Emu Goada Ibounai Oi Henia, A?

“GOADA ibounai ida do lau gaukara toho.” Nega momo ta ese unai hereva murinai ia gwau “to,” bona ia gaukara goada diba lasi ena eksius momo ia gwauraia! Iseda gwauhamata herevana Iehova dekenai be edena bamona?

Gwauhamata herevana ita karaia ena anina be ‘dirava ta ena gaukara ita karaia eiava ia sibona ita tomadiho henia eiava helaga gaukarana ita karaia.’ Iesu ese ia hahedinaraia goevagoeva Iehova gwauhamata henia ena anina be dahaka, ia gwau: “Tau ta bema ia ura lauegu murina dekenai do ia raka, ia sibona ena ura do ia laloa lasi, iena satauro do ia huaia, lauegu murina dekenai do ia raka.” (Mataio 16:24) Sibona ena ura ia dadaraia bona Dirava dekenai ia gwauhamata tauna ena mauri lalonai Dirava ena ura ia karaia be gau badana momokani.

Sibona eda kara do ita tahua namonamo be gau badana. Petro be horoa Keristen taudia ia hagoadadia neganai, sibona eda kara ita tahua ena badina ia hahedinaraia, ia gwau: “Umui gaukara goada, inai boiboi bona inai abia hidi do umui hamomokania totona. Badina unai bamona umui karaia neganai emui abidadama dekena amo do umui moru lasi.” (2 Petero 1:10) Oibe, bema iseda goada ibounai ida ita gaukara, lauma dalanai do ita moru lasi.

Iseda Gaukara Ita Habadaia Diba

Momokani, namona be Dirava dekenai idia gwauhamata hesiai taudia iboudiai be edia goada ibounai ida idia gaukara. To, unai gaukara ita habadaia diba. Lagani toi merona be ena sinana ia durua totona ena goada ibounai ida gaukara maragina ta ia karaia, to ia tubu bada sisina neganai, gaukara ma haida do ia karaia diba. Iseda tubu lauma dalanai be unai hegeregerena​—guna iseda goada ibounai ena bada bona hari iseda goada ibounai ena bada be idia idau.

Iseda moale Iehova dekenai ia bada ia lao neganai, ita ura iseda hesiai gaukarana ita habadaia danu. Baibel ita stadilaia neganai, ita diba Dirava be ita dekenai gau momo ia henia, bona unai ese ita ia hagoadaia. Hegeregere, Iehova ese iena Natuna ia siaia ena mauri do ia henia taunimanima be kara dika amo do ia ruhadia totona, bona unai sivarai ena anina ita tahua bona ita laloa namonamo neganai, ita ura mauri davana henia dalana ia Havaraia Tauna ita hesiai henia. (Ioane 3:​16, 17; 1 Ioane 4:​9-11) Bema nega momo ‘ita mamia toho bena ita diba, Iehova be namo,’ unai ese iseda kudouna ia hamarerea bona ita ura iseda hesiai gaukarana ita habadaia.​—Salamo 34:8.

Nega ibounai hesiai gaukarana ia karaia hahine ta, ladana Jetter, be unai ia diba. Ia stadilaia herevana ena anina ibounai ia tahua namonamo diba totona, iena ruma lalonai daiutu maragina ta ia abia hidi bona ia gaukaralaia. Gau ibounai ia atoa namonamo ia stadi namonamo totona. Watch Tower Publications Indexes bona Gima Kohorona bona Noga! bound volume bukadia be ia abidia haraga diba gabunai ia atodia hegaegae. Ia gwau: “Lalona veria sivaraidia lau stadilaia neganai, lau ura taunimanima lau hadibadia haraga.”

Bema nega tamona Baibel ita stadilaia neganai ita gwau lasi dina ma haida dekenai lauma aniani ita ania lasi be namo. Ruth ia diba stadi hanaihanai karana be gau badana, badina ia maragi negana amo, iena ruma bese taudia be daba bona hanuaboi anianina murinai idia iboudiai be Baibel idia duahia hebou. Hari, iena lagani be 81 bona lagani 60 lalodiai ia be nega ibounai hesiai gaukarana ia karaia vadaeni, to hanaihanai daba rere 6:00 okoloko ia noga neganai, Baibel ia do duahia noho. Gima Kohorona bona Noga! magasin ia abidia neganai, Ruth be nega ia atoa do ia duahidia totona. Ia gwau: “Emu abidadama ia goada noho totona Dirava ena Hereva oi stadilaia noho be gau badana.” Unai kara ese ia durua lagani momo lalodiai misinari gaukara ia karaia noho totona.

Iseda Goada Ibounai Ida Haida Ita Durudia

Bema hanaihanai Dirava ena Hereva dobudia ita stadilaia, Dirava hesiai henia urana ia habadaia, bona iseda lalona ese ita ia doria hesiai gaukara do ita habadaia totona. (Ieremia 20:9 itaia danu.) Unai bamona ura be Hirohisa ia hagoadaia ena hesiai gaukarana do ia karaia namonamo totona. (2 Timoteo 4:5) Ia be ena sinana bona ena tadidia bona ena taihudia hani danu ia noho. Lagani 20 ia do abia lasi neganai, Hirohisa be ena ruma bese durua totona daba kahana 3 okoloko dekenai ia toreisi bona ruma ta ruma ta dekenai niuspepa ia abidia lao. Ia ura taunimanima dekenai Iehova ena sivarai ia hadibaia gaukarana do ia habadaia, unai dainai Hirohisa be aplikeisini ia torea pioneer gaukara do ia karaia totona, unai be Iehova ena Witness orea ena nega ibounai hesiai gaukarana. Ena be ia be tauhau sibona, to ia ura dikadika taunimanima ma haida ia durudia ia danu Iehova hanamoa gaukarana idia goadalaia totona.

Taunimanima ma haida ita durudia totona iseda goada ibounai ida ita gaukara ena anina be haroro gaukara ita karaia namonamo. Nega ta Iesu be ena hahediba taudia ia hagoadadia inai bamona: “Bema umui diba bona bema umui karaia, be do umui namo.” (Ioane 13:17) Naomi ena kara be haheitalai namona, iseda haroro gaukara hanamoa totona Iehova ena orea amo ita abia heduru herevadia ia badinaia. Ruma ta ruma ta ai ia haroro neganai, ia diba lasi taudia ia hereva henidia be ia auka ia dekenai, bona nega momo edia iduara dekenai ia gini neganai ia diba lasi dahaka do ia hereva. Elda taudia be idia hamaoroa namona be Reasoning From the Scriptures bukana, “Introductions for Use in the Field Ministry”a henunai idia noho heduru herevadia do ia badinaia. “Family/Children” ena hereva henunai idia noho hamatamaia herevadia be ena lalona dekenai ia lalodia tao totona nega momo idia ia karaia toho. Unai dainai, lagani 30 ia abia vadaeni ruma hahine ta ida idia kiki hebou diba. Naomi be unai hahine dekenai ia do lou henia lasi neganai, Kingdom Hall dekenai ia mai. Ia dekenai Baibel stadi idia hamatamaia. Unai ruma hahine bona ena adavana be bapatiso Keristen taudia ai idia lao vadaeni, bona edia natudia ida ruma bese moalena idia abia.

Iseda Goada Ibounai Ida Edia Namo Ita Tahua

Danu, aposetolo Paulo ena kara ita tohotohoa be namo, ia gwau: “Sivarai Namona dainai inai kara ibounai lau karaia, iena mauri namona lalonai [taunimanima ma haida danu] hanamoa do lau abia totona.”​—1 Korinto 9:​22, 23.

Hatsumi ena kara be unai bamona. Hatsumi be haroro gaukara dekenai hahine ta ia davaria, bona unai hahine be ruma lalona amo, telefon bamona gauna amo idia kiki, ia gwau ia bisi dainai idia kiki hebou diba lasi. Ruma hahine be mai manau ia hereva dainai, Hatsumi be ia lou henia loulou. Hanaihanai unai ruma hahine be telefon gauna sibona amo ia hereva, ena ruma ia rakatania lasi idia hedavari namonamo totona. Lagani rua mai kahana lalodiai unai bamona idia herevahereva hebou.

Dina ta ai, Hatsumi be nega idauna ai unai hahine ia lou henia, adorahi kahanai ia lao. Ruma dekenai ta ia noho lasi. To, ruma ia rakatania lalonai, ia diba gadona ia gwau, “Oi be daika?” Ruma hahine be ruma dekenai ia giroa mai. Hatsumi ena ladana ia diba neganai maoromaoro ia gwau. “Oi be lau oi vadivadi henia loulou, ani? Lauegu namo oi tahua noho dainai oi lau tanikiu henia.” Guna unai hahine be ma gabu ta dekenai Iehova ena Witness taudia ida ia stadi, to stadi ia hadokoa, bona Hatsumi ia mai neganai ia ura lasi ena iduara ia kehoa badina ia hemarai. Baibel stadi ia dekenai idia hamatamaia lou, bona unai ruma hahine ia goada ia lao noho. Ruma ta ruma ta gaukara dekenai ita davaria taudia be unai bamona edia namo ita tahua, a?

Emu Goada Ibounai Oi Henia

Bema iseda goada ibounai ita henia iena hesiai gaukara dekenai, Iehova ese unai ia moalelaia. Ia be tamana bamona, natuna be ia dekenai harihari gaudia ia mailaia neganai. Lagani idia hanai lalodiai, natuna ena lagani ena bada bona ena moni hegeregerena tamana dekenai ia henia harihari gaudia be idauidau. Ena natuna be kudouna ibounai ida harihari gaudia ia henia neganai, ena tamana be mai moale danu ia abidia dae, unai hegeregerena, iseda kudouna ibounai ida bona iseda lauma goadana hegeregerenai hesiai gaukara ita karaia neganai, Iehova be mai moale danu ia abia dae.

Momokani, namo lasi oiemu hesiai gaukara ena bada bona ma haida edia hesiai gaukara ena bada oi hahegeregeredia. Paulo ia gwau, sibona eda kara namo ita heagilaia diba, to ‘ma tau ta ena kara danu ita hahegeregerea’ be namo lasi. (Galatia 6:4) Namona be aposetolo Petro ena sisiba ita badinaia noho, ia gwau: ‘Umui naria namonamo. Dirava vairanai mai goevagoeva, kerere lasi bona maino danu Dirava ena vairanai do umui noho totona.’​—2 Petero 3:14.

[Footnotes]

[Picture on page 29]

Emu goada ibounai ida heduru herevadia be haroro gaukara lalonai oi gaukaralaidia, a?