‘Kara Namodia Do Ita Karaia’ Noho

¹ Aposetolo Paulo ena haroro goadagoada lagani dokodia lalonai, Timoteo bona Tito ida ia gaukara hebou. Idia ta ta dekenai ia torea hagoadaia herevadia idia hegeregere. Tito ia hamaoroa “Dirava idia abidadama henia taudia” be “kara namodia sibona do idia karaia” be namo. (Tito 3:8) Timoteo ia hamaoroa Dirava idia abidadama henia taudia ese “kara namodia do idia karaia.” (1 Tim. 6:​17, 18) Unai be sisiba namona ita ibounai totona! To dahaka ese ita do ia durua, iseda mauri lalonai kara namodia ita karaia totona? Bona vaira dinadia ai dahaka kara namodia ita karaia be namo?

² Kara namodia ita karaia badina Iehova ita abidadama henia bona lalokau henia dainai bona ita dekenai ia henia helaro namona dainai. (1 Tim. 6:​19; Tito 2:​11) Inai nega lalonai, ita laloa lou gauna be Iehova ese iena Natuna tanobada dekenai ia siaia, unai amo Iesu ese ena Tamana ena ladana ia hahelagaia bona idia ura mauri hanaihanai idia abia taudia ibounai totona dala ia kehoa. (Mat. 20:28; Ioa. 3:​16) March 28 ai, Keriso ena Memorial hebouna dekenai unai do idia hahedinaraia goevagoeva. Mauri hanaihanai helarona ese eda lalona ia veria ‘kara namodia do ita karaia’ noho totona, ani? Oibe! Dahaka kara namodia be hari ita karaia be namo?

³ March Bona Murina Huadia Lalonai Kara Namodia Karaia: Momokani, lagani ta ta lalonai Iehova ena Witnes taudia tanobada hegegemadai edia mai anina bada hebouna​—Memorial​—dekenai do ita lao. (Luka 22:19) To ita ura unai hebou ena moale be taunimanima momo ida ita moalelaia hebou. January 1, 2002, Gima Kohorona, rau 19-22 ai ia noho hesiai laganina ena ripoti oi itaia, ia hahedinaraia lagani gunanai Papua New Guinea ai, Memorial hebouna dekenai idia mai taudia edia namba be nega 5 pablisa taudia edia namba ia hanaia. Idia mai taudia momo be unuseniai idia noho badina Memorial ena boiboi pepana idia abia. Unai dainai, hari amo ela bona March 28, nega ita atoa be namo Memorial dekenai taunimanima ita boridia mai, idia ita durua hahemauri ena helaro idia dibaia totona.

⁴ April ena hua lalonai, edena dala ai ita hahedinaraia diba ‘kara namodia do ita karaia’? Sivarai namona harorolaia gaukara be mai eda ura bada ida ita karaia, unai amo “kara namodia do ita karaia.” (Tito 2:​14; Mat. 24:14) Bema March lalonai heduru painia gaukara oi karaia lasi, April bona May eiava idia ta dekenai oi karaia diba, a? Bema March lalonai do oi heduru painia, unai do oi karaia noho, a?

⁵ Moni gaukara idia karaia taudia haida idia davaria, gaukara totona idia lao neganai hora ta bamona idia haroro diba, badina dala ai, eiava daba momokani ai edia bisinesi idia kehoa taudia dekenai idia haroro. Haida ese sediual idia karaia, edia dina tubua negana ena hora kahana idia gaukaralaia haida idia haroro henia totona. Haida idia davaria, unai nega lalonai edia gaukara turana ida Baibel stadi idia karaia diba. Ruma dekenai idia noho taihudia momo ese nega idia atoa, edia natudia be sikuli dekenai idia lao neganai haroro gaukara idia karaia totona. Dina haida ai edia ruma gaukara karaia totona daba momokani idia toreisi, unai dina lalonai idia be mai edia nega bada haroro bona hahediba gaukara idia karaia.​​—Efe. 5:​15, 16.

⁶ Ena be oi hegeregere lasi heduru painia oi karaia, to sibona emu sediual oi karaia haroro gaukara oi habadaia totona, namona be oi gaukara goada ‘kara namodia oi karaia, kohu oi haria karaia, haida oi durua’ hereva momokani idia diba totona.​​—1 Tim. 6:18.

⁷ Hahediba Taudia Halaoa Gaukara Namona Oi Laloa: Lagani ta ta ai, kamonai taudia be Memorial dekenai idia mai. Ia hegeregere bema kongregesen lalonai haida ese unai hebou dekenai idia mai to idia stadi noho lasi taudia idia durua, a? Unai taudia ita lou henidia diba, bena ita durudia lauma dalanai idia goada idia lao totona, a? Reana Memorial dekenai idia mai taudia haida be Witnes taudia edia varavara. Ma haida be reana guna idia stadi taudia bona ita hagoadaia be namo stadi idia karaia lou bona kongregesen ena hebou ibounai dekenai idia mai totona. Idia be ita ida Iehova ena hesiai taudia goadadia ai idia lao neganai moale bada ia mailaia!

⁸ March bona murina huadia lalonai haroro gaukara ita habadaia dainai, toana be ita lou henia diba kamonai taudia momo do ita davaria. Idia dekenai henanadai ta oi rakatania. Bena oi hamaorodia gabeai oi mai neganai do oi haerelaia. Unai bamona ita karaia neganai, dala do ia kehoa lou henia ita karaia totona. Lou henia ita karaia haraga neganai, anina namona do ita abia. Bema ita vadivadi henia nega ginigunana ai stadi ita karaia lasi, namona be gabeai ita vadivadi henia neganai, stadi ita hamatamaia.

⁹ Bema dala dekenai ita haroro neganai, namona be taunimanima ida herevahereva ita hamatamaia daladia ita laloa noho be namo. Bema unai haroro dalana amo ita davaria tauna ena ladana, adres, eiava telefon namba ita abia, ia ita lou henia be namo. Bema oi davaria tauna be emu teritori dekenai ia noho lasi, namona be kongregesen ma ta ena pablisa ta dekenai unai hereva oi gwauraia, unai amo unai tauna ia lou henia diba. Bema hegeregere kongregesen ena seketere ese unai dekenai oi ia durua diba. Nega haida, ia ese brens opesi dekenai unai hereva ia siaia idia ese dala idia karaia totona. Unai dala amo, unai kamonai tauna ena ura ita habadaia diba.

¹⁰ Bema telefon namba ita abia to adres ita abia lasi, namona be unai tauna be telefon amo oi hereva henia lou. Do oi herevalaia gauna oi hegaegaelaia guna. Herevalaia bukana oi dogoatao hereva haida oi itaia haraga totona. Haida ese anina namona idia davaria haida be telefon amo idia stadi henidia dainai, bona inai taudia haida be guna ruma dekenai idia davaria lasi taudia. Taihu ta be ruma-ta-ruma-ta gaukarana dekenai ia davaria kamonai hahine edia telefon namba ia abia, bona unai dainai Baibel stadi rua ia hamatamaia.

¹¹ Elda Taudia ida Gaukara Hebou Haroro Lasi Taudia Durua Totona: Elda taudia idia ura bada unai taudia idia durua totona. Unai bamona taudia haida be sibodia edia ura dainai kongregesen ena hebou idia lao henia noho. Idia lalo-parara namona be Iehova ena orea kahirakahira idia noho, unai amo Salamo 91 ese ia gwauraia bamona, lauma dalanai noho namo do idia abia. Idia haida be hari idia hegeregere haroro gaukara idia karaia lou totona. Bema haroro lasi pablisa haida be inai hua lalonai Memorial hebouna idia mai, reana do idia ura ta ese idia ida Baibel stadi do ia karaia. Bema unai bamona, elda taudia ese dala do idia karaia ta ese heduru ia ura abia tauna idia stadi henia totona. Bema oi idia noia unai heduru oi henia totona, idia ida oi gaukara hebou karana idia laloa bada.​​—Roma 15:​1, 2.

¹² ‘Kara Namodia Do Oi Karaia’ Noho: Hua tamona eiava ma haida lalonai heduru painia idia karaia taudia momo idia davaria, murina huadia lalonai edia haroro gaukara idia habadaia. Kamonai taudia idia davaria, bona idia laloa unai taudia idia lou henia be namo. Unai ese idia ia hagoadaia haroro gaukara idia karaia momo totona, unai amo idia davaria kamonai taudia idia lou henia diba. Haida ese stadi idia hamatamaia, bona unai ese idia ia durua haroro gaukara idia habadaia totona.

¹³ To ma haida ese haroro bona hahediba taudia halaoa gaukarana dekenai moale bada idia davaria dainai, unai ese idia ia hagoadaia edia mauri lalonai idia atoa guna gaudia idia tahua namonamo totona. Unai dainai, haida ese edia moni gaukara ena hora idia hamaragia bona heduru painia gaukara idia karaia noho diba. Ma haida be regula painia gaukara idia karaia matamaia. Unai amo idia ese Dirava idia abidadama henia badabada, tanobada ia henia gaudia lasi. Idia davaria ‘edia kohu idia haria karaia, haida idia durua totona,’ ese Iehova amo hahenamo badadia ia mailaia bona edia helaro “mauri” korikorina dekenai ia hagoadaia. (1 Tim. 6:​18, 19) Oibe, momo ese painia gaukara idia karaia neganai, kongregesen taudia ibounai ese namo idia davaria. Painia taudia be nega momo edia ekspiriens idia herevalaia bona ma haida idia boiria idia ida haroro gaukara idia karaia totona, bona unai ese kongregesen lalonai lauma gaudia laloa bada karana ia habadaia.

¹⁴ Namona be ita ibounai ese Memorial negana bona murina huadia lalonai ‘kara namodia ita karaia’ bona iseda Keristani hesiai gaukarana ita habadaia. Iehova ese kara maoromaoro tanobada matamatana dekenai ita noho ena helaro namona ia henia dainai, namona be ita ese ia dekenai iseda tanikiu karana ita hahedinaraia.​​—2 Pet. 3:​13.