Iehova be Do Ia Leiti Lasi

“Ena be [unai matahanai] ia mai metairametaira, to oi naria noho; badina momokani do ia mai. Do ia leiti lasi.”​​—⁠HABAKUKU 2:​3, NW.

1. Iehova ena taunimanima ese edena bamona lalo-goada idia hahedinaraia, bona unai dainai dahaka idia karaia?

“GIMA kohoro dekenai lau daekau, unuseni lau naria.” Dirava ena peroveta tauna Habakuku ese ena lalona ia hadaia unai do ia karaia. (Habakuku 2:⁠1) Hari inai nega lalonai, Iehova ena Witnes taudia ese unai bamona lalo-goada idia hahedinaraia danu. Unai dainai idia gaukara goadagoada, September 1922 ena distrik hebouhebou badana ta ai, inai boiboi herevana idia gwauraia hegeregerena: “Hari be dina iboudiai edia dina badana. Itaia, Pavapava ia lohia! Umui be iena hereva gwauraia taudia. Unai dainai umui haroro, haroro, haroro, Pavapava bona iena basileia umui harorolaia.”

2. Tanobada Ibounai Tuarina Ginigunana murinai, horoa Keristani taudia idia gaukara goadagoada lou neganai, dahaka idia gwau diba?

² Tanobada Ibounai Tuarina Ginigunana murinai, Iehova ese ena horoa orena taudia ia hagoadaia bona idia gaukara goadagoada lou. Bena Habakuku hegeregerena idia ta ta idia gwau diba: “Lau ura iena haere lau naria. Unai dainai lau ese tuari taudia edia gima kohoro dekenai lau daekau, unuseni lau [gima].” “Naria” bona “gima” totona idia gaukaralaia Heberu herevadia be peroveta herevadia momo lalonai idia gwauraia loulou.

“Do Ia Leiti Lasi”

3. Dahaka dainai ita gima noho be namo?

³ Hari inai negai Iehova ena Witnes taudia ese hadibaia herevadia idia henia noho lalonai, Iesu ena peroveta hereva badana ena hereva dokona idia laloa noho be gau badana, ia gwau: “Unai dainai, umui [gima] noho, badina umui diba lasi edena negai ruma biaguna do ia mai, adorahi, o hanuaboi momokani, o kokoroku boiboi negana, o dabai. Ia mai haraga garina, bona umui mahuta neganai ia ese umui ia davaria garina. Inai hereva lau hamaoroa umui, taunimanima ibounai dekenai danu lau hamaoroa, lau gwau, ‘Umui [gima] noho.’ ” (Mareko 13:​35-37) Habakuku bamona, bona Iesu ena hereva hegeregerena, namona be ita gima noho!

4. Edena dala ai iseda noho be lagani 628 B.C.E. ai Habakuku ena noho hegeregerena?

⁴ Toana be lagani 628 B.C.E. bamona ai, Habakuku ese ena peroveta herevana ia torea ore, unai neganai Babulonia be basileia badana ai ia do lao lasi. Lagani momo lalodiai, Iehova ena hahemaoro herevana hereva momokani ia negea hanuana Ierusalema dekenai idia gwauraia loulou. To, edena negai unai hahemaoro karana do ia vara be ia hedinarai goevagoeva lasi. Daika ia diba lagani 21 sibona murinai do ia vara bona Babulonia ese Iehova ena hahemaoro gaukarana do ia karaia? Hari inai negai be unai hegeregerena, inai tanobada ena dokona ena dina bona hora ita diba lasi, to Iesu ese ita dekenai inai sisiba ia henia vadaeni: “Do umui hegaegae, badina be Taunimanima ena Natuna do ia mai ena hora be umui diba lasi.”​​—⁠Mataio 24:​36, 44.

5. Dahaka dainai Dirava ena hereva Habakuku 2:​2, 3 ai ese ita idia hagoadaia bada?

⁵ Badina namona dainai, Iehova ese Habakuku dekenai inai moale ia havaraia gaukarana ia henia, ia gwau: “Lau ese oi dekenai lau hedinaraia gauna be nadi palaka dekenai do oi torea, vadaeni duahia taudia ese do idia duahia haraga diba.” Bena ia gwau: “Badina unai matahanai be ena nega ia do naria noho, dokona ia heau henia noho, do ia koikoi lasi. Ena be ia mai metairametaira, to oi naria noho; badina do ia mai momokani. Do ia leiti lasi.” (NW ) (Habakuku 2:​2, 3) Hari inai negai, tanobada hegegemadai kara dika bona dagedage idia bada idia lao noho, bona unai ese ia hahedinaraia ‘Iehova ena dina’ mai garina ia kahirakahira momokani. (Ioela 2:​31) Iehova ena hereva ese ita idia hagoadaia momokani, ia gwau: “Do ia leiti lasi”!

6. Edena dala ai hahemaoro dinana amo do ita roho mauri diba?

⁶ Vadaeni, edena dala ai unai hahemaoro dinana amo do ita roho mauri diba? Iehova ese unai henanadai ia haerelaia dalana be kara maoromaoro bona kara dika taudia edia idau ia hahedinaraia, ia gwau: “Iena laumana ia maoromaoro lasi tauna be do ia moru, to kara maoromaoro tauna be do ia mauri, ia ese Dirava ia abidadama henia dainai.” (Habakuku 2:⁠4) Hekokoroku bona mataganigani taudia bona unai bamona lohia taudia ese iseda nega be rara amo idia hadikaia, tanobada ibounai tuaridia rua lalonai bona tano ena bese idauidau edia tuari heheni karadia lalonai, kerere lasi taudia milioni momo edia rara idia bubua. To, Dirava ena horoa taudia, maino idia ura henia taudia, be mai edia abidadama ida idia haheauka. Idia be “kara maoromaoro besena, Dirava idia abidadama bese taudia.” Unai bese bona edia bamodia, “mamoe idaudia” taudia, ese inai sisiba idia badinaia: “Lohiabada do oi abidadama henia hanaihanai, badina Iehova, Lohiabada, be iseda noho hanaihanai nadi goadana momokani.”​​—⁠Isaia 26:​2-4; Ioane 10:⁠16.

7. Paulo ese Habakuku 2:4 ia gaukaralaia hegeregerena, dahaka ita karaia be namo?

⁷ Aposetolo Paulo ese Heberu taudia ia tore henia neganai, Habakuku 2:4 ena hereva ia gaukaralaia, Iehova ena taunimanima ia hamaoroa: “Metau lalonai do umui gini goada, do umui haheauka, vadaeni Dirava ena ura do umui karaia diba. Unai neganai Dirava ia gwauhamatalaia davana namona do umui abia. Badina be Buka Helaga ia gwau: ‘Nega daudau lasi, nega sisina sibona, inai ia mai noho Tauna be do ia ginidae. Ia be do ia naria noho lasi. To lauegu kara maoromaoro taudia, be edia abidadama dainai do idia mauri. Bona lauegu dala ia rakatania tauna, do lau moale lasi ia dekenai.’ ” (Heberu 10:​36-38) Harihari ita hesiku eiava Satani ena mataganigani bona moale karadia tahua sibona tanobadana ena tarapu lalodiai ita moru be aonega karana lasi. Inai “nega sisina sibona” ia ore negana lalonai, dahaka ita karaia be namo? Paulo bamona, ita Iehova ena bese helagana taudia be ‘vaira neganai gaudia do ita goadalaia, bona heau helulu ena dokona gabuna dekenai maoromaoro ita heau henia, kwalimu ahuna’ mauri hanaihanai do ita abia totona. (Filipi 3:​13, 14) Bona Iesu hegeregerena, ‘moale be ita vairanai ia noho dainai,’ do ita haheauka.​​—⁠Heberu 12:2.

8. Daika be Habakuku 2:5 ese ia gwauraia “tauna,” bona dahaka dainai do ia kwalimu lasi?

⁸ Habakuku 2:5 ese “hekokoroku tauna” ia herevalaia, iena tahua gauna ia abia diba lasi, herevana ia ura ia abia gaudia be momo, “mase [Sheol] ese taunimanima momo ia ura abia bamona.” Unai ‘gau momo ia ura abia’ tauna be daika? Habakuku ena nega lalonai Babulonia ese ia hahedinaraia mataganigani hegeregerena, hari inai negai unai “tauna,” gavamani idauidau ibounai ia laulaulaia​—⁠herevana idia be Fascist, Nazi, Komiunis, eiava sibodia idia gwauraia demokratik gavamanidia​—⁠be mai ena mataganigani ida ena tano edia hetoana habadaia totona tuari ia karaia. Unai tauna ese Sheol, taunimanima edia gara gabuna, be kerere lasi taudia amo ia hahonua danu. To unai Satani ena tanobada ena dagedage bada “tauna,” sibona ena namo ia laloa bada dainai ia kekero bamona tauna unai, ese ‘bese idauidau momo bona edia taunimanima ia abia’ toho karana lalonai ia kwalimu lasi. Iehova Dirava sibona ese taunimanima ibounai ia hatamonaia diba, bona Mesia ena Basileia amo unai do ia karaia.​​—⁠Mataio 6:​9, 10.

Dika Badadia Ima amo Dika Ginigunana

9, 10. (a) Iehova be Habakuku amo dahaka ia gwauraia hedinarai? (b) Kara gageva amo kohu abia karana hari inai negai be edena bamona?

⁹ Iehova be ena peroveta tauna Habakuku amo dika badadia ima ia gwauraia hedinarai, idia be hahemaoro karadia, idia vara be gau badana badina idia amo tanobada idia hegaegaelaia, Dirava ena abidadama tomadiho taudia ese do idia noholaia totona. Unai bamona kudou-maoro taudia ese Iehova ena “hereva” idia gwauraia. Habakuku 2:6 ia gwau: “Umui ese emui gaudia lasi umui abia noho. Umui ese abiatorehai taudia umui hagaria dekena amo, kohu momo umui abia noho. Unai karadia dainai dika bada do umui davaria inai.”

¹⁰ Unai siri ese kara gageva amo idia abia gaudia ia herevalaia. Hari inai tanobada lalonai taga taudia edia taga ia bada ia lao, bona ogogami taudia edia ogogami maurina ia dika ia lao. Drag dikadia idia hoihoilaia taudia bona koikoi taudia ese moni bada idia haboua, to taunimanima ma momo be hitolo dainai dika idia davaria. Inai tanobada dekenai idia noho taudia hani hani amo ta ta idia ogogami momokani. Tano momo dekenai, taunimanima edia noho dalana be dika herea. Tanobada dekenai kara maoromaoro do ia vara idia ura itaia taudia idia gwau, ‘edena negai do ia ore,’ badina unai gau dikadia idia bada idia lao noho! To, dokona be kahirakahira! Momokani, unai matahanai ia guguru negana be “do ia leiti lasi.”

11. Habakuku ena hereva taunimanima edia rara bubua karana dekenai be dahaka, bona dahaka dainai ita gwau diba hari inai negai tanobada dekenai rara bubua kava karana ia bada herea?

¹¹ Peroveta tauna ese dika taudia ia hamaoroa: “Umui ese bese idauidau momo edia kohu umui abia lao kava. Bona umui ese taunimanima momo umui alaia, bona edia hanua umui hadikaia ore. Unai dainai bese haida, idia do goada noho besedia be do idia toreisi, umui do idia tuari henia, bona emui kohu do idia abia ore.” (Habakuku 2:⁠8) Hari inai negai tanobada dekenai rara bubua kava karana ia bada herea! Iesu ia gwau goevagoeva: “Tuari kaia idia iusilaia taudia ibounai, be tuari kaia dekenai do idia mase.” (Mataio 26:52) To, idia ore laganidia 100 bamona lalonai sibona, rara idia bubua tanodia bona besedia ese taunimanima milioni 100 ia hanaia idia alaia mase. Unai rara bubua bada karana idia durua taudia ese dika do idia davaria!

Dika Iharuana

12. Habakuku ese ia gwauraia dika iharuana be dahaka, bona dahaka dainai ita diba momokani koikoi dalanai idia abia kohu ese namo ia havaraia lasi?

¹² Dika iharuana, Habakuku 2:​9-​11 ese ia herevalaia gauna, be ‘hanua momo idia hadikaia bona edia kohu momo idia abia kava, unai kohu dekena amo edia bese idia haginia bada bona ruma goadadia momo, tuari koua magudia danu, idia haginia’ taudia ese do idia davaria. Salamo torea tauna ese ia hahedinaraia goevagoeva koikoi dalanai idia abia kohu ese namo ia havaraia lasi, ia gwau: “Bema tau ta be mai ena kohu bona moni momo, bona iena ruma bona kohu ia habadaia momokani neganai, do oi hoa lasi bona mama henia lasi. Badina be do ia mase neganai, gau ta do ia abia lao lasi. Iena ruma bona kohu namona, be ia danu do idia diho lasi.” (Salamo 49:​16, 17) Unai dainai, Paulo ena aonega sisibana ita laloa be namo, ia gwau: “Inai tanobada mauri ena kohu momo taudia do oi hamaoroa, do idia hekokoroku lasi. Bona idia do oi hamaoroa danu inai tanobada ena kohu do idia abidadama henia lasi, to Dirava sibona do idia abidadama henia. Badina inai tanobada ena kohu do ia dika haraga, to Dirava ese ita hamoalea totona, gau momo ita dekenai ia henia davana lasi.”​​—⁠1 Timoteo 6:​17.

13. Dahaka dainai Dirava ena hereva ita harorolaia noho be mai anina bada?

¹³ Hari inai negai Dirava ena hahemaoro herevadia ita harorolaia be mai anina bada! Farisea taudia idia ura lasi taunimanima hutuma ese Iesu idia gwauraia “Lohiabada ena ladana dekenai ia mai King,” bona unai dainai Iesu ia gwau: “Lau hamaoroa umui dekenai, bema idia be mai regerege lasi, inai nadi do idia boiboi.” (Luka 19:​38-​40) Unai hegeregerena, bema hari inai negai Dirava ena taunimanima ese inai tanobada ena kara dika idia gwauraia hedinarai lasi, ‘magu dekenai idia haginia nadi do ia boiboi.’ (Habakuku 2:11) Unai dainai, namona be Dirava ena sisiba herevana ita gwauraia noho mai gari lasi ida!

Dika Ihatoina Bona Rara Bubua Kava Karana

14. Tanobada ena tomadiho oreadia ese idia havaraia rara bubua karadia be dahaka?

¹⁴ Habakuku ese ia gwauraia dika ihatoina ese rara bubua kava karana ia herevalaia. Habakuku 2:​12 ia gwau: “Umui ese taunimanima umui alaia, bona edia kohu umui abia. Unai dekena amo emui hanua umui haginia! Unai dainai emui kerere ena davana dika momokani do umui davaria!” Hari inai tanobadana lalonai, kara maoromaoro lasi bona rara bubua karadia be nega tamona idia vara. Taunimanima edia histori lalonai, tanobada ena tomadiho oreadia ese rara momo bubua karadia badadia idia havaraia. Kruseid negana ita herevalaia diba, sibodia idia gwauraia Keristani taudia ese Muslim taudia idia tuari henia; Katolik Inkwisisen be Spain bona Latin America lalonai ia vara; Europe ena Lagani 30 Tuarina lalonai Protestan bona Katolik taudia idia tuari heheni; bona rara bada herea idia bubua tuaridia, tanobada ibounai tuaridia ruaosi unai, be Kerisendom tanodia dekenai idia matamaia.

15. (a) Tano momo be dahaka idia karaia noho bona dubu ese unai kara ia durua eiava ia abia dae? (b) United Nations ese inai tanobada ena tuari kohu habadaia karana idia koua diba, a?

¹⁵ Tanobada Ibounai Tuarina Iharuana lalonai ia vara kara dika hereana ta be Nazi taudia edia ala-ala karana, ia lalonai Iuda taudia bona Europe ena kerere lasi taudia milioni momo idia hamasea. Vanegai sibona Roman Katolik gunalaia taudia France dekenai idia hereva hedinarai, idia gwau Nazi taudia ese taunimanima tausen tausen momo be hamasea gabudia dekenai idia siaia neganai, dubu ese unai kara ia koua lasi. To, rara bubua kava karana do idia karaia totona tano momo idia hegaegae noho, bona edia dubu ese unai kara idia durua eiava idia abia dae. Vanegai, Russia ena Otodoks Dubuna ia kikilaia Time magasin ta (intenesenel gauna) ia gwau: “Idia hagoadaia lou dubuna ena siahu be bada herea guna taunimanima idia laloa lasi gauna dekenai: Russia ena tuari oreana unai. . . . Tuari peleini bona tuari taudia edia ruma idia hanamoa momo. November lalonai, Moscow ena Danilovsky Monastery dekenai, Russia ena Patriarchate ia noho gabuna unai, dubu oreana ese Russia ena niuklia bomu ia hahelagaia danu.” United Nations be demoni ese idia hagoadaia tuari kohu habadaia karana idia koua diba, a? Lasi! Nobel Peace Prize ia abia tauna ta ena hereva London, England, ena Guardian niuspepa lalonai be inai: “Lau laloa momo gauna be, UN Security Council ena memba tanodia badadia ima be inai tanobada ena tuari kohu hoihoilaia tanodia badadia ima danu.”

16. Iehova ese unai tuari hagoadaia besedia dekenai dahaka do ia karaia?

¹⁶ Iehova ese unai tuari idia hagoadaia besedia dekenai hahemaoro karana do ia karaia, a? Habakuku 2:​13 ia gwau: “Umui ese tano momo umui halusia, bona edia taudia umui guia, vadaeni idia ese emui hanua haginia totona idia hekwarahi bada. To inai hekwarahi be hekwarahi kava do ia lao. Badina idia haginia gaudia ibounai be lahi ese do ia gabua ore. [Tuari oreadia edia Iehova] ese inai bamona do ia karaia.” “Tuari oreadia edia Iehova”! Oibe, Iehova be mai ena tuari taudia, ena guba anerudia, bona do ia gaukaralaidia dagedage tuari taudia bona besedia haorea totona!

17. Iehova ese dagedage besedia dekenai ena hahemaoro karana ia karaia murinai, tanobada dekenai Iehova diba karana ena bada be edena bamona?

¹⁷ Iehova ese unai dagedage besedia dekenai hahemaoro karana ia karaia murinai, dahaka do ia vara? Habakuku 2:14 ese haere ia henia: “Tanobada taudia ibounai ese Lohiabada ena siahu bona iena hairai do idia diba momokani. Inai diba momokani, be do ia bada, davara ena ranu ena bada hegeregerena.” Unai be helaro namo hereana ta! Aramagedono lalonai, Iehova ese ena lohia siahuna do ia hamomokania ela bona hanaihanai. (Apokalupo 16:16) Ia ese ita ia hamaoroa iena aena atoa gabuna, ita noholaia tanobada unai, be “hairai momokani gabuna” ai do ia halaoa. (Isaia 60:13) Taunimanima ibounai be Dirava ena dala do idia dibaia, bena edia diba Iehova ena ura namodia dekenai be davara ese ia hahonua gabudia edia bada bamona.

Dika Namba 4 Bona Namba 5

18. Habakuku ese ia herevalaia dika namba 4 be dahaka, bona hari inai negai tanobada taudia edia kara ai unai be edena bamona ia hedinarai?

¹⁸ Dika namba 4 be Habakuku 2:​15 ese ia herevalaia, ia gwau: “Dika do umui davaria momokani! Badina umui badu dainai emui badibadinai noho taudia umui hahemaraia, bona edia ladana umui hadikaia. Umui ese inua kekero umui henidia, vadaeni idia kekero neganai edia dabua idia kokia, bona edia hemarai umui itaia.” Unai ese hari inai tanobada ena lebulebu karadia ia hahedinaraia. Ena lebulebu karadia idia bada idia lao, bona tomadiho oreadia ese ena lebulebu karadia idia durua danu. Gorere idauidau, hegeregere AIDS bona lebulebu karadia amo idia vara gorere idauidau ma haida, be tanobada ibounai lalonai idia vara badabada. Hari, sibona idia atoa guna taudia ese ‘Iehova ena hairai’ idia hahedinaraia lasi, to matabodaga karadia idia habadaia bona Dirava ena hahemaoro be kahirakahira do idia davaria. Inai “hemarai bada” tanobadana be kahirakahira Iehova ena badu ena kapusi amo do idia inuinu, unai ese ena ura idia dekenai ia laulaulaia. Edia ‘ladana do ia doko momokani, bona do idia hemarai sibona.’​​—⁠Habakuku 2:​16.

19. Habakuku ese dika namba 5 ia gwauraia matamaia neganai dahaka ia gwauraia, bona dahaka dainai unai bamona herevadia be mai anina hari inai tanobada dekenai?

¹⁹ Dika namba 5 ia gwauraia matamaia neganai, kaivakuku tomadiho henia karana ia sisibalaia auka. Iehova be peroveta tauna ia gaukaralaia inai mai anina herevadia henia totona: “Umui kaivakuku dekenai tomadiho henia taudia ese dika do umui davaria momokani! Umui ese au ta dekenai umui hereva henia, umui gwau, ‘Do oi noga!’ Bona nadi ta dekenai umui gwau, ‘Do oi toreisi!’ Umui be umui laloa idia be do idia toreisi, bona gau ta umui dekenai do idia hedinaraia, a?” (Habakuku 2:19) Unai nega amo ema bona hari, Kerisendom bona idia gwauraia Keristani lasi tomadiho idauidau ese edia korosi, Maria ena laulau, bona taunimanima bona animal idauidau idia laulaulaia kaivakuku dekenai idia tui diho. Iehova ena hahemaoro karana lalonai, idia ta do ia noga diba lasi edia tomadiho taudia hamauria totona. Edia golo bona siliva hairaina be do ia noho hanaihanai Diravana, Iehova, ena hairai bona ia havaraia mauri gaudia edia hairai ida oi hahegeregerea neganai, idia be anina lasi gaudia. Namona be Iehova ena ladana hereadaena ita hanamoa ela bona hanaihanai!

20. Hari iseda hahenamo be edena dubu dekenai mai eda moale ida hesiai gaukara ita karaia?

²⁰ Oibe, iseda Dirava, Iehova, ese hanamoa ibounai ia abia be maoro. Ia ita matauraia bada dainai, namona be kaivakuku tomadiho henia karana dekenai iena sisiba aukana ita badinaia. To kamonai! Iehova ia hereva noho: “Ia be iena Dubu Helaga lalonai ia noho. Umui tanobada dekenai noho taudia ibounai be Lohiabada ena vairanai do umui mai, regena ta lasi.” (Habakuku 2:20) Ita diba peroveta tauna ese Ierusalema ena dubu ia laloa noho. To, hari inai negai, iseda hahenamo be iseda tomadiho be lauma dubu badana dekenai ita karaia, bona unuseniai iseda Lohiabada Iesu Keriso be Hahelaga Tauna Badana. Unai dubu ena tanobada ariara gabuna ai ita hebou, hesiai gaukara ita karaia, bona ita guriguri, unai amo Iehova bona ena ladana hairaina ita matauraia. Bona ita moale bada badina mai eda kudouna ibounai ida iseda lalokau guba Tamana ita tomadiho henia diba!

Oi Laloatao, A?

• Iehova ena hereva, “Do ia leiti lasi,” be edena bamona oi laloa?

• Habakuku ese ia gwauraia dika edia anina hari inai negai be dahaka?

• Dahaka dainai Iehova ena hereva ita harorolaia noho be mai anina bada?

• Iseda hahenamo be edena dubu ena ariara gabuna dekenai hesiai gaukara ita karaia?

[Pictures on page 15]

Habakuku bamona, hari inai negai Dirava idia hesiai henia taudia idia diba Iehova be ia leiti lasi

[Pictures on page 18]

Iehova ena lauma dubuna ena ariara gabuna ai ia oi tomadiho henia ena hahenamo oi laloa bada, a?

[Picture Credit Line on page 16]

U.S. Army photo