Iesu Ena Kara Tohotohoa
1 Hahediba taudia halaoa gaukarana ita karaia neganai, namona be ita laloatao, iseda kara ese ita idia itaia taudia dekenai anina namona ia havaraia diba. Iesu be ena hereva bona kara amo ma haida ia hadibaia. Ia idia itaia taudia idia diba ia be haroro gaukara ia laloa bada, ma haida ia lalokau henia, iena Tamana ena ladana ia hahelagaia, bona Tamana ena ura hagugurua karana ia laloa bada.—1 Pet. 2:21.
2 Ruma-Ta-Ruma-Ta Ai: Iesu bamona, iseda kara ese ita idia bamoa taudia ia hagoadaia diba. Bema iseda haroro gaukara ita karaia mai lalona ibounai ida, unai ese pablisa matamatadia ia durua diba edia haroro gaukara hanamoa daladia idia laloa totona. Moale toana bona ma haida laloa bada karana ita hahedinaraia neganai, do idia diba edia haroro gaukara dekenai unai bamona kara idia hahedinaraia be mai anina bada. Baibel ita gaukaralaia namonamo dalana, lou henia bona Baibel stadi ita karaia daladia idia itaia neganai, unai ese idia do ia durua edia hahediba gaukarana ai unai bamona idia karaia totona.
3 Baibel Stadi Negadia Ai: Iseda Baibel stiuden taudia be iseda kara idia itaia. Hegeregere, ena be idia dekenai hegaegae namonamo karana ita herevalaia, bona idia ita hagoadaia siri ibounai idia duahia, bona hereva badadia sibona idia makaia, to do idia itaia danu, bema ita hegaegae eiava lasi. (Roma 2:21) Bema edia stadi karaia totona nega korikori ai ita ginidae, unai ese idia do ia durua edia Baibel stadi ia koua diba gaukara ma haida idia karaia lasi to edia stadi totona idia hegaegae. Danu, do idia itaia ita be haroro gaukara ita laloa bada dainai sibona eda ura ita dadaraia, bona iseda abidadama ia goada. Unai dainai, bema Baibel stadi karaia tauna be Iesu ena kara ia tohotohoa, ena stiuden be haroro goadagoada tauna ai ia lao diba.
4 Kongrigeisen Heboudia Ai: Keristani kongrigeisen lalonai idia noho taudia be mai edia maduna edia haheitalai amo ma haida idia hadibaia totona. Kamonai taudia be iseda kongrigeisen hebou dekenai idia mai neganai, iseda kara namodia ese idia ia hagoadaia danu. Ta ta ita kara heheni dalana, iseda lalotamona karana, bona iseda dabua bona toana idia itaia. (Sal. 133:1) Kongrigeisen heboudia dekenai ita lao bona iseda haere amo iseda abidadama ita herevalaia karana idia itaia danu. Kamonai tauna ta be iseda hebou ta dekenai ia lao, bona ia itaia kekeni maragina ta be ena Baibel amo siri ia kehoa bona ia davaria haraga bona ena Baibel amo ia badinaia. Unai kekeni maragina ena kara ese unai tau ena lalona ia veria Baibel stadi ia abia dae totona.
5 Baibel be ita ia hagoadaia ma haida edia kara namodia ita tohotohoa totona. (Fili. 3:17; Heb. 13:7) Unai dainai, bema ita hekwarahi Iesu ena kara ita tohotohoa, ita idia itaia taudia do ia durua Iesu idia tohotohoa totona. Unai ita karaia totona, namona be 1 Timoteo 4:16 ena hereva ita laloa bada: “Oi sibona oiemu kara do oi naria namonamo, oiemu hadibaia hereva danu.”
[Study Questions]
1. Iesu ese dahaka kara namodia ia hahedinaraia?
2. Haroro gaukara ai ita idia bamoa taudia be edena dala ai iseda kara ese idia do ia durua?
3. Edena bamona iseda kara ese Baibel stiuden ia durua diba, bona unai ese ia dekenai dahaka ia hadibaia?
4. Iseda kongrigeisen hebou dekenai ita lao neganai, iseda haheitalai ese dahaka namo ia havaraia diba?
5. Dahaka dainai iseda kara ita naria namonamo be gau badana?