Dirava Ena Peroveta Herevadia Ibounai Do Idia Vara Momokani!
1 Nega ibounai Iehova ena Witnes taudia ese Baibel ena peroveta herevadia idia laloa bada. Unai dainai, inai lagani ena distrik hebouhebou ena sinado, “Dirava Ena Peroveta Herevana” ita kamonai neganai ita moale bada. Iehova ese “aniani neganai” ita totona ia hegaegaelaia gauna ita ura bada ita dibaia. (Mat. 24:45) Bona gau namodia ia henia.
2 Hebouhebou Ena Hereva Badadia: Friday dekenai hebouhebou ena hereva badana be “Dirava Ena Peroveta Herevana Oi Kamonai Namonamo,” bona lalo-parara ita abia totona, ia lalonai Iesu ena toana ia idau sivaraina ia herevalaia. (Mat. 17:1-9) Ia hahedinaraia, hari inai negai, nega namo herea ita davaria gwauraia, badina inai tanobada ena dokona ia kahirakahira momokani, bona tanobada matamatana be iseda vairanai ia noho! Dirava ena Hereva ita kamonai namonamo dalana mai anina bada be ia ita duahia hanaihanai. “Dirava Ena Hereva Duahia Karana Oi Moalelaia” ena hereva toi, ese heduru hereva namodia idia gwauraia iseda Baibel duahiduahi karana amo moale bona anina namona ita davaria totona.
3 Saturday adorahi ai, dina gabediai ita noho idia hamomokania gaudia ita riviulaia. Unai ibounai oi laloatao diba, a? Sunday daba ai, Habakuku ena peroveta herevana ita herevalaia, ita dibaia gauna be iena nega bona iseda nega be hegeregere bona mai anina bada gaudia be kahirakahira do idia vara, badina Iehova ese kara dika taudia do ia haorea bona kara maoromaoro taudia do ia hamauria. Esau bona Iakobo ia herevalaia Baibel drama ena hereva badana oi dibaia, a? Iehova ena amo idia mai hahenamo ita tahua goadagoada be namo, bona laloa lasi karana ita dadaraia.
4 Lalona Ia Veria Buka Matamatana: Ita moale bada buka matamatana Pay Attention to Daniel’s Prophecy! ita abia neganai. Ai laloa oi ese unai lalona ia veria bukana oi duahia matamaia vadaeni. Hereva ia henia tauna ese unai buka ia halasia neganai, ia gwau: “Daniela ena peroveta herevadia kahirakahira ibounai idia guguru vadaeni, edia kahana haida sibona idia do guguru lasi.” Unai ese ia hahedinaraia momokani hari iseda negai karaharaga lalohadaina ita dogoatao be gau badana, ani?
5 Unai hebouhebou ena program ese iseda abidadama ia hagoadaia momokani, bona ita diba idia do guguru lasi Dirava ena peroveta herevadia ibounai be do idia vara momokani. Unai ese ita ia durua, Dirava ena peroveta herevana be ma haida dekenai do ita harorolaia!