Basileia Haroro Ripoti
‘Dina Ibounai Hoihoi Gabuna Lalonai’
APOSETOLO Paulo be nega namodia ibounai ia gaukaralaia Basileia ena sivarai ia harorolaia totona. Kara namo taudia ia tahua totona, ia ese “Iuda taudia bona edia dubu dekenai . . . bona hoihoi gabuna lalonai danu, dina ibounai ia lao, unuseni ia davaria taudia dekenai ia herevahereva.”—Kara 17:17.
Unai bamona gaukara goada karana be aposetolo edia nega dekena amo Iehova idia tomadiho henia taudia korikoridia edia toana. (Mataio 28:19, 20) Hari inai negai, Iehova ena Witness taudia be dala idauidau ai mai goada danu kudou-momokani taudia idia durudia hereva momokani idia diba totona. (1 Timoteo 2:3, 4) Australia amo ia mai ekspiriens ese unai ia hahedinaraia.
Pura ta ta ai, dina ima lalonai, Sid bona Harold be ta ta edia nega edia nega ai Sydney ena trein steiseni ai Baibel bukadia ia hahedinaraia teibolo ta idia naria. Idia ese lagani ima lalonai Dirava ena Basileia ena sivarai namona be inai dala amo idia harorolaia noho. Sid, iena mauri lagani be 95, ia gwau: “Egu mauri lagani be 87 ia abia neganai, motuka lau taria diba lasi. Unai lau lalohisihisilaia badina lau ese taunimanima idia noho gabudia ai haroro gaukarana lau moalelaia. Dina ta loaloa taudia idia lao momo gabuna ladana Echo Point, Katoomba ai, lau itaia laulau penia tauna ta ese gabu ena toana ia penia bona ia hoihoilaidia. Ena laulau lau itadia bona lau laloa, ‘Lau be mai edia laulau namodia haida egu haroro baege lalonai—bona edia davana be maragi!’ Unai dainai egu lalona lau hadaia bona teibolo maragina lau karaia, bona loaloa taudia idia lao momo gabuna dekenai lau haginia, bona idia raka hanai taudia dekenai Iehova ena Witness taudia ese idia hariharilaia Baibel edia sivarai idia hahedinaraia bukadia mai edia laulau hairaidia lau hahedinaraia.
“Lagani hani idia ore vadaeni, Sydney dekenai unai teibolo lau abia lao, bona Harold ese lau ia bamoa. Ai ta ta be mai emai nega teibolo ai naria bona emai kongregesen danu ai gaukara totona.” Harold, hari ena mauri lagani be 83, ia gwau: “Monday ia lao Friday ruma ai taunimanima momo idia noho lasi. Unai dainai inai dala amo Basileia ena sivarai ai harorolaia neganai, ai be taunimanima idia noho gabudia dekenai ai lao. Unai dainai, anina namona ai davaria. Inai tano lalonai, ai ese ai haria buka bona magasin edia namba be bada herea.”
Sid ia gwau: “Ena be idia hanai lagani lalodiai gabu idauidau hani o ima dekenai emai buka bona magasin ai hahedinaraia, daudau lasi murinai taunimanima be ai idia diba. Taunimanima haida be buka bona magasin totona ai dekenai idia mai. Haida be mai edia henanadai bona idia ura ai haerelaidia. Bona haida idia ura nega sisina lalonai do ai herevahereva sibona.” Mai kiri danu ia gwau, “Inai nega sibona lalonai egu lou-henia taudia be lau dekenai idia mai.”
Harold be ma ia gwau: “Taunimanima momo be Baibel idia ura henia bada. Hua tamona lalonai ai amo idia abia buka bona magasin bona Baibel amo edia henanadai ai haerelaidia diba dainai, taunimanima hani be Witness taudia ida Baibel stadi idia hamatamaia. Unai bamona ekspiriens ese ai idia hagoadaia bada.”
Sid bona Harold bamona—bona aposetolo Paulo bamona—gabu ibounai Iehova ena Witness taudia be dala idauidau idia gaukaralaia edia mai anina bada sivaraina idia harorolaia totona. Unai dala amo, “Sivarai Namona” idia do harorolaia noho “tanobada ibounai dekenai.”—Mataio 24:14.