Oi Goada Oi Lao Noho

Inai Baibel kosi lalonai, Iehova dekenai gau momo oi dibaia. Reana oi dibaia gaudia ese emu lalokau Dirava dekenai ia habadaia dainai, emu mauri oi gwauhamatalaia bona bapatiso oi abia vadaeni. Bema lasi, reana oi laloa noho vaira nega ai unai do oi karaia. To bapatiso murinai, oi goada oi lao noho be namo. Namona be emu hetura karana Iehova ida oi hagoadaia noho ela bona hanaihanai. Edena dala ai unai oi karaia diba?

1. Dahaka dainai emu hetura karana Iehova ida oi hagoadaia noho be namo?

Namona be oi hekwarahi emu hetura karana Iehova ida oi hagoadaia noho. Dahaka dainai? Ia amo “do ita hure oho lasi totona.” (Heberu 2:1) Dahaka ese ita do ia durua Iehova ita tomadiho henia noho totona? Hanaihanai haroro gaukara do ita karaia bona Dirava ena hesiai gaukara ma haida ita karaia goadagoada. (Filipi 3:​16 duahia.) Iehova hesiai henia karana be mauri hereadaena!—Salamo 84:10.

2. Dahaka gaudia ma haida oi karaia noho be namo?

Ena be inai Baibel kosi ena dokona dekenai oi ginidae, to emu Keristani maurina do ia doko lasi. Baibel ia gwau “kara matamata [ita] atoa” be namo. (Efeso 4:​23, 24) Dirava ena Hereva oi stadilaia bona kongrigeisen hebou oi lao noho lalonai, Iehova bona ena kara namodia ma haida do oi dibaia. Dala idauidau ai emu mauri lalonai iena kara oi tohotohoa. Iehova hamoalea totona emu kara oi haidaua noho be namo.

3. Oi goada oi lao totona Iehova ese edena dala ai oi do ia durua?

Baibel ia gwau: “[Dirava] ese emui treinini do ia hagugurua. . . . Bona ia ese umui do ia hagoadaia, unai amo emui abidadama be do ia goada, bona umui do ia haginia goada.” (1 Petero 5:​10) Ita ibounai be hahetoho ita davaria. To Iehova ese ita dekenai unai hahetoho dadaraia daladia ia hadibaia. (Salamo 139:​23, 24) Ia gwauhamata oi dekenai ura bona goada do ia henia, unai amo mai abidadama ida ia oi hesiai henia diba.—Filipi 2:​13 duahia.

DIBA MA HAIDA ABIA

4. Emu Tura korikorina ida oi herevahereva noho

Guriguri bona Baibel stadi karana ese oi idia durua Iehova ena turana ai oi lao totona. Edena dala ai unai gaudia ese oi idia durua diba emu hetura karana Dirava ida oi hagoadaia noho totona?

Salamo 62:8 duahia, bena inai henanadai herevalaia:

• Emu hetura karana Iehova ida ia goada totona, edena dala ai emu guriguri dalana oi hanamoa diba?

Salamo 1:2 bona futnout duahia, bena inai henanadai herevalaia:

• Emu hetura karana Iehova ida ia goada totona, edena dala ai emu Baibel duahiduahi karana oi hanamoa diba?

Edena dala ai sibona emu stadi karana amo namo oi davaria diba? Dala haida oi diba totona, VIDIO itaia, bona henanadai herevalaia.

VIDIO: Sibona Emu Stadi Karana Oi Hanamoa (5:​22)

• Vidio ai edena dala oi gaukaralaia diba?

• Baibel ai oi ura dahaka gauna oi stadilaia?

5. Tahua gaudia oi atoa

Iehova ena hesiai gaukara lalonai tahua gaudia oi atoa ese oi do idia durua oi goada oi lao totona. VIDIO itaia, bona henanadai herevalaia.

VIDIO: Mauri Dala Namo Hereana (3:​31)

• Inai vidio ai, Cameron be tahua gaudia ia atoa dainai dahaka hahenamo ia davaria?

Ita ibounai be tano ma ta dekenai ita haroro diba lasi. To, ita hagugurua tahua gaudia ita atoa diba. Aonega Herevadia 21:5 duahia, bona edena tahua gaudia oi ura atoa oi laloa . . .

• kongrigeisen ai.

• haroro gaukara ai.

Unai siri ena hakaua herevana ese edena dala ai oi ia durua emu tahua gauna oi hagugurua totona?

Tahua gaudia haida

• Emu guriguri dalana oi hanamoa.

• Baibel ibounai oi duahia.

• Emu kongrigeisen taudia ibounai oi diba namonamo.

• Baibel stadi ta oi davaria bona oi karaia.

• Heduru o regula painia gaukara oi karaia.

• Bema oi be tadikaka, oi hekwarahi hesiai tauna ai oi lao totona.

POINT BADANA

Emu hetura karana Iehova ida oi hagoadaia noho bona tahua gaudia oi atoa. Bena mauri do oi moalelaia hanaihanai!

Riviu

• Dahaka dainai oi diba momokani Iehova ese oi do ia durua mai abidadama ida ia oi tomadiho henia totona?

• Edena dala ai emu hetura karana Iehova ida oi hagoadaia diba?

• Edena dala ai tahua gaudia ese oi do idia durua oi goada oi lao totona?

REFERENS ITAIA

Iehova be edena kara ia laloa bada, oi karaia abidadama karana tamona sibona, eiava oiemu mauri ibounai lalonai ia oi hesiai henia karana?

Aberahamo Bamona Oi Abidadama (9:​20)

Iehova ena hesiai tauna goadana ese ena moale ia haboioa diba. Unai moale ia davaria lou dalana do oi dibaia.

Stadi Bona Laloa Dobu amo Moale Oi Davaria Lou (5:​25)

Edena dala ai tahua gaudia oi atoa bona oi hagugurua diba?

“Lauma Dalanai Tahua Gaudia Gaukaralaia Emu Havaraia Tauna Hanamoa Totona” (Gima Kohorona, July 15, 2004)

Dahaka dainai lo Keristani tauna ai oi lao be mai anina bada? Edena dala ai lo Keristani tauna ai oi lao diba?

“Ita Hekwarahi Lo Taudia ai Ita Lao, Badina Iehova Ena Dina Badana be Kahirakahira” (Gima Kohorona, May 15, 2009)