Iehova Ena Hahemaoro be Kara Dika Taudia Latanai Do Ia Mai
“Egu kota dekenai do umui hedinarai totona do umui noho hegaegae!”—AMOSA 4:12.
1, 2. Dahaka dainai ita diba momokani Dirava ese kara dika do ia haorea?
IEHOVA ese inai tanobada ena kara dika bona hisihisi do ia hadokoa, a? Lagani 2000 ia hamatamaia lalonai, unai henanadai be mai anina bada. Gabu ibounai ita itaia neganai, taunimanima be ma taunimanima haida idia hahisia noho. Dagedage lasi, terorist karana lasi, bona kara gageva lasi tanobadana lalonai ita ura ita noho!
2 To ita moale diba, badina ita diba momokani Iehova ese kara dika do ia haorea. Dirava ena kara ese idia hamomokania kara dika taudia do ia hadikaia ore. Iehova be kara maoromaoro bona hahemaoro goeva Diravana. Salamo 33:5 dekenai iena Hereva ia gwau: “Lohiabada ese kara maoromaoro, bona kota maorona ia ura henia.” Salamo ena siri ma ta ia gwau: “Taravatu utua taudia be, Lohiabada ese ia badu henidia.” (Salamo 11:5) Momokani, Iehova, siahu ibounai bona kara maoromaoro bona hahemaoro goeva ia ura henia Diravana, be ia inai henia karadia do ia haheaukalaia hanaihanai lasi.
3. Amosa ena peroveta herevana ita tahua karana ese dahaka do ia hahedinaraia?
3 Ita abia dae momokani Iehova ese kara dika do ia kokia ena badina ma ta mani ita itaia. Idaunegai ia karaia karadia edia sivarai ese idia hamomokania. Baibel bukana Amosa lalonai, Iehova ese kara dika taudia ia kara henidia dalana edia sivarai idia noho. Amosa ena peroveta herevana ita tahua karana ese point toi do ia hahedinaraia Dirava ena hahemaoro karana dekenai. Ginigunana be, ia hahemaoro henia taudia ese ena hahemaoro karana idia abia be maoro. Iharuana be, ena hahemaoro karana amo idia heau mauri diba lasi. Bona ihatoina be, ia abia hidi taudia sibona ia hahemaoro henidia, badina Iehova ese kara dika taudia ia hamasedia, bona idia helalo-kerehai kudou-maoro taudia ia hamauridia.—Roma 9:17-26.
Dirava Ena Hahemaoro Idia Abia be Maoro
4. Iehova ese edeseniai Amosa ia siaia lao, bona dahaka do ia karaia totona?
4 Amosa ena nega ai, Israela taudia be basileia rua ai idia parara vadaeni. Ta be Iuda ena saut kahana ena iduhu rua basileiana. Bona ma ta be Israela ena not kahana ena iduhu 10 basileiana. Iehova ese Amosa ia abia hidi peroveta gaukara do ia karaia bona ena hanua Iuda amo ia siaia lao Israela dekenai. Unuseniai, Dirava ese Amosa ia gaukaralaia ena hahemaoro herevadia ia harorolaia totona.
5. Amosa ese edena bese ia peroveta henidia guna, bona Dirava ena hahemaoro idia abia be maoro ena badina ta be dahaka?
5 Amosa ese Iehova ena hahemaoro herevana be mai ena kara dika not basileiana, Israela dekenai ia harorolaia matamaia lasi. To, ia ese Israela kahirakahira idia noho bese 6 dekenai Dirava ena hahemaoro herevana ia harorolaia guna. Unai bese 6 be Suria, Pilistia, Turo, Edoma, Amono bona Moaba. To, unai bese be Dirava ena hahemaoro aukana idia abia be maoro, a? Oibe. Badina ta be idia ese Iehova ena taunimanima idia inai henidia.
6. Dahaka dainai Dirava ese Suria, Pilistia bona Turo dekenai dika do ia mailaia?
6 Haheitalai be, Iehova ese Suria taudia ia hahemaoro henidia badina “idia ese Gileada taudia idia dagedage henidia dikadika.” (Amosa 1:3) Suria taudia ese Gileada ena tano kahana idia abia—ia be Israela tanona, Ioridane Sinavai ena ist kahana dekenai—bona unuseniai idia noho Dirava ena taunimanima idia hahisidia bada. Pilistia bona Turo be edena bamona? Idia kerere badina Pilistia taudia ese Israela taudia idia guidia bona Edoma besena dekenai idia hoihoilaidia, bona Israela taudia haida be hesiai taudia idia hoihoilaia Turo taudia ese idia biagudia. (Amosa 1:6, 9) Mani oi laloa—Dirava ena taunimanima be igui hesiai taudia bamona idia hoihoilaidia! Unai dainai, Iehova ese Suria, Pilistia bona Turo do ia hadikaia be hoa gauna lasi.
7. Edena bamona Edoma, Amono, Moaba bona Israela be varavara, to unai bese toi ese Israela taudia dekenai dahaka idia karaia?
7 Edoma, Amono, Moaba bona Israela taudia be varavara. Edoma taudia be Aberahamo ena tubudia; Iakobo ena kakana Esau amo idia vara. Ita gwau diba, idia be Israela taudia edia tadikaka. Amono bona Moaba taudia be Aberahamo ena vavana Lota ena bese amo idia vara. To, Edoma, Amono bona Moaba taudia ese Israela taudia be tadikaka bamona idia kara henidia, a? Lasi vaitani! Edoma be ia hebogahisi lasi, to tuari kaia amo “edia tadina taudia” ia hamasedia, bona Amono taudia be idia abia mauri Israela taudia idia hahisia bada. (Amosa 1:11, 13) Bona, ena be Amosa ese Moaba ena kara dika Dirava ena taunimanima dekenai ia herevalaia lasi, to nega daudau lalonai Moaba be Israela taudia idia inai henia. Unai varavara besedia toi be panisi dikana momokani do idia abia. Iehova ese lahi amo idia do ia hadikaia ore.
Dirava Ena Hahemaoro amo Idia Heau Mauri Diba Lasi
8. Dahaka dainai Israela badinai idia noho bese 6 be Dirava ena hahemaoro karana amo idia heau mauri diba lasi?
8 Ita daradara lasi, Israela kahirakahira idia noho bese 6 be Dirava ena hahemaoro aukana idia abia be maoro. Bona danu, idia be unai hahemaoro karana amo idia heau mauri diba lasi. Amosa karoa 1 siri 3 amo ia hamatamaia ela bona karoa 2 siri 1 lalonai, Iehova be nega 6 ia gwau: “Edia kerere davana do lau henidia momokani.” Ena hereva hegeregerena, edia kerere davana ia henia momokani. Idia torea histori ese ia hamomokania, gabeai idia ta ta be dika bada idia davaria. Oibe, idia hani—Pilistia, Moaba, Amono bona Edoma—be hari idia noho lasi!
9. Iuda taudia dekenai dahaka ia vara be maoro, bona dahaka dainai?
9 Hari, Amosa ese bese namba 7—iena hanua Iuda—dekenai ena peroveta herevana do ia gwauraia. Israela ena not kahana basileiana dekenai idia noho taudia idia kamonai Amosa ese saut kahana basileiana, Iuda dekenai hahemaoro herevana ia harorolaia neganai, reana idia hoa. Dahaka dainai Iuda taudia ese hahemaoro aukana idia abia be maoro? Amosa 2:4 ia gwau: “Badina idia ese . . . lauegu taravatu idia badinaia lasi.” Iehova ese mai edia ura ida ena taravatu idia dadaraia karana ia moalelaia lasi. Amosa 2:5 lalonai, Iehova ia gwau: “Iuda tano dekenai lahi do lau siaia bona Ierusalema ena tuari koua magudia do lau gabua ore.”
10. Dahaka dainai Iuda be dika amo ia heau mauri diba lasi?
10 Dirava idia badinaia lasi Iuda taudia be unai dika amo do idia heau mauri diba lasi. Iehova be nega namba 7 ia gwau: “Edia kerere davana do lau henidia momokani.” (Amosa 2:4) Lagani 607 B.C.E. ai, Babulonia ese Iuda ia hadikaia ore neganai, unai dika ia davaria. Ita itaia lou, kara dika taudia be Dirava ena hahemaoro amo idia heau mauri diba lasi.
11-13. Amosa be edena bese dekenai peroveta herevana ia gwauraia, bona unuseniai dahaka kara dika idia karaia?
11 Peroveta tauna Amosa ese bese 7 dekenai Iehova ena hahemaoro herevadia ia gwauraia vadaeni. Bema ta ia laloa Amosa ena peroveta gaukara ia ore vadaeni, madi ia kerere. Amosa ena gaukara ia do ore lasi! Dirava ese ia hagania not kahana basileiana, Israela dekenai hahemaoro hereva aukana do ia gwauraia. Bona Israela taudia ese Dirava ena hahemaoro aukana ia abia be maoro, badina tauanina bona lauma dalanai idia kara dika bada herea.
12 Amosa ena peroveta herevana ese vaia Israela besena dekenai idia vara kara dikadia ia hahedinaraia. Amosa 2:6, 7 ia gwau: “Israela taudia idia kara dika lou, kara dika lou, nega momo. Unai dainai edia kerere davana do lau henidia momokani. Israela taudia ese kara maoromaoro taudia, madi edia abiatorehai idia henia lou diba lasi taudia, idia hadikaia noho. Inai Israela taudia ese unai kara maoromaoro taudia idia guia, bona idau taudia dekenai idia hoia, edia heniatorehai moni idia abia lou totona. Bona Israela taudia ese unai bamona kara idia karaia noho ogogami herea taudia dekenai, edia abiatorehai be tamaka ena davana sibona. Israela taudia ese manoka bona manau taudia idia moia diho. Bona idia ese ogogami taudia idia durua lasi.”
13 Kara maoromaoro taudia be “idau taudia dekenai idia hoia.” Reana, unai ena anina be diadi taudia ese lalo-ani monina idia abia dainai, kerere lasi taudia be koikoi dalanai idia hahemaoro henia. Heniatorehai taudia ese “tamaka ena davana dekenai” ogogami taudia be igui hesiai taudia bamona idia hoihoilaidia. Unai idia karaia ena be edia abiatorehai monina be maragi sibona. Hebogahisi lasi taudia ese “manoka” taudia idia tahua goadagoada, idia ura do idia moia diho ela bona ogogami taudia ese sibodia edia kwarana dekenai kahu idia atoa, unai ese ia hahedinaraia idia taitai, idia lalohisihisi eiava idia hemarai bada. Kara gageva be bada herea dainai dala be lasi “manau taudia” ese hahemaoro goeva idia abia totona.
14. Israela ena iduhu 10 basileiana dekenai daidia idia kara dika henidia?
14 Oi itaia edena bamona taudia idia kara dika henidia. Idia be kara maoromaoro, ogogami, manoka bona manau Israela taudia. Iehova ena Taravatu Israela besena dekenai ia gwau, manoka bona dabu taudia dekenai hebogahisi do idia hahedinaraia. To, Israela ena iduhu 10 basileiana dekenai, unai bamona taudia edia mauri be ia auka momokani.
“Egu Kota Dekenai Do Umui Hedinarai Totona Do Umui Noho Hegaegae!”
15, 16. (a) Dahaka dainai Dirava ese Israela taudia dekenai inai hereva ia gwauraia: “Egu kota dekenai do umui hedinarai totona do umui noho hegaegae!”? (b) Edena dala ai Amosa 9:1, 2 ia hahedinaraia kara dika taudia be Dirava ena hahemaoro karana amo idia heau boio diba lasi? (c) Lagani 740 B.C.E. ai, Israela ena iduhu 10 basileiana dekenai dahaka ia vara?
15 Israela be matabodaga bona kara dika ma haida amo ia honu dainai, peroveta tauna Amosa ese unai gwau-edeede besena dekenai inai hereva ia gwauraia be maoro, ia gwau: “Egu kota dekenai do umui hedinarai totona do umui noho hegaegae!” (Amosa 4:12) Abidadama lasi Israela besena be kahirakahira ia mai hahemaoro amo do ia heau mauri diba lasi, badina Iehova be nega 8 ia gwau: “Edia kerere davana do lau henidia momokani.” (Amosa 2:6) Idia ura komu kara dika taudia dekenai, Dirava ia gwau: “Tau ta do ia heau mauri lasi. Lasi momokani. Bema tano idia geia dobu, ela bona mase taudia edia gabu idia davaria, idia be unuseni danu idia hunia diba lasi, lau ese idia do lau dogoatao. Bema idia be guba dekenai idia daekau lao, lau ese idia do lau veria diho.”—Amosa 9:1, 2.
16 Kara dika taudia idia ura Iehova ena hahemaoro karana amo idia heau boio totona “tano idia geia dobu, ela bona mase taudia edia gabu,” anina be tano henunai momokani idia komu toho, to Iehova ese ia davaridia diba. Danu, Dirava ena hahemaoro karana amo idia heau boio totona “guba dekenai idia daekau lao,” anina be ataiai momokani ororo dekenai idia komu toho, to idia hegeregere lasi. Iehova ena hadibaia hereva ia hedinarai goevagoeva: Komu gabudia ibounai dekenai ia lao diba. Dirava ena hahemaoro goevana ia hahedinaraia, Israela besena be kara dika ia karaia dainai panisi ia abia be maoro. Bona unai nega ia ginidae. Lagani 740 B.C.E. ai—Asuria ese Israela basileiana ia hadikaia ore—unai be Amosa ese ena peroveta hereva ia torea bena lagani 60 murinai ia vara.
Dirava be Ia Abia Hidi Taudia Sibona Ia Hahemaoro Henidia
17, 18. Amosa karoa 9 ese Dirava ena hebogahisi karana dekenai dahaka ia hahedinaraia?
17 Amosa ena peroveta herevana amo ita itaia, Dirava ese ia hahemaoro henia taudia be iena hahemaoro idia abia be maoro, bona do idia heau mauri diba lasi. To danu, Amosa ena buka ia hahedinaraia Iehova be ia abia hidi taudia sibona ia hahemaoro henidia. Herevana, kara dika taudia be edeseniai idia komu, to Dirava ese idia ia davaria bona ia hahemaoro henidia diba. Danu, ia ese helalo-kerehai bona kara maoromaoro taudia ia davaria diba, bona idia dekenai hebogahisi ia hahedinaraia. Amosa bukana ena karoa dokona lalonai unai ia hahedinaraia namo herea.
18 Amosa karoa 9, siri 8 lalonai, Iehova ia gwau: “Iakobo ena tubuna taudia ibounai do lau alaia lasi.” Amosa 9 Siri 13 ia lao 15 lalonai, Iehova be inai bamona ia gwauhamata: “Egu bese taudia be edia tano dekenai ma do lau mailaia lou.” Unai taudia dekenai hebogahisi do ia hahedinaraia bona noho namona do idia moalelaia. Iehova ia gwauhamata: “Aniani be do ia tubu haraga herea, bona edia tubu ena haraga ese, utua gogoa taudia edia haraga do ia hanaia.” Unai mani oi laloa—aniani be bada herea momokani dainai idia do gogoa noho lalonai, tano geia bona uhe hadoa lou negana ma ia ginidae!
19. Israela bona Iuda taudia haida dekenai dahaka ia vara?
19 Ita gwau diba Iuda bona Israela dekenai Iehova ese kara dika taudia sibona ia abia hidi bona ia hahemaoro henidia, badina idia helalo-kerehai bona kudou-maoro taudia dekenai hebogahisi ia hahedinaraia. Lagani 537 B.C.E. ai, Amosa karoa 9 ena giroa lou peroveta herevana ia guguru, bona idia helalo-kerehai Israela bona Iuda taudia haida be Babulonia idia rakatania bona edia tano dekenai idia giroa lou. Edia lalokau hanuana dekenai tomadiho goevana idia haginia lou. Maino ai idia noho bona edia ruma, vine umadia bona aniani umadia idia karaia lou.
Iehova Ena Hahemaoro Dikana Do Ia Mai!
20. Amosa ese ia harorolaia hahemaoro herevadia ita stadilaia neganai, edena dala ai ita ia hagoadaia be namo?
20 Dirava ena hahemaoro herevadia Amosa amo ita stadilaia karana ese ita ia hadibaia momokani Iehova ese iseda negai idia vara kara dika do ia hadokoa. Dahaka dainai ita abia dae momokani unai do ia vara? Badina ginigunana be, Dirava ese guna kara dika taudia ia kara henidia dalana amo, iseda nega lalonai Ia ese dahaka do ia karaia ita dibaia. Iharuana be, Dirava ese Ia idia rakatania Israela ena iduhu 10 basileiana ia hahemaoro henia karana amo ita diba momokani, Dirava ese Kerisendom, “Babulonia Badana,” tanobada ibounai ena tomadiho koikoi basileiana ena kahana badana, latanai dika do ia mailaia.—Apokalupo 18:2.
21. Dahaka dainai Kerisendom be Dirava ena hahemaoro dikana ia abia be maoro?
21 Ita daradara lasi, Kerisendom be Dirava ena hahemaoro dikana ia abia be maoro. Ia lalonai idia karaia tomadiho bona mauri dalana dikana idia hedinarai goevagoeva. Iehova ena hahemaoro karana Kerisendom latanai—bona Satani ena tanobada orena latanai—be kara maorona. Danu, unai dika amo idia heau mauri diba lasi, badina hahemaoro dinana ia ginidae neganai, Amosa karoa 9, siri 1 ena hereva do ia momokani: “Tau ta do ia heau mauri lasi. Lasi momokani.” Oibe, herevana kara dika taudia be edeseniai idia komu, Iehova ese do ia davaridia.
22. Tesalonika Iharuana 1:6-8 ese Dirava ena hahemaoro karana dekenai dahaka gaudia ia hahedinaraia?
22 Dirava ena hahemaoro karana be nega ibounai ia maoro, ia abia hidi taudia sibona dekenai ia karaia bona ia hahemaoro henia taudia do idia heau mauri diba lasi. Aposetolo Paulo ena hereva ese unai ia hamomokania, ia gwau: “Hisihisi umui dekenai idia henia taudia dekenai, be ia ese hisihisi do ia henidia. Dirava ese umui bona ai, hisihisi ita abia noho taudia dekenai iena mauri namona do ia henia. Inai be do ia vara, Lohiabada Iesu bona iena aneru mai siahu bada danu guba dekena amo do idia mai neganai. Mai lahi siahu bada danu, Dirava ese ia idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia.” (2 Tesalonika 1:6-8) “Dirava ese kara maoromaoro do ia karaia” bona Iena horoa taudia idia hahisia taudia latanai, hahemaoro dikana do ia mailaia. Unai hahemaoro karana amo do idia heau mauri diba lasi, badina ‘Iesu bona iena aneru be mai lahi siahu bada danu’ do idia mai, bona kara dika taudia do idia hamasedia. Dirava ena hahemaoro karana be ia abia hidi taudia sibona dekenai do ia karaia, badina Iesu ese Dirava “idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia.” Bona Dirava idia gari henia bona hisihisi idia mamia noho taudia dekenai, Dirava ena hahemaoro karana ese namo do ia mailaia.
Kudou-Maoro Taudia Edia Helaro
23. Amosa ena buka amo dahaka helaro bona lalona hagoadaia herevana ita davaria diba?
23 Amosa ena peroveta herevana ese kudou-maoro taudia ta ta dekenai helaro bona hahegoada sivaraina ia mailaia. Amosa bukana ese ia hahedinaraia bamona, Iehova ese ena idaunega taudia ibounai ia hamasedia lasi. Gabeai, tuari amo idia abia mauri Israela bona Iuda taudia ia gogoa lou bona edia hanua dekenai idia giroa lou bona maino bona noho namo ia henidia. Iseda nega totona unai ena anina be dahaka? Ita diba momokani Dirava ena hahemaoro dinana ai, herevana kara dika taudia be edeseniai idia komu, Iehova ese do ia davaridia. Bona herevana edeseniai idia noho, iena hebogahisi idia abia be namo taudia do ia davaridia danu.
24. Iehova ena hesiai taudia hari inai negai be dahaka hahenamo idauidau idia abia?
24 Kara dika taudia latanai Iehova ena hahemaoro do ia mailaia negana ita naria noho lalonai, mai eda abidadama taudia be edena bamona? Lauma dalanai Iehova ese ita ia hanamoa bada noho! Ita be tomadiho goevana ita moalelaia, Kerisendom ena hahediba koikoi herevadia amo idia vara hereva kereredia be lasi. Danu, Iehova ese ita dekenai lauma aniani bada herea ia henia. To, namona be ita laloatao, unai hahenamo namodia ida Iehova ese ita dekenai maduna badana ia henia danu. Dirava ia ura ma haida dekenai ia mai noho hahemaoro karana ena sivarai do ita hadibaia. Iseda ura be “mauri hanaihanai idia ura kudou-maoro taudia” ita tahudia totona do ita gaukara goada. (Kara 13:48, NW ) Oibe, ita ura taunimanima momo do ita durudia hari ita moalelaia lauma aniani idia abia totona. Bona ita ura idia be kara dika taudia latanai kahirakahira do ia mai hahemaoro karana amo do idia roho mauri. To, momokani, bema ita ura unai hahenamo idauidau ita moalelaia, lalohadai maorona ita abia be namo. Gabeai, stadi herevana lalonai, Amosa ena peroveta herevana ese unai do ia herevalaia danu.
Edena Bamona Do Oi Haere?
• Amosa ena peroveta herevana be edena bamona ia hahedinaraia haida ese Iehova ena hahemaoro dikana idia abia be maoro?
• Amosa ese edena dala ai ia hamomokania taunimanima be Dirava ena hahemaoro karana amo idia heau mauri diba lasi?
• Amosa bukana be edena dala ai ia hahedinaraia Dirava ena hahemaoro karana be ia abia hidi taudia sibona dekenai do ia mailaia?
[Picture on page 10, 11]
Israela basileiana be Dirava ena hahemaoro karana amo ia heau mauri lasi
[Picture on page 12]
Lagani 537 B.C.E. ai, Israela bona Iuda taudia haida be Babulonia idia rakatania bona idia giroa lou