“Iehova Ena Matana ai Lau be mai Anina!”

HARI “metau dikadia momo idia vara” negana lalonai, Iehova ena hesiai taudia momo mai edia kamonai idia laloa idia be anina lasi, unai dainai nega ibounai unai lalohadai idia hekwarahilaia. (2 Timoteo 3:1) Unai ita hoalaia lasi, badina be Satani ena “koikoi karadia” ta be, iseda lalona ia ania toho, do ita laloa ta ese ita ia lalokau henia lasi, ita ia karaia Diravana danu ese ita ia lalokau henia lasi! (Efeso 6:​11) Unai dainai, April 1, 1995 ena Gima Kohorona magasin lalonai, be stadi herevadia rua kongregesen totona; edia sinado be “Dirava Ena Matana ai Oi be mai Anina Bada!” bona “Edena Bamona Ita Ha-uraia Heheni, Lalokau Bona Kara Namodia Havaraia Totona?” Unai hereva rua idia torea, ita do idia hamaoroa lou Iehova ese iseda hekwarahi ia laloa bada. Unai hereva idia moalelaia taudia haida edia tanikiu herevadia, revareva amo idia siaia herevadia, be henuai idia noho:

“Lagani 27 lalonai lau be Iehova ena Witness hahinena ta, to unai nega lalonai magasin ta ena hereva ese lau be unai magasin ena hereva ese ia durua hegeregerena ia durua lasi. Lau tai​—unai hereva ese lauegu mamina idia hanamoa dainai. Hari lauegu mamina be Iehova ese lau ia lalokau henia bada. Ia be hegeregere ta ese maduna metauna be egu pagana amo ia kokia vadaeni.”​—C. H.

“Dina tamona lalonai unai magasin be nega hani lau duahia lou. Ena hereva ta lau ura henia, ia gwau bema oi laloa oi be anina lasi, lalohadai koikoina oi abia dae unai. Unai magasin ena hereva do lau gaukaralaia, tadikaka hagoadaia totona lau vadivadi henidia neganai bona haroro gaukarana ai danu.”​—M. P.

“Satani ese Iehova idia lalokau henia taudia edia lalona danu ia ania, do idia laloa idia be anina lasi bona ta ese ia lalokau henidia lasi. To “hesiai tauna mai ena kamonai” oreana ese ita idia hamaoroa lou, Iehova ese ita ia lalokau henia bada bona ia dainai ita karaia karadia maragidia ibounai ia laloa bada; unai hereva lau duahia neganai, lau ia hagoadaia bada. Lagani momo lalodiai egu mamina be unai hereva ruaosi ese idia gwauraia mamidia bamona. Lau laloa lau hegeregere lasi Iehova ese lau do ia lalokau henia, unai dainai iena hesiai gaukarana lau goadalaia toho, lau do ia lalokau henia totona. To lauegu dika ena mamina lau abia bona lau hemarai dainai lau karaia. Unai dainai herevana hora hida lalodiai lau haroro, eiava taunimanima hida lau durudia, to lau laloa unai be hegeregere lasi. Lauegu manoka sibona lau itaia. To hari, Iehova ena hesiai gaukarana be lalokau dainai lau karaia neganai, lau laloa ia ese lau ia kiri henia bona lau ia heagilaia. Unai dainai, ia lau lalokau henia bada bona lau ura egu gaukara do lau habadaia. Hari, Iehova ena hesiai lao henia karana amo moale bada lau davaria.”​—R. M.

“Lau duahia herevadia iboudiai amo unai magasin ena hereva be hagoadaia herevadia hereadaedia, oibe, emai lalona hamarerea bada herevadia! Lagani 55 lalodiai Gima Kohorona lau duahia, bona unai nega lalonai magasin mai edia anina bada herevadia momo idia halasia. To unai Gima Kohorona ena hereva be namo herea. Guna ai gari, badina be ai laloa ai be ‘anina lasi’ bona ena be do ai hekwarahi bada to Iehova ese ai do ia ‘lalokau henia lasi,’ emai hekwarahi ena ‘davana’ bamona. To unai Gima Kohorona ese emai gari ia haorea vaitani. Iena hereva ese iseda tadikaka be lauma dalana ai do ia durudia bada. Lauegu ura be tadikaka hagoadaia totona lau vadivadi henidia neganai, unai hereva ruaosi do lau gaukaralaia loulou.”​—F. K.

“Ai haida ai laloa ai be anina lasi eiava ai sibona emai kara ai badulaia momokani, unai dainai hereva momokani ai badinaia noho be auka herea. Unai magasin ena hereva ese hebogahisi bona lalo-parara bada ia hahedinaraia, ia be toto hanamoa muramurana namona bamona, emai lalona dekenai ai atoa. Unai bamona herevana be Gima Kohorona lalonai ai duahia bona ai diba momokani Iehova be ia lalo-parara; unai ese emai lalona idia hagoadaia bada! Tanikiu, badina be ai umui hamaoroa lou Iehova ese ena orea taudia be kerere lalohisihisilaia karana o hemarai o gari amo ia ha-uradia toho lasi. Ena be hari inai negai moni ai lau dabu bona egu famili taudia haida idia gorere dainai haroro gaukarana sisina mo lau karaia diba, to lau karaia diba gaukarana dainai egu lalona be ia hegeregere. Lau davaria, bema lalokau dainai lau haroro neganai, egu moale be bada.”​—D. M.

“ ‘Dirava Ena Matana ai Oi be mai Anina Bada!’ herevana be hari sibona lau duahia ore. Paragraf ta ta iboudiai lau duahia neganai egu matana ranuna ia diho. Lau tubu daekau neganai, egu famili ese lalokau idia hahedinaraia sisina mo. Lau idia hevasehalaia, idia ha-uraia, bona idia kirikirilaia. Unai dainai, lau maragi neganai lau laloa lau be anina lasi. Hari danu, dika lau davaria neganai, lau maragi neganai lau abia hemamidia ese lau idia do hahisihisia. Kongregesen ena elda dagina lau rakatania neganai, vaia lau laloa lau hegeregere lasi​—egu Dirava, egu famili, bona egu tadikaka kongregesen lalonai edia vairanai. Unai hemami idia doko haraga lasi, to unai magasin ena hereva namona ese lau ia durua, lalohadai maorona do lau abia totona. Ia ese helaro be lau ia henia.”​—D. L.

“Umui lau tanikiu henia inai hereva, ‘Dirava Ena Matana ai Oi be mai Anina Bada!’ dainai. Lau maragi neganai ta ese lau ia hadikaia dainai, hari lau ese sibogu lau inai henia bada bona lau laloa lau be anina lasi momokani. Oibe, iseda lalona ai unai lalohadai kererena be Satani ena koikoi dainai ia vara gauna ita gwauraia be maoro. Unai lalohadai ese mauri ura henia urana ia koua diba. Namona be dina dina iboudiai lau hekwarahi inai hereva koikoina, ta ese lau ia lalokau henia diba lasi herevana, do lau dadaraia. Unai magasin ena hereva be mai anina bada lau dekenai, ena bada oi lalo-pararalaia diba lasi.”​—C. F.

“Hari inai negai tadikaka ese inai hereva idia moalelaia: Ta ese lalokau dainai ia karaia karadia be Iehova ese ia laloa bada, to hahegani o hedori dainai ia karaia karadia be ia laloa maragi. Iehova ese ena orea taudia ta ta iboudiai edia namo ia tahua mai ena lalokau ida​—unai ita laloa neganai, iseda lalona idia goada lou bona ita ura do ita hamoalea. Unai dainai, ai ese magasin mai ena hereva ta ladana ‘Dirava Ena Matana ai Oi be mai Anina Bada!’ ai abia neganai, ai momo ai gwau unai hereva ai moalelaia. Toana be ia ese dala ia kehoa, taunimanima momo ese Iehova do idia tura henia momokani totona. Lau bona egu hahine ai ura umui ai tanikiu henia, vanegai Gima Kohorona magasin lalodiai umui torea herevadia ai hebogahisi mamina ia hedinarai dainai. Kongregesen ai vadivadi henidia negana lalonai, unai magasin edia hereva momo do ai badinaia toho.”​—Sekit naria tauna ta ena amo.

“Lagani 30 bamona lalodiai Gima Kohorona iboudiai lau duahia, to unai magasin ena hereva ese lauegu lalona ia hagoadaia bada. Ia gwauraia Baibel siridia ese lau idia durua, lalohadai koikoidia, lauegu hemami lalonai idia hehuni gaudia, do lau kokia bona Iehova kahirakahira dekenai lau raka lao. Lagani momo lalodiai Iehova ena hesiai lau lao henia, hemarai mamina lau abia dainai. Mauri davalaia boubouna bona Dirava ena lalokau lau diba, to edia anina lau lalo-pararalaia lasi. Umui lau tanikiu henia, unai hereva, lalo-parara idia henia herevadia, dainai. Lau ura unai bamona herevadia momo do lau duahia.”​—M. S.

“Lagani 29 lalodiai hereva momokani lalonai lau noho, to nega ta lau laloa diba lasi, magasin ena hereva ta dainai lau moale bada bona Dirava lau tanikiu henia, unai magasin ena hereva dainai lau moale bada bona Dirava lau tanikiu henia bamona. Ena be lau tubu daekau lalonai egu tamana bona sinana ese lau idia lalokau henia bada bona lau idia naria, to lau laloa lau hegeregere lasi do lau mauri bona Iehova ena hesiai do lau lao henia. Unai hereva lau duahia murinai, lau tui diho, bona mai egu taitai ida Iehova lau tanikiu henia. Unai hereva do lau laloa bada hanaihanai. Lau be dala idauna ai sibogu do lau laloa, badina be hari lau diba lau be mai anina bada Iehova ena matana ai.”​—D. B.