Matamata Tadikaka E, Mareko Bona Timoteo Tohotohoa

1-2. Dahaka gaudia ese Mareko bona Timoteo ia koua diba ma haida idia hesiai henia totona?

MATAMATA tadikaka e, umui ura Iehova totona gaukara ma haida umui karaia bona kongrigeisen ai tadikaka bona taihu umui durua, a? Oi ura unai bamona oi karaia, ani? Ita moale badina matamata tadikaka momo be mai ura ida ma haida idia hesiai henia! (Sal. 110:3) To, reana gau haida dainai do ia auka unai oi karaia totona. Vaira nega ai emu mauri ai do idia vara gaudia oi diba lasi dainai oi gari emu hesiai gaukara oi habadaia totona, a? Eiava oi be asainmen ta oi dadaraia badina oi laloa oi hegeregere lasi oi karaia totona, a? Bema oibe, oi sibona be unai bamona oi mamia lasi.

² Mareko bona Timoteo be unai bamona hemami idia abia danu. To ena be idia diba lasi gabeai edia mauri ai dahaka do ia vara eiava idia laloa do idia hegeregere lasi, to abia hidi idia karaia Iehova idia hesiai henia totona. Aposetolo Paulo bona Banaba ese Mareko idia boiria edia misinari laolao lalonai idia ia bamoa totona, unai neganai Mareko be reana ena sinana ida ruma namona dekenai idia noho. (Kara 12:12, 13, 25) Mareko be ena noho gabuna ia rakatania badina ia ura ena hesiai gaukara ia habadaia. Ginigunana be, Antioka dekenai ia lao. Gabeai, Paulo bona Banaba ia bamoa gabu daudau ma haida dekenai idia lao totona. (Kara 13:1-5) Mareko hegeregerena, Timoteo danu be ena tama sina ida ia noho neganai, Paulo ese ia boiria haroro gaukara ai do ia bamoa totona. Timoteo be mero sibona bona ia diba ia hegeregere lasi dainai, unai ese ia koua diba Paulo ia bamoa totona. (1 Korinto 16:10, 11 bona 1 Timoteo 4:12 hahegeregerea.) To, Paulo ena boiboi herevana ia abia dae, unai dainai hahenamo momo ia moalelaia.—Kara 16:3-5.

3. (a) Edena dala ai ita diba Paulo be Mareko bona Timoteo ia laloa bada? (2 Timoteo 4:6, 9, 11) (Laulau itaia danu.) (b) Inai atikol ai dahaka henanadai do ita herevalaia?

³ Mareko bona Timoteo be edia matamata negana ai, kongrigeisen lalonai maduna idauidau huaia dalana idia dibaia. Paulo be unai tadikaka matamatadia ia laloa bada dainai, kahirakahira ia mase neganai ia ura idia be ia dekenai do idia lao. (2 Timoteo 4:6, 9, 11 duahia.) Dahaka kara namodia dainai Paulo be Mareko bona Timoteo ia laloa bada? Edena dala ai matamata tadikaka ese edia kara idia tohotohoa diba? Bona edena dala ai matamata tadikaka be Paulo ena sisiba amo namo idia davaria diba?

MAREKO TOHOTOHOA—MAI URA IDA HESIAI GAUKARA KARAIA

4-5. Edena dala ai Mareko be mai ura ida ma haida ia durua?

⁴ Buka ta ia gwau ma haida hesiai henia karana ena anina be, “oi gaukara goada idia oi durua totona, bona idia oi durua noho, ena be ia auka.” Mareko be unai kara dekenai haheitalai namona ia hahedinaraia. Paulo ena misinari laolao iharuana ai, ia ura lasi Mareko be ia ida do ia lao, reana unai dainai Mareko ia lalohisihisi. (Kara 15:37, 38) To unai ese Mareko ia koua lasi ma haida ia hesiai henia totona.

⁵ Mareko be ena kasin Banaba ida gabu ta dekenai idia lao, edia hesiai gaukara idia karaia totona. Lagani 11 bamona murinai, Paulo be Roma ai idia hadiburaia neganai Mareko be Paulo ia hagoadaia. (File. 23, 24) Momokani, Paulo be Mareko ena heduru ia laloa bada, unai dainai ia gwau, Mareko ese ia “durua bona hagoadaia bada.”—Kol. 4:10, 11.

6. Mareko be abidadama tadikaka ida ia gaukara hebou dainai, dahaka namo ia davaria? (Futnout itaia.)

⁶ Mareko be abidadama tadikakadia ia bamoa dainai hahenamo momo ia davaria. Ia be Roma ai nega sisina Paulo ida ia noho murinai, Babulonia dekenai ia lao bona aposetolo Petero ida ia gaukara hebou. Mareko bona Petero edia hetura karana ia goada unai dainai Petero ese Mareko ia gwauraia “egu natuna Mareko.” (1 Pet. 5:13) Idia gaukara hebou lalonai, reana Petero ese Mareko dekenai Iesu ena mauri bona ena haroro gaukara ia herevalaia bona unai be gabeai Mareko ese Evanelia bukana ai ia torea.a

7. Edena dala ai matamata tadikaka Seung-Woo ese Mareko ena haheitalai ia tohotohoa? (Laulau itaia danu.)

⁷ Mareko be Iehova ena hesiai gaukara lalonai ia bisi bona lo tadikakadia ia bamoa. Edena dala ai Mareko oi tohotohoa diba? Reana oi ura Iehova ena hesiai gaukara ma haida oi karaia, hegeregere hesiai tauna eiava elda tauna ai oi lao, to oi do hegeregere lasi. Bema unai bamona oi mamia, oi hesiku lasi. To dala idauidau ai Iehova bona kongrigeisen taudia oi hesiai henia noho. Hari elda gaukara ia karaia noho tadikaka ta, Seung-Woo ena haheitalai ita laloa. Ia mero matamata neganai, nega momo tadikaka matamatadia ma haida ida sibona ia hahegeregerea. Idia haida be kongrigeisen lalonai elda taudia ese gaukara idia henia guna. Seung-Woo be ia lalohisihisi dainai, elda taudia dekenai ena hemami ia herevalaia. Bona elda ta ese ia hamaoroa, ia karaia diba gaukaradia do ia karaia noho, ena be haida ese ia karaia gaudia do idia itaia lasi. Unai sisiba namona dainai, Seung-Woo ese ena kongrigeisen lalonai burukadia ia durua bona ena motuka amo ma haida ia durua hebou dekenai ia abidia lao totona. Unai nega ia laloa lou neganai, ia gwau: “Hari ma haida hesiai henia karana ena anina lau lalopararalaia. Lau itaia henia karana amo ma haida lau durua dainai lau moale bada.”

TIMOTEO BAMONA MA HAIDA OI LALOA BADA

8. Dahaka dainai Paulo ese Timoteo ia abia hidi ia do ia bamoa totona? (Filipi 2:19-22)

⁸ Paulo be dagedage ia davaria hanuadia dekenai ia giroa lou neganai, ia ura idia gari lasi tadikaka ese ia do idia bamoa. Unai dainai tadikaka ta ladana Sila ia abia hidi guna, ia be lagani momo lalonai Iehova ia hesiai henia. (Kara 15:22, 40) Gabeai Paulo ese Timoteo ia abia hidi danu, ia do ia bamoa totona. Dahaka dainai Paulo ese Timoteo ia abia hidi? Badina Paulo ia kamonai Timoteo be ladana namona ia abia. (Kara 16:1, 2) Danu Timoteo be taunimanima ia laloa bada.—Filipi 2:19-22 duahia.

9. Edena dala ai Timoteo ia hahedinaraia iena tadikaka taihu ia laloa bada?

⁹ Timoteo be Paulo ida ia gaukara hebou matamaia neganai, Timoteo ia hahedinaraia ia be ma haida edia namo ia atoa guna. Unai dainai Paulo be Berea ia rakatania neganai, ia diba momokani Timoteo ese tadikaka taihu do ia naria. (Kara 17:13, 14) Unai nega ai, Timoteo be reana Sila amo gau momo ia dibaia, badina ia danu be Berea dekenai ia noho. Gabeai, Paulo ese Tesalonika dekenai Timoteo sibona ia siaia, unai siti ai idia noho Keristani taudia ia hagoadaia totona. (1 Tes. 3:2, ftn.) Lagani 15 ma haida murinai, Timoteo ena lalokau ena tadikaka taihu totona be ia goada. Unai dainai idia lalohisihisi bona taitai neganai, idia ida ia taitai danu. (Roma 12:15; 2 Tim. 1:4) Edena dala ai matamata Keristani taudia ese Timoteo idia tohotohoa diba?

10. Tadikaka Seung-Woo be edena dala ai ma haida laloa bada karana ia hahedinaraia?

¹⁰ Tadikaka ta ladana Seung-Woo be ma haida laloa bada karana ia dibaia. Ia mero matamata neganai, ia auka kongrigeisen ai burukadia ida ia herevahereva totona. Unai dainai idia do ia hanamoa sibona bona ia lao. Elda ta ese Seung-Woo ia hamaoroa, tadikaka taihu ida herevahereva ia hamatamaia dalana ta be idia dekenai edia kara namodia do ia gwauraia. Danu unai elda ese ia hamaoroa ma ta ena ura gaudia ia laloa totona. Seung-Woo ese unai sisiba ia badinaia danu. Hari ia be elda ta, bona ia gwau: “Hari lau dekenai ia auka lasi, mauri lagani idauidau taudia ida lau herevahereva totona. Lau moale badina ma haida lau diba namonamo. Unai ese lau ia durua tadikaka taihu edia ura gaudia lau diba bona idia durua dalana lau laloa diba.”

11. Edena dala ai matamata tadikaka be edia kongrigeisen ai, ma haida laloa bada karana idia hahedinaraia diba? (Laulau itaia danu.)

¹¹ Matamata tadikaka e, oi danu be ma haida edia namo oi laloa diba. Kongrigeisen heboudia dekenai oi lao neganai, taunimanima idauidau, burukadia bona matamata taudia ida oi herevahereva. Idia oi nanadaia bema idia namo, bona idia hereva neganai oi kamonai. Unai amo idia oi durua dalana do oi diba. Reana buruka taudia haida idia ura JW Library^® app gaukaralaia dalana idia diba. Eiava haroro gaukara totona ta ida palani idia karaia lasi idia gaukara hebou totona. Unai bamona taudia dekenai fon gaukaralaia dalana do oi hadibaia, eiava haroro gaukara ai idia do oi bamoa, a? Dala idauidau ai heduru oi henia neganai, kongrigeisen ai haheitalai namona do oi hahedinaraia.

PAULO ENA SISIBA ESE OI IA DURUA DIBA

12. Edena dala ai Paulo ese Timoteo ia sisiba henia herevadia be tatau matamata ia durua diba?

¹² Paulo ese Timoteo dekenai sisiba namodia ia henia, unai ese do ia durua ena mauri ia moalelaia bona ena hesiai gaukara ia hagugurua totona. (1 Tim. 1:18; 2 Tim. 4:5) Umui matamata tadikaka be Paulo ena sisiba amo namo umui davaria diba. Edena dala ai? Paulo ese Timoteo totona ia torea revareva rua oi duahia neganai, namona be oi laloa unai be oi totona danu, bona oi itaia edena sisiba oi badinaia diba. Mani haheitalai haida ita laloa.

13. Dahaka ese ita ia durua diba Dirava kahirakahira ita lao totona?

¹³ “Oi sibona oi treinia Dirava oi badinaia totona, unai be emu tahua gauna.” (1 Tim. 4:7b) Dirava oi badinaia ena anina be dahaka? Anina be ta be Iehova kahirakahira ia noho bona mai ura ida Iehova ese ia moalelaia gaudia ia karaia. To Iehova ita badinaia bona lalokau henia totona ita gaukara goada be namo. Edena dala ai? Greek gado ai inai hereva “sibona oi treinia” be nega momo idia gaukaralaia gadara helulu taudia edia hegaegae karana idia herevalaia totona. Gadara helulu taudia be edia tahua gauna idia hagugurua totona edia gadara do ia hadikaia gaudia idia dadaraia be namo. Ita danu namona be sibona ita treinia iseda kara ita hanamoa totona, unai ese ita do ia durua Dirava kahirakahira ita lao totona.

14. Baibel ita duahia neganai, iseda tahua gauna be dahaka? Haheitalai gwauraia.

¹⁴ Dina ta ta ai Baibel oi duahia be gau badana. Danu namona be oi laloatao Baibel oi duahia ena badina be oi ura Dirava kahirakahira oi lao. Hegeregere, Baibel ai Iesu bona taga tauna ena sivarai oi duahia neganai, Iehova amo dahaka oi dibaia? (Mar. 10:17-22) Unai tau matamata ia abia dae Iesu be Mesia, to Iesu ena hahediba tauna ai ia lao totona ena abidadama ia hagoadaia be namo. Iesu ese unai tau matamata “ia lalokau henia,” ena be ena abidadama ia goada lasi. Iesu be mai hemataurai ida unai tauna ia hereva henia. Unai ese ia hahedinaraia, Iesu ia ura unai tau matamata ese abia hidi namona do ia karaia. Danu Iesu ena kara amo ia hahedinaraia Iehova be unai tauna ia lalokau henia. (Ioa. 14:9) Unai sivarai bona emu mauri dalana oi laloa neganai, sibona oi nanadaia, ‘Dirava kahirakahira lau lao bona ma haida lau durua totona dahaka lau karaia be namo?’

15. Edena dala ai matamata tauna ese haheitalai namona ia hahedinaraia diba? Haheitalai gwauraia. (1 Timoteo 4:12, 13)

¹⁵ “Namona be abidadama taudia dekenai . . . oi be haheitalai namona.” (1 Timoteo 4:12, 13 duahia.) Paulo ese Timoteo ia hagoadaia duahiduahi bona hadibaia karana sibona do ia hanamoa lasi, to lalokau, abidadama, bona kara goeva do ia hahedinaraia be namo. Dahaka dainai? Badina ta ese ia karaia gaudia be ia herevalaia gaudia ia hereaia. Hegeregere, kongrigeisen ai do oi henia tok be haroro gaukara ai iseda ura habadaia dalana do ia herevalaia. Bema oi be mai ura ida haroro gaukara oi karaia goadagoada, do ia auka lasi unai tok oi henia totona. Oi herevalaia gaudia be emu kara amo oi hahedinaraia dainai, emu tok idia kamonai taudia do ia durua oi herevalaia gaudia idia badinaia totona.—1 Tim. 3:13.

16. (a) Edena dala faiv ai Keristani matamata taudia ese haheitalai namona idia hahedinaraia diba? (b) Edena dala ai matamata tadikaka ta be ena “hereva” amo haheitalai namona ia hahedinaraia diba?

¹⁶ Timoteo Ginigunana 4:12 ai, Paulo ia gwau matamata tadikaka ese dala faiv ai haheitalai namona ia hahedinaraia diba. Nega oi atoa unai kara ta ta oi stadilaia totona, unai be emu namo totona. Hegeregere, oi ura “emu hereva” amo haheitalai namona oi hahedinaraia. Oi gwauraia herevadia ese ma haida do ia hagoadaia dalana oi laloa. Bema oi be emu tama sina ida oi noho, oi totona idia karaia gaudia dainai, nega momo idia oi tanikiu henia diba, a? Hebou murinai kahana ta ia henia tadikaka eiava taihu dekenai oi moalelaia point oi herevalaia diba, a? Danu hebou dekenai sibona emu hereva dalana amo haere oi henia diba, a? Emu hereva dalana oi hanamoa totona oi gaukara goada dainai, haida ese idia itaia diba oi be Iehova ena hesiai tauna namona ai oi lao noho.—1 Tim. 4:15.

17. Dahaka ese matamata tadikaka ta ia durua diba ena tahua gaudia ia hagugurua totona? (2 Timoteo 2:22)

¹⁷ ‘Matamata taudia ese idia abia ura idauidau amo oi heau siri, to kara maoromaoro oi tahua noho.’ (2 Timoteo 2:22 duahia.) Paulo ese Timoteo ia hagoadaia iena hesiai gaukara do ia hadikaia gaudia, bona Iehova ida ena hetura karana do ia hamanokaia gaudia ia dadaraia totona. Reana do oi laloparara oi be nega bada lalonai gau ma haida oi karaia dainai, nega be lasi Iehova oi hesiai henia totona. Hegeregere, spot gadara, intanet eiava fon ai idia noho gadara totona, oi haorea nega mani oi laloa. Oi ese unai nega oi gaukaralaia diba, Iehova bona ma haida oi hesiai henia totona, a? Reana heduru oi henia diba Kingdom Hall hanamoa bona hagoevaia totona eiava troli haroro oi karaia diba. Bema unai bamona gaukara idauidau dekenai heduru oi henia, reana tura matamatadia do oi davaria, bona idia ese oi do idia durua Iehova totona tahua gaudia oi atoa bona hagugurua diba.

MA HAIDA DURUA KARANA AMO DO OI MOALE

18. Dahaka dainai ita gwau diba, Mareko bona Timoteo be edia mauri idia moalelaia bada?

¹⁸ Mareko bona Timoteo be ma haida idia durua totona, edia mauri ai senisi momo idia karaia, unai dainai idia moale bona hahenamo idauidau idia abia. (Kara 20:35) Mareko be gabu idauidau dekenai ia lao, ena tadikaka taihu ia durua totona. Danu ia ese Iesu ena mauri bona haroro gaukara ena sivarai ia torea. Timoteo ese Paulo ia durua kongrigeisen matamata ia haginia bona tadikaka taihu ia hagoadaia. Momokani, Iehova ia moale bada, badina ia itaia Mareko bona Timoteo be ia totona edia hesiai gaukara idia habadaia bona edia tadikaka taihu idia durua.

19. Dahaka dainai matamata tadikaka be Paulo ese Timoteo ia sisiba henia revareva idia badinaia be namo, bona unai amo dahaka namo do idia davaria?

¹⁹ Paulo ese Timoteo totona ia torea revareva amo ita itaia, ia ese Timoteo ia lalokau henia bada. Danu, unai revareva ese ia hahedinaraia Iehova be umui matamata tadikaka ia lalokau henia bada. Ia ura ia umui hesiai henia lalonai emui mauri umui moalelaia. Unai dainai oi gaukara goada Paulo ena sisiba oi badinaia totona, unai amo emu hesiai gaukara oi habadaia diba. Bema unai bamona oi karaia, hari emu mauri do oi moalelaia bona ia mai noho ‘mauri korikorina do oi dogoatao auka.’—1 Tim. 6:18, 19.