Gima Kohorona INTANET LAIBRI
Gima Kohorona
INTANET LAIBRI
Hiri Motu
  • BAIBEL
  • PABLIKEISEN
  • HEBOUDIA
  • w93 5/1 rau 28-31
  • “Lau Inai! Oi Siaigu”

Oi abia hidi kahana ena vidio ia noho lasi.

Sori, hekwakwanai ia vara vidio ia loud totona.

  • “Lau Inai! Oi Siaigu”
  • 1993 Gima Kohorona Iehova Ena Basileia Ia Harorolaia
  • Sinado maragidia
  • Inai Bamona Atikol
  • Lau Lao Singapore
  • Egu Gaukara Shanghai Ai
  • Hong Kong bena Burma
  • Australia Ai
  • Gabu Ginigunana Lau Lou Henia
  • Lau Maragi Negana amo Iehova ese Lau Ia Hagoadaia
    1993 Gima Kohorona Iehova Ena Basileia Ia Harorolaia
1993 Gima Kohorona Iehova Ena Basileia Ia Harorolaia
w93 5/1 rau 28-31

“Lau Inai! Oi Siaigu”

WILFRED JOHN ENA SIVARAI

Burma ena ami gadi taudia mai edia bainat bona ipidi be kahana kahana amo sinavai lalonai idia diho bena haiwei ena uapu ta henunai ai idia ginia hegege.

LAU bona egu bamona ai gari dikadika bona ai daradara. Ena be gado ai diba lasi, to ai lalo-parara haraga idia mai ai idia dabaia tao totona. Emai tauele ai kwatudia bena ai idia hakaua lao pulisi siteiseni, bena unuseniai opesa ta, English gado ia diba tauna, ese ai ia henanadai henia.

Unai be lagani 1941 ai ia vara, tanobada ibounai tuarina iharuana negana lalonai. Idia laloa ai be hehuni dalanai unai uapu ai hadikaia gwauraia. Emai Keristen haroro gaukarana ai gwauraia hedinarai neganai, opesa ese emai hereva ia abia dae, bena ai ia hamaoroa ai be laki momokani badina be gadi taudia ese ai idia alaia mase lasi. Iehova ai tanikiu henia bona opesa ena hereva hegeregerena uapu dekenai ai lou lao lasi.

Dahaka dainai lau be Burma (ladana matamatana be Myanmar) ai lau noho? Mani, egu sivarai be oi do lau hamaorolaia.

Lau Tauhau Neganai Egu Lalona Lau Hadaia

Lagani 1917 ai lau vara, Wales ai. Lagani 6 murinai, mai egu tamana sinana bona tadina ida ai lao New Zealand. Unuseniai lau tubu daekau. Egu tamana ese boromakau ia naridia. Dina ta ia ese buka gunadia haida ia hoidia. Idia rua be Studies in the Scriptures, Watch Tower Bible and Tract Society ese ia printadia gaudia. Egu sinana ese ia ura henidia bada, bona Timoteo ena sinana Eunike hegeregerena, lau ia ha-uraia, egu matamata negana na Iehova ena Basileia gaukarana ai do lau haorea totona.​—2 Timoteo 1:5.

Lagani 1937 ai dala rua be lau vairanai idia noho​—egu tamana ena boromakau do lau naridia, eiava Isaia hegeregerena Iehova do lau hamaoroa, do lau gwau: “Lau inai! Oi siaigu.” (Isaia 6:8) Lau be tauhau, egu tauanina ia goada, bona lau be asi egu maduna. Boromakau naridia gaukarana lau diba bona lau ura henia. To, pioneer gaukarana be lau diba lasi. Edena do lau abia hidi?

Haroro taudia Iehova ena Witness taudia edia Australia branch opesi amo ese lau idia hagoadaia. Lau idia ha-uraia, egu tauhau negana be Dirava ena hesiai lao henia karana ai do lau gaukaralaia totona. (Kohelete 12:1) Lau be egu tamana sinana ida ai herevalaia, bona idia danu idia laloa Dirava ena ura do lau tahua guna be aonega karana. Iesu ena hereva danu lau haeroa: “Basileia bona [Dirava] ena kara maoromaoro do umui tahua guna, vadaeni unai gau ibounai danu umui dohore ia henia.”​—Mataio 6:33.

Vadaeni, egu lalona lau hadaia! Iehova ena Witness taudia edia branch opesi ta be lasi New Zealand ai, unai dainai lau idia boiria Australia ena branch opesi ai do lau gaukara, Sydney ai. Vadaeni, lagani 1937 ai lau lao Australia, Iehova Dirava ena hesiai gaukarana do lau karaia hanaihanai totona.

Lau laloa, ‘Dahaka gaukara do idia henigu?’ Unai lau laloa momo lasi, badina be Iehova lau hamaoroa vadaeni, ‘Lau inai. Oiemu ura hegeregerena lau oi hagaukaraia.’ Lagani rua lalodiai pikap karadia gaukarana lau karaia. Unai neganai Iehova ena Witness taudia ese pikap amo Baibel ena hereva idia halasia ruma taudia dekediai. Bena gaukara ma ta lau idia hadibalaia, buka bona magasin be gabu ta ta siaidia lao gaukarana unai.

Lau Lao Singapore

Lagani 1939 ai lau idia siaia lao Singapore, Society ena buka abidia bona siaidia gabuna ai do lau gaukara totona. Buka be Australia, Britain, bona United States amo idia mai, bena Asia ena tano idauidau lau siaidia lao.

Singapore ai Asia taudia bona European taudia danu idia noho; bese ta ta mai edia gado ta ta. Bese idauidau taudia be Malay gado ai idia herevahereva heheni, unai dainai ruma ta ruma ta ai do ai haroro totona, ai nao taudia ese Malay gado ai dibaia. Ai be mai emai kadi haida danu, idia latadiai be Basileia sivaraina gado idauidau ai.

Matamanai lau ese unai kadi ena sivarai Malay gado ai lau dibaia bena sisina sisina unai gado ena hereva ma haida lau dibadia. Baibel idia gwauraia bukadia gado idauidau ai danu ai loalaidia. India taudia totona ai ese inai gado bukadia ai loalaidia: Bengali, Gujarati, Hindi, Malayalam, Tamil, bona Urdu. Gado idauidau taudia hedavari henidia karana be kara matamatana lauegu ai.

September 1939 ai idia halasia herevana lau laloatao, idia gwau Europe ai idia tuari. Ai laloa, ‘Do ia bada ia lao ela bona emai noho gabuna, eiava?’ Lau laloa unai be Aramagedono ia gunalaia tuarina. Lau moale, badina be egu tauhau negana lau gaukaralaia namonamo.

Buka gabuna ai lau gaukara, kongregesen heboudia ai lau gaukara, bona haroro gaukarana lau karaia danu. Taunimanima ida Baibel ai stadilaia, bona haida ese hereva momokani idia abia dae bena Singapore konena ai ai bapatisodia. Emai lalona ai hadaia sekit hebouhebouna ta do ai karaia, unai dainai boiboi pepadia be kamonai taudia ai henidia. Ai moale, badina be taunimanima 25 bamona idia hebou, bona ai laloa unai be aiemai hebouhebou ginigabena, Aramagedono be kahirakahira dainai.

Tuari dainai Society ena branch opesi idauidau ese revareva idia siaidia heheni be auka. Singapore ai ai ese revareva maragina ta ai davaria, ia gwau pioneer taudia toi Germany amo do idia ginidae. Sisima ena ladana, do ia ginidae dinana, bona do idia gaukara gabuna ia gwauraidia lasi. Pura haida murinai idia ginidae bena ai dekenai idia noho hora 10. Edia gado ai diba lasi dainai ai hekwarahi, to ai kamonai do idia lao Shanghai.

Egu Gaukara Shanghai Ai

Lagani tamona murinai Society ese lau ia siaia lao Shanghai. Lau ginidae neganai, Society ena post opesi bokis namba sibona lau diba. Post opesi ai henanadai momo amo idia hamomokania lau be Society tauna ta, bena ena gabu lau idia hadibaia. Lau ginidae neganai, China tauna ta lau davaria, ia gwau branch opesi ese unai ruma ia rakatania vadaeni, to ena gabu matamatana be ia diba lasi.

Lau laloa, ‘Dahaka do lau karaia hari?’ Lau guriguri, heduru abia totona. Lau roharoha bena tatau toi lau itadia idia raka mai, idia lata sisina bona edia toana be idau. Edia toana be Germany taudia Singapore ai lau hedavari henidia edia toana bamona. Karaharaga, lau lao, idia vairadiai lau gini.

Mai egu moale ida lau hereva henidia, lau gwau: “Ekskiusi.” Idia gini bena lau idia raraia mai edia gari ida. Lau gwau: “Singapore. Iehova ena Witness taudia. Lau umui laloatao a?”

Nega sisina murinai idia haere, idia gwau: “Ja! Ja! Ja!” Ai rosia heheni bona lau tai, lau moale bada dainai. Unai siti ai be taunimanima hutuma bada herea; edena bamona unai tatau toi be unai gabu ai idia raka hanai, lau noho neganai? Lau gwau, “Tanikiu, Iehova e.” Unai neganai China famili toi, Germany tatau toi, bona lau, ai sibona be Witness taudia Shanghai ai.

Hong Kong bena Burma

Hua haida Shanghai ai lau gaukara, bena lau idia siaia lao Hong Kong. Pioneer tauna ta be Australia amo ia mai gwauraia lau do ia bamoa totona, to ia mai lasi, unai dainai lau sibogu be Witness tauna unai gabu ai. Bena lau laloa lou Iehova lau hamaoroa vadaeni, “Lau inai! Oi siaigu.”

Lau ese English gado idia gadolaia China taudia lau haroro henidia toho, to edia magu ai lau vareai be auka, badina be edia hesiai taudia ikoukou idia gimadia be China gado sibona idia diba. Unai dainai China gado sisina lau dibaia. Vadaeni, hesiai taudia dekediai lau lao, egu bisinesi kadina lau henidia, hereva kwadogina China gado ai lau gwauraia, bena ikoukou idia kehoa, lauegu.

Nega ta sikuli ta ai unai bamona lau karaia, badina lau ura het-tisa do lau hereva henia. Tisa ta ia mai, lau ia hakaua lao. Klasrum haida ai rakaia hanai, bena lau hegaegae het-tisa hedavari henia totona. Tisa ia pidipidi, iduara ia kehoa, ia raka muri, bena lau raka vareai. Lau hoa maragi lasi, badina be unai be mei rumana! Gabeai het-tisa ese lau ia hamaoroa, China gado ai lau hereva neganai egu hereva idia lalo-pararalaia lasi, idia laloa lau be inspekta tauna, toilet sekea totona lau mai.

Hua hani lau haroro, bena Hong Kong ena pulisi ese lau idia hadibaia, gavamani ese aiemai gaukara ia taravatua. Idia gwau bema haroro gaukarana do lau hadokoa lasi lau do idia siaia oho. Lau laloa lau do idia siaia oho be namo, bena gabu idauna ta ai do lau haroro diba. Hong Kong ai buka 462 lau hariharilaidia bona taunimanima rua lau durudia haroro gaukarana do idia karaia totona.

Bena Society ese lau ia siaia lao Burma. Unuseniai pioneer gaukarana lau karaia bona Rangoon (hari be Yangon) ai buka naridia gaukarana lau karaia danu. Lau moalelaia bada gaukarana be inai: Rangoon amo ia lao Mandalay ma ia lao Lashio dalana badana badinai idia noho taonidia bona hanuadia ai ai haroro. Lau bona egu bamona ese English gado idia diba taudia ai haroro henidia bona idia edia amo Consolation (hari be Awake!) sabskripsen handred handred lau abidia.

Dala ai ai raka negadiai kahu be bada herea, unai dainai nega momo ai ura digu. Unai dainai, inai sivarai ena matamanai lau gwauraia gauna ia vara; uapu henunai sinavai ai ai digu neganai ami taudia ese ai idia dabaia tao. Nega daudau lasi murinai, tuari dainai bona ai gorere dainai, ai lou lao Rangoon. Burma ai lau noho ela bona lagani 1943, bena tuari ia bada ia lao dainai, lau lou lao Australia.

Australia Ai

Australia gavamanina ese Iehova ena Witness taudia edia gaukara idia taravatua vadaeni. To, nega sisina murinai taravatu idia kokia, bena gabeai Society ese lau ia boiria branch opesi ai do lau gaukara. Lagani 1947 ai Betty Moss lau adavaia; ia be branch ai ia gaukara guna. Iena tamana sinana be pioneer taudia bona idia ese ia bona ena taihuna Bill idia hagoadadia pioneer gaukarana do idia karaia totona. Betty ena lagani be 14 neganai, pioneer gaukarana ia karaia matamaia. Lau laloa do ai gaukara hebou namonamo diba, badina be lau hegeregerena, Iehova ia hamaoroa, ia gwau, “Lau inai! Oi siaigu.”

Lagani tamona ai headava, bena Society ese lau ia noia, sekit naria gaukarana ai Iehova ena Witness taudia edia kongregesen do ai vadivadi henidia. Australia ena gunika ai ai gaukara mai emai hekwarahi ida. Abata idia vara negadiai emai laolao dalana ia dika, badina be dala idia dedidedi. Ai be palai rumana ai ai mahuta dainai, ai davaria siahu negadia be siahu bada herea bona keru negadia be keru bada herea.

Distrik naria gaukarana danu lau karaia. Unai neganai distrik be rua sibona Australia ai. Donald MacLean ese ta ia naria bona lau ese ta lau naria. Hari inai negai unai gabu edia kongregesen edia sivarai lau duahidia negadiai, lau moale bada. Momokani, Baibel ena hereva momokani uhedia idia tubu bona anina idia havaraia!

Gabu Ginigunana Lau Lou Henia

Lagani 1961 ai, Gilead misinari sikuli ai lau vareai, Brooklyn, New York ai. Gunaguna lau idia boiria, to lau gorere dainai lau lao diba lasi. Hua 10 lau sikuli, bena lau idia noia New Zealand ai do lau gaukara.

Unai dainai, January 1962 amo ema, Betty bona lau be New Zealand ai ai gaukara. Sekit bona distrik naria gaukarana lau karaia guna mai egu moale ida, bena April 1979 amo ema ai ruaosi be New Zealand ena branch opesi ai ai gaukara.

Betty bona lau, emai mauri laganidia be 75 bamona. Betty ese ful-taim Basileia gaukarana ia karaia laganidia bona lau ese lau karaia laganidia be ai haboudia neganai, lagani 116 ai abia. Betty be January 1933 ai pioneer gaukarana ia karaia matamaia, bona lau be April 1937 ai lau karaia matamaia. Emai moale be bada, badina be emai natudia bona tubudia lauma dalanai ai havaradia be ai itadia, ai hegeregerena Kohelete 12:1 ena sisiba idia badinaia; ia gwau: “Oi ia karaia Diravana Badana be emu tauhau dinadia ai oi laloatao.”

Emai mauri ibounai lalonai, Iesu Keriso ena hahegani hegeregerena Dirava ena Basileia ena sivarai namona ai harorolaia bona taunimanima be hahediba taudia ai ai halaodia be hahenamo badana aiemai ai! (Mataio 24:14; 28:​19, 20) Ai moale bada, badina be Dirava ena boiboi ai haerelaia, Isaia ia haere bamona, ia gwau, “Lau inai! Oi siaigu.”

    Hiri Motu Pablikeisen (1987-2026)
    Log aut
    Login
    • Hiri Motu
    • Ta dekenai siaia
    • Preferens
    • Copyright © 2025 Watch Tower Bible and Tract Society of Pennsylvania
    • Gaukaralaia Taravatudia
    • Privacy Policy
    • Privacy Settings
    • JW.ORG
    • Login
    Ta dekenai siaia