Duahia Taudia Edia Henanadai

Idaunegai Israela dekenai, palai dubu bona dubu helagana ai Helaga Herea Gabuna lalonai ia hedinarai diaridiari idia gwauraia Shechinah ena anina be dahaka?

Iehova be iena taunimanima ia lalokau henia Tamana bona Gimaia Tauna bona ia hahedinaraia ia be Israela dekenai ia noho. Unai ia hahedinaraia dalana ta be ia idia tomadiho henia gabuna lalonai ori diaridiarina ta ia hedinarai.

Unai diaridiari ese Iehova ena noho ia laulaulaia. Palai dubuna bona Solomona ese ia haginia dubu helagana ena Helaga Herea Gabuna ai ia hedinarai. To, ita gwau lasi Iehova be unuseniai ia noho momokani. Lasi. Dirava be taunimanima ese idia karaia ruma ta lalonai ia noho diba lasi. (2 Sivarai 6:18; Kara 17:24) Dirava ena helaga momokani gabuna dekenai unai diaridiari ia hedinarai ese hahelaga tauna ia hagoadaia, bena ia amo Israela taudia danu idia diba momokani, Iehova be idia ida ia noho bona Ia ese idia ia naria bona edia dabu gaudia ia henia.

Baibel idia torea haorea negana murinai, idia gaukaralaia Aramia gadona ai unai diaridiari idia gwauraia Shechinah (shekhi·nahʹ). Anina be “ia noho gauna” eiava “noho gabuna.” Unai hereva be Baibel lalonai ia noho lasi, to Aramia gado dekenai idia hahanaia Heberu Revarevadia, idia gwauraia Targums lalonai idia gaukaralaia.

Iehova ese Mose dekenai palai dubu haginia dalana ia hadibaia neganai, ia gwau: “Koua gauna be Maua ena latanai do umui atoa, umui koua. Unuseniai, Maua ena koua gauna, kara dika gwauatao gabuna ena ataiai, kerubi aneru edia huanai, lau ese unai gabu dekenai oi danu do ita hedavari bona oi dekenai lauegu Taravatu do lau hadibaia.” (Esodo 25:​21, 22) Unai Maua be mai ena golo koua gauna bona Helaga Herea Gabuna dekenai ia noho. Bona golo amo idia karaia kerubi rua be Maua ena koua gauna latanai idia atoa.

Iehova be edeseni amo do ia hereva? Haere be Mose dekenai ia gwauraia: “Lau be ori lalonai lau hedinarai noho, Taravatu Maua ena koua gauna ena atai dekenai.” (Levitiko 16:⁠2) Unai ori be Maua helagana ataiai, golo kerubi rua huanai ia hedinarai. Baibel ese ori ia noho ena daudau Maua ena koua gauna amo eiava kerubi rua edia ataiai amo be ia gwauraia hedinarai lasi.

Unai ori diarina ese Helaga Herea Gabuna ia hadiaria. Unai daiutu lalonai diari gauna ma ta be lasi. Kara Dika ena Davana Karaia Dinana ai hahelaga tauna be unai daiutu lalonai ia vareai neganai, unai ori diarina amo gabu ia itaia diba. Ia be Iehova ena vairanai ia gini.

Unai diaridiari be mai ena anina Keristani taudia dekenai, a? Aposetolo Ioane be matahanai ta lalonai hanua ta ia itaia, “hanuaboi be lasi unuseni.” Unai hanua be Ierusalema matamatana, ia lalonai idia toreisi lou bona Iesu ida idia lohia horoa Keristani taudia idia noho. Unai haheitalai hanuana ena diari be dina eiava hua amo ia abia lasi. Iehova Dirava ese unai orea ia hadiaria, Shechinah orina ese Helaga Herea Gabuna ia hadiaria bamona. Bona danu, Iesu Keriso, Mamoe ena Natuna be unai hanua ena “lamepa.” Bena, Iehova ese bese ibounai amo ia hamauria taudia ia hakaua totona, unai “hanua” ese idia latanai lauma diarina bona hahenamo ia halasia.​—⁠Apokalupo 21:​22-25.

Iehova idia tomadiho henia taudia be ia amo unai hahenamo momo herea idia abia dainai, idia diba momokani, Iehova be idia ia gimaia Mamoe Naria Tauna bona hebogahisi Tamana.