Duahia Taudia edia Henanadai
◼ Guna, Israel lalonai, lagani 49 idia ore neganai, lagani namba 50 idia gwauraia Iubile laganina. Unai be Dirava ese gau ibounai ia havaraia wikina, lagani 49,000 unai, ena murina negana ia hahegeregerea eiava lasi?
Unai namba 49 be unai nega rua lalonai idia gwauraia dainai, reana oi laloa Iubile be gau ibounai havaraia wikina, lagani 49,000 unai, ena murina negana ia hahegeregerea. To, Israel ena Iubile negana lalonai idia karaia karadia ese lagani 1,000 lalonai do idia karaia karadia ia hahegeregeredia. Unai lagani 1,000 be gau ibounai havaraia wikina ena lagani dokodia unai, wiki murinai do idia vara karadia ia hahegeregeredia lasi. Hamomokanilaia herevadia be inai:
Hamomokania hereva ginigunana be, Mose ena Taravatu lalonai ia gwau lagani namba 7 iboudiai do idia gwauraia sabati, tano ia laga-ani totona; uhe idia hadoa lasi, tano idia geia lasi bona aniani idia gogoa lasi unai lagani namba 7 lalonai. Nega 7 unai lagani 7 ena sabati idia karaia murinai (eiava lagani namba 49 murinai), lagani namba 50 idia gwauraia Iubile laganina. Unai lagani namba 50 lalonai danu, sabati idia karaia tano ia laga-ani totona. Unai neganai danu igui hesiai Heberu taudia idia ruhadia. Danu, bema ogogami dainai edia tano idia hoia, Iubile negana lalonai edia tano korikori bona edia iduhu korikori dekenai idia henia lou. Unai dainai Iubile negana be Israel taudia ia ruhadia ogogami amo bona edia tano idia abia lou.—Levitiko 25:1-46.
Hamomokania hereva iharuana be, Bible ena peroveta herevadia idia guguru ita stadilaia dainai bona hari inai nega lalonai ita mauri noho dainai ita diba Dirava ese gau ibounai ia havaraia dinadia ta ta edia lata be lagani 7,000 7,000. (Genese, karoa 1) Ita laloa Keriso ena lagani 1,000 lohia negana ia ore neganai, Dirava ena lagani 7,000 ‘laga-ani dinana’ o gau ibounai ia havaraia wikina ena ‘dina’ dokona do ia ore. (Apokalupo 20:6; Genese 2:2, 3) Vadaeni ia hedinarai, Dirava ese gau ibounai ia havaraia wikina ena lata be lagani 49,000.
Haida idia laloa, guna, Israel lalonai, lagani 49 murinai Iubile laganina idia gwauraia be Dirava ese gau ibounai ia havaraia wikina, lagani 49,000 unai, ia hahegeregerea. Idia laloa Israel ena Iubile laganina namba 50 ese gau ibounai havaraia wikina ia ore murinai do idia vara gaudia ia laulaulaidia.
To, ita laloaboio lasi Iubile laganina lalonai taunimanima be ogogami amo ia ruhadia bona edia tano idia abia lou, to unai gau ibounai havaraia wikina ena gaukara be inai tanobada havaraia totona. To taunimanima dekenai Dirava ena ura ia havaraia neganai, ita gwau lasi tanobada be igui hesiai gaukara dekenai ia vareai, to ia idau, taunimanima be igui hesiai dekenai idia vareai, bona taunimanima be lagani 49,000 inai tanobada dekenai idia noho lasi, to lagani 6,000 sibona bamona. Bible ia hahedinaraia Dirava ese Adam bona Eva ia havaradia murinai, ia dekenai idia gwau-edeede henia, bena kara dika ese ia guidia, mauri goevadae idia haboioa, bona idia mase. Roma 8:20, 21 lalonai ia gwau, Iehova Dirava ese kamonai taudia do ia ruhadia inai dika dekena amo. Unai dainai ena tomadiho korikori taudia inai tanobada dekenai ‘be do ia ruhadia dika ena bodaga dekena amo, vadaeni Dirava ena natudia edia ura kwalimu hereadaena do idia abia.’—Roma 6:23 itaia danu.
Guba maurina totona idia abia hidi orea maragi taudia edia kara dika be Pentekoste 33 C.E. negana amo ia gwauatao, bona idia ese Iubile karana idia moalelaia vadaeni, to kamonai taunimanima oredia be Keriso ena lagani 1,000 lohia negana lalonai igui hesiai amo do idia ruhadia. Unai negana Keriso ese ena boubou davana do ia gaukaralaia taunimanima hanamodia totona. Unai lagani 1,000 dokonai, taunimanima edia tauanina do idia goevadae, kara dika bona mase amo do ia ruhadia. Keriso ese taunimanima edia inai tauna dokona (mase, Adam amo ia vara gauna unai) do ia haorea, bena Basileia do ia henia lou ena Tamana dekenai, unai gau ibounai havaraia wikina ena lagani 49,000 dokonai.—1 Korinto 15:24-26.
Unai dainai, Lagani 1,000 Sabatina lalonai, kamonai taudia, tanobada dekenai idia ura noholaia taudia unai, ese Iubile dekenai idia karaia ruhaia bona tano abia lou karadia do idia davaria. Unai neganai orogami amo do ia ruhadia bona edia tano dekenai do idia noho lou. Keriso ena lohia negana lalonai unai do ia vara, “badina be Taunimanima ena Natuna be Sabati ena biaguna.”—Mataio 12:8.