Dirava Ita Kamonai Henia Daladia
“Unai dainai Dirava ena ura do umui karaia.”—IAKOBO 4:7.
1. Ita tomadiho henia Diravana be edena bamona Diravana?
IEHOVA be Dirava hereadaena! Ta be ia ida ia hegeregere lasi! Ia be Atai Herea Diravana, lohia siahuna momokanina ibounai be ia lalonai. Ia be matamana lasi bona dokona lasi, bona ena hairai be bada herea dainai, taunimanima ta ese ena vairana bema ia itaia neganai do ia mauri diba lasi. (Esodo 33:20; Roma 16:26) Ena aonega bona ena siahu be dokona lasi, ena hahemaoro be maoromaoro momokani, bona ia be lalokau. Ia ese ita ia karaia, ia be eda Diadi, eda Taravatu Henia Tauna, bona eda Pavapava. Harihari gaudia namodia iboudiai bona herahia gaudia goevadaedia iboudiai be iena amo idia mai.—Salamo 100:3; Isaia 33:22; Iakobo 1:17.
2. Dirava ita kamonai henia anina be dahaka?
2 Unai dainai ita kamonai henia be maoro. Ita ese Iehova Dirava ita itaia diba lasi, unai dainai ia ita kamonai henia anina be iseda lalo-maoromaoro ita badinaia, Dirava ena orea ita badinaia, gavamani ita matauraidia, bona kwara dagidia famili lalonai ita matauraidia danu.
Lalo-Goevagoeva Dogoatao
3 Iseda lalodia do idia goeva noho totona, namona be taravatu idaudia, taunimanima ese ita idia fosia diba lasi do ita badinadia totona taravatudia, be do ita badinadia. Inai hegeregerena: Taravatu namba 10, mama taravatuna unai, be gavamani ese taunimanima idia fosidia diba lasi do idia badinaia totona. Unai taravatu amo, Iehova Dirava ese Israel taudia na maduna ia henidia, ta ta ena lalohadai ena lalohadai do idia naridia namonamo, edia lalodia do idia goevagoeva noho totona. (Esodo 20:17) Unai hegeregerena, ena be kota taudia ese mama karadia idia hahemaoro henidia diba lasi, to mama taudia ese Dirava ena Basileia do idia abia diba lasi. (Galatia 5:19-21) Iseda lalodia do idia goevagoeva noho totona, unai kara amo do ita siri be namo.
4. Iseda lalodia do idia goeva noho totona, edena Baibel haheganidia do ita badinadia be namo?
4 Oibe, Baibel ena hahegani do ita badinadia be namo. Tau ta ese Iesu Keriso ia nanadaia, Mose ena Taravatu ai hahegani hereana be edena, bena Iesu ia haere, ia gwau: “Iehova, emu Dirava, do oi lalokau henia mai emu lalona ibounai, mai emu mauri ibounai, bona mai emu darana ibounai.” Ma ia gwau: “Emu dekena tauna do oi lalokau henia, oi sibona oi lalokau henia bamona.” (Mataio 22:36-40, NW) Inai hahegani iharuana ena anina be Iesu ese inai bamona ia gwauraia: “Gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.”—Mataio 7:12.
5. Edena bamona do ita kara be namo, Iehova Dirava do ita badinaia noho totona?
5 Namona be do ita kara maoromaoro bona kara dika amo do ita siri; taunimanima ese ita idia itaia eiava lasi be herevana, bona eda kara dainai panisi do ita abia eiava lasi be herevana. Namona be iseda Tamana gubai ia noho do ita badinaia noho, bona aposetolo Paulo ese Heberu 4:13 ai ia torea herevana do ita laloa noho: “Gau ta Dirava dekena amo ita hunia diba lasi. Ia ese ia karaia gaudia ibounai be nega ibounai ia itaia. Idia be hanaihanai iena matana vairanai idia noho. Bona Dirava ese danu iseda kara do ia kota henia.” Bema kara maoromaoro ita karaia hanaihanai, unai ese ita do ia durua, Diabolo ena tiriki karadia, tanobada ena lalo-ani, bona siboda eda ura tahua lalohadaina do ita dadaraidia totona.—Efeso 6:11 itaia.
Dirava ena Orea Kamonai Henia
6 Dirava ese ita ia kahua nege lasi, ta ta ena lalohadai ena laohadai hegeregeredia Baibel ena hahegani do ita badinadia toho totona. Matamana negana amo Dirava ese taunimanima na iena gwaukau taudia ai ia halaodia. Adam be Dirava ena gwaukau tauna Eva enai. Dirava ese Eva ia do karaia lasi neganai, ia ese au huahuana taravatuna na Adam ia hamaorolaia guna. Dirava ena ura Eva enai be Adam ese ia hamaorolaia. (Genese 2:16-23) Noa be Dirava ena peroveta tauna, sibona ena famili enai bona tanobada taudia ediai. (Genese 6:13; 2 Petero 2:5) Abraham be Dirava ena gwaukau tauna iena famili enai. (Genese 18:19) Dirava ena peroveta tauna bona ena gwaukau tauna Israel besena enai be Mose. (Esodo 3:15, 16; 19:3, 7) Ia murina amo, Dirava ese peroveta taudia, hahelaga taudia, bona pavapava edia amo iena ura be ena bese taudia ia hadibadia.
7 Mesia, Iesu Keriso, ia mai neganai, Dirava ese ia bona ena aposetolo bona ena hahediba taudia, ia idia bamoa taudia, be Iena gwaukau taudia ai ia halaodia. Gabeai, Iesu ena orea taudia mai edia kamonai, horoa taudia, be “hesiai tauna mai ena kamonai bona mai ena kara maoromaoro” ai idia lao, Baibel ena hahegani badinadia daladia be Iehova ena orea taudia idia hadibalaidia. Dirava kamonai henia karana anina be ia ese ia gaukaralaia oreana matauraia karana.—Mataio 24:45-47; Efeso 4:11-14.
7, 8. (a) Mesia ia mai neganai, Dirava ese daidia na Iena gwaukau taudia ai ia halaodia? (b) Witness taudia ese Dirava idia kamonai henia dainai, edena bamona idia karaia?
8 Hari inai negai “hesiai tauna mai ena kamonai bona mai ena kara maoromaoro” be Iehova ena Witness taudia ida idia gaukara hebou, bona Witness taudia edia Hakaua Oreana be iena ladanai idia hereva. Unai orea ese naria taudia ia duanaidia—elda taudia bona sekit naria taudia bona distrik naria taudia danu—gaukara do idia gunalaia totona. Witness taudia ese Dirava idia kamonai henia dainai, namona be unai naria taudia danu idia kamonai henidia, Heberu 13:17 hegeregerena: “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho nega ibounai. Gabeai idia ese Dirava ena vairanai edia gaukara ibounai ena anina do idia gwauraia hedinarai.”
Matahakani Abia Dae
9 Dirava ita kamonai henia, anina ta be naria taudia edia matahakani ita abia dae. Bema ita be siboda eda kerere ita hamaoromaorodia lasi neganai, iseda kongregesen ena elda taudia ese ita do idia sisiba henia bona iseda matana do idia hakania be namo reana. Unai matahakani do ita abia dae be aonega dalana.—Hereva Lada-isidia 12:15; 19:20.
10 Namona be elda taudia ese haida do idia matahakani henidia sibona lasi, to namona be Dirava badinaia karana do idia haheitalaidia danu. Galatia 6:1 hegeregerena, namona be dala namona ai do idia sisiba sibona lasi, to kara namo toana do idia hahedinaraia danu: “Bema tau ta ia kerere neganai, umui Lauma kamonai henia taudia ese unai tau do umui hakaua lou, mai manau danu. To oi naria namonamo, hedibagani ese oi danu do ia koia garina.” Namona be elda tauna ena sisiba be ena kara hegeregerena. (2 Timoteo 2:24, 25; Tito 1:9) Namona be elda taudia be nega ibounai do idia naria namonamo, do idia hereva auka garina. Namona be nega ibounai do idia hebogahisi bona do idia manau, to Dirava ena Hereva ena hahegani do idia badinadia goadagoada danu be namo. Namona be do idia kamonai namonamo bona lalo-metau taudia do idia hagoadadia.—Mataio 11:28-30 itaia.
Gavamani Kamonai Henia
11 Dirava ita kamonai henia anina ma ta be gavamani ita kamonai henia. “Taunimanima ibounai ese gavamani do idia kamonai henia. Badina be gavamani ta ia noho diba lasi bema Dirava ia ura lasi neganai. Gavamani ena siahu be Dirava ese ia henia.” (Roma 13:1) Unai dainai namona be trafik taravatudia do ita badinadia bona takisi monina do ita henia mai eda momokani ida be namo.—Roma 13:7.
12. Kaisara ita kamonai henia karana be mai ena hetoana; unai ena anina be dahaka?
12 To, momokani, Kaisara kamonai henia karana be mai ena hetoana. Namona be nega ibounai Iesu ena hereva do ita laloatao: “Kaisara ena gau, Kaisara dekenai umui henia, to Dirava ena gau be Dirava dekenai umui henia.” (Mataio 22:21) Oxford NIV Scofield Study Bible lalonai, Roma 13:1 henunai idia torea herevana be inai: “To taravatu dikadia o Keristen dalana hadikaia taravatudia do idia badinadia lasi. Unai bamona taravatudia ediai, Dirava do idia kamonai henia be namo, taunimanima do idia kamonai henia be dika (Kara 5:29; ma danu Dan. 3:16-18; 6:10 itaia).”
Famili Lalonai Dirava Kamonai Henia
13 Famili lalonai, tau be ena adavana bona ena natuna edia kwarana. Unai dainai hahine ese Efeso 5:22, 23 ena sisiba do idia badinaia be namo: “Hahine e, emui adavana do umui kamonai henia, Lohiabada umui kamonai henia hegeregerena. Badina tau be iena adavana ena kwarana, Keriso be ekalesia ena kwarana bamona.”a Memero kekeni ese tamadia sinadia do idia kamonai henidia be namo, Paulo be Efeso 6:1-3 (NW) ai ia hereva bamona: “Memero kekeni e, emui tamadia bona sinadia do umui kamonai henidia, badina be unai be maoro. ‘Emui tamadia bona sinadia do umui matauraidia,’ inai be hahegani mai gwauhamatana ginigunana, ‘bena do umui namo, do umui mauri daudau tanobada ai.’ ”
14. Famili kwaradia be edena bamona do idia karaia be namo?
14 Bema tatau be edia kara ai idia hahedinaraia Dirava idia kamonai henia, edia adavadia bona edia natudia ese do idia kamonai henidia be auka lasi. Namona be Baibel ena hahegani do idia badinadia: “Tatau ese edia adavadia do idia lalokau henidia, sibodia edia tauanidia idia lalokau henidia hegeregerena. Ena adavana ia lalokau henia tauna ese sibona ia lalokau henia. Badina be tau ta ese sibona ena tauanina ia inai henia lasi, to ia ubua bona ia naria, Keriso ese ekalesia ia ubua bona ia naria hegeregerena.” “Tama e, emui natudia do umui habadudia lasi, to Iehova ena hahediba bona matahakani ai do umui naridia.”—Efeso 5:28, 29; 6:4, NW.
Ita Do Idia Durua Gaudia
15 Dahaka ese ita do idia durua, unai kara idauidau ai Dirava do ita kamonai henia totona? Gau ginigunana be lalokau—Iehova bona ita ataiai ia atodia taudia ita lalokau henidia lalokauna unai. “Dirava ita lalokau henia ena anina be inai: Dirava ena taravatu do ita badinaia.” (1 Ioane 5:3) Iesu ese unai ia hamomokania; Ioane 14:15 ai ia gwau: “Bema lau dekenai umui lalokau henia, be lauegu taravatu do umui badinaia.” Momokani, lalokau—lauma ena huahuana hereadaena—ese ita do ia durua, Iehova be ita dainai ia karaia karadia iboudiai do ita lalodia bada totona, bona unai amo ita do ia durua, do ita kamonai henia totona.—Galatia 5:22.
16. Dirava gari henia karana ese ita edena bamona do ia durua, do ita kamonai henia totona?
16 Iharuana be Dirava gari henia karana. Unai ese ita do ia durua, badina be ena anina be “dika inai henia.” (Hereva Lada-isidia 8:13) Momokani, bema ita gari Iehova do ita habadua garina, do ita manoka lasi taunimanima ita gari henidia dainai. Unai ese danu ita do ia durua, Dirava ena oda do ita badinadia, herevana dahaka hekwarahi do idia vara. Ita do ia durua, hedibagani bona ura dikadia do ita dadaraidia totona. Abraham ese Iehova ia gari henia dainai, ena natuna lalokauna Isaak ia bouboulaia toho, bona Iosef ia gari Iehova do ia habadua garina, unai dainai Potifara ena adavana ena lalo-ani herevadia ia dadaraidia diba.—Genese 22:12; 39:9.
17 Heduru gauna ihatoina be Iehova abidadama henia karana. Abidadama ese ita do ia durua, Hereva Lada-isidia 3:5, 6 ena sisiba do ita badinaia totona: “Iehova oi abidadama henia mai emu lalona ibounai ida, bona oi sibomu emu lalo-parara oi abidadama henia lasi. Emu dala iboudiai lalodiai ia oi laloa, bena ia ese emu dala do ia hamaoromaorodia.” Bema toana be haida ese ita idia hahisia kerere o ita be idau bese taudia dainai ita idia dadaraia, abidadama ese ita do ia durua bada. Reana haida idia laloa kongregesen ena hesiai taudia o elda taudia ai idia halaodia lasi be kerere. Bema ita be mai eda abidadama, Iehova do ita naria mai eda haheauka ida, ela bona iena nega korikorina ai kerere do ia hamaoromaorodia.—Rohe-ahu Bukana 3:26.
18. Dirava do ita kamonai henia totona ita do ia durua gauna ihahanina be dahaka?
18 Heduru gauna ihahanina be manau. Manau tauna ese Dirava ia kamonai henia be haraga, badina be ena lalo-manau ai ia laloa ‘haida be idia namo herea, to ia be namo lasi.’ Ena lalona ia hegeregere “maragi momokani tauna” bamona do ia kara. (Filipi 2:2-4; Luka 9:48) To hekokoroku tauna ia ura lasi unai bamona do ia kara. Ia ura haida ese ia do idia hanamoa, ia ura lasi do idia sisiba henia.
19. Watch Tower Society ena presiden gunana ta ese manau edena bamona ia hahedinaraia?
19 Joseph Rutherford, Watch Tower Bible and Tract Society ena presiden iharuana, be manau ai bona Dirava kamonai henia karana ai, eda tohotohoa tauna ai ia lao. Hitler ese Iehova ena Witness taudia edia hebou karana bona edia haroro gaukarana Germany ai ia taravatudia neganai, idia tore henia, idia nanadaia edena bamona do idia kara be namo. Unai be Betele taudia ia hamaorolaidia, ma ia gwau ia diba lasi Germany tadikakadia edena bamona do ia haere henidia. Ia gwau, bema idia ta be haere maorona ia hadibalaia diba, do ia kamonaia mai ena moale ida. Iena lalona ia manau momokani!b
Dirava Kamonai Henia Karana
ena Davana Namodia
20 Vadaeni, Dirava kamonai henia karana ena davana namodia be dahaka dahaka? Gaudia be inai: Sibodia edia ura hegeregeredia idia kara taudia edia lalo-hekwarahi amo ita roho mauri. Iehova ese ita ia lalo-namo henia. Iseda Keristen tadikaka edia hebamo namo hereana ita moalelaia. Gavamani edia taravatu ita badinadia dainai ita idia panisia lasi. Ita tama sina bona natu be iseda famili nohona ita moalelaia. Ma danu, Dirava ita kamonai henia noho dainai, ita ese Hereva Lada-isidia 27:11 ai ia gwauraia sisibana ita badinaia: “Natugu e, oi aonega, lauegu lalona oi hamoalea, lau ia gwau henia tauna do lau haere henia totona.”
[Footnotes]
a Pioneer tauna ta ese ena adavana ena hemataurai bona ena heduru ia heagilaia pioneer tauhauna ta dekenai. Tauhau ia laloa namona be ena turana ese ena adavana ena kara namodia ma haida danu do ia heagilaidia be namo. To gabeamo, ia danu ia headava murinai, ena lalona ia parara gau badana be hahine ese ena adavana ia durua mai ena lalokau ida, ruaosi do idia moale totona.
b Ia guriguri momo bona Dirava ena Hereva ia tahua momo murinai, Joseph Rutherford ena lalona ia parara tadikaka Germany ai be kara ta do ia haganilaidia lasi be namo. Dirava ena Hereva idia abia vadaeni; unai ese edia hebou karana bona edia haroro gaukarana ia haganilaidia goevagoeva vadaeni. Unai dainai unai nega amo idia kara hehuni, to Iehova ena hahegani hegeregeredia idia hebou loulou noho bona iena ladana bona ena Basileia idia harorolaia noho.
Riviu Henanadaidia
◻ Dirava ese daika daika na iena gwaukau taudia ai ia halaodia, bona ena hesiai taudia ese edena bamona idia kara henidia be namo?
◻ Daidia do ita kamonai henidia be namo?
◻ Dahaka ese ita do idia durua, Dirava do ita kamonai henia totona?
◻ Dirava kamonai henia karana ena hahenamo be dahaka dahaka?
3. Iseda lalodia do idia goeva noho totona, edena bamona taravatudia do ita badinadia be namo?
6. Gunaguna Dirava ese daika daika na iena gwaukau taudia ai ia halaodia?
9. Dirava kamonai henia karana ena anina ta be dahaka?
10. Haida edia matadia idia hakanidia taudia be edena bamona do idia kara be namo?
11. Keristen taudia ese gavamani edena bamona do idia kara henidia be namo?
13. Famili lalonai Dirava kamonai henia karana ena anina be dahaka?
15. Edena lauma huahuana ese ita do ia durua, Dirava do ita kamonai henia totona?
17. Abidadama ese ita edena bamona do ia durua, Dirava do ita kamonai henia totona?
20. Dirava kamonai henia karana ena hahenamo be dahaka dahaka?
[Picture on page 16]
Dirava ese Ierusalem ena dubu oreana amo ena ura be ena bese taudia ia hadibalaidia
[Pictures on page 18]
Dirava do ita kamonai henia diba gabudiar