Papias ese Lohiabada Ena Hereva Ia Laloa Bada

“LAU ESE . . . hereva momo taudia bamoa karana lau moalelaia lasi, to hereva momokani idia hadibaia taudia bamoa karana lau moalelaia.” Papias be unai ia torea, ia be lagani 100 C.E. murinai ia noho bona sibona ia gwauraia ia be Keristen tauna.

Papias ia mauri noho negana be Iesu Keriso ena aposetolo taudia idia mase ore negana sisina murinai. Oibe, idia gwau aposetolo Ioane ese ia hadibaia tauna, Polycarp, ia bamoa. Unai hereva, bona Papias ese diba ia tahua dalana amo, ia hedinarai reana ia be sivarai momo ia diba tauna.

Ia Torea Namonamo

Papias ese ia torea buka ima lalodiai Lohiabada ena hereva ia torea, bona unai amo ia hahedinaraia goevagoeva hereva momokani ia tahua goadagoada. Ia tauhau negana lalonai, Papias ia kamonai henia hereva momokanidia momo ia lalodia tao. Gabeai, Frugia siti, Hierapolis, Asia Minor dekenai, ena ruma dekena amo Papias ese buruka taudia ia henanadai henidia, ia ura diba idia be Iesu ena aposetolo taudia idia itadia eiava edia hereva idia kamonaia. Mai moale danu ia henanadai henidia bona edia hereva ia toredia.

Papias ia gwau: “Lau daradara lasi . . . buruka taudia ese lau idia hadibaia sivaraidia lau toredia namonamo, bona edia hereva lau lalodia tao namonamo, umui be hereva momokani do umui diba totona. Lau be taunimanima momo bamona lasi, lau ese hereva momo taudia bamoa karana lau moalelaia lasi, to hereva momokani hadibaia taudia bamoa karana lau moalelaia; haida edia hahegani idia gwauraia taudia lau moalelaidia lasi, to Lohiabada ena hahegani, abidadama momokani ena hereva idia gwauraia taudia lau moalelaidia. Danu, tau badadia murinai idia raka taudia lau davaridia neganai, lau nanadaidia unai tau badadia edia hereva be dahaka dahaka​—Andrea eiava Petero edia hereva be dahaka, eiava Filipo, Toma, Iakobo, eiava Ioane eiava Mataio edia hereva be dahaka, eiava Lohiabada ena hahediba tauna ma ta ena hereva.”

Ena Gaukara

Lauma dalanai, reana Papias be sivarai momo ia kamonai. Ita diba maoro lasi, to taunimanima ese aposetolo taudia ta ta iboudiai edia mauri bona gaukara sivaraidia idia gwauraia neganai, reana hereva iboudiai ia kamonai henidia namonamo. Lagani 135 C.E. bamona ai, Papias ese ia haboua sivaraidia be buka ta dekenai ia torea. To madi, unai buka ia boio. Lagani 100-199 C.E. ai ia noho tauna, Irenaeus, sibona ia gwauraia ia be Keristen tauna, bona lagani 399 C.E. murinai ia noho histori torea tauna, Eusebius, be unai buka ena hereva idia gwauraia. Oibe, lagani 800-899 C.E. ai, taunimanima be unai buka idia do duahia noho, bona reana ia noho ela bona lagani 1300-1399 C.E. ai.

Papias be mai ena abidadama Keriso ena Lagani 1,000 Lohia Negana do ia mai. (Apokalupo 20:​2-7) Irenaeus ia gwau unai tau ena toretore lalonai ia gwau nega do ia mai bena “tanobada be do ia matamata lou bona dika amo do ia ruhaia, guba ena paripari bona tano namona amo, aniani idauidau do ia havaraia, unai be Lohiabada ena hahediba tauna Ioane, idia itaia tau badadia hegeregeredia, Lohiabada be unai nega sivaraina ia hadibadia bona idia kamonai herevadia idia gwauraidia hedinarai.” Danu Papias ma ia torea, ia gwau: “Mai edia abidadama taudia dekenai unai sivarai be idia momokani. Bona Iuda, Iesu ia samania tauna, ia abidadama lasi neganai, ia gwau, ‘Lohiabada be edena dala amo unai do ia havaraia diba?’ Lohiabada ia gwau, ‘Unai nega lalonai do idia mauri taudia be do idia itaia.’ ”

Papias ia toretore negana lalonai, Gnostic tomadihona be ia bada. Gnostic tomadiho lalonai, aonega herevadia, lalohadai kava, kaivakuku tomadiho henia bona Keristen koikoi karadia idia bulodia. Oibe, Papias be Lohiabada ena hereva ia gwauraidia hedinarai Gnostic tomadiho ia koua toho totona. Ia murinai, Irenaeus be ia hegeregerena, Gnostic tomadiho, lauma dalanai sibona ia gwauraia goada herea ena koikoi karana ia dadaraia noho. Gnostic tomadiho torea bukadia be momo herea, unai dainai kirikirilaidia ai ia gwau “idia be hereva momo taudia.” Iena ura ia hedinarai goevagoeva​—ia ura hereva momokani amo koikoi hereva do ia koua.​—1 Timoteo 6:4; Filipi 4:5.

Edia Hereva Evanelia Bukadia Dekenai

Papias ia torea revareva pepa kahana maragidia haida idia do noho, bona idia lalodiai Mataio bona Mareko idia torea sivaraidia idia noho. Inai bamona, Papias be Mareko ena toretore ia gwauraia: “Mareko, be Petero ena hereva ia hahanaia, ia laloatao hereva ibounai ia torea hedinarai namonamo.” Unai Evanelia buka ena hereva ena maoro ia hamomokania totona, Papias ma ia hereva: “Unai dainai toretore dekenai Mareko be ia kerere lasi, hereva ia lalodia tao hegeregerena ia toredia; ia naria namonamo badina ia ura lasi hereva ta ia reaia, bona ia ura lasi unuseniai hereva koikoi ta ia torea.”

Papias be Baibel torea tauna lasi, to ia ese ia hamomokania Mataio ese ena Evanelia bukana be Heberu gado ai ia torea. Papias ia gwau: “Sivarai be Heberu gado ai ia torea, bona ta ta ese unai hereva idia hahanaia namonamo toho.” Reana Papias be Luka bona Ioane edia Evanelia herevadia, bona Keristen Greek Revareva ma haida edia hereva ia gwauraidia. Bema oibe, ia be edia maoro bona Dirava ena lauma siahu amo idia torea hamomokania tauna ginigunana. To madi, Papias ena toretore pepa kahana maragimaragidia sibona idia do noho.

Ia Diba Lauma Gaudia Ia Tahua be Namo

Hierapolis dekenai Papias be ekalesia naria tauna, bona hereva momokani tahua karana ia hesikulaia lasi. Hereva ia tahua goadagoada mo sibona lasi, to Revareva Helagadia ia laloa bada danu.” Papias ena lalohadai be ia maoro, ia diba Iesu Keriso eiava Iena aposetolo taudia idia gwauraia hahediba herevadia ia gwauraidia ena namo, ese iena nega lalonai idia noho bukadia lalonai edia lalohadai idia haidaua momo herevadia ia gwauraidia ena namo do ia hanaia.​—Iuda 17.

Taunimanima idia gwau lagani 161 eiava 165 C.E. ai, Peregamo dekenai, ena tomadiho dainai Papias idia hamasea. Ita diba maoro lasi Iesu Keriso ena hahediba herevadia edia siahu ena bada Papias ena mauri bona kara dekenai be dahaka. To, ia ura dikadika Revareva Helagadia ia diba bona ia kikilaidia. Hari inai negai danu, Keristen momokani taudia be unai bamona, idia diba lauma gaudia idia tahua be namo. (Mataio 5:3) Bona Papias bamona, Lohiabada ena hereva idia lalodia bada.