Kongrigeisen Ena Hebou Karaia Dalana Matamatana
1 April 21-27, 2008 ai, tanobada ibounai tadikaka oreana ese hadibaia hereva badana ta idia kamonai. Unai hadibaia hereva ia gwau, “January 1, 2009 amo, Kongrigeisen Buka Stadi, Tiokratik Haroro Sikuli bona Hesiai Hebou be nega tamona do ita karaia hebou. Inai ladana, ‘Kongrigeisen Buka Stadi’ ai haidaua bona ena ladana matamata be ‘Kongrigeisen Baibel Stadi.’ ”
2 Hebou Karaia Dalana: Unai hebou toi (ane bona guriguri danu) be hora tamona bona miniti 45 lalonai do ita karaia. Hebou be ane bona guriguri (edia lata be miniti 5) amo ita hamatamaia murinai, Kongrigeisen Baibel Stadi (ena lata be miniti 25) do ita karaia. Unai murinai, Tiokratik Haroro Sikuli (ena lata be miniti 30) do ita karaia. Bena ane ta (ena lata be miniti 5) ita abia murinai, Hesiai Hebou (ena lata be miniti 35) do ita karaia. Hebou be ane bona guriguri (edia lata be miniti 5) amo do ita koua. Hua ta ta ai Iseda Basileia Gaukara pepana lalonai be unai hebou toi ena sediual do ia noho, unai ese umui do ia durua umui hegaegae namonamo totona.
3 Papua New Guinea dekenai, hekwakwanai haida hegeregere trenspot bona raskol karadia dainai, kongrigeisen momo edia hebou foa be dina tamona lalonai idia abia, hegeregere, Pablik Hebou, Gima Kohorona Stadi, Tiokratik Haroro Sikuli bona Hesiai Hebou. Bema elda taudia idia laloa unai sediual tamona do idia badinaia noho, anina be unai dina tamona lalonai Kongrigeisen Baibel Stadi danu do idia karaia. Hebou be ane bona guriguri (edia lata be miniti 5) amo ita hamatamaia murinai, Pablik Hebou (ena lata be miniti 30) do ita karaia. Bena ane ta (ena lata be miniti 5) ita abia murinai, Gima Kohorona Stadi (ena lata be miniti 60) do ita karaia. Bena ane ta (ena lata be miniti 5) ita abia murinai, do ita laga-ani (ena lata be miniti 15). Bena ane ta (ena lata be miniti 5) ita abia murinai, Kongrigeisen Baibel Stadi (ena lata be miniti 25) do ita karaia. Unai murinai, Tiokratik Haroro Sikuli (ena lata be miniti 30) do ita karaia. Bena ane ta (ena lata be miniti 5) ita abia murinai, Hesiai Hebou (ena lata be miniti 35) do ita karaia. Hebou be ane bona guriguri (edia lata be miniti 5) amo do ita koua. Bema elda taudia idia laloa ma gau haida dainai hebou faiv be Kongrigeisen Baibel Stadi amo idia hamatamaia bona Gima Kohorona Stadi amo idia hadokoa, vadaeni unai bamona idia karaia diba. Anina be miniti 15 ena laga-ani murinai Pablik Hebou do ita karaia. Herevana edena hebou ena sediual ita badinaia, to gau badana be hebou faiv (ane, guriguri, bona laga-ani danu) edia nega ena lata be hora toi bona miniti 45.
4 Kongrigeisen Baibel Stadi: Inai hebou be Gima Kohorona Stadi idia karaia bamona do ita karaia. Unai hebou ita karaia neganai, namo lasi wiki gunadia edia stadi herevadia ita riviulaia. To, namona be hamatamaia hereva kwadogina sibona ita gwauraia. Unai amo nega bada do ia noho helai taudia ese haere kwadogidia idia henia totona. Hakaua naria tauna ese elda ta ta do ia abia hidi, unai hebou idia naria totona.
5 Hesiai Hebou: Hesiai Hebou karaia dalana be do ia idau lasi, to ena kahana ena nega be do idia kwadogi. Hadibaia herevadia be miniti 5 lalonai do ita karaia. Unai miniti ena lata ia hegeregere, mai anina bada hadibaia herevadia ita gwauraia bona brens opesi amo idia mai revareva ita duahia totona. Hadibaia hereva ma haida hegeregere, haroro gaukara, Kingdom Hall hagoevaia, akaun ripoti, bona brens opesi ena revareva haida be platfom amo ita duahia lasi, to notisbod dekenai ita atoa tadikaka taihu ese idia itaia diba. Namona be tok do idia henia tadikaka idia hegaegae namonamo, hadibaia herevadia idia badinaia, bona nega korikori ai edia kahana idia haorea.
6 Sekit Naria Tauna Ena Vadivadi: Sekit naria tauna ena vadivadi ai ita karaia hebou edia sediual be do idia idau lasi. Hegeregere, Tuesday ai, ane bona guriguri murinai Tiokratik Haroro Sikuli bona Hesiai Hebou do ita karaia. Bena ane murinai, sekit naria tauna ese miniti 30 lalonai hereva ta do ia henia. Thursday o dina ma ta ai, ane bona guriguri murinai, Kongrigeisen Baibel Stadi do ita karaia bena ane murinai, sekit naria tauna ese ena hereva do ia henia. Unai hebou ruaosi be ane bona guriguri amo do ita koua.
7 Haroro Grup Ena Hebou: “Grup naria taudia” be elda oreana ese do ia abia hidi bona ena maduna be haroro grup do ia naria bona grup lalonai idia noho taudia dekenai mamoe vadivadi do ia karaia. Bema kongrigeisen ena hesiai tauna ta be unai gaukara ia durua, ia be do ita gwauraia “grup hesiai tauna.”
8 Momokani, kongrigeisen ena hebou karaia dalana matamatana amo hadibaia herevadia bona hagoadaia hereva momo do ita abia. Unai ese ita do ia durua haroro bona hahediba gaukaradia ita karaia namonamo bona anina namona do ita havaraia.—Efe. 4:13, 14; 2 Tim. 3:17.
9 Ruma dekenai hebou ta ta totona ita hegaegae namonamo be namo, badina unai ese ita do ia durua hebou lalonai idia herevalaia point badadia ita laloa bada totona. Danu, hebou lalonai haere ita henia diba, unai amo ita ta ta do ita hagoadaia heheni. (Roma 1:11, 12; Heb. 10:24) Iseda ura gauna be, ‘hereva momokani do ita hadibaia maoromaoro’ karana amo ‘taunimanima ibounai ese eda goada do idia itaia, ia bada lao noho.’—1 Tim. 4:15; 2 Tim. 2:15.
10 Ita moale badina kongrigeisen ena hebou karaia dalana matamatana do ita badinaia. Namona be ita ibounai ita hekwarahi “hesiai tauna mai ena kamonai, bona mai ena kara maoromaoro” amo idia mai hadibaia herevadia ita gaukaralaia namonamo bona iseda Mamoe Naria Tauna Badana kahirakahira ita noho, badina ia be ita ia durua kahirakahira do ia vara “hisihisi badana” totona ita hegaegae.—Mat. 24:21, 45, NW; Heb. 13:20, 21; Apok. 7:14, NW.
[Study Questions]
1, 2. January 1, 2009 ia matamaia neganai, hebou karaia dalana dekenai dahaka do idia idau?
3. Bema kongrigeisen haida edia hebou faiv be dina tamona lalona do idia karaia, vadaeni edena sediual do idia badinaia?
4. Kongrigeisen Baibel Stadi be edena bamona do ita karaia?
5. Edena dala ai Hesiai Hebou do ia idau?
6. Sekit naria tauna ena vadivadi neganai, kongrigeisen heboudia be edena bamona do ita karaia?
7. Grup naria tauna ena maduna be dahaka?
8. Kongrigeisen ena hebou karaia dalana matamatana amo dahaka namo do ita abia?
9. Edena dala ai ruma dekenai hebou totona ita hegaegae namonamo karana ese ita bona ma haida do ia durua?
10. Dahaka ita karaia be namo, bona dahaka dainai?