Dahaka Dainai Unai Idaunegai Besena Ia Ore?
TANOBADA ibounai Abata badana be ia vara kava dika ta lasi. Unai be Dirava ena hahemaoro karana. Hadibaia hereva ia henidia guna, to idia dadaraia momokani. Dahaka dainai? Iesu ia gwau: “Unai neganai, abata badana do ia ginidae lasi neganai, idia aniani noho, idia inuinu noho, idia headava noho, ia mai bona Noa be lagatoi dekenai ia guia dinana; taunimanima ese idia laloa lasi dahaka do ia vara, idia kara dika noho, ia mai bona abata badana ia ginidae, vadaeni abata ranu ese ibounai ia abia lao.”—Mataio 24:38, 39.
Mauri Dalana Namona
Abata badana ia do vara lasi neganai taunimanima ese idia moalelaia gaudia namodia haida be inai negai ita abia lasi. Hegeregere, taunimanima ibounai be gado tamona idia herevalaia. (Genese 11:1) Unai ese imana amo karaia gaudia idauidau bona saiens dalana namona kwalimulaia dalana ia durua badina taunimanima momo idia hekwarahi edia diba idauidau idia haboua. Danu, taunimanima momo ese idia moalelaia mauri daudauna ena anina be lagani momo lalonai idia dibaia vadaeni gaudia idia habadaia totona.
Taunimanima haida idia gwau unai neganai taunimanima edia mauri be ia kwadogi bona Baibel lalonai idia herevalaia laganidia be lagani lasi to hua. Unai be momokani, a? Mahalalela mani ita laloa. Baibel ia gwau: “Mahalalela ena mauri lagani be 65 neganai, ia ese Iareda ia havaraia. . . . Mahalalela ena mauri lagani ibounai be 895, vadaeni ia mase.” (Genese 5:15-17) Bema lagani ta ena anina be hua ta, Mahalalela ena mauri lagani be ima neganai ena natuna mero ia vara! Lasi, taunimanima be tau ginigunana, Adamu, ese ia abia mauri goevadaena ena nega kahirakahira dekenai idia noho. Lagani handred haida idia mauri momokani. Dahaka idia karaia?
Lagani handred momo Abata ia do vara lasi lalonai, tanobada taudia idia hutuma neganai Adamu ena natuna Kaino be siti ta ia haginia, ena ladana ia gwauraia Enoka. (Genese 4:17) Abata badana vairanai idia noho taudia edia mauri laganidia lalonai, faktori gaukara idauidau idia karaia. Unuseniai be “kapa bona auri” tulu idauidau karaia gaudia idia noho. (Genese 4:22) Ita daradara lasi, unai tulu idauidau be konstraksen, kapenta, dabua turia gaukarana, bona uma gaukara totona idia gaukaralaia. Unai gaukara ibounai be tanobada idia noholaia taudia ginigunadia edia sivarai lalonai ia noho.
Diba ia bada karana ese uru ta ta ia durua gaukara idauidau hegeregere auri gaukara, uma aniani bona tano naria gaukarana, mamoe bona boromakau naria gaukarana, toretore gaukarana, bona ima gaukaradia idauidau idia hanamoa totona. Hegeregere, Iubala, be “gita bona ivilikou idia gadaralaia taudia edia tubuna.” (Genese 4:21) Mauri dalana namona ia bada daekau. To, karaharaga gau ibounai edia dokona ia ginidae. Dahaka ia vara?
Dahaka Kerere Ia Vara?
Abata ia do vara lasi lalonai idia mauri noho taudia mai edia gau namodia idauidau edia matamana negana ai dika ia vara. Hamatamaia tauna, Adamu, be Dirava ia gwau-edeede henia. Siti ginigunana ia haginia tauna, Kaino, be ena tadina ia alaia mase. Unai dainai, unai dika ia bada haraga dainai ita hoa lasi! Adamu ese ena natuna dekenai ia rakatania dika be ia bada.—Roma 5:12.
Unai dika be ia bada herea momokani neganai, Iehova be ena lalona ia hadaia unai dika be ma lagani 120 sibona do ia noho. (Genese 6:3) Baibel ia gwau: “[Taunimanima] edia kara dika be bada herea gabu ibounai dekenai, bona edia laloa be nega ibounai ia dika sibona mo. . . . Edia dika be gabu ibounai dekenai.”—Genese 6:5, 11.
Gabeai, Dirava be Noa ia hamaoroa, abata amo mauri gaudia ibounai do ia hamasea. (Genese 6:13, 17) Ena be Noa be ‘kara maoromaoro harorolaia tauna’ ai ia lao, to taunimanima be ia harorolaia herevana idia abia dae lasi. (2 Petero 2:5) Taunimanima 8 sibona ese unai hadibaia hereva idia kamonai henia bona idia mauri. (1 Petero 3:20) Dahaka dainai hari inai negai unai be mai anina bada ita dekenai?
Unai Ena Anina Ita Dekenai be Dahaka?
Ita be Noa ena nega hegeregerena lalonai ita noho. Hanaihanai taunimanima hagaria kara dikadia, bese idaudia hamasea karadia, idia laloa namonamo lasi bona ipidi amo idia ala-ala kava karadia, bona ruma bese dagedage henia karadia edia sivarai ita kamonai. Tanobada be dagedage amo ia honu lou, bona guna bamona, tanobada taudia be do ia vara hahemaoro karana idia hadibadia. Iesu sibona ia gwau ia be Dirava ese ia abia hidi Hahemaoro Tauna bamona do ia mai bona taunimanima do ia hapararaia, mamoe naria tauna ese mamoe bona nanigosi ia hapararaia bamona. Iesu ia gwau, idia hegeregere lasi taudia be “davana ia dika hanaihanai gabuna dekenai do idia lao.” (Mataio 25:31-33, 46) To, Baibel ia gwau unai neganai taunimanima milioni momo do idia roho mauri—Dirava momokani tamona idia tomadiho henia hutuma bada taudia. Do ia mai tanobadana lalonai, taunimanima be maino bona noho namo do idia abia, guna bamona lasi.—Mika 4:3, 4; Apokalupo 7:9-17.
Unai bamona Baibel ia gwauraia herevadia bona hahemaoro karadia ena hadibaia herevadia idia kirikirilaia taudia momo dekenai do ia hahedinaraia unai hereva be momokani. To aposetolo Petero ia gwau unai bamona laloa kerere taudia be hereva momokani idia dadaraia. Ia gwau: “Nega dokona dekenai, tauanina ena ura sibona idia karaia taudia be do idia hedinarai . . . , do idia gwau, ‘Iesu ia gwauhamata, do ia giroa mai, a?’ . . . Kara ta idia ura laloaboio, kara be inai: Dirava ese guba bona tanobada, sibona ena oda hereva dekena amo ia karaia. Tanobada be ranu dekena amo ia karaia, bona ranu ese ia hagegea. To Dirava ese unai tanobada gunana be ranu dekena amo ia hadikaia ore, abata badana dekena amo. To harihari idia noho guba bona tanobada be Dirava ese, iena oda hereva dekena amo ia naridia noho. Oibe, idia noho hegaegae, ela bona Kota Badana Dinana dekenai. Unai neganai, lahi badana ese tanobada bona guba do ia araia ore, bona Dirava idia negea taudia be do idia boio.”—2 Petero 3:3-7.
Do ia vara hahemaoro dinana ena hadibaia herevana bona maino ena sivarai namona be tanobada ibounai dekenai idia harorolaia goadagoada noho Iesu ena peroveta hahegani herevana hegeregerena. (Mataio 24:14) Unai hadibaia herevana ita laloa maragi lasi. Siahu ibounai Diravana be ena gwauhamata do ia hagugurua.
Do Ia Mai Tanobadana
Do idia vara gaudia ita laloa neganai, taunimanima edia vaira negana be edena bamona? Iesu be ena Haroro Herevana Badana ia hamatamaia neganai, ia gwau: “Dagedage lasi taudia be idia namo, badina tanobada do idia abia.” Bena ena hahediba taudia ia hadibadia Dirava do idia guriguri henia idia gwau: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 5:5; 6:10) Oibe, Iesu ia gwau abidadama taudia be vaira nega namona inai tanobada dekenai do idia abia. Unai nega ia gwauraia ‘gau ibounai karaia matamata negana.’—Mataio 19:28.
Unai dainai vaira negana oi laloa neganai, namo lasi oi idia kirikirilaia taudia dainai Dirava ena hadibaia herevana oi daradaralaia. Momokani, toana be iseda noho ia namo, bona hari ita noholaia tanobadana be nega daudau ia noho vadaeni. To, unai ita abidadama henia lasi be namo. Tanobada taudia ia hahemaoro henidia vadaeni. Unai dainai aposetolo Petero ena revareva dokona amo goada oi abia:
“Bema inai gau ibounai unai bamona do idia boio ore, umui be edena bamona do umui noho? Umui emui kara ibounai do idia helaga be namo, bona Dirava do umui badinaia namonamo. Ma Dirava ena Dina do umui naria noho . . . Inai gaudia umui naria noho dainai, do umui noho namonamo. Mai goevagoeva bona kerere lasi danu Dirava ena vairanai do umui noho. . . . Iseda Lohiabada bona Hamauria Tauna Iesu Keriso ena hariharibada, bona iena diba, bona laloa diari lalonai do umui tubu daekau noho.” (2 Petero 3:11, 12, 14, 18) Unai dainai, Noa ena negai ia vara gauna amo diba oi abia be namo. Dirava kahirakahira dekenai oi lao. Iesu Keriso oi dibaia namonamo. Dirava badinaia karana oi goadalaia, bona inai tanobada dokona amo do idia roho mauri bona maino tanobadana dekenai do idia noho totona edia lalona idia hadaia taudia huanai oi noho.
[Picture on page 5]
Auri gaukaralaia karana be Abata ia do vara lasi neganai idia dibaia
[Picture on page 7]
Vaira negana namona do ia vara