Tomadiho Herevalaia be Taravatu A?

“GAU rua be taunimanima ida lau herevalaia lasi: tomadiho bona politik!” Iehova ena Witness taudia ese Baibel be taunimanima dekenai idia herevalaia negadiai, taunimanima momo be unai bamona idia hereva. Edia lalohadai ita lalo-pararalaia diba.

Taunimanima ese politik idia herevalaia neganai, reana do idia badu bona do idia heai. Taunimanima momo ese politik taudia edia anina lasi gwauhamatadia idia abia dae lasi, bona idia diba politik taudia momo ese siahu, ladana bada, bona moni sibodia idia tahua. Madi, taunimanima be mai edia lalohadai idauidau politik dekenai dainai, nega haida dagedage ia vara.

Reana oi laloa, ‘To, tomadiho danu be unai bamona, ani? Hari inai nega lalonai, tomadiho goadalaia karana ese tuari momo ia havaraia vadaeni, ani?’ Northern Ireland lalonai, Roman Katolik taudia bona Protestan taudia be lagani momo herea lalonai idia inai heheni. Balkan tanodia lalonai, Isten Otodoks taudia, Roman Katolik taudia, bona ma haida ese tano dainai idia tuari heheni. Unai dainai dahaka ia vara? Idia dagedage bada bona idia badu heheni noho.

Haida ese do idia hamasedia garina, taunimanima momo ese idia sibodia bona edia ruma bese taudia edia tomadiho idia hunia toho. Africa lalonai, Kerisendom taudia, bona idau besedia edia tomadiho daladia idaudia idia badinaia taudia, bona sene tomadiho daladia idia badinaia taudia, be lagani handred momo lalonai idia badu heheni dainai, tama sina ese edia natudia ta ta edia ladana rua, do idia naridia ladadia, idia hatoa; unai bamona idia karaia ema bona hari. Unai dainai, taunimanima edia vairanai mero ta ese ena ladana ta ia gwauraia neganai, idia laloa ia be Kerisendom tauna ta, eiava ena ladana idauna ia gwauraia neganai, idia laloa ia be tomadiho oreana idauna tauna ta. Bema haida ese do idia alaia mase garina ia gari dainai, ta ia ura lasi ena tomadiho do ia gwauraia hedinarai, unai ita hoalaia lasi.

Taunimanima ma haida idia gwau, tomadiho herevalaia be taravatu, herevana haida ese idia hamasedia gwauraia lasi. Idia gari, edia tomadiho herevadia be tomadiho idauna tauna ta ida herevalaia karana ese anina lasi hepapahuahuna do ia havaraia garina. Ma haida idia laloa tomadiho iboudiai be namo. Idia gwau, bema ta ese ia abia dae herevadia be hegeregere ia dekenai, unai hereva edia idau herevalaia karana be anina lasi.

Tomadiho ena anina be mai edia momokani ida idia tahua taudia danu idia lalo-tamona lasi. The New Encyclopædia Britannica be ena hereva ta ladana “The Study and Classification of Religions” lalonai ia gwau: “Nega ta ta sibona . . . [tomadiho] ena anina idia stadilaia taudia idia lalo-tamona . . . Unai dainai, tomadiho ena nega ibounai lalonai, haida ese idia hepapahuahulaia.”

Diksenari ta ia gwau tomadiho amo “taunimanima ese idia ia hereaia momokani diravana idia abidadama henia bona idia matauraia bada; idia laloa ia be guba bona tanobada karaia bona biagua diravana.” Unai dainai iseda mauri lalonai tomadiho be mai anina bada. Momokani, tanobada ibounai lalonai tomadiho ese taunimanima edia noho daladia edia toana ia havaraia. Buka ta ladana Oxford Illustrated Encyclopedia of Peoples and Cultures, ia gwau: “Bese ta lasi ese tomadiho dalana ta amo mauri ena dala maorona bona ena anina ia tahua lasi.” Tomadiho amo mauri ena “dala maorona” bona ena “anina” idia tahua, unai dainai namona be oi heailaia lasi, to oi be ma ta ida do umui herevalaia namonamo hebou be namo. To daika ida, bona unai ena namo be dahaka?