Emai Abidadama Idia Tohoa Neganai Ai Sibona Ai Noho Lasi

Vicky be beibi kekenina namona​​—⁠ia gorere lasi, ia be mai hairaina, bona ia mareremarere momo. Oibe, lagani 1993 ena siahu negana ia matamaia neganai ia vara, bona ai moale bada herea. Sweden ena saut kahana ena taoni maragina ta dekenai ai noho, bona aiemai mauri be namo.

TO VICKY ena mauri lagani be ta mai kahana neganai, emai mauri ena toana be ia dika ia lao. Nega sisina daudau ia gorere, unai dainai hospital dekenai ai abia lao. Unai nega do ai laloaboio lasi, doketa ese ai ia hamaoroa emai natuna be lymphoblastic lukimia gorerena ia abia, unai be maragidia idia abia kensa ta, edia rara ena sel kurokurodia ia hadikaia.

Emai kekeni maragina be unai gorere badana ia abia be ai abia dae haraga diba lasi. Diba ia abia matamaia sibona bona hari reana do ia mase. Doketa ese ai ia hagoadaia toho, ia gwau, heduru namona do ia henia diba, unai be kemoterapi bona nega haida rara do idia henia hanai. Unai be ai hoalaia gauna ma ta.

Emai Abidadama Ia Tohoa

Emai kekeni ai lalokau henia momokani bona ia totona medikol heduru namona ai ura. To, rara henia hanai karana do ai abia dae lasi. Dirava ena Hereva, Baibel, ai abia dae momokani, bona ia hahedinaraia goevagoeva Keristani taudia ese ‘rara idia dadaraia’ be namo. (Kara 15:​28, 29, NW ) Ai diba rara henia hanai karana be dika ia havaraia danu. Taunimanima tausen momo be rara henia hanai karana amo gorere idia abia bona idia mase. Rara henia hanai lasi hanamoa dalana ma ta ai abia be mai anina. Unai dala ai, hari emai abidadama lalonai do ai gini goada tuarina ia matamaia.

Dahaka do ai karaia? Sweden dekenai, Iehova ena Witnes taudia edia brens opesi lalonai Hospital Information Services ai hereva henia, edia heduru ai noia totona.a Karaharaga, rara henia hanai lasi kemoterapi do ia karaia diba doketa ta idia tahua totona, hospital idauidau Europe dekenai fax idia siaia. Emai Keristani tadikaka idia hekwarahi bada ai idia durua totona neganai, edia gaukara goadagoada karana bona lalokau ese ai ia hagoadaia momokani. Emai abidadama lalonai do ai gini goada tuarina dekenai, ai sibona ai noho lasi.

Hora haida lalonai, Homburg/Saar, Germany dekenai, hospital bona doketa ta idia davaria. Murina dinana dekenai, dala idia karaia peleini amo do ai lao bona doketa ese Vicky do ia sekea. Ai ginidae neganai, Homburg kongregesen amo Iehova ena Witnes taudia bona emai varavara taudia haida danu idia noho. Bona unai gabu ena Hospital Liaison Committee tadikakana ta ese ai ia welkam henia. Hospital dekenai ai ia bamoa bona ai ia durua bada. Ena be tano idauna ta dekenai ai noho, to ai ia hagoadaia gauna be emai lauma tadikaka ese ai idia durua.

Hospital dekenai Dr. Graf ai hedavari henia neganai, ai ia hagoadaia danu. Ia be hebogahisi tauna bona ai ia hadibaia Vicky dekenai rara do ia henia hanai lasi to heduru daladia ma haida do ia gaukaralaia. Ena be reana ena rara ena hemoglobin be do ia diho 5 g/dl dekenai, to rara henia hanai lasi karana amo heduru do ia henia noho. Ia gwau gorere ai davaria bena Vicky ai mailaia haraga dainai, unai ese dala ia kehoa gorere do ia hanamoa medikol heduruna ia abia totona. Ia gwau unai be nega ginigunana Vicky ia abia gorere hanamoa totona rara henia hanai karana do ia gaukaralaia lasi to kemoterapi sibona do ia karaia. Dr. Graf ia gari lasi bona ena lalona ia hadaia ai do ia durua dainai, ia ai tanikiu henia bada bona ia ai laloa bada.

Moni Hekwakwanai

To henanadai ta be, Edena bamona Vicky ia abia medikol heduruna ena davana do ai henia? Ai idia hadibaia lagani rua ena davana be K215,393 neganai, ai hoa bada. Emai moni be ia hegeregere lasi, to gau badana be Vicky ena gorere hanamoa daladia idia hamatamaia haraga. Sweden ai rakatania, Germany dekenai medikol heduru ai abia totona dainai, helt insurens ai abia diba lasi. Unai dainai emai gorere kekeni maragina ida ai noho bona doketa idia gini hegaegae heduru do idia henia totona, to aiemai moni be hegeregere lasi.

Hospital ese ai ia durua, ai idia hamaoroa hanamoa karadia do idia hamatamaia haraga diba bema ai ese K28,719 ai henia bona orena totona gwauhamata pepa ai sainia. Ai be emai moni haida, bona turadia bona varavara taudia edia heduru amo, K28,719 ai henia​​—⁠to moni orena be edena bamona?

Unai neganai danu, ai dibaia lou emai abidadama lalonai do ai gini goada tuarina dekenai, ai sibona ai noho lasi. Ai diba lasi lauma tadikaka ta be ia ura moni orena do ia henia. To ia henia gwauraia harihari gauna badana ai gaukaralaia lasi, to dala ma ta ai davaria unai moni abia totona.

Doketa Edia Diba Idia Gaukaralaia

Kemoterapi idia hamatamaia. Dina bona pura idia ore. Nega haida, ai bona emai kekeni maragina totona ia auka bona ai hekwarahi bada. To, toana be ia namo ia lao negadia ta ta ai, ai moale bada. Kemoterapi be hua 8 lalonai idia karaia. Vicky ena rara ena hemoglobin be ia diho 6 g/dl dekenai, bona Dr. Graf be ena gwauhamata ia badinaia.

Lagani 6 mai kahana idia ore vadaeni, bona doketa ai vadivadi henia neganai, nega ginigabena iena doruna turia ena ranu idia sekea totona, lukimia gorerena idia davaria lasi. Hari ia be gorere lasi moale kekenina ta. Oibe, unai be hoa gauna bamona badina Vicky be ia namo momokani. Ai diba unai gorere idia abia natudia momo be kemoterapi bona rara idia abia, to idia mase.

Emai abidadama lalonai do ai gini goada noho tuarina dekenai ai kwalimu, to emai varavara, Keristani tadikaka bona taihu, bona doketa taudia ese ai idia durua danu. Hospital Information Services be dina iboudiai, hora 24 lalodiai ai ia durua. Dr. Graf bona doketa ma haida ese edia diba idia gaukaralaia Vicky ia namo lou totona. Unai heduru ibounai dainai, idia ai tanikiu bada.

Emai Abidadama Ia Hagoadaia

To gau badana be inai, aiemai Dirava, Iehova, be mai ena lalokau ida ai ia naria bona ena Hereva, Baibel, amo ai abia goada dainai, ia ai tanikiu henia be namo. Aiemai mauri ena metau negana ai laloa lou neganai, ai laloa ai dibaia gaudia be momo bona emai abidadama ia hagoadaia bada.

Hari ai ura dikadika emai hetura karana namona Iehova Dirava ida ia goada noho bona emai natuna dekenai Dirava ena ura hegeregerena ia mauri ena namo do ai hadibaia. Oibe, ai ura lauma ahuna namona do ai henia ia dekenai, mauri hanaihanai, tanobada dekenai do ia mai Paradaisona lalonai do ia noho.​​—⁠Ta ese ia siaia sivaraina.

[Footnote]