Baibel Lalonai Idia Noho Guriguridia Ita Tahua Namonamo be Namo
ENA lalona ia hekwarahi hahinena ta, king ta, bona Dirava ena Natuna ese idia gwauraia guriguridia be hari do ita tahua namonamo. Idia ta ta edia noho be idauidau dainai, edia guriguri be idauidau. To, reana nega haida iseda noho be idia edia hegeregeredia. Edia guriguri ese ita dahaka idia hadibaia?
“Oiemu Hesiai Hahine, Lauegu Hisihisi Bada Mani Do Oi Itaia”
Ia noho daudau hekwakwanaina ta dainai oi hekwarahi noho, a? Eiava lalo-hekwarahi ese emu lalona ia hametaua, a? Bema oibe, emu noho be Hana ena bamona, ena natuna ginigunana, Samuela, ia do abia lasi neganai. Ia gabani dainai hahine ta ese ia kirikirilaia. Hana ena lalona ia hisihisi bada bona ia hekwarahi bada, unai dainai ia aniani lasi. (1 Samuela 1:2-8, 15, 16) Iehova ia noia mai ena manau ida, ia gwau:
“Siahu Ibounai Lohiabada e, lau, oiemu hesiai hahine, lauegu hisihisi bada mani do oi itaia, lau do oi laloa, lau do oi laloaboio lasi, to lau dekenai natuna mero do oi henia. Bema lau dekenai oi henia neganai, lau ese oi Lohiabada dekenai do lau henia lou, bona iena huina do lau utua lasi, iena mauri dinadia ibounai lalonai.”—1 Samuela 1:11.
Mani inai oi laloa, Hana ese Iehova ia hereva henia neganai, ia ura henia gauna (natuna mero) ia gwauraia hedinarai goevagoeva, bona do ia karaia karana danu (ena natuna be Dirava do ia henia iena hesiai do ia lao henia totona). Unai ese ita dahaka ia hadibaia?
Gauna be inai: Dika oi davaria neganai, emu guriguri lalonai unai dika oi gwauraia hedinarai goevagoeva. Herevana oiemu hekwakwanai be dahaka—emu ruma taudia edia noho ia namo lasi, o oi be turana lasi, o oi gorere—to Iehova dekenai oi gurigurilaia. Emu hekwarahi ena anina bona emu hemami be oi gwauraia hedinarai goevagoeva ia dekenai. Vabu ta ladana Louise ia gwau: “Adorahi iboudiai egu lalo-hekwarahi be Iehova lau hamaorolaia, bona nega haida idia be momo, to idia ta ta iboudiai lau gwauraia hedinarai goevagoeva.”
Iehova dekenai ita gurigurilaia gauna bema ita gwauraia hedinarai goevagoeva, unai ese namo do ia havaraia. Unai kara ese ita ia durua, iseda hekwakwanai ita lalo-pararalaia goevagoeva totona, bena reana do ita laloa, hanaia dalana ta ia noho. Unai bamona guriguridia ese iseda lalo-hekwarahi idia hamaragia. Dirava ese Hana ena guriguri ia do haerelaia lasi neganai, “iena lalohisihisi ia ore.” (1 Samuela 1:18) Ma gau ta be inai: Ita gurigurilaia gauna bema ita gwauraia hedinarai goevagoeva, eda guriguri ena haere do ita lalo-pararalaia diba. Bernhard, Keristani tauna ta Germany lalonai, ia gwau: “Lauegu guriguri lau gwauraidia goevagoeva neganai, edia haere be idia hedinarai goevagoeva.”
“Lau be Mero Maragina Sibona”
Vadaeni, bema ta ese gaukara ta ia abia to ia laloa ia hegeregere lasi unai gaukara do ia karaia, reana ena lalo-hekwarahi be idau. Nega haida oi laloa oi hegeregere lasi Iehova ese oi ia henia gaukarana do oi karaia, a? Eiava haida ese oi be unai bamona idia laloa, a? Eregabe tauna Solomona idia horoa bona Israela ena king ai idia halaoa neganai, haida ese ia unai bamona idia laloa. Mai ladana bada taudia haida idia ura tau idauna ta be terona ai do ia helai. (1 King Taudia 1:5-7, 41-46; 2:13-22) Ena lohia negana ena matamana ai, Solomona be guriguri amo ia noinoi, ia gwau:
“Lohiabada e, lauegu Dirava e, lau be mero maragina sibona, to oi ese lau, oiemu hesiai tauna dekenai king dagi oi henia vadaeni . . . Lau diba lasi edena bamona basileia do lau gunalaia namonamo. . . . Mani emu kara aonega lau dekenai do oi henia, oiemu bese taudia do lau biagua mai maoromaoro danu . . . [bona] namo bona dika edia idau do lau diba totona.”—1 King Taudia 3:7-9.
Ena guriguri lalonai Solomona ese inai gau ia gwauraidia: Ena noho Iehova vairanai, ia henia gaukarana, bona ena diba unai gaukara do ia karaia totona. Unai hegeregerena, gaukara ta ita idia henia neganai, bema ita laloa iseda diba be hegeregere lasi do ita karaia, namona be Dirava ita noia, ita do ia durua unai gaukara do ita karaia totona. Inai sivarai mani oi lalodia:
Eugene ia gwau: “Lau idia noia gaukara badana ta be Watch Tower Society ena brens opesi ai do lau naria neganai, lau laloa lau hegeregere lasi momokani. Ma haida edia diba be bada bona unai gaukara idia manadalaia vadaeni. Hanuaboi rua lalonai lau mahuta momo lasi, to hora momo lalonai lau guriguri. Unai ese lau ia hagoadaia bona egu daradara ia kokia.”
Roy ena turana ta, taunimanima momo ese idia ura henia merona, be ia mase haraga neganai, Roy idia noia ena guria herevana do ia karaia. Unai dina ai taunimanima handred momo do idia mai. Roy ese dahaka ia karaia? Ia gwau: “Dirava lau guriguri henia loulou, lau noia lau do ia hagoadaia bona lau do ia durua, taunimanima edia lalona hagoadaia herevadia maorodia do lau gwauraia totona. Guna, nega ta ta sibona unai bamona lau guriguri loulou.”
Dirava ese kara haida ‘ia havaraia haraga’ bona ena orea ia bada ia lao negana lalonai, iena hesiai taudia momo maduna ia henidia. (Isaia 60:22) Bema oi idia noia maduna ma ta do oi huaia, to unai gaukara oi manadalaia lasi eiava emu diba be hegeregere lasi, unai oi laloa momo lasi, badina be Iehova ese oi ia durua diba. Dirava oi hereva henia, Solomona ese ia hereva henia hegeregerena, bena oi do Ia durua emu gaukara do oi karaia totona.
“Idia Ibounai be Do Idia Tamona”
Hari inai negai ia vara gauna ihatoina be hebou taudia dainai guriguri karana. Ita idia noia haida dainai do ita guriguri neganai, dahaka ita gurigurilaia be namo? Iesu ena guriguri Ioane karoa 17 lalonai mani oi laloa. Ia do mase lasi hanuaboina ginigabena ai, Iesu ese unai guriguri ia gwauraia ena hahediba taudia vairanai. Ia ese ena Tamana guba ai be edena bamona ia noinoi henia?
Iesu ese ia dekenai idia noho taudia iboudiai idia tahua gaudia bona edia helaro tamona ia gwauraia momo. Iehova Dirava ena ladana hanamoa bona Basileia hahedibalaia karadia ia gwauraia. Iesu ia gwau Tamana bona Natuna do idia tura henia totona, Buka Helaga ena hereva idia dibaia be gau badana. Tanobada amo gini siri karana ia herevalaia; unai kara ese ia murinai idia raka taudia do ia hahegaegaedia badu do idia haheaukalaia totona. Keriso ese danu ena Tamana ia noia, ena hahediba taudia do ia naria bona tomadiho momokani lalonai do ia hatamonaia.
Oibe, Iesu ese lalo-tamona ia gwauraia momo. (Ioane 17:20, 21) Unai hanuaboi lalonai, ena hahediba taudia idia heai, memero maragidia bamona. (Luka 22:24-27) To, ena guriguri lalonai Keriso ese ia gwau henidia lasi, to ia hatamonadia toho. Unai hegeregerena, ta be ena ruma bese lalonai eiava kongregesen lalonai ia guriguri neganai, namona be ena guriguri amo lalokau ia havaraia bona hepapahuahu koua dalana ia tahua. Namona be idia dainai ia guriguri taudia edia lalona ia hatamonadia.—Salamo 133:1-3.
Unai lalo-tamona be guriguri dokonai ia hedinarai, kamonai taudia be “Amen,” idia gwauraia neganai; unai hereva ena anina be “Unai bamona do ia vara.” Unai bamona do idia hereva diba totona, guriguri herevana idia lalo-pararalaia bona idia lalo-tamonalaia be namo. Unai dainai, bema ta ese ia dekenai idia noho taudia haida be idia diba lasi gauna ta ia gurigurilaia, unai be maoro lasi. Hegeregere, reana elda ta be kongregesen vairanai ia guriguri neganai, Iehova ia noia edia lauma tadikakana o taihuna ta, ia gorere bada tauna, do ia hanamoa. To bema idia momo be ia gwauraia tauna idia diba lasi bona ena gorere sivaraina idia kamonai vadaeni lasi, unai bamona ia guriguri be namo lasi.
Inai danu mani oi laloa: Iesu ese idia dainai ia guriguri taudia ta ta edia ura gaudia ta ta ia gwauraia lasi. Bema unai bamona ia karaia, anina be ia ese idia sibodia edia gau, taunimanima haida sibodia idia diba gaudia, ia gwauraia hedinarai. Namona be ta ese sibona ena gau ia gwauraidia, ia sibona ia guriguri neganai; unai neganai ena ura hegeregerena hereva momo amo ia gwauraidia hedinarai goevagoeva diba.
Ta be edena bamona ia hegaegae be namo, idia hebou tomadiho taudia momo dainai do ia guriguri totona? Keristani tauna ta mai ena diba be ia gwau: “Inai gau lau laloa guna: Dahaka gau dainai Dirava do lau tanikiu henia, tadikaka edia noinoi idauidau be dahaka dahaka, bona idia dainai dahaka lau noinoilaia diba. Bena egu lalohadai idauidau bona hahenamo herevadia lau laloa namonamo, edena do lau gwauraia guna, edena be gabeai. Taunimanima vairanai lau do guriguri lasi neganai, egu lalona ai lau guriguri, Dirava lau noia lau do ia durua, tadikaka dainai do lau guriguri mai egu hemataurai ida totona.”
Herevana oiemu noho be edena bamona, to Baibel lalonai guriguri ta do oi davaria diba, ia gwauraia tauna ena noho be oiemu bamona. Baibel lalonai idia noho guriguridia idauidau ese Dirava ena lalokau bona hebogahisi idia hahedinaraia. Unai guriguri bema oi duahia bona oi laloa noho, unai ese oi do ia durua emu guriguri do oi hanamodia totona.
[Box on page 5]
MAI ANINA BADA GURIGURIDIA BAIBEL LALONAI
Iehova ena hesiai taudia be nega idauidau ai idia guriguri. Emu noho be henuai ai gwauraia taudia ta o haida edia noho bamona, a?
Eliesere hegeregerena, oi ura Dirava ese oi do ia hakaua, a?—Genese 24:12-14.
Iakobo hegeregerena, oi ese dika do oi davaria haraga diba, a?—Genese 32:9-12.
Mose hegeregerena, oi ura emu diba Dirava dekenai do oi habadaia, a?—Esodo 33:12-17.
Elia hegeregerena, oi be emu inai taudia vairadiai oi gini, a?—1 King Taudia 18:36, 37.
Ieremia hegeregerena, oi laloa oi haroro be auka, a?—Ieremia 20:7-12.
Daniela hegeregerena, oi ese emu dika oi gwauraia hedinarai bona Dirava oi noia do ia gwauatao, be namo a?—Daniela 9:3-19.
Iesu ena hahediba taudia hegeregeredia, oi ese dagedage oi hisihisilaia, a?—Kara 4:24-31.
Mani inai siri danu oi itaia: Mataio 6:9-13; Ioane 17:1-26; Filipi 4:6, 7; Iamesi 5:16.
[Box on page 6]
OI MANADALAIA KARANA TA DO OI HADOKOA TOHO NEGANAI, INAI BAMONA DO OI GURIGURI BE NAMO
Emu kerere ta, ia vara loulou gauna, dainai oi hekwarahi, a? Baibel lalonai idia torea guriguridia ese oi edena bamona idia durua diba? Davida sivaraina ese oi ia durua diba; nega idauidau ai ia ese ena kerere ia gurigurilaidia.
Davida ese ane ia abia, ia gwau: “Dirava e, egu kudouna do oi tahua, ena dala ibounai do oi diba. Egu lalona danu do oi tohoa, bona egu laloa gaudia do oi davaria.” (Salamo 139:23) Davida ia ura Iehova Dirava ese ena ura, ena hemami, bona ena lalohadai kereredia do ia tahua. Ia ese Iehova ia noia, do ia durua ia kara dika lasi totona.
To Davida ena kerere ese idia halusia dainai, kara dika rohorohona ta ia karaia. Bena guriguri ese ia durua lou—unai neganai ia durua, Dirava ena lalo-namo do ia abia lou totona. Salamo 51:2 ena hereva hegeregerena, Davida ia noinoi, ia gwau: “Egu dika mani do oi huria ore, bona egu kerere dekena amo lau do oi hagoevaia.”
Ita danu be mai eda manau ida Iehova ita noia diba, ita do ia durua, iseda ura dikadia do ita koua totona. Unai ese ita do ia hagoadaia, ita manadalaia karana kererena do ita hadokoa bona kara dika amo do ita raka oho totona. Bema do ita kerere lou, namona be Iehova do ita noia lou, ita do ia durua unai kara do ita hadokoa lou totona.
[Picture on page 7]
Idia hebou taudia dainai idia gwauraia guriguridia lalonai, Baibel ese ia gwauraia helarodia bona lauma gaudia, idia iboudiai ese idia tahua gaudia, idia gwauraia be namo