Iehova Ena Hereva be Ia Mauri Noho
Ioela Bona Amosa Bukadia Edia Hereva Badadia
IOELA be sibona ia gwauraia, ia be “Petuela ena natuna.” (Ioela 1:1) Ioela bukana ia hahedinaraia, ia be ena peroveta herevana ia laloa bada, to ia sibona ia herevalaia momo lasi. Dahaka dainai Ioela be sibona ia herevalaia momo lasi? Badina ia ura peroveta herevana sibona ia gwauraia bona ia torea tauna be ia laloa bada lasi. Ioela bukana idia torea negana be idia diba namonamo lasi, to idia gwau reana ia be lagani 820 B.C.E. ai ia torea, unai be Usaia ena lohia laganina namba 9 lalonai.
Danu, Usaia ena negai, ‘mamoe naria tauna bona fig audia danu ia naria’ Iuda tauna, Amosa, be peroveta gaukara ia karaia. (Amosa 7:14) Ioela be Iuda dekenai ia peroveta, bona Amosa be Israela ena not kahana ena basileia 10 dekenai ia peroveta. Amosa be Iuda dekenai ia giroa lou murinai, Amosa bukana be auka lasi dalanai lagani 804 B.C.E. ai ia torea ore.
“LOHIABADA ENA DINA BE KAHIRAKAHIRA”
Ioela ena matahanai lalonai, ia ese gaigai maragina, kwadi, bona pitopito idia mai ia itaia. Unai matahanai lalonai ia itaia gaudia be “tuari orea badana bamona.” (Ioela 1:4; 2:2-7) Ioela ia gwau: “Lohiabada ena dina be kahirakahira. Unai dina dekenai Ia ese ita do ia hadikaia bada. Unai dina ese gari bada do ia havaraia.” (Ioela 1:15) Iehova ese Siona dekenai idia noho taudia ia sisiba henia, ia gwau: “Namona be harihari, emui lalona do umui giroa momokani, bona lau dekenai do umui giroa mai lou.” Unai bamona idia karaia neganai, Iehova ese “iena bese taudia dekenai do ia bogahisihisi henia” bona “mirigini kahana” amo idia mai kwadi oreana, be do ia lulua lao. To, Iehova ena dina badana ia do mai lasi neganai, Ia ese ‘ena Lauma, be taunimanima ibounai dekenai do ia bubua diho’ bona ‘unai dina do ia mai ena toadia, be guba bona tanobada dekenai do ia atoa.’—Ioela 2:12, 18-20, 28-31.
Dirava be bese idauidau dekenai ia gwau: “Tano geia auridia edia matana, be do umui botaia palaka, tuari kaia gaudia do idia lao. Bona emui uma kaia badadia dekena amo, io do umui karaia” bona tuari totona do umui hegaegae. Unai bese idauidau ia oda henidia koura ta ladana “Dirava be Kota Biaguna” dekenai do idia haboua bona unuseniai Dirava ese do ia kota henidia bona hadikadia ore. To ‘Iuda taudia be do idia noho hanaihanai.’—Ioela 3:10, 12, 20; BHğ.
Baibel Henanadaidia Edia Haere:
1:15; 2:1, 11, 31; 3:14—“Lohiabada ena dina” be dahaka? Iehova ena dina badana ai ena inai taudia do ia hahemaoro henidia, anina be do ia haoredia to tomadiho momokani idia badinaia taudia do ia hamauridia. Hegeregere lagani 539 B.C.E. ai, idaunegai hanuana Babulonia dekenai unai bamona dina ia ginidae, unai neganai Mede bona Parasa taudia ese unai hanua idia hadikaia ore. (Isaia 13:1, 6) “Iehova ena dina” ma ta be ia mai kahirakahira, Ia ese Babulonia Badana—tomadiho koikoi ibounai oreana—do ia hahemaoro henia.—Apokalupo 18:1-4, 21.
2:1-10, 28—“Kwadi orea bada herea” ena peroveta herevana be edena bamona ia guguru? Ioela ena peroveta herevana lalonai ia gwauraia kwadi orea bada herea be laulau herevana ta sibona, bona unai bamona kwadi oreana ese Kanana tanona ia hadikaia sivaraina ta be Baibel lalonai ia noho lasi. To, kwadi oreana ena peroveta herevana be lagani 33 C.E. ai ia guguru. Unai neganai, Iehova ese Keriso ena murinai idia raka taudia edia latanai lauma helaga ia bubua bona idia harorolaia herevana ese tomadiho koikoi edia gunalaia taudia ia hahisia bada. (Kara 2:1, 14-21; 5:27-33) Hari, unai bamona gaukarana lalonai ita vareai be hahenamo badana.
2:32—Iehova ena ladana dekenai ita noinoi ena anina be dahaka? Anina be Dirava ena ladana ita dibaia, ita abidadama henia, bona unai ladana ia abia tauna ita matauraia.—Roma 10:13, 14.
3:14—“Kota Biaguna ena koura” be edena gabu ia herevalaia? Unai be laulau dalanai Dirava ena hahemaoro karana do ia karaia gabuna ia herevalaia. Iuda ena King Iehosapata—ena ladana anina be “Iehova be Kota Biaguna”—ena lohia negana ai, Dirava ese bese idauidau edia tuari taudia huanai daradara ia havaraia, unai amo Iuda besena ia hamauria. Unai dainai, unai koura idia gwauraia “Dirava be Kota Biaguna.” (Ioela 3:2, 12) Hari inai negai, unai gabu be laulau dalanai ia gwauraia vain huahua moia gabuna bamona, bona unuseniai tanobada besedia be vain huahua bamona Dirava ese do ia moidia.—Apokalupo 19:15.
Ita Dibaia Gaudia:
1:13, 14. Hahemauri davaria totona, namona be helalo-kerehai momokani ena toana ita hahedinaraia bona ita abia dae Iehova be Dirava momokani tamona.
2:12, 13. Mai kudouna ibounai ida ita helalo-kerehai be gau badana. ‘Dabua ita darea be hegeregere lasi’ to ‘eda kudouna do ita makohia’ be helalo-kerehai momokani ena toana.
2:28-32. “Lohiabada ena dina be kahirakahira” bona taunimanima ibounai do idia gari bada herea, to “Lohiabada idia noia taudia ibounai, ese mauri do idia davaria.” Ita moale badina Iehova ese ena lauma helaga be taunimanima idauidau—matamata bona buruka, tatau bona hahine—dekenai ia henia, unai amo peroveta herevadia harorolaia gaukarana idia karaia diba. Anina be, “Dirava ena hoa gaudia idia herevalaia”! (Kara 2:11) Iehova ena dina ia mai kahirakahira lalonai, namona be ita hekwarahi ‘iseda kara ibounai do idia helaga be namo, bona Dirava do ita badinaia namonamo.’—2 Petero 3:10-12.
3:4-8, 19. Ioela ia peroveta vadaeni, Iuda idia hagegea besedia be Dirava ena abia hidi besena idia kara dika henia dainai do ia panisidia. Unai peroveta herevadia idia momokani. Turo ena hanua badana be Babulonia ena King Nebukanesa ese ia hadikaia. Gabeai, Alesana Badana ese Turo ena motumotu hanuana ia hadikaia neganai, tuari taudia bona ladana bada taudia tausen momo ia hamasea, bona hanua taudia 30,000 bamona be igui hesiai taudia bamona ia hoihoilaia. Alesana bona lohia taudia ma haida ese Pilistia taudia be unai bamona idia kara henia danu. Lagani 300 B.C.E. lalonai, Edoma tanona idia hadikaia bona ia noho kava. (Malaki 1:3) Inai peroveta herevadia idia guguru karana ese iseda abidadama, gwauhamata Hagugurua Tauna, Iehova dekenai ia hagoadaia. Danu, peroveta herevadia idia guguru karana ese ia hahedinaraia, hari inai negai tomadiho momokani idia kara dika henia taudia be Iehova ese do ia hadikadia ore.
3:16-21. “Guba bona tanobada do idia mareremarere,” bona bese idauidau ese Iehova ena hahemaoro aukana do idia mamia. “To Lohiabada ese iena bese taudia do ia naria namonamo,” bona paradaiso lalonai mauri hanaihanai do ia henidia. Inai tanobada dikana do ia hahemaoro henia dinana ia kahirakahira lalonai, iseda lalona ita hadaia Iehova kahirakahira ita noho be gau badana.
“EGU KOTA DEKENAI DO UMUI HEDINARAI TOTONA DO UMUI NOHO HEGAEGAE!”
Amosa ese ia gwauraia sivaraina be Iuda, Israela bona kahirakahira idia noho besedia totona. Suria, Pilistia, Turo, Edoma, bona Moaba be dika do idia davaria, badina idia ese Dirava ena taunimanima idia kara dika henia. Bona Iuda besena be dika do ia davaria badina “lauegu taravatu idia badinaia lasi.” (Amosa 2:4) To, Israela ena basileia 10 be edena bamona? Ia ese ogogami taudia ia kara dika henia, matabodaga karadia ia karaia, bona Dirava ena peroveta taudia ia dagedage henidia. Amosa ia gwau, Iehova ese ‘Betele ena boubou patadia do ia hadikaia ore’ bona ‘keru negana rumadia bona siahu negana rumadia do ia hadikaia ore.’—Amosa 3:14, 15.
Ena be Iehova ese idia ia panisia loulou, to Israela taudia be kaivakuku idia tomadiho henidia noho bona idia helalo-kerehai lasi. Amosa ese ia hamaorodia: ‘[Dirava] ena kota dekenai do umui hedinarai totona do umui noho hegaegae!’ (Amosa 4:12) Israela taudia dekenai Iehova ena dina ia ginidae, anina be ‘igui hesiai taudia bamona, idia do ia siaia daudau, tano ta, Damaseko unai kahana dekenai,’ unai be Asuria tanona dekenai. (Amosa 5:27) Betele ena hahelaga tauna ta ese Amosa ia dagedage henia, to ia gari lasi. Iehova ese Amosa ia hamaoroa: “Lauegu bese Israela taudia edia dokona be inai. Lau ese edia kerere davana do lau henia. Egu lalona do lau giroa lou lasi.” (Amosa 8:2) Dirava ena kota dekenai idia hunia diba lasi. (Amosa 9:2, 3) To, hanamoa lou gwauhamatana ia noho. Iehova ia gwau: “Egu bese taudia be edia tano dekenai, ma do lau mailaia lou. Idia ese edia hanua dikadia, ma do idia haginia lou, bona noholaia. Idia ese vain umadia do idia hadoa, bona unai uaina do idia inua. Idia ese edia uma do idia karaia, bona idia havaraia gaudia do idia ania.”—Amosa 9:14.
Baibel Henanadaidia Edia Haere:
5:5—Dahaka dainai Iehova ese Israela taudia ia hamaoroa ‘Betele dekenai Ia do idia tahua lasi’? Ieroboama be Betele dekenai boromakau ena natuna tomadiho henia karana ia hamatamaia. Unai nega amo, unai gabu be tomadiho koikoi gabuna ai ia lao. Reana, Gilegala bona Bere Sieba be tomadiho koikoi gabudia. To, Israela taudia be dika idia davaria lasi totona, namona be unai gabu lao henia karana idia hadokoa bona Iehova do idia tahua.
7:1—“King ena rei idia utua vadaeni” gauna ese dahaka ia laulaulaia? Reana, unai ese King ena hosi dekenai idia guia taudia bona ena animal naria totona idia abia takisi monina ia laulaulaia. “Rei matamata ia tubu noho” lalonai, unai takisi moni do idia henia. Unai murinai, uma ena anina do idia haboua. To, uma ena anina idia do haboua ore lasi neganai, kwadi oreana be edia uma gabu bona tubutubu gaudia ma haida idia hadikaia.
8:1, 2—“Au huahua, idia mage gaudia, bosea lalonai” ese dahaka ia laulaulaia? Ia hahedinaraia Iehova ena dina ia mai kahirakahira. Idia mage au huahua be uma ena anina haboua negana ena dokona ai idia gogoa. Matahanai lalonai Amosa ese “au huahua, idia mage gaudia, bosea lalonai” ia itaia, unai amo ia diba Israela taudia totona dokona be ia kahirakahira. Unai dainai, Dirava ese Amosa ia hamaoroa: “Lauegu bese Israela taudia edia dokona be inai. Lau ese edia kerere davana do lau henia. Egu lalona do lau giroa lou lasi.”
Ita Dibaia Gaudia:
1:3, 6, 9, 11, 13; 2:1, 4, 6. Iehova be Israela, Iuda, bona edia badina hanuadia siks dekenai ia badu, unai dainai ia gwau: “Edia kerere davana do lau henidia momokani.” Iehova ena hahemaoro karana amo ta ia heau mauri diba lasi.—Amosa 9:2-5.
2:12. Namona be painia taudia, sekit bona distrik naria taudia, misinari taudia, eiava Betele taudia dekenai lalona hamanokaia herevadia ita gwauraia lasi. Hegeregere ita gwau lasi, edia ful-taim hesiai gaukara idia rakatania bona ita bamona idia noho. Lasi. To, idia ita hagoadaia edia gaukara namona idia karaia noho totona.
3:8. Laiona ia boiboi ita kamonai neganai ita gari, ani? Unai hegeregerena, Iehova ese Amosa ia hamaoroa ‘iena bese Israela do ia peroveta henidia’ neganai, ia ese Iehova ena gadona ia kamonai. (Amosa 7:15) Dirava gari henia karana ese ita do ia veria Basileia sivaraina ita harorolaia goadagoada totona.
3:13-15; 5:11. Iehova ena heduru dainai, mamoe naria tauna Amosa be Iehova ena dina idia laloa lasi kohu momo taudia ia haroro henidia diba. Unai hegeregerena, ena be iseda haroro teritori be auka, to Iehova ese ita ia durua Basileia ena sivarai namona ita harorolaia totona.
4:6-11; 5:4, 6, 14. Ena be Israela taudia idia kara dika loulou bona Iehova dekenai idia “giroa” lou lasi, to Amosa ese ia hamaorodia: “Lohiabada dekenai do umui lao, vadaeni mauri do umui davaria.” Unai hegeregerena, Iehova ese inai tanobada dikana ia do haorea lasi lalonai, ita ese ma haida ita durua Dirava dekenai idia giroa mai totona.
5:18, 19. Ita ura “Lohiabada ena dina” do ia mai, to ita hegaegae lasi be kavakava karana. Unai bamona ia karaia tauna be hegeregere laiona amo ia heau boio to bea ese ia hagaria, bona bea amo ia heau boio neganai, gaigai ese ia koria. Namona be iseda hetura karana Iehova ida do ita “naria” namonamo bona ita hegaegae noho be aonega karana.—Luka 21:36.
7:12-17. Namona be mai gari lasi ida Dirava ena hereva ita gwauraia hedinarai.
9:7-10. Ena be Dirava ese Israela taudia be Aigupito amo ia ruhadia bona edia tubudia be Iehova idia abidadama henia taudia, to idia be Iehova idia dadaraia bona edia kara be Kusu taudia bamona. Namo lasi ita laloa iseda tubudia be abidadama taudia dainai, Dirava ese ita do ia lalonamo henia. To gau badana be Ia ita ‘gari henia, bona kara maoromaoro ita karaia’ noho.—Kara 10:34, 35.
Dahaka Do Ita Karaia?
Satani ena tanobada do ia hahemaoro henia dinana be ia kahirakahira. Dirava ese lauma helaga be Ia idia tomadiho henia taudia dekenai ia henia, unai amo taunimanima dekenai Iena hahemaoro dinana idia harorolaia diba. Namona be ita ese ma haida ita durua Iehova idia dibaia bona Iena ladana dekenai do idia boiboi.—Ioela 2:31, 32.
Amosa ia gwau: “Kara dika do umui ura henia lasi momokani, kara namo do umui ura henia noho, bona kota maoromaoro sibona do umui karaia.” (Amosa 5:15) Iehova ena dina be ia mai kahirakahira, unai dainai aonega karana be Dirava kahirakahira ita lao bona inai tanobada bona ena kara dika ita dadaraia be namo. Unai ita karaia diba totona, ita be nega korikori ai Ioela bona Amosa edia buka amo hereva namodia momo ita dibaia!—Heberu 4:12.
[Picture on page 18]
Ioela ia peroveta: “Lohiabada ena dina be kahirakahira.”
[Pictures on page 21]
Amosa bamona, namona be mai gari lasi ida Dirava ena hereva ita harorolaia