Iehova Ena Ura Idia Karaia

Iesu ese Hahediba Taudia 70 Ia Siaia

UNAI nega be siahu nega ia ore neganai, lagani 32 C.E. ai. Hua 6 sibona idia do noho bena Iesu do ia mase. Unai dainai, haroro gaukara ia haharagaia bona ena hahediba taudia ia hadibaia namonamo totona, ia ese hahediba taudia 70 ia abia hidi bona “rua rua dekena amo ia siaia guna, do idia lao, ia be idia edia murina dekenai do ia mai.”​—⁠Luka 10:⁠1.a

Iesu ese iena hahediba taudia ia “siaia guna, do idia lao, ia be idia edia murina dekenai do ia mai,” unai amo gabeai Iesu ia lao neganai taunimanina edia lalona do idia hadaia haraga diba ia be Mesia eiava lasi. To dahaka dainai ia ese “rua rua” ai ia siaidia? Unai amo dagedage idia davaria neganai, ta ta idia hagoadaia diba.

Iesu ese haroro gaukara do idia karaia haraga ia herevalaia neganai, iena hahediba taudia ia hamaoroa: “Uiti anina be ia momo herea vadaeni, to utua taudia be momo lasi. Unai dainai uma biaguna dekenai do umui noinoi, ia ese utua taudia haida do ia siaia, iena uiti do idia utua.” (Luka 10:2) Haroro gaukara be uiti utua negana ida ia hahegeregerea be maoro, badina uiti be nega korikorina ai idia utua lasi neganai uiti anina namodia idia dika kava diba. Unai hegeregerena, bema hahediba taudia be edia haroro gaukara idia dadaraia neganai, mai anina bada mauri do idia boio diba!​—⁠Esekiela 33:⁠6.

Lalo-Rua Lasi Haroro Taudia

Iesu ese ena hahediba taudia ma ia hamaoroa: “Moni ena pusepuse bona dabua udaia ena pusepuse bona tamaka danu be do umui abia lao lasi. Dala dekenai danu tau ta do umui hereva henia lasi.” (Luka 10:⁠4) Vaia unai negai, loaloa tauna be pusepuse bona aniani sibona ia abia lasi to tamaka danu ia abia, badina tamaka ena lalona idia dika eiava edia varo idia makohia diba. To Iesu ena hahediba taudia be unai gaudia dainai do idia laloa momo lasi. To, namona be idia abidadama Iehova ese do ia naridia edia Israela varavara taudia amo, badina heabidae karana be Israela taudia edia kastom karana ta.

To dahaka dainai Iesu ese iena hahediba taudia ia hamaoroa tau ta do idia hereva henia lasi? Idia ese taunimanima do idia dadaraia, a? Lasi momokani! Greek gado ai unai hereva a·spaʹzo·mai anina be ta idia hanamoa neganai idia rosia, ese “namo” eiava “dina namona” gwauraia karana sibona ia herevalaia lasi. To ena anina be taunimanima rua idia hedavari neganai, kastom dalanai idia kisi, idia rosia, bona nega daudau lalonai idia herevahereva. Unai kara ia herevalaia tauna ta ia gwau: “Orient taudia edia hanamoa karana be ita ese ita karaia bamona lasi, ita igo diho sisina, eiava imana ita abia isi, to idia be nega momo idia rosia, idia tui diho, bona tano dekenai idia goru diho danu. Unai ibounai karaia totona nega bada idia halusia.” (2 King Taudia 4:29 itaia.) Unai dainai, Iesu ese iena hahediba taudia ia durua anina bada lasi gaudia idia dadaraia totona, ena be idia be kastom karadia.

Dokonai, Iesu ese iena hahediba taudia ia hamaoroa ruma ta dekenai idia vareai bona idia abidia dae neganai, “unai ruma tamona dekenai do umui noho, emui aniani do idia henia gaudia do umui ania, bona do umui inua.” To bema siti ta dekenai idia vareai bona idia abidia dae lasi, idia ese ‘hanua ena ariara dekenai do idia gini, do idia gwau, “Umui emui hanua ena kahuna, aiemai aena dekenai ia kamokau gauna be ai kokia inai.” ’ (Luka 10:​7, 10, 11) Ta ese ena aena amo kahu ia kokia o ia dahua oho anina be hahediba taudia be mai maino ida unai kamonai lasi rumana eiava siti idia rakatania bona Dirava ese davana do ia henia. To mai maino ida Iesu ena hahediba taudia idia abia dae taudia ese sibodia edia dala idia kehoa hahenamo do idia abia totona. Ma nega ta Iesu ese iena aposetolo taudia ia hamaoroa: “Umui ia abia dae tauna ese lau danu ia abia dae, bona lau ia abia dae tauna ese lau ia siaia Diravana danu ia abia dae. Bema tau ta ese ranu keruma kapusi tamona sibona ia henia egu murinai ia raka tau maragina ta dekenai, umui lau hamaoroa momokani, ia be davana do ia abia momokani.”​—⁠Mataio 10:​40, 42.

Ita Dibaia Gaudia

Dirava ena Basileia harorolaia bona hahediba taudia karaia ena gaukara be hari tanobada hegegemadai Iehova ena Witness taudia ibounai 5,000,000 mai kahana ese idia karaia noho. (Mataio 24:14; 28:​19, 20) Idia lalo-parara edia sivarai do idia harorolaia haraga. Unai dainai, edia nega idia gaukaralaia namonamo, lalona veria gaudia idia dadaraia unai amo edia lalona ibounai ida mai anina bada gaukarana idia karaia diba.

Iehova ena Witness taudia be idia davaria taudia ibounai idia hereva henia namonamo. To, idia kiki kava lasi, bona tanobada dekenai idia vara hekwakwanai eiava taunimanima ese kara gageva idia ura idia kokia to idia hegeregere lasi karadia edia sivarai idia hepapahuahulaia lasi. (Ioane 17:16) To, taunimanima edia hekwakwanai do ia haorea vaitani gauna​—⁠Dirava ena Basileia​—⁠idia herevalaia.

Nega momo, taunimanima idia itaia Iehova ena Witness taudia be rua rua idia gaukara. Gaukara momo idia karaia diba bema sibona sibona idia gaukara, a? Reana. To, inai nega ena Keristani taudia ese edia tadikaka ida idia gaukara hebou ena namo idia diba. Gabu dikadia ai idia gaukara neganai unai be naria karana namona. Ma ta ida idia gaukara neganai, matamata taudia ese sivarai namona idia harorolaia manada taudia amo diba idia abia. Momokani, idia ruaosi ese ta ta idia hagoadaia diba.​—⁠Aonega Herevadia 27:⁠17.

Ita daradara lasi, hari inai “nega ena dokona dekenai” haroro gaukara be idia karaia gaukara badana ta. (2 Timoteo 3:⁠1) Iehova ena Witness taudia be idia moale, badina tanobada hegegemadai edia tadikaka ese idia durudia bona “Sivarai Namona abidadama henia totona” idia gaukara hebou noho.​—⁠Filipi 1:⁠27.

[Footnote]