Badina be Dahaka Dirava Ita Kamonai Henia?

“Iehova e, lau diba taunimanima ena dala be ia sibona lalonai lasi. Taunimanima ena raka be ia sibona ese do ia gwauraia hidi diba lasi.” ​—IEREMIA 10:23.

1. Dahaka indipendens be bese momo ese idia laloa bada?

LAGANI 200 bamona idia lao vadaeni, North America ai Britain ena teritori 13 ese ena lohia siahuna idia dadaraia, bona revareva ta ladana Declaration of Independence lalonai idia gwau indipendens idia abia gwauraia, ura-kwalimu do idia abia totona. Politik bona bisinesi ai indipendens idia abia besedia ese unai amo namo bada idia davaria diba. Vanegai Eastern Europe tanodia haida ese politikol indipendens idia abia, to madi unai ese hekwakwanai badadia ia havaradia.

2, 3. (a) Edena indipendens be dika? (b) Ena dika be edena negai ia hedinarai matamaia?

² Ena be taunimanima ese indipendens idia ura henia, to indipendens dalana ta be dika. Dalana be inai: Indipendens abia totona idia ese ia karadia Diravana, Iehova, ena lohia siahuna idia dadaraia. Unai amo dika idia davaria, badina be, Ieremia ena hereva ese idia hahedinaraia hegeregerena, Dirava ia ura lasi taunimanima ese ia do idia rakatania bona sibodia edia raka dalana do idia karaia. Ia ese ia karadia ia do idia kamonai henia totona.

³ Iehova ese taunimanima ginigunana ia henia haheganina amo unai ia hamomokania; ia gwau: “Uma gabu dekenai gini au ibounai edia huahua oi ania diba, idia be taravatu lasi, to kara namona bona kara dikana hadibaia au ena huahua oi ania lasi, badina be inai huahua oi ania dina dekenai do oi mase momokani.” (Genese 2:​16, 17) Adam ese Dirava ia kamonai henia lasi dainai, kara dika, hisihisi, bona mase ese ia bona ena bese taudia iboudiai idia abidia.​—Genese 3:19; Roma 5:12.

4, 5. (a) Taunimanima ese Dirava idia kamonai henia lasi dainai dahaka ia vara? (b) Dahaka hahemaoro amo idia roho mauri diba lasi?

⁴ Dirava idia kamonai henia lasi taudia idia aonega lasi bona edia kara be kerere. Idia kamonai henia lasi dainai, taravatu idia utua, idia dagedage, bona idia sihari kava bena unai dainai pokese goreredia idia abidia. Hari inai negai memero momo be raskol taudia ai idia lao, badina be Iehova bona edia tamadia sinadia idia kamonai henidia lasi bona gavamani ena taravatu idia badinaia lasi dainai, ani? Taunimanima momo edia gwau-edeede toana be edia dabua dikadia bona edia hereva mirodia ai ia hedinarai.

⁵ To Dirava ena hahemaoro amo idia roho mauri diba lasi: “Umui laloa kerere lasi, Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia. Bema tauanina ena ura ia hadoa neganai ia be mase do ia abia.”​—Galatia 6:​7, 8.

6, 7. Badina be dahaka idia kamonai lasi, bona daidia edia sivarai ese unai idia hamomokania?

⁶ Badina be dahaka idia kamonai lasi? Badina be sibodia edia namo idia tahua bona idia hekokoroku. Unai hegeregerena, Eva, hahine ginigunana, be gaigai ese ia koia diba, bena au huahuana ia ania. Bema ena lalona ia manau, ia ura lasi Dirava hegeregerena ai do ia lao bona sibona ena lalona do ia hadaia dahaka be namo bona dahaka be dika. Bema sibona ena ura ia tahua lasi, ia ura lasi Iehova Dirava ese ia taravatulaia gauna do ia ania.​—Genese 2:​16, 17.

⁷ Nega daudau lasi murinai, Kain ia hekokoroku bona sibona ena namo ia tahua dainai, iena tadina Abel ia alaia mase. Danu, aneru haida be sibodia edia namo idia tahua dainai, idia gwau-edeede, edia gabu korikori idia rakatania, bona tauanina idia karadia sibodia edia, sihari karadia do idia moalelaidia totona. Nimrod ia hekokoroku bona sibona ena namo ia tahua, bona unai nega amo tanobada lohiadia momo be unai bamona idia kara.​—Genese 3:​6, 7; 4:​6-8; 1 Ioane 3:12; Iuda 6.

Dirava Ita Kamonai Henia be Maoro

⁸ Dirava ita kamonai henia be maoro, badina be ia be guba bona tanobada edia Pavapava Badana. Lohia siahuna ibounai be ia lalonai. Ia be eda Diadi, eda Taravatu Henia Tauna, bona eda Pavapava. (Isaia 33:22) “Ia ese ia karaia gaudia ibounai be nega ibounai ia itaia. Idia be hanaihanai iena matana vairanai idia noho. Bona Dirava ese danu iseda kara do ia kota henia.”​—Heberu 4:13.

8-11. Dahaka dainai Dirava ita kamonai henia be maoro?

⁹ Danu, ia be siahu ibounai Diravana, unai dainai ta ese ena siahu ia koua diba lasi. Iboudiai ese idia kamonai henia be namo. Idia gwau-edeede henia taudia iboudiai ese dika do idia davaria, Farao ese gunaguna ia davaria bona Satana Diabolo ese do ia davaria hegeregerena.​—Salamo 136:​1, 11-15; Apokalupo 11:17; 20:​10, 14.

¹⁰ Aneru bona taunimanima ese Dirava idia kamonai henia be maoro, badina be ia karadia iena hesiai do idia lao henia totona. Apokalupo 4:11 ia gwau: “[Iehova], aiemai Dirava e, oi be hegeregere momokani vadaeni, taunimanima ibounai ese hairai bona mataurai oi do idia henia, bona oiemu siahu henunai do idia noho. Badina be gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.” Ia be Uro Karaia Tauna Badana; taunimanima be uro bamona ia karadia, iena ura do idia karaia totona.​—Isaia 29:16; 64:8.

¹¹ Dirava ena aonega be bada herea dainai, eda namo havaraia dalana hereana be ia diba. (Roma 11:33) Iena taravatu ese ita ‘idia hanamoa.’ (Deuteronomi 10:​12, 13) “Dirava be lalokau,” unai dainai ia ura ita do ia hanamoa bada. Momokani, ita ia karaia Diravana, Iehova, ita kamonai henia be mai badina korikoridia momo!​—1 Ioane 4:8.

Iesu Keriso, Dirava Ia Kamonai Henia Goevagoeva Tauna

¹² Momokani, Iehova sibona ese ia havaraia Natuna tamona, Iesu Keriso, ese Dirava kamonai henia dalana goevadaena na ita ia haheitalaia. “Ena be ia be Dirava ena oromana hegeregerena ai ia noho, to ia laloa lasi dagi do ia dabaia ia be Dirava ida do idia hegeregere totona. Lasi, to iena dagi badana ia negea, hesiai tauna ena oromana ia abia, bona taunimanima edia oromana ai ia vara. Ma iena oromana be taunimanima edia oromana hegeregerena neganai, ia be sibona ia hamanaua [lou] bona Dirava ia kamonai henia ela bona mase, oibe, hahisia auna ena mase.” (Filipi 2:​6-8, NW) Tanobada ai ia noho neganai, Iesu ia gwau loulou ia be sibona gau ta ia karaia lasi; nega ibounai ia ese ena Tamana guba ai ia noho ia kamonai henia.

12, 13. (a) Edena bamona Iesu Keriso ese ia hahedinaraia Dirava ia kamonai henia? (b) Dahaka hereva amo unai ia hahedinaraia?

¹³ Iesu be Ioane 5:​19, 30 ai ia gwau: “Natuna be sibona kara ta do ia karaia diba lasi, to ia ese Tamana ena kara do ia itaia, vadaeni unai kara sibona do ia karaia. Tamana ese ia karaia noho karadia be Natuna ese danu ia karaia noho. Lau be sibona gau ta do lau karaia kava lasi. Dirava ese lau ia hamaoroa hegeregerena kota henia gaukara lau karaia, bona egu kota henia gaukara be maoromaoro, badina lau sibona egu ura lau karaia lasi, to Dirava ena ura sibona lau karaia.” Unai hegeregerena, hanuaboi ta ia guriguri loulou, ia gwau: “Lauegu ura lasi, oiemu ura sibona.”​—Mataio 26:​39, 42, 44; ma danu Ioane 7:28; 8:​28, 42 itadia.

Idau Negai Dirava Idia Kamonai Henia Taudia

¹⁴ Dirava kamonai henia taudia ginigunadia ta be Noa. Iena kamonai be dala toi ai ia hahedinaraia. Ginigunana be, ia be kara maoromaoro tauna, ena uru ai ia kara namo guguru, bona ia be Dirava ida idia raka hebou. (Genese 6:9) Iharuana be, “ia karaia, Dirava ena hereva ibounai hegeregere.” (Genese 6:22) Ihatoina be, “kara maoromaoro ia harorolaia,” bona Utu-utu Badana danu.​—2 Petero 2:5.

15, 16. (a) Abraham ese Dirava badinaia namonamo karana edena bamona ia hahedinaraia? (b) Sara ese ena kamonai edena bamona ia hahedinaraia?

¹⁵ Abraham danu be Dirava kamonai henia tauna hereana ta. Dirava ese ia hagania, ia gwau: “Emu tano . . . oi rakatania,” bena unai hahegani ia badinaia. (Genese 12:1) Iena ruma namona, ladana bada hanuana Uru ai ia noho, be ia rakatania, bena idau tanona ta ai ia loaloa, lagani 100. Ena kamonai ia hahedinaraia dalana badana be inai: Dirava ese ia tohoa neganai, ena lalona ia hegeregere ena natuna Isaak do ia bouboulaia.​—Genese 22:​1-12.

¹⁶ Abraham ena adavana Sara danu ese Dirava ia kamonai henia namonamo. Idau tanona ai idia loaloa hanaihanai dainai ia hekwarahi momo, to unai ia maumauraia sivaraina be lasi. Ena be nega rua Abraham ese pavapava ia hamaorodia Sara be iena taihuna bena unai dainai idia adavaia gwauraia, to unai nega ruaosi ai Abraham ena ura hegeregerena ia karaia. Iena kamonai ia hahedinaraia dalana ma ta be inai: Sibona ena lalona ai iena adavana, Abraham, be “egu lohia” ia gwauraia, unai amo ia hahedinaraia iena lalohadai korikorina be unai.​—Genese 12:​11-20; 18:​12, NW; 20:​2-18; 1 Petero 3:6.

17. Dahaka dainai ita gwau Isaak be Dirava kamonai henia tauna?

¹⁷ Abraham ena natuna Isaak danu ese Dirava ia kamonai henia. Iuda sene herevadia ese idia hahedinaraia, Iehova ese ena tamana, Abraham, ia hagania do ia bouboulaia neganai, Isaak ena mauri laganidia be 25 bamona. Bema ia ura neganai, ia ese ena tamana ia koua diba, badina be ia buruka momokani dainai. To lasi. Ena be Isaak ia henanadai badina be boubou mamoena be lasi, to ena tamana ese ia guia bona boubou patana latanai ia atoa neganai, unai kara ia abia dae mai ena manau ida; ena tamana ese unai bamona ia guia, kaia amo do ia gwadaia neganai kara ta do ia karaia kava garina.​—Genese 22:​7-9.

18. Mose ese edena bamona ia hahedinaraia Dirava ia kamonai henia namonamo?

¹⁸ Mose danu ese Dirava kamonai henia karana ita ia haheitalaia. Baibel ese unai ia hahedinaraia, ia gwau: “Tanobada taudia iboudiai bogaragidiai ia mo sibona manau herea.” (Numera 12:3) Ena be gwau-edeede besena taudia milion rua o toi be tano gagaena ai ia gunalaidia, to lagani 40 lalodiai Iehova ena hahegani ia badinadia mai ena kamonai ida. Baibel ia gwau: “Iehova ese ia hagania hegeregerena, unai bamona mo ia kara.”​—Esodo 40:16.

19. Iobu ese dahaka hereva amo ia hahedinaraia Iehova ia kamonai henia?

¹⁹ Iobu danu ese Dirava kamonai henia karana ita ia haheitalaia namo herea. Iehova ese Satana ia koua lasi dainai, Iobu ena kohu ibounai ia haboioa, ena natuna ia hamasedia, bena “iohururu dika hereadia amo ia hahisia, ena aena lalona amo ela bona ena kwarana tubuana.” Bena Iobu ena adavana ese ia hereva henia, ia gwau: “Oi be emu lalo-maoromaoro ai oi do haheauka noho a? Iehova oi gwau dika henia bena oi mase!” To Iobu ia hahedinaraia Dirava ia kamonai henia; ia haere, ia gwau: “Oi be kavakava hahinedia edia hereva hegeregeredia ai oi hereva. Be, namo mo Dirava ena imana amo do ita abia bona dika do ita abia lasi a?” (Iobu 2:​7-10) Unai lalohadai be ma ia hahedinaraia lou, ia gwau: “Ena be lau do ia alaia mase, to do lau naria ani?” (Iobu 13:15) Ena be Iobu be sibona ena maoro hamomokania karana ia laloa bada, to dokonai Iehova ese ena turana koikoidia ta ia hereva henia, ia gwau: “Lauegu badu ia siahu, oi bona emu turadia ruaosi latadiai, badina be lau umui herevalaia maoro lasi, lauegu hesiai tauna Iobu ia hereva hegeregerena.”​—Iobu 42:7.

20. Edena dala ai David ese ia hahedinaraia Dirava ia kamonai henia?

²⁰ Ena sivarai be Heberu Revarevadia lalodiai idia torea tauna ma ta be David. King Saulo ese ia tahua, animal ta ia labana henia bamona, neganai, nega rua David ese hamasea dalana ia davaria. To, David ese Dirava ia kamonai henia dainai, ia hamasea lasi. Ia gwau: “Inai kara be egu lohia, Iehova ese ia horoa tauna, do lau kara henia lasi, egu imana be ia hadikaia totona do lau toia lasi, badina be ia be Iehova ese ia horoa tauna.” (1 Samuel 24:6; ma danu 1 Samuel 26:​9-11 itaia.) Unai hegeregerena, ia kara kerere o ia kara dika dainai idia gwau henia negadiai, unai ia abia dae; unai amo ia hahedinaraia Dirava ia kamonai henia.​—2 Samuel 12:13; 24:17; 1 Sisiga 15:13.

Paulo ena Kamonai

²¹ Keristen Greek Revarevadia lalodiai aposetolo Paulo sivaraina idia torea. Dirava ia kamonai henia, badina be ena Biaguna Iesu Keriso ena kamonai ia tohotohoa, ena hesiai gaukarana ibounai lalonai ena kara ia tohotohodia hegeregerena. (1 Korinto 11:1) Ena be Iehova Dirava ese ia hagaukaraia bada bona aposetolo oredia ia hagaukaradia maragi, to Paulo be nega ta sibona ena lalohadai hegeregerena ia kara lasi. Haida ese idau bese taudia peritomedia karana idia hepapahuahulaia neganai, Antioka ena ekalesia taudia “idia gwau Paulo bona Banaba bona varavara haida dohore idia lao Ierusalema. Unuseni aposetolo bona kwarana taudia dekenai inai hadibaia hereva do idia herevalaia.”​—Kara 15:2.

21-23. Edena negadiai Paulo ia hahedinaraia Dirava ia kamonai henia?

²² Paulo ese ena misinari gaukarana inai bamona ia gwauraia: “Iakobo bona Petero bona Ioane, edia toana be ekalesia gunalaia taudia. Idia itaia momokani Dirava ese inai gaukara badana lau dekenai ia henia vadaeni. Unai dainai Banaba bona lau, aiemai imana idia abia, varavara hanamoa toana. Vadaeni ai laloa tamona, Banaba bona lau be Iuda lasi taudia huanai do ai gaukara, to idia be Iuda taudia huanai do idia gaukara.” (Galatia 2:9) Paulo be sibona gau ta ia karaia lasi, to siahu taudia edia hereva ia tahua guna.

²³ Unai hegeregerena, ma nega ta ai Paulo ese Ierusalem ena elda taudia edia sisiba ia abia dae, bena unai sisiba hegeregerena ia lao dubu bona unuseniai Taravatu karadia ia karaia, iboudiai do idia itaia ia ese Mose ena Taravatu ia negea lasi. Unai bamona ia karaia neganai, hutuma ese idia alaia mase gwauraia. Anina be unai elda taudia ia kamonai henidia be kerere a? Lasi, badina be Kara 23:11 ia gwau: “Hanuaboi lalonai Lohiabada be Paulo badinai ia gini, ia gwau, ‘Oi goada noho, badina Ierusalema dekenai lauegu hereva oi gwauraia hegeregere, Roma dekenai danu do oi gwauraia.’ ”

24. Dahaka dahaka be stadi gabena lalonai do ita herevalaidia?

²⁴ Momokani, Baibel ese ita ia hadibaia goevagoeva Dirava do ita kamonai henia be namo, bona idia kamonai henia taudia sivaraidia danu ia gwauraidia. Stadi herevana gabena lalonai, Iehova kamonai henia daladia idauidau do ita herevalaidia, bona unai kara ai ita idia durua gaudia, bona ena davana namodia danu.

Edena Bamona Oi Haere?

◻ Edena indipendens be dika?

◻ Badina be dahaka haida idia kamonai lasi?

◻ Dahaka dainai Iehova ita kamonai henia be maoro?

◻ Dirava idia kamonai henia namonamo taudia, sivaraidia be Baibel lalonai idia toredia taudia, be daika daika?

14. Edena dala ai Noa ia hahedinaraia Dirava ia kamonai henia?

[Picture on page 10]

Nimrod, Utu-utu Badana murinai Dirava ia gwau-edeede henia lohiana ginigunana

[Picture on page 13]

Noa, Dirava kamonai henia goevagoeva tauna.​—Genese 6:​14, 22