“Do Umui Gaukara Goada”
1 Iehova ita gwauhamata henia neganai, ita gwau iseda gau namodia do ita henia ia dekenai. Aposetolo Petero ese Keristani ginigunadia ia hagoadaia idia gaukara goada Iehova ena lalo-namo abia totona. (2 Pet. 1:10) Hari inai negai Iehova ita hesiai henia neganai, ita ura ita gaukara goada ia hamoalea totona. Edena bamona unai ita karaia? Iseda hetura karana Iehova ida ia bada ia lao bona ita totona ia karaia gaudia ita laloa bada neganai, unai ese iseda kudouna ia hamarerea bona ena hesiai gaukara ita karaia mai iseda goada ibounai ida. Ita ura iseda hesiai gaukara ita hanamoa bona bema mai dalana, unai gaukara ita habadaia.—Sal. 34:8; 2 Tim. 2:15.
2 Iena hesiai gaukara ia ura habadaia mero matamatana ta ia davaria, Dirava ena hereva ia stadilaia hanaihanai ese ia durua Iehova ia laloa bada bona ena haroro goadagoada urana ia habadaia. Unai gaudia ese ia idia hagoadaia painia gaukara ia hamatamaia totona. Taihu ta ia davaria ia diba lasi taudia ia hereva henidia be auka, to heduru herevadia be Herevalaia buka amo ia gaukaralaia bena daudau lasi murinai, anina namona ia davaria ena hesiai gaukara amo. Ia ese tau ta bona ena adavana ida Baibel stadi ta ia hamatamaia bona hereva momokani idia abia dae.
3 Oi Karaia Diba Gaukarana Dainai Oi Moale: Ita haida be hekwakwanai badadia ita davaria, hegeregere gorere, ruma bese idia dagedage, ogogami, eiava teritori lalonai sivarai namona idia ura lasi idia kamonai taudia momo ita davaria. Danu, hari inai nega dokonai idia vara hekwakwanai momo be iseda hesiai gaukara idia koua diba. (Luka 21:34; 2 Tim. 3:1) Unai ese ia hahedinaraia iseda gwauhamata Iehova dekenai ita hagugurua lasi, a? Lasi, bema ita be mai iseda goada ibounai ida ia ita hesiai henia.
4 Namo lasi iseda hesiai gaukara ena bada be ma haida edia hesiai gaukara ena bada ida ita hahegeregerea. To, Baibel ese ita ia hagoadaia “ta ta ena kara ena kara ia diba be namo.” Ita karaia diba hesiai gaukara ibounai ita karaia neganai, Iehova ita hamoalea bona do ita “heagilaia diba.”—Gal. 6:4; Kol. 3:23, 24.
5 Namona be aposetolo Petero ena sisiba ita badinaia noho: ‘Do umui naria namonamo. Mai goevagoeva bona kerere lasi bona mai maino danu Dirava ena vairanai do umui noho.’ (2 Pet. 3:14) Unai amo noho namo bona Iehova sibona ese ia henia diba lalo-maino do ita abia.—Sal. 4:8.