Eregabe Taudia e—Dahaka Lauma Gaudia Umui Tahua?
1 Iehova ia diba gaukara mai anina bada bona oi tahua diba gaudia ese moale idia havaraia. (Genese 1:28; 2:15, 19 itaia.) Hari inai negai, Iehova ese haroro gaukara bona hadibaia gaukara be iena taunimanima dekenai ia henia. Ita tahua gauna badana danu be mauri hanaihanai Paradaiso lalonai. Bema ita ura lasi iseda goada bona kohu ita haorea kava, namona be lauma gaudia ita tahua noho.—1 Kor. 9:26.
2 Eregabe Taudia ese Idia Tahua Diba Gaudia: Namona be eregabe taudia ese edia diba bona goada hegeregerena, tiokratik gaudia idia tahua. (1 Tim. 4:15) Maragidia haida be idia do duahiduahi diba lasi neganai, Baibel ena buka ta ta edia ladadia idia laloatao. Ruma bese stadi karana amo, natudia be hebouhebou hegaegaelaia dalana idia dibaia bena lauma gaudia haida idia tahua diba: mai anina bada haere do idia henia bona Tiokratik Sikuli lalonai do idia vareai. Natudia be haroro gaukara lalonai edia tama sina idia bamoa neganai, do idia diba idia be mai edia maduna haroro dekenai bona bapatiso lasi pablisa ai idia lao totona idia gaukara goada diba. Namona be tama sina ese edia natudia dekenai gwauhamata bona bapatiso idia herevalaia badabada.
3 Bema oi be tauhau eiava ulato, oi tahua lauma gaudia haida be dahaka? “Oi ia karaia Dirava do oi laloa” dalana ta be mai anina bada gaudia oi tahua emu mauri lalonai. (Had. 12:1; Sal. 71:17) Emu sikuli holide huadia lalonai, heduru painia oi karaia diba, a? Ful-taim hesiai gaukarana hegeregere regula painia gaukara oi laloa danu, a? Gado idauna ta oi dibaia toho, bena nega vaira bema dala ia noho, emu gabu eiava ma gabu idauna dekenai ia noho grup eiava kongregesen dekenai oi lao diba heduru henia totona, ani? Hari Betele eiava sekit bona distrik gaukara eiava misinari gaukara idia karaia taudia be guna idia do sikuli neganai, ful-taim hesiai gaukara be edia tahua gauna. Oi danu unai bamona oi karaia diba, ani?
4 Oi do maragi neganai, Iesu ena haheitalai oi tohotohoa. Ena be iena mauri lagani be 12 sibona, to lauma gaudia ia herevalaia mai gari lasi ida. (Luka 2:42-49, 52) Bema oi tahua gaudia be sibona emu stadi oi karaia, dina ta ta ibounai Baibel oi duahia, bona hebouhebou gabudia dekenai bona haroro hesiai gaukarana lalonai idia goada Keristani taihu bona tadikaka oi bamoa loulou, unai ese oi do ia durua Dirava ena Basileia be ma haida dekenai do oi hadibaia namonamo totona, Iesu ia karaia bamona.