Baibel Stadi Karaia Totona Oi Hesiku Lasi!
1 Dirava ena Basileia ena sivarai namona ita harorolaia goadagoada neganai, ita hahedinaraia ita be eda teritori ai idia noho taudia ita laloa bada bona ita ura ita “durudia.” (Aon. 3:27) Taunimanima dekenai ita herevalaia sivarai namona be inai: Dirava ena Basileia ese noho namona do ia havaraia. Ena be nega bona gabu idauidau ai oi haroro eiava ma haida dekenai buka bona magasin oi rakatania, to hari namona be oi hekwarahi Baibel stadi ta oi karaia totona.
2 Nega haida lalohadai idauidau dainai, Baibel stadi ta ita karaia totona be ia auka. Haida idia laloa idia be hegeregere lasi eiava idia bisi bada dainai, Baibel stadi idia karaia diba lasi. Henunai idia noho paragraf ma haida dekenai idia noho herevadia ese reana oi ia durua diba, Baibel stadi ta oi karaia totona.—Mat. 28:19; Kara 20:20.
3 Hegeregere Lasi Lalohadaina: Reana sikuli badana dekenai oi lao lasi eiava badina ma haida dainai, oi laloa oi be hegeregere lasi Baibel stadi ta oi karaia totona. Aposetolo edia negai, Keristani haroro taudia be “sikuli bada lasi bona aonega bada lasi taudia.” To dahaka ese idia ia durua ma haida dekenai hereva momokani idia hadibaia totona? “Idia be Iesu ena bamona taudia.” (Kara 4:13) Idia be Hadibaia Tauna Badana, Iesu, amo gau momo idia dibaia, bona Iesu ena hadibaia daladia be Baibel lalonai ita duahia diba. Ena be sikuli badana ta dekenai oi lao lasi, to Dirava bona ena ura oi dibaia karana ese sikuli ibounai ia hereaia.—Isa. 50:4; 2 Kor. 3:5.
4 Iehova ese nega haida peroveta taudia ia gaukaralaia lohia eiava dagi bada taudia ia sisiba henia totona. Hegeregere, Amosa be dagi bada lasi tauna. Amosa ia gwau: “Lau be peroveta taudia haida bamona lasi, lau ese davana abia totona lau peroveta lasi. Lau be mamoe naria tauna, bona fig audia danu lau naria noho.” (Amo. 7:14) Unai dainai, Amosa be mai gari lasi ida boromakau natuna ia tomadiho henia hahelaga tauna, Amasaia dekenai Iehova ena hahemaoro herevana ia gwauraia. (Amo. 7:16, 17) Namona be nega ibounai ita laloatao, Dirava be ita do ia hadibaia namonamo ena gaukara ita karaia totona.—2 Tim. 3:17.
5 Ita Bisi Bada: Ena be oi bisi bada, to namona be nega oi atoa haroro gaukara oi karaia hanaihanai totona. Baibel amo ta oi stadi henia karana be hesiai gaukara namo hereana ta. Iehova ena Hereva ese ta ena mauri ia haidaua be hahenamo badana. (Heb. 4:12) Ita sibona eda ura gaudia ita dadaraia bena ma haida ita durua “hereva momokani” idia dibaia neganai, ita be Iehova ena kudouna ita hamoalea unai. (1 Tim. 2:4) Kara dika tauna ta ia helalo-kerehai bona Iehova hesiai henia karana ia goadalaia neganai, aneru idia moale danu.—Luka 15:10.
6 “Dirava ia ura taunimanima ibounai ese mauri do idia davaria, bona hereva momokani do idia diba.” (1 Tim. 2:4) Baibel stadi ita karaia neganai, ita be Dirava ena ura ita hagugurua, bona unai be hahenamo badana!
[Study Questions]
1. Edena dala ai taunimanima ita “durudia” diba?
2. Dahaka dainai haida ese Baibel stadi idia karaia be auka?
3. Dahaka dainai ita be hegeregere ma haida dekenai Baibel ena hereva ita hadibaia totona?
4. Amosa ena haheitalai amo dahaka ita dibaia?
5. Ena be ita bisi bada, to dahaka dainai ita hekwarahi Baibel stadi ta ita hamatamaia totona?
6. Dahaka dainai Dirava ena ura ita hagugurua be hahenamo ta?