Peroveta Taudia Tohotohoa—Amosa
1. Dahaka dainai Amosa ena haheitalai ese ita ia durua diba?
1 Oi mamia haroro ai oi be hegeregere lasi badina emu diba be bada lasi bona emu kohu be momo lasi, a? Bema oibe, vadaeni Amosa ena haheitalai ese oi ia durua diba. Ena be mamoe ia naria bona nega haida biru gaukara ia karaia, to Iehova ese ia abia hidi ena kota herevana ia harorolaia totona. (Amo. 1:1; 7:14, 15) Hari danu, Iehova ese manau taudia ia gaukaralaia. (1 Kor. 1:27-29) Amosa ena sivarai ma haida ese edena bamona ita ia durua ita haroro noho totona?
2. Haroro lalonai, dahaka dainai dagedage negadiai ita gini goada diba?
2 Dagedage Negadiai Oi Gini Goada: Israela ena not kahana ena iduhu 10 basileiana ai, hahelaga tauna Amasaia be boromakau ia tomadiho henia. Ia ese Amosa ena peroveta herevana ia kamonai neganai, mai badu ida ia gwau: ‘Oi lao ruma! Ai oi rakatania! Ai be mai emai tomadiho!’ (Amo. 7:12, 13) Ia ese peroveta tauna ena hereva ia mogea bona King Ieroboama ia noia Amosa ena gaukara ia taravatua totona. (Amo. 7:7-11) To Amosa ia gari lasi. Hari, dubu gunalaia taudia haida be gavamani ena lalona idia ania Iehova ena taunimanima ia dagedage henia totona. To, Iehova ia gwau tuari gauna ta ese ita do ia hadikaia diba lasi.—Isa. 54:17.
3. Dahaka sivarai rua be hari ita harorolaia?
3 Dirava Ena Kota Bona Vaira Negana Ena Hahenamo Harorolaidia: Ena be Amosa ia peroveta Iehova ese Israela ena iduhu 10 basileiana do ia kota henia, to ena buka dokonai ia gwau, Dirava ese unai bese do ia haginia lou bona hanamoa. (Amo. 9:13-15) Ita danu be Dirava ena “hahemaoro negana” ita harorolaia, to unai be “Basileia ena sivarai namona” ena kahana ta sibona. (2 Pet. 3:7; Mat. 24:14) Iehova ese Aramagedono ai kara dika taudia ia haorea murinai, tanobada paradaisona do ia vara.—Sal. 37:34.
4. Dahaka dainai ita diba Iehova ena ura ita hagugurua diba?
4 Dagedage taudia momo huanai, Iehova ena ura bona eda gwauhamata hegeregerena, Basileia sivaraina ita harorolaia be mai ena hekwarahi. (Ioa. 15:19) To ita diba, Iehova be ita do ia durua noho ena ura ita hagugurua totona, Amosa dekenai ia karaia bamona.—2 Kor. 3:5.