) Danu, hetura karana be ia vara kava diba lasi. Tauhau ta ladana Presley ia gwau: “Ena be oi be mai emu ura gau haida dekenai, to namona be emu lalona ia hegeregere oiemu turana ena ura danu do oi abia dae.”

Unai bamona oi karaia be mai ena hekwarahi, to bema ta oi lalokau henia lasi, emu lalona do ia hekwarahi bada oi be turana lasi dainai. Unai dainai namona be taunimanima oi tura henidia. (Luka 16⁠:9 itaia.) Oiemu nega oi gaukaralaia oi durudia totona. Ma haida edia hereva oi kamonaia bona edia namo oi tahua. Bena, Iesu hegeregerena, reana oi danu be taunimanima momo dekenai do oi gwau diba: “Umui be lauegu turana.”​—⁠Ioane 15⁠:15.

Inai Henanadai Herevalaia

◻ Edena bamona oi diba ta be emu turana korikorina? Edena bamona taudia be tura koikoidia?

◻ Tura be edeseniai oi davaridia diba? Namona be emu uru taudia sibodia oi tura henidia, a?

◻ Bema emu turana ta ese dika bada ia davaria, dahaka oi karaia be namo?

◻ Edena dala 4 amo taunimanima be oiemu turadia ai oi halaodia diba?

[Blurb on page 66]

“Lauegu ‘turadia’ matamatadia ese kara momo lau idia hadibalaia​—⁠kaset rikoda henaoa dalana, seke moni koikoilaia karana, mariuana ania karana, bona drag ania kava totona dina ta ta iboudiai 200 dola davaria dalana”

[Box on page 68, 69]

Lauegu Turana Lau Samania be Maoro A?

Bema oi diba emu turana ta ese drag ia ania kava, o ia sihari kava, o ia koikoi, o ia henaohenao​—⁠siahu tauna ta dekenai do oi samania, a? Memero kekeni momo be unai bamona do idia karaia lasi, badina sibodia edia taravatu hegeregerena samani herevana ta do idia gwauraia lasi.

Haida idia gari, ma haida ese “samania taudia” do idia gwauraidia garina. Ma haida ese edia turadia idia badinadia kerere. Idia laloa matahakani be gau dikana, unai dainai idia laloa bema edia turana ena kerere idia hunia unai ese do ia durua. Danu, bema idia samania, reana edia bamodia ese do idia kirikirilaidia bona do idia dadaraidia.

To mero ta ladana Lee be ia diba ena turana Chris ese kuku ia ania neganai, ia laloa namona be ta do ia hadibaia. Ia gwau: “Lauegu lalona ese lau ia botaia badina lau diba namona be ta lau hamaorolaia.” Baibel ese unai bamona sivarai ta ia gwauraia. “Iosef ena mauri laganidia be 17 neganai, ia bona iena kakadia ese mamoe idia naridia. . . . Bena Iosef ia lao iena tamana dekenai, iena kakadia ia samanidia.” (Genese 37⁠:2) Iosef ia diba, bema ia hereva lasi ena kakadia be lauma dalana ai do idia dika diba.

Kara dika ese taunimanima ia hakereredia. Ta ena turana ia kara kerere murinai, bema ia durua lasi​—⁠hegeregere, bema Baibel ena amo ia sisiba henia lasi​—⁠reana ena kara dika do ia habadaia. (Kohelete 8⁠:11) Unai dainai, bema ta ese ena turana ena kerere ia hunia, unai ese do ia durua lasi, to reana do ia hadikaia momokani.

Baibel ena hereva be inai: “Lauegu varavara taudia e, bema tau ta ia kerere neganai, umui Lauma kamonai henia taudia ese unai tau do umui hakaua lou, mai manau danu.” (Galatia 6⁠:1) Reana oi laloa oi hegeregere lasi unai bamona do oi karaia. To, emu turana ia durua diba tauna ta oi hamaoroa be namo, ani?

Unai dainai gau badana be oiemu turana dekenai oi lao bona ena kerere oi gwauraia hedinarai. (Mataio 18⁠:15 itaia.) Namona be oi gari lasi bona oi boga-auka. Oi hereva mai emu goada ida, oi diba gauna oi gwauraia namonamo, bona iena kerere oi davaria dalana oi hadibaia. (Ioane 16⁠:8 itaia.) Oi gwauhamata henia lasi ena kerere do oi hunia, badina unai bamona gwauhamata be hegeregere lasi Dirava vairanai.​—⁠Hereva Lada-isidia 28⁠:13.

Reana iena kara oi lalo-pararalaia momokani lasi. (Hereva Lada-isidia 18⁠:13) To, bema oi lalo-pararalaia momokani bona bema momokani ia kara kerere, oi gwauraia hedinarai neganai reana ena lalona do ia hegeregere. Ena hereva oi kamonaia namonamo. (Iakobo 1⁠:19) Ena hereva oi koua lasi. Ia hereva neganai oi gwau lasi, “Unai bamona oi karaia be maoro lasi!” eiava “Edena bamona unai oi karaia diba?” Oi bogaia hisi be namo.​—⁠1 Petero 3⁠:8.

Nega momo do oi hegeregere lasi do oi durua. Unai dainai namona be emu turana oi doria, ena kerere do ia gwauraia hedinarai ena tamana sinana dekenai eiava ladana namona tauna ma ta dekenai. Bema ia ura lasi unai bamona do ia karaia, oi hamaoroa, oi gwauraia negana lalonai bema ia karaia lasi, oi be ena turana korikorina dainai do oi gwauraia hedinarai idia dekenai.​—⁠Hereva Lada-isidia 17⁠:17.

Reana matamanai oiemu turana do ia lalo-parara lasi dahaka dainai unai bamona oi karaia. Reana do ia badu bona oi do ia dadaraia. To Lee ia gwau: “Lau diba ta lau hadibaia be maoro. Lauegu lalona ia namo, badina unai neganai Chris ese heduru namona ia abia. Gabeai Chris ese lau ia hamaoroa lauegu kara dainai ia badu lasi, bona unai ese lau ia hamoalea.”

Bema oiemu bamona ese oiemu boga-auka karana ia badulaia noho, ia be oiemu turana korikorina lasi. To oi diba oiemu kara amo oi hahedinaraia oi be iena turana korikorina bona Dirava oi badinaia momokani.

[Picture on page 67]

Taunimanima oi tura henidia be auka a?

[Picture on page 70]

Taunimanima oi tura henidia matamaia totona, edia namo oi tahua be mai anina bada