Baibel—Dirava Ena Hakaua Gauna Taunimanima Ibounai Totona
1 Baibel ibounai bilioni hani bamona idia printaia vadaeni gado 2,100 dekenai, anina be tanobada dekenai idia noho taudia amo 90 pesen ese Dirava ena Hereva idia abia diba. To, tanobada dekenai hitolo bada ia noho “Lohiabada ena hereva totona.” (Am. 8:11) Baibel idia abia taudia momo be idia duahia lasi eiava ena anina idia lalo-pararalaia lasi. Edena bamona ita ha-uradia diba Baibel be hakaua gauna namona bamona idia gaukaralaia edia mauri lalonai?
2 December lalonai Buka Helaga—Dirava Ena Hereva Eiava Taunimanima Edia? buka, Tau Hereadaena buka, eiava Lau Egu Bible Sivarai Buka do ita hariharilaia. Inai buka tamona eiava haida ita hariharilaia mai goada ida neganai, ita hahedinaraia Iehova ese ita dekenai iena Buka Helaga lalonai ia hahedinaraia hereva momokanidia ita laloa bada. Ita hegeregerena, unai buka ese kudou namo taudia idia durua diba, do idia laloa Baibel be Dirava ena hakaua gauna taunimanima ibounai totona. Mani emu kara unai buka ta ta oi gaukaralaia, to iniseniai heduru herevadia haida idia noho Buka Helaga—Dirava Ena Hereva Eiava Taunimanima Edia? buka oi hahedinaraia totona.
3 “Bible Oi Abidadama Henia Diba,” pepapepana amo oiemu hereva oi hamatamaia diba. Reana oi gwau:
◼ “Ena be tanobada taudia 90 pesen mai kahana ese Baibel idia abia diba, to taunimanima haida sibona ese Baibel idia duahia loulou. Oi laloa ena badina be dahaka?” Pepapepa ena paragraf ginigunadia rua bona 2 Timoteo 3:16 oi duahia. Dirava Ena Hereva bukana oi hariharilaia toho. Bema ia abia lasi, ruma tauna oi hagoadaia pepapepa ena hereva ibounai do ia duahia ore. Sinado dokona, “Vaira Negana Perovetalaia,” oi hahedinaraia namonamo.
4 Idia dekenai “Bible Oi Abidadama Henia Diba” pepapepana oi rakatania taudia oi lou henia neganai, inai oi tohoa diba:
◼ Oiemu ladana oi gwauraia lou murinai, pepapepa ena paragraf ginigabedia rua oi duahia. Ruma tauna oi nanadaia bema nega ta ia ese mauri hanaihanai tanobada dekenai ia lalohadailaia. Ia haere murinai, oi gwau: “Iehova ena Witness taudia be idia diba momokani Baibel lalonai idia noho peroveta herevadia ibounai edia anina be do idia vara, Dirava ena ura idia badinaia taudia edia vaira negana do ia namo herea peroveta herevadia danu.” Dahaka Ita Karaia? buklet ena rau 13 dekenai ia noho laulauna oi hahedinaraia, kahana 5 dekenai oi giroa lou, bona oi hamaoroa idia noho henanadai edia haere umui kikilaia diba, unai dala amo stadi oi hamatamaia.
5 Oi diba vadaeni ta be tomadiho ia laloa bada neganai, reana inai bamona oi hamatamaia:
◼ “Papua New Guinea dekenai idia noho ruma bese momo be mai edia Baibel, bona idia matauraia badina ia be Dirava ena Hereva, to hekwakwanai badadia idia davaria neganai Baibel idia tahua lasi. Unai bamona kara oi itaia, a? [Haere naria.] Reana idia diba lasi Baibel be peroveta buka sibona lasi, to dina ta ta ibounai iseda mauri dekenai ita idia hakaua mai anina bada herevadia idia noho. Inai buka, Buka Helaga—Dirava Ena Hereva Eiava Taunimanima Edia?, ese ia hamomokania Baibel ia herevalaia gaudia be momokani bona hari inai negai ruma bese idia davaria hekwakwanai idia hanaia daladia ia gwauraia.” Buka amo karoa 8 eiava karoa 12 ena hereva haida oi hahedinaraia, bena buka oi hariharilaia.
6 Bema “Dirava Ena Hereva” buka ta oi hariharilaia vadaeni, inai bamona oi hereva diba:
◼ “Vanegai oi lau vadivadi henia neganai, Baibel be edena bamona ita ia durua hari idia vara ruma bese hekwakwanai ita hanaia totona, ita herevalaia. Ia be Dirava ena Hereva idia abia dae taudia be heduru idia abia danu, mai moale ida idia no namonamo totona. Lau ura oi danu lau rakatania bukana lalonai Baibel ena hakaua hereva ta ruma bese totona, be oi dekenai lau hahedinaraia.” Karoa 12, paragraf 23-25 dekenai ia noho Baibel ena hakaua hereva ta oi herevalaia, bona dokonai, paragraf 26 oi duahia. Bema kamonai toana ia hahedinaraia, Diba buka eiava Dahaka Ita Karaia? buklet lalonai Baibel stadi oi hamatamaia toho.
7 Reana inai hereva ese buruka taudia edia lalona ia veria:
◼ “Guna ruma momo dekenai taunimanima ese Baibel idia duahia bona ruma bese ese Baibel ena hakaua herevadia idia badinaia. Oi matamata neganai, oiemu ruma bese be unai bamona idia karaia, a? [Haere naria.] Hari inai negai momo idia laloa namonamo lasi dainai nega idia atoa lasi Baibel duahia totona eiava idia laloa Baibel ena hakaua hereva be gau gunadia. Buka Helaga—Dirava Ena Hereva Eiava Taunimanima Edia? buka, ena karoa 13 lalonai, Baibel idia stadilaia murinai edia mauri idia hanamoa taudia toi edia sivarai ia hahedinaraia. Bema oi ura oi duahia edena bamona Dirava ena Hereva ena siahu ese idia ia durua, mai moale ida inai buka be oi dekenai do lau rakatania, ena davana be K1.50 sibona.”
8 Oi lou henia neganai, inai bamona oi hereva diba:
◼ “Guna ita herevahereva neganai, ita gwau hari inai negai taunimanima ese Baibel ena hahegani goevadia idia dadaraia. To unai be mai anina ita dekenai, a? [Haere naria.] Iesu Keriso ese Baibel amo diba abia karana ia laloa bada.” Ioane 17:3 oi duahia. Bena Diba buka lalonai karoa 1 ena paragraf 5 oi duahia. Iseda davana lasi Baibel stadi program oi herevalaia, bona Baibel stadi oi haheitalaia.
9 Oi guriguri Iehova ese emu hekwarahi do ia hanamoa, Baibel—Dirava ena hakaua gauna—be taunimanima ibounai dekenai oi hahedinaraia diba.