Oiemu Kara Hebou Durua Totona
1 Iseda hebou karana ese ita idia durua Iehova ita diba namonamo totona. Ita idia durua iena taravatu bona ia gwauraia dala maorodia ita diba bona ita badinaia totona. Hebou ese ita idia durua ita hegaegae namonamo mauri ia havaraia haroro gaukarana ita habadaia totona. Bona ita idia durua ita tahua gauna, mauri hanaihanai Dirava ena tanobada matamatana lalonai, ita davaria totona. Hebou dekenai hora momo ita negea, to bema ita hegaegae namonamo iseda hebou karana amo namo bada ita abia diba.
2 Hebou amo namo ita davaria dalana be toi: (1) ita hegaegae, (2) ita haere bona (3) ita kamonai gaudia ita gaukaralaia. Unai gau toi be idia gaukara hebou bamona. Bema oi hegaegae namonamo oi be mai moale danu oi haere be ia auka lasi. Mai moale danu oi haere neganai emu abidadama karana oi hahedinaraia, unai ese hebou taudia ia hagoadaia bona ia durudia idia gaukara goada totona. (Ef. 4:29) Hebou dekenai bema iboudiai be idia kamonai henia herevana ena anina idia lalo-pararalaia, bona edia mauri ia durua bona taunimanima be hahediba taudia ai idia halaoa gaukarana dekenai idia gaukaralaia dalana idia diba, vadaeni unai hereva do idia gaukaralaia diba.
GIMA KOHORONA BONA KONGREGESEN BUKA STADI
3 Gima Kohorona bona Kongregesen Buka Stadi be mai anina bada heboudia, badina unai hebou amo “hesiai tauna mai ena kamonai bona mai ena kara maoromaoro” oreana ese mai edia kamonai ruma bese taudia ia ubudia. (Mat. 24:45-47) Nega oi atoa do oi stadilaia herevana oi hegaegaelaia totona, a? Oi hegaegae hebou dekenai haere oi henia totona, a? Bema unai bamona oi karaia hebou oi durua bada.
4 Bema Gima Kohorona bona Kongregesen Buka Stadi totona hereva oi hegaegaelaia namonamo, vadaeni henia karana oi moalelaia diba. (Kara 20:35) Tadikaka momo idia gwau hereva badadia makaia karana be heduru badana. Idia torea siri iboudiai oi kehoa bona edia anina be dahaka, stadi ena hereva dekenai, oi laloa namonamo neganai, dahaka dainai unai siri idia torea ena badina do oi diba. Oi sibona emu hereva amo haere oi henia diba eiava paragraf ena hereva oi duahia sibona, a? Tiokratik stadi oi karaia neganai, gau badana be oi diba gaudia oi abia dae momokani bona mai lalo-parara bona mai moale danu unai hereva oi badinaia.—Her. 2:5; 4:7, 8.
HARORO BONA HESIAI HEBOUDIA
5 Haroro School dekenai hereva ta oi idia henia neganai, oi laloa unai be gaukara namona Iehova ena amo dainai oi hegaegaelaia namonamo, a? Namona be hereva ena anina oi tahua namonamo dala namona ai do oi henia totona. Ena be hebou dekenai gaukara ta oi idia henia lasi, to stadi oi karaia totona namona be pura iboudiai sediual ia gwauraia hegeregerena, Bible siridia bona ma hereva haida do oi hegaegaelaidia. Hesiai Hebou totona unai bamona oi hegaegae danu. Bema oi hegaegae guna, hebou ena nega lalonai idia herevalaia gaudia be oi diba vadaeni dainai do oi hekwarahi lasi, to idia herevalaia gaudia oi laloa namonamo diba.
6 Hesiai Hebou dekenai haheitalai karaia neganai bona Haroro School dekenai hereva henia neganai, namona be oiemu hanua dekenai idia vara gaudia oi hahegeregerea taunimanima iboudiai durua totona. Namona be oi hegaegae namonamo. Danu, dabua namona oi karaia neganai oi be haheitalai namona taunimanima vairanai.
7 Namona be mai moale danu oi hegaegae namonamo hereva oi henia totona. Tama bona sina e, natudia umui durudia idia hegaegae bona sibodia edia hereva amo haere idia henia totona. Momokani, bema ita ibounai ita hegaegae bona ita goada karaia nega korikori dekenai hebou dekenai ita ginidae totona, hebou dekenai hereva namodia momo do ita kamonai bona unai heduru hereva namodia do ita moalelaidia bada. Unai dala amo oi heduru diba “hebou taudia haginia bona durua totona,” a?—1 Kor. 14:26.
[Questions]
1. (a) Hebou amo ita abia gau namodia hani oi gwauraia? (b) Dahaka ita karaia bena hebou dekena amo namo bada ita abia diba?
2. (a) Hebou amo namo ita abia daladia toi be dahaka? (b) Dahaka dainai ita gwau idia gaukara hebou bamona? (c) Efeso 4:29 be edena bamona ita ia hagoadaia? (d) Dahaka ese hebou taudia ia durua idia kamonai henia herevana idia badinaia totona?
3. (a) “Hesiai tauna mai ena kamonai bona mai ena kara maoromaoro” oreana be edena dala amo mai edia kamonai ruma bese taudia ia ubudia? (b) Hebou taudia be edena dala rua amo unai ‘aniani’ ena namo idia abia diba?
4. (a) Kara 20:35 ena hereva hegeregerena, hebou dekenai iseda moale edena bamona ita habadaia diba? (b) Dahaka dainai sibona eda hereva amo ita haere be namo? (c) Hereva Lada-isidia 4:7, 8 ese ita ia hagoadaia dahaka ita karaia totona?
5. (a) Haroro School dekenai hereva ta oi idia henia neganai edena bamona do oi laloa be namo? (b) Hebou totona hegaegae guna karana ena namo be dahaka?
6. Haroro School dekenai hereva ita henia bona haheitalai ita karaia neganai, hebou taudia durudia bada totona dahaka ita karaia?
7. Ita ibounai be dahaka ita karaia diba iboudiai ese hebou ena hereva idia moalelaia totona?
This article is repeated in km 9/95.