KAROA 7

Emai Kongrigeisen Heboudia Ai Karaia Dalana

Iehova ena Witnes taudia edia hebou ta New Zealand ai — New Zealand

Iehova ena Witnes taudia edia hebou ta Japan ai — Japan

Uganda ai mero maragina ta be Baibel ia duahia — Uganda

Lithuania ai Witnes taudia rua be Baibel idia herevalaia ena haheitalai ta idia karaia — Lithuania

Keristani taudia ginigunadia be edia hebou lalodiai kara idauidau idia karaia lasi, to ane idia abia, idia guriguri, bona Dirava ena Hereva idia duahia bona herevalaia. (1 Korinto 14:26) Hari inai negai, emai hebou ai unai bamona ai karaia danu.

Baibel amo heduru ai abia. Saturday o Sunday ai, ai be Kingdom Hall dekenai ai hebou, miniti 30 lalonai pablik tok ta ai kamonai totona. Unai tok ese ai ia hagoadaia emai mauri lalonai Baibel ai badinaia bona hari negai idia vara gaudia edia anina ai lalopararalaia totona. Tok henia tauna ese Baibel siri ta ia duahia neganai, ia ese ai ia noia emai Baibel ai unai siri ai itaia. Unai tok murinai, “Gima Kohorona” Stadi be hora tamona lalonai ai karaia. Unai stadi lalonai ai ese Gima Kohorona, stadi gauna, ena atikol ta ai herevalaia hebou. Unai stadi ese ai ia durua emai mauri lalonai Baibel ena hakaua herevadia ai badinaia totona. Tanobada ibounai, emai kongrigeisen 110,000 mai kahana be unai seim Gima Kohorona ena atikol idia stadilaia.

Emai hadibaia karana ai hanamoa. Wiki lalonai ai be hanuaboi ta lalonai hebou toi ai karaia. Hebou ginigunana be Kongrigeisen Baibel Stadi, ia be miniti 30 lalonai henanadai bona haere amo ai karaia. Unai hebou ese ai ia durua Baibel ena hakaua herevadia bona peroveta herevadia ai lalopararalaia totona. Hebou iharuana be Tiokratik Haroro Sikuli, ia be miniti 30 lalonai ai karaia. Unai hebou ena tok ginigunana ai, Baibel ena karoa rua o toi—emai kongrigeisen taudia ese edia ruma ai idia duahia vadaeni karoa—ai herevalaia. Unai murinai, sikuli ai idia vareai stiuden taudia ese tok kwadogina idia henia. Sisiba henia tauna o tisa ese emai duahiduahi bona hereva daladia ia itaia, bena heduru herevadia ia gwauraia. (1 Timoteo 4:13) Hebou ihatoina be Hesiai Hebou, ia be miniti 30 lalonai ai karaia. Unai hebou ai tok, haheitalai bona intaviu ai karaia, unai amo Baibel amo ma haida hadibaia daladia ai dibaia.

Emai hebou oi mai neganai, Baibel amo gau matamatadia do oi dibaia bona do oi moale.—Isaia 54:13.

Iehova ena Witnes taudia edia hebou dekenai dahaka gaudia do oi kamonai?
Wiki lalonai ai karaia heboudia amo, oi ura edena hebou oi mai?