‘Umui Abidadama Taudia Ibounai E, Lohiabada Do Umui Lalokau Henia’
Iesu Ena Mase Laloatao Hebouna be April 4 ai Do Ita Karaia
1 Lagani haida gunanai, Ukraine be Komiunis gavamanina henunai ia do noho neganai, gavamani taudia ese tadikaka idia itaia namonamo—Lohiabada Ena Anibou dinana ia kahirakahira negana be namo—badina idia laloa tadikaka edia hebou gabuna do idia davaria. Nega momo unai be hekwakwanai ta, badina gavamani taudia be Iesu ena mase laloatao dinana idia diba. Tadikaka be dahaka idia karaia diba? Taihu ta ena ruma ena henuna daiutu dekenai be abata ia noho. Gavamani taudia idia laloa taunimanima be unuseniai idia hebou diba lasi dainai, tadikaka ese ranu latanai, ranu ena dobu be ela bona tuina dekenai, platfom ta idia karaia. Ena be guhi be henuna momokani dainai do idia igo diho bona idia helai, to kongregesen be mai moale ida Memorial hebouna idia karaia, ta ese ia hadikaia lasi.
2 Iseda Ukraine tadikakadia ese edia lalona idia hadaia Iesu ena mase idia laloatao haheganina idia badinaia totona, unai ese edia lalokau Dirava dekenai ia hahedinaraia namo herea. (Luka 22:19; 1 Ioa. 5:3) Iseda mauri lalonai hekwakwanai haida ita davaria neganai, unai bamona tadikaka edia haheitalai ese ita ia hagoadaia be namo, bona iseda lalona ita hadaia April 4 ai Lohiabada Ena Anibou dekenai ita lao totona. Unai bamona ita karaia neganai, ita hahedinaraia iseda lalohadai be salamo torea tauna ena ane bamona: “Lohiabada dekenai umui abidadama henia taudia ibounai e, Lohiabada do umui lalokau henia.”—Sal. 31:23.
3 Ma Haida Durua Edia Lalokau Dirava Dekenai Idia Habadaia: Dirava lalokau henia karana ese danu iseda lalona ia veria ma haida ita boiria ita ida Iesu ena mase ita laloatao hebou totona. February ena Iseda Basileia Gaukara lalonai idia udaia pepana ese ita ta ta ia hagoadaia, Memorial dekenai ita ura boiria taudia edia lista ita karaia totona. Emu lista dekenai idia noho taudia ta ta oi tahua bona oi boiria vadaeni, a? Nega oi atoa unai hebou ena anina oi gwauraia hedinarai totona. Memorial ena dina bona nega oi hadibaia bona, bema namo, oi hadibaia oi ese ia do oi hakaua, reana unai ese idia do ia hagoadaia idia mai totona.
4 Hebou gabuna dekenai, ita hekwarahi iseda boiboi idia abia dae bena idia mai taudia ita welkam henia totona. Edena bamona idia oi durua diba edia lalokau Iehova dekenai idia habadaia totona? Dala oi karaia edia henanadai oi haerelaia totona. Bema hegeregere, oi hegaegae Baibel stadi hamatamaia totona. Pura ta ta ai ita abia kongregesen heboudia dekenai oi boiridia mai. Haroro lasi Keristani taudia idia mai neganai, elda taudia do idia ura unai taudia idia laloa bada be gau badana. Dala idia karaia diba unai bamona taudia idia vadivadi henia bona idia hagoadaia haroro gaukara idia karaia lou totona, reana Memorial ena hereva amo idia hagoadaia.—Roma 5:6-8.
5 Iseda Lalokau Iehova Dekenai Ita Habadaia: Mauri davalaia boubouna, harihari gauna unai, ita laloa namonamo neganai, unai ese iseda lalokau Iehova bona iena Natuna dekenai ia habadaia. (2 Kor. 5:14, 15) Lagani momo lalonai Memorial hebouna dekenai ia lao Witnes hahinena ta ia gwau: “Memorial ai naria mai emai moale ida. Lagani ta ta amo ena anina be ia bada ia lao. Lau laloatao, lagani 20 gunanai mase rumana lalonai lau gini bona tamagu ena mase tauanina lau itaia neganai, mauri davalaia boubouna ena anina lau laloa bada bona lau moalelaia. Guna, hahediba herevana sibona bamona lau laloa. Idia gwauraia Baibel siridia iboudiai lau diba bona edia anina lau gwauraia hedinarai diba! To egu tamana ena mase lau itaia neganai, mauri davalaia boubouna hereadaena ese do ia havaraia gaudia lau lalodia bona unai ese egu lalona ia hamoalea bada.”—Ioa. 5:28, 29.
6 Inai lagani ena Memorial negana ia mai kahirakahira dainai, unai hebou totona nega oi atoa emu kudouna oi hegaegaelaia totona. (2 Siv. 19:3) Memorial ena Baibel duahiduahi, Dina Iboudiai Buka Helaga Tahua—2004 bukana bona lagani 2004 Calendar dekenai idia noho gaudia oi laloa dobu be namo. Haida be Tau Hereadaena bukana ena karoa 112-16 be edia ruma bese stadi dekenai idia riviulaia karana idia moalelaia. Ma haida be hesiai tauna mai ena kamonai, bona mai ena kara maoromaoro oreana ese ia hegaegaelaia stadi bukadia dekenai hereva ma haida idia tahua. (Mat. 24:45-47) Ita ibounai ese mauri davalaia boubouna, harihari gauna unai, be guriguri lalonai ita gwauraia diba be namo. (Sal. 50:14, 23) Oibe, Memorial negana lalonai, namona be Iehova ese ita dainai ia hahedinaraia lalokauna ita laloa noho bona dala ita tahua ia dekenai iseda lalokau ita hahedinaraia totona.—Mar. 12:30; 1 Ioa. 4:10.