Iehova Ena Hebogahisi-mai-Lalokauna Dainai Ita Tanikiu Henia
Keriso Ena Mase Laloatao Negana be March 24
1 Salamo torea tauna ia gwau: “Idia ese Lohiabada do idia tanikiu henia be namo, iena lalokau badana dainai. badina be ia ese kara namodia momokani idia dekenai ia karaia.” (Sal. 107:8) Dirava ena hebogahisi-mai-lalokauna be Ia ese taunimanima ia ura henia karana sibona lasi. Dirava ena lauma amo idia torea hanamoa herevana ese unai ia hahedinaraia goevagoeva, ia gwau: “Lohiabada e, oiemu lalokau bada [“hebogahisi-mai-lalokauna,” NW] ese lau ia abia isi lou.” (Sal. 94:18) Iehova sibona ia havaraia Natuna tamona be ita dainai ia henia, unai ese Iena hebogahisi-mai-lalokauna ia hahedinaraia!—1 Ioa. 4:9, 10.
2 Keriso ena mase ena Memorial negana ia kahirakahira dainai, edena dala ai “hebogahisi-mai-lalokauna Diravana” ita tanikiu henia diba? (Sal. 59:17, NW) Ita ta ta ita ura nega do ita atoa Iesu ena dina ginigabedia tanobada ai ita laloa dobu totona. (Sal. 143:5) Memorial ena Baibel duahiduahi sediual, Dina Iboudiai Buka Helaga Tahua—2005 dekenai idia noho bamona, ita badinaia be namo, bona bema hegeregere, Tau Hereadaena bukana ena karoa 112-16 bona Baibel idia herevalaia bukadia ma haida oi duahia bona tahua karana oi karaia. Mai emu lalona ibounai ida oi duahia gaudia oi laloa dobu. (1 Tim. 4:15) Mai guriguri ida Dirava ena Hereva ita laloa neganai, unai ese iseda kudouna ia durua sibona lasi, to iseda lalokau Iehova dekenai ia hedinarai danu.—Mat. 22:37.
3 Ma Haida Hagoadaia Dirava Idia Tanikiu Henia Totona: Vanegai lagani ai, tanobada hegegemadai, taunimanima 16,760,607 be Memorial dekenai idia lao. Liberia ena hanua ta dekenai, tadikaka be taoni ena lohia tauna dekenai revareva ta idia torea, Lohiabada Ena Anibou be ena taoni dekenai do idia karaia ena badina be ia dekenai idia hadibaia totona. Unai lohia tauna ese gwaumaoro ia henia tadikaka ese futbol gadara gabuna ai Memorial idia abia totona, bona ia ese hanua taudia ibounai ia boiria unai hebou dekenai idia lao totona. Ena be unai hanua dekenai pablisa be faiv sibona, to Memorial dekenai idia lao taudia be 636!
4 Unai hegeregerena, ita ura momo ita durua Memorial hebouna dekenai ita idia bamoa totona. Oi ura oi boiria taudia edia lista oi karaia vadaeni, a? March 8 Awake! bona March 15 Watchtower edia rau dokona kahana dekenai be Memorial boiboi herevana ta ia noho. Danu, idia printaia Memorial boiboi pepadia ita gaukaralaia diba. Unai pepa dekenai Memorial negana bona gabuna oi taipia eiava torea namonamo, bona oi boiria taudia ta ta dekenai ta oi henia. March 24 ia kahirakahira neganai, idia ta ta oi vadivadi henia lou bona dala umui karaia hegaegae.
5 Edena dala ai hebou idia do lao lasi Baibel stiuden taudia ita durua diba unai hebou dekenai idia lao bona namo bada idia abia totona? Stadi ta ta ai, miniti haida lalonai, stiuden oi durua unai mai anina bada hebouna idia lalo-parara totona. Hereva namodia ma haida be March 15, 2004, Watchtower, rau 3-7, bona Herevalaia bukana, rau 309-312 ai oi davaria diba.
6 Vadivadi Taudia Welkam Henia: Memorial dekenai, vadivadi taudia oi hedavari henia bona oi abidia dae. (Roma 12:13) Dala oi karaia oi boiria taudia ida oi helai totona, bona Baibel bona ane bukana ta oi henia be namo. Dala ita karaia idia haroro lasi tadikaka bona taihu, idia hekwarahi Memorial idia mai taudia unai, ita hedavari henia be gau badana. Iseda lalokau idia dekenai ese idia ia durua diba hanaihanai kongrigeisen idia bamoa lou totona. (Luka 15:3-7) Unai mai anina bada negana ai, Iehova ena “hebogahisi-mai-lalokauna” dainai, ita hekwarahi ma haida ita hagoadaia Iehova ita tanikiu henia hebou totona.—Sal. 31:21, NW.
[Study Questions]
1. Edena dala ai Iehova ese ita dekenai hebogahisi-mai-lalokauna ia hahedinaraia?
2. Edena dala ai iseda tanikiu karana Iehova dekenai ita hahedinaraia diba?
3, 4. (a) Edena dala ai iseda Liberia tadikaka edia haheitalai ita tohotohoa diba? (b) Daika oi ura boiria Memorial dekenai ia mai totona?
5. Edena dala ai Baibel stiuden taudia ita durua diba unai hebou idia mai totona?
6. Dahaka dainai Memorial dekenai vadivadi taudia ita welkam henia be mai anina bada?