Ma Haida Dekenai Dirava Ia Ura Dahaka Ita Karaia Ita Hadibaia
1 Taunimanima momo ita do davaria noho, lauma dalanai “Lohiabada ena hereva” dekenai idia dabu. (Am. 8:11) Ma haida idia abia dae Dirava ia noho, to ena ura bona ia ura karadia idia diba lasi. Unai dainai, namona be mauri herevana, Basileia ena hereva momokani unai, do ita hadibaia idia dekenai. Bema ita hegaegae namonamo bona dala ia kehoa neganai, Iehova ena ura idia ura dibaia taudia do ita davaridia diba.
2 April bona May hua lalodiai, ita ese Gima Kohorona sabskripsen do ita hariharilaia. Danu Awake! sabskripsen oi hariharilaia diba eiava bema mai dalana unai magasin ruaosi edia sabskripsen oi henia toho, hegeregere bisinesi teritori ai eiava oiemu Baibel stadi bona lou henia taudia dekenai. Bema sabskripsen idia abia lasi neganai, magasin rua oi hariharilaia toho. Ma danu, nega ginigunana, Dirava Ia Ura Dahaka Ita Karaia? buklet do ita hariharilaia. Unai buklet ena laulau namodia bona lalona veria henanadai dainai taunimanima momo ese unai buklet idia ura henia bada. Henunai be lalohadai haida, ita idia durua edena bamona unai magasin bona buklet ita gaukaralaia namonamo diba.
3 Taunimanima Ita Tahua: Ruma-ta-ruma-ta gaukarana lalonai, taunimanima be edia ruma dekenai ita davaria momo lasi neganai, idia noho gabudia ai ita tahudia bona ita hereva henidia be mai anina bada. September 1996 ena Iseda Basileia Gaukara lalonai idia udaia pepana ese ita ia hagoadaia sivarai namona be gabu ibounai dekenai ita harorolaia—dala dekenai, PMV bona peleini ai, loaloa uma gabudia, motuka atoa gabudia, bona bisinesi gabudia ai. Haheitalai ta be inai, bisinesi teritori idia karaia lalonai, painia tadikakana ta ese Filipino tauna ta ia hereva henia ia gwau ia ese iseda magasin be Philippines dekenai ia abidia danu. Ia ese unai painia tadikaka ia boiria iena opesi dekenai bona ia hamaoroa unai be nega ginigunana Witness taudia ia itaia Papua New Guinea dekenai. Ia ese magasin 20 bona Creation buka ta ia abia! Edena bamona kwalimu oi moalelaia vadaeni, gabu ibounai dekenai sivarai namona oi harorolaia neganai? Gima Kohorona bona Awake! bona Dahaka Ita Karaia? buklet be dala idauidau ai ita haroro neganai do ita gaukaralaia, badina unai magasin bona buklet ese taunimanima edia mauri lalonai idia vara gaudia idia hahedinaraia bona taunimanima edia laloa karana ia habadaia.
4 Herevahereva Hamatamaia Dalana: October 1996 ena Iseda Basileia Gaukara pepana ena murina kahana dekenai ia hedinarai edena bamona Gima Kohorona bona Awake! hariharilaia herevana ita hegaegaelaia diba. Unai hereva ese oi do ia durua danu Dahaka Ita Karaia? buklet hariharilaia dalana oi hegaegaelaia neganai. Hereva haida sibona ita gwauraia diba eiava Baibel siri ta ita gaukaralaia diba danu. Iseda hamatamaia herevana ita abia hidi namonamo be mai anina bada, badina oi hereva henia tauna ena lalona ia veria diba bena ia ura kamonai noho. Haida idia kwalimu inai hamatamaia herevana idia gaukaralaia neganai: “Hereva ta lau duahia bona lau ia hagoadaia, bona lau ura oi ida lau herevalaia.” Eiava henanadai namona ta oi gwauraia diba ta ena lalona oi veria do umui herevahereva totona.
5 Bema ia hegeregere emu gabu dekenai, inai bamona henanadai oi gaukaralaia diba inai hua lalonai:
◼ “Hari inai negai graffiti, momoru negea kava karana, bona hodahoda hadikaia karadia momo ita itaia noho. Dahaka ese inai tanobada do ia hagoevaia bona noho gabuna namona ai do ia halaoa?” Haere oi naria, bona oi hadibaia oi mailaia magasin lalonai, edena bamona inai tanobada ibounai be uma namona ai do ia lao dalana ia hedinarai. Hereva ta, siri kwadogina ta, bona laulau mai kala namodia magasin matamata ta amo oi hahedinaraia, bona sabskripsen oi hariharilaia toho. Bema ia abia lasi neganai, magasin oi henidia toho. Hereva oi do hadokoa lasi neganai, dala oi hegaegaelaia oi lou henia totona.
◼ “Oi laloa Dirava ia ura ita be hari ita davaria hekwakwanai idauidau huanai ita noho, a?” Ruma tauna ia haere murinai, reana oi gwau: “Iesu ese ena hahediba taudia ia hadibaia gurigurina, Dirava ena Basileia do ia mai gurigurina, be reana oi diba. Nega haida oi laloa, Dirava ena Basileia be dahaka, a?” Dahaka Ita Karaia? buklet ena kahana 6 oi kehoa, bona idia noho henanadai oi duahia. Bena paragraf ginigunana oi duahia lalonai, henanadai ginigunana ena haere oi hahedinaraia. Oi hahedinaraia henanadai ibounai edia haere kwadogina be paragraf lalonai do ia davaria. Buklet oi hariharilaia, davana be 40 toea, bona dala oi karaia do oi giroa lou Basileia ena hereva ma haida do oi kikilaia totona.
◼ “Idia laloa namonamo taudia momo be hari idia laloa tomadiho be taunimanima edia hekwakwanai idia havaraia, idia hanamoa lasi. Dahaka oi laloa unai kara dekenai?” Ruma tauna ena lalohadai oi kamonai murinai, tomadiho koikoi ia kwalimu lasi gauna ta eiava do ia ore herevana ta Gima Kohorona matamatana ta lalonai oi hahedinaraia. Oi nanadaia bema ia ura sabskripsen dalanai Gima Kohorona magasin be nega ibounai ena pos opesi dekenai do ia abia. Bema ia abia lasi neganai magasin haida oi hariharilaia. Oi do lao lasi neganai, emu ladana oi gwauraia bona ena ladana oi nanadaia, oi hamaoroa oi ura do oi giroa lou bona tomadiho momokani ese taunimanima ia durua dalana umui kikilaia.
◼ “Hekwakwanai momo idia vara ruma bese lalonai dainai, nega haida oi laloa, ruma bese lalonai moale korikori davaria dalana be dahaka, a?” Haere totona oi naria, bena oi hahedinaraia Baibel lalonai, Dirava ese ruma bese hamoalea dalana ia herevalaia. Reana Isaia 48:17 oi duahia. Bena Dahaka Ita Karaia? buklet ena kahana 8 oi kehoa, bona ruma bese taudia ta ta idia durua Baibel siridia oi hahedinaraia. Kahana matamanai idia noho henanadai oi duahidia. Ruma tauna oi henanadai henia bema ia ura haere do ia duahia. Bema ia ura, buklet oi henia ia dekenai ia itaia totona bona oi hahedinaraia sibona ena kopi ta ia abia diba davana be 40 toea. Oi hamaoroa ma nega ta do oi giroa lou bona Baibel amo idia mai hakaua herevadia ruma bese hamoalea totona do umui herevalaia.
6 March 1997 ena Iseda Basileia Gaukara lalonai idia udaia pepana ese ita ia hagoadaia mai gari lasi ida lou henia ita karaia. Ia hahedinaraia namona be Dahaka Ita Karaia? buklet ita gaukaralaia Baibel stadi hamatamaia totona, bema nega ginigunana ai lasi, vadaeni lou henia neganai oi hamatamaia. Anina bada gauna taunimanima dekenai be idia diba Dirava ia ura dahaka idia karaia bena ena ura idia badinaia. (Kol. 1:9, 10) Haida do ita durudia bada April bona May hua lalodiai bema ita diba gaudia, mauri totona Iehova ia ura dahaka ita karaia gaudia, be idia ita hadibaia hamatamaia.—1 Kor. 9:23.