Kingdom Proclaimers Report

Edia Noho Dalana Idia Haidaua

OI ITADIA vadaeni reana, dala ai taunimanima idia hereva henidia negadiai, ruma ta ruma ta ai idia lao negadiai, eiava Keristen heboudia karaia totona edia Kingdom Hall idia lao henidia negadiai. Iehova ena Witness memerodia bona kekenidia mai edia toana namona ai herevalaidia inai. Reana oi laloa idia be Witness taudia badina be edia tamadia sinadia ese unai bamona idia hadibadia dainai. Idia momo be unai bamona, to haida edia noho dalana be guna ia idau vaitani. Edia laulau be rau 8 ai ia noho taudia be guna raskol taudia bona drag ania taudia edia orea ai idia noho, Norway ai. Dahaka dainai edia noho dalana idia haidaua vaitani? Edia sivarai ita kamonai be namo.

Idia Haidaua ena Badina

Guna, Witness taudia rua be ruma ta ruma ta gaukarana idia karaia neganai, haneulato ta ladana Annette idia davaria. Hari ia ese unai nega ia gwauraia, ia gwau: “Nega momo haida ese lau idia hamaoroa namona be Iehova ena Witness taudia do lau hereva henidia lasi, to lau ura diba dahaka dainai unai bamona idia hereva, unai dainai egu ruma ai lau abidia dae.” Ena lagani be 11 negana amo, drag ia anidia, bona raskol karadia haida ia karaia vadaeni.

Basileia ena sivarai namona ia moalelaia. Toreisi-lou sivaraina ese ena lalona ia hagoadaia, badina be ia maragi neganai ena sinana ia mase. Unai dainai ena lalona ia hegeregere Baibel stadi do ia abia bona hebou ai ia vareai Kingdom Hall ai. Ia ese ia dibaia herevadia be ena sihari merona bona ma haida ia hamaorolaidia. Idia ura lasi momokani, bona idia hamaoroa Witness taudia ese ena lalona idia ania kerere. To gabeai idia haida ese Baibel idia stadilaia matamaia.

Tauhau ta ladana Espen ese Basileia ena sivarai namona be Annette ena sihari merona ena amo ia kamonai bona maoromaoro ia ura Baibel stadi do ia abia. To, drag ia karalaidia hehuni bona ia henaohenao loulou dainai, diadi ia gwau hua hani do ia dibura. Ia ese danu kuku bona mariuana ia anidia bona ma drag haida danu. Dahaka dainai unai bamona tauhauna ia ura Baibel do ia stadilaia? Espen ena lalona ia parara ena noho dalana be anina lasi. Ia gwau: “Baibel ena gwauhamata ese egu lalona idia veria, badina idia dainai lau diba egu mauri be mai anina. Lau stadi matamaia, badina be lau ura do lau diba, lau idia hamaorolaia herevadia be momokani eiava lasi.”

Ma Haida Idia Ura Baibel Do Idia Stadilaia

Unai neganai edia turana ma ta ese sivarai namona ia kamonai bena ia danu ia stadi bona hebou ai ia lao matamaia. Unai murinai, mero ma ta ia stadi bona hebou ai ia lao matamaia. Nega sisina murinai, edia turana ma ta ese ia bamodia Baibel stadilaia karana ai, bona ia danu be lauma dalanai ia goada ia lao. Bena edia bamona ta ese edia kara namo ia hoalaia dainai ia danu ia ura Baibel do ia stadilaia.

Gilbert, miusik karaia tauna, be edia orea tauna ta bona ia danu ese Baibel ia stadilaia matamaia. Ena tamana sinana ruaosi be kensa gorerena dainai idia mase, unai dainai toreisi-lou gwauhamatana Baibel ai ese ena lalona ia hagoadaia. (Ioane 5:​28, 29) Mariuana ia ania bona ia lebulebu, bona ena ura be ladana bada do ia abia ena miusik dainai. To lauma dalanai ia goada ia lao bona ena lalona ia hadaia Iehova ena Witness tauna ta ai do ia lao. Gabeai, Espen ena tadina danu ese Baibel ia tahua matamaia bona Witness taudia ida ia hebou.

Baibel ese Edia Noho Ia Haidaua

Hari haneulato bona uhau ese edia noho dalana idia haidaua. Guna edia dabua bona huidia toadia be dika, bona drag idia anidia, idia henao, bona kara dikadia ma haida idia karaia. To hari, Annette be Basileia sivaraina harorolaia kekenina bona lagani tamona ai pioneer gaukarana ia karaia vadaeni. Espen bona Gilbert ese heduru pioneer gaukarana idia karaia vadaeni, bona idia ruaosi be kongregesen ena hesiai taudia. Idia ruaosi ese Keristen kongregesen ulatodia idia adavadia. Edia bamodia ma hani be Basileia sivaraina harorolaia taudia goadadia!

Guna diadi ese Espen ia hamaoroa hua hani do ia dibura. To, ena noho dalana ia haidaua dainai, diadi ese ena hereva ia haidaua, ia gwau hora 80 lalodiai hanua gaukarana do ia karaia. Pulisi taudia bona ma haida ese gwaumaoro idia henia, unai hora lalodiai Iehova ena Witness taudia edia Kingdom Hall ai do ia gaukara. Pulisi ese unai idia moalelaia bada.

Oibe, tanobada hegegemadai memero kekeni momo be guna raskol karadia idia karaia. To Baibel ese edia henanadai ia haerelaidia bona helaro namona ia henidia. Unai dainai raskol karadia bona drag idia rakatanidia bona dabua dikadia idia karaia lasi. Edia noho dalana idia haidaua dainai, idia be inai sivarai ena matamanai ai gwauraidia taudia hegeregeredia​—Iehova ena Witness memerodia bona kekenidia, edia dabua bona huidia edia toadia be namo taudia. Idia ura Baibel ena hereva, memero kekeni momo edia hekwakwanai kokidia dalana herevadia, be taunimanima do idia hadibalaidia.​—1 Korinto 6:​9-11.

[Picture on page 8]

Norway ai uhau bona ulato ese hereva momokani idia abia dae