Hebou Lao Henidia Karana “Do Umui Habadaia be Namo”
1 Iehova ena taunimanima idia hebou be hanaihanai mai anina bada. Israela taudia be guna mai edia dubu helagana bona dubu ma haida tomadiho momokani idia karaia totona, Dirava ena hahediba idia abia totona, bona hebamo namona idia moalelaia totona. Unai hegeregerena, Keristani taudia ginigunadia ese edia hebou karana idia hadokoa lasi. Inai dina gabedia dikadia lalonai, hekwarahi bona hahetoho idia momo idia lao neganai, iseda kongregesen heboudia ese idia henia lauma goada ita abia be namo, bona unai ita abia totona hebou lao henidia karana ‘do ita habadaia be namo.’ (Heb. 10:25) Hebou dekenai ita lao ena badina toi mani oi laloa.
2 Hebamo Totona: Baibel ese ita ia sisiba henia ita be ‘ta ta dekenai goada do ita henia, bona durua do ita henia.’ (1 Tes. 5:11) Dirava idia badinaia taudia edia hebamo ese lalohadai namodia amo iseda lalona ia hahonua bona ita ia doria kara namodia ita karaia totona. To bema sibona ita noho, ita be kavakava, sibona eda namo ita tahua, eiava matabodaga lalohadaidia do ita abidia.—Aon. 18:1.
3 Hadibaia Herevadia Totona: Keristani heboudia ese hanaihanai Baibel ena hadibaia herevadia amo, ita idia durua, iseda kudouna ai Dirava lalokau henia karana ia mauri noho totona. “Dirava ena ura ibounai” ita badinaia totona hakaua hereva namodia idia henia. (Kara 20:27) Hebou ese ita idia hadibaia sivarai namona harorolaia bona hadibalaia gaukarana be edena bamona ita karaia, bona hari unai diba be mai anina bada bema Baibel ena hereva momokani do idia abia dae taudia ita davaria bona durua karana amo ita ura moale ita abia.
4 Ita Idia Gimaia Totona: Inai tanobada dikana lalonai, kongregesen be heau mauri gabuna korikorina ta—maino bona lalokau gabuna ta. Hebou dekenai ita noho neganai, Dirava ena lauma helaga ese ita ia durua bada lauma ena huahua “lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana,” ita havaraia totona. (Gal. 5:22, 23) Hebou ese ita idia hagoadaia abidadama dekenai ita gini goada totona. Ita idia durua, do ita abia hahetoho lalonai ita hegeregere totona.
5 Hanaihanai hebou lao henia karana dainai, iseda hemami be salamo ia torea tauna ese Salamo 133:1, 3 dekenai ia herevalaia bamona, ia gwau: “Bema Dirava ena taudia do idia noho hebou, mai edia laloa tamona neganai, unai kara be namo, bona mai ena moale danu.” Hari inai negai, herevana edeseniai Dirava ena taunimanima idia gaukara hebou bona idia mai hebou, unuseniai “Lohiabada ese . . . iena hanamoa do ia atoa. Iena hanamoa be inai: Mauri hanaihanai.”