Buruka Eiava Gorere Tauna Oi Naria Lalonai Oi Moale Noho Dalana

1-2. Iehova ese buruka eiava gorere taudia idia naria taudia be edena bamona ia laloa? (Aonega Herevadia 19:17) (Laulau itaia danu.)

KOREA ai, tadikaka ta ladana Jin-yeol ia gwau: “Lau bona egu adavana be lagani 32 mai kahana lalonai ai headava. Lagani 5 lalonai egu adavana lau naria. Ia be Parkinson gorere ia abia bona ia marere diba lasi. Egu adavana lau lalokau henia bada bona lau moale ia lau naria totona. Hanuaboi ta ta ai, ia be bedi latanai ia mahuta sibona. Lau be ena badinai lau mahuta bona ena imana lau dogoatao.”

² Oi be tama sina, emu adavana, natuna eiava turana ta oi naria noho, a? Bema oibe, oi moale badina oi lalokau henia tauna oi durua noho. Bona unai oi karaia dainai oi hahedinaraia Iehova oi lalokau henia. (1 Tim. 5:​4, 8; Iam. 1:27) To, oi karaia gaudia haida be mai ena hekwarahi, bona ta be unai ia diba lasi. Nega haida do oi mamia emu hisihisi be ta ese ia lalopararalaia lasi. Bona reana taunimanima vairanai oi kiri, to sibona oi noho neganai, oi tai. (Sal. 6:6) To laloatao, Iehova be hanaihanai oi hekwarahilaia gaudia ia itaia. (Esodo 3:7 hahegeregerea.) Emu mata ranu bona hekwarahi be Iehova ese ia laloa bada. (Sal. 56:8; 126:5) Emu lalokau tauna oi naria neganai, Iehova be unai ia itaia bona ia gwau unai be ia totona oi karaia bona ia gwauhamata emu davana do ia henia.—Aonega Herevadia 19:17 duahia.

3. Aberahamo bona Sara be Tera idia naria lalonai, dahaka gaudia idia hekwarahilaia?

³ Baibel lalonai taunimanima momo be buruka eiava idia gorere taudia idia naria. Aberahamo bona Sara edia haheitalai ita laloa. Uru hanua idia rakatania neganai, edia tamana Tera ena mauri lagani be 200 bamona. To ia be idia ida ia lao. Idia be Harana dekenai idia lao neganai, kilomita 960 idia lao. (Gen. 11:​31, 32) Aberahamo bona Sara be Tera idia lalokau henia, to edia laolao lalonai ia idia naria be mai ena hekwarahi bada. Reana idia be kamelo eiava doniki idia gaukaralaia dainai, ia auka Tera ia guia totona. Bona idia hesiku bada. To herevana dahaka, Iehova ese idia dekenai goada ia henia. Iehova ese Aberahamo bona Sara ia durua hegeregerena, ia ese oi do ia durua bona hagoadaia.—Sal. 55:22.

4. Inai atikol ai dahaka do ita herevalaia?

⁴ Bema oi moale noho, unai ese oi do ia durua buruka taudia eiava gorere tauna oi naria totona. (Aon. 15:13) Laloatao, mauri lalonai hekwakwanai idauidau idia vara, to oi moale noho diba. (Iam. 1:​2, 3) Edena dala ai oi moale noho diba? Dala ta be guriguri karana amo Iehova oi tabekau henia bona ia oi noia lalohadai maorona oi abia totona. Hari, gorere o buruka tauna idia naria taudia idia moale noho totona, idia do ia durua gaudia do ita herevalaia. Danu ma haida ese unai naria taudia do idia durua dalana do ita herevalaia. Ginigunana, naria tauna ia moale noho ena badina bona ena moale ia hadikaia gauna do ita herevalaia.

DAHAKA DAINAI IA AUKA OI MOALE NOHO TOTONA?

5. Dahaka dainai gorere o buruka taudia idia naria taudia idia moale noho be namo?

⁵ Bema gorere o buruka tauna idia naria taudia idia moale lasi, do idia hesiku haraga diba. (Aon. 24:10) Bona idia hesiku neganai, do ia auka kara namodia idia hahedinaraia totona. Dahaka gaudia ese naria taudia edia moale ia hadikaia diba?

6. Dahaka dainai haida be idia hesiku bada?

⁶ Gorere o buruka tauna idia naria taudia be idia hesiku bada. Taihu ta ladana Leah ia gwau: “Gorere o buruka tauna naria gaukara ese hesiku bada ia havaraia diba. Dina ai lau karaia gaukara murinai, gau ta lau karaia diba lasi. Nega haida egu goada ia ore momokani dainai, lau hegeregere lasi teks mesiji ta lau haloua totona.” Haida be idia mahuta namonamo lasi eiava laga-ani idia abia lasi. Taihu ta ladana Inés ia gwau: “Lau mahuta namonamo lasi. Hanuaboi ai, hora rua murinai lau toreisi bona egu ravana hahine lau naria. Bona lau bona egu adavana be nega daudau lalonai emai holidei ai abia lasi.” Haida be moale karadia haida dekenai idia lao lasi bona tiokratik hesiai gaukara haida idia karaia be auka, badina nega ibounai edia lalokau taudia badinai idia noho be namo. Unai dainai, idia mamia sibona idia noho bona edia ura gaudia idia karaia diba lasi.

7. Dahaka dainai gorere o buruka taudia idia naria taudia haida idia lalohisihisi eiava lalometau?

⁷ Gorere o buruka taudia idia naria taudia idia lalohisihisi eiava lalometau diba. Taihu ta ladana Jessica ia gwau: “Nega haida lau laloa lau karaia gaudia be hegeregere lasi ta durua totona. Unai dainai nega haida sibona totona gau haida lau karaia neganai, lau laloa lau be sibona lau laloa bada.” Haida be idia lalohisihisi badina nega haida idia karaia gaukara dekenai idia maumau. Haida be idia laloa momo badina idia laloa idia be edia lalokau taudia idia durua namonamo lasi. Ma haida idia lalohisihisi badina idia badu bona idia naria buruka o gorere taudia dekenai hereva aukadia idia gwauraia. (Iam. 3:2) Haida be idia lalometau badina idia laloatao guna unai tauna be mai ena goada bona ia gorere lasi, to hari ena goada ia ore ia lao. Taihu ta ladana Barbara ia gwau: “Lau lalohekwarahilaia gauna badana ta be dina ta ta ai lau itaia egu lalokau tauna ena goada ia ore ia lao.”

8. Tanikiu herevana ese ta ia hagoadaia ena ekspiriens ta oi gwauraia.

⁸ Gorere o buruka taudia idia naria taudia haida idia mamia, idia karaia gaukara be haida ese idia laloa bada lasi. Dahaka dainai? Badina nega momo idia karaia gaukara totona tanikiu hereva eiava hanamoa hereva idia abia lasi. Unai dainai hanamoa hereva kwadogina ese idia ia hagoadaia diba. (1 Tes. 5:18) Taihu ta ladana Melissa ia gwau: “Nega haida, lau tai badina lau lalometau. To lau naria taudia be lau idia hamaoroa, ‘Lau totona oi karaia gaudia ibounai dainai lau tanikiu bada,’ unai ese lau ia hagoadaia bada! Unai hereva dainai goada lau abia dina ma ta ena gaukara lau karaia totona.” Tadikaka ta ladana Ahmadu bona ena adavana be edia varavara ena natuna kekeni idia naria, ia be ia gorere bada. Ahmadu ia gwau: “Kekeni be ia naria totona ai karaia gaukara ibounai ia lalopararalaia lasi. To ai dekenai tanikiu herevana eiava ia gwau ai ia lalokau henia neganai, ai moale bada.”

MOALE NOHO DALANA

9. Edena dala ai gorere o buruka taudia idia naria taudia be idia manau diba?

⁹ Oi manau. (Aon. 11:2) Iseda nega bona goada be hegeregere lasi, gau ibounai ita karaia totona. Unai dainai emu nega bona goada ena hetoana oi dibaia be namo bona nega haida buruka o gorere tauna ese ia gwauraia gaudia haida oi karaia lasi be namo. Unai amo manau karana oi hahedinaraia. Bema haida idia ura oi idia durua, mai moale ida edia heduru oi abia dae. Tadikaka ta ladana Jay ia gwau: “Dina ta ta ai, iseda nega bona goada hegeregerena ita karaia diba gaudia sibona ita karaia. Bema unai bamona ita karaia, do ita moale noho diba.”

10. Dahaka dainai gorere o buruka taudia idia naria taudia be idia laloa namonamo be mai anina bada? (Aonega Herevadia 19:11)

¹⁰ Oi laloa namonamo. (Aonega Herevadia 19:11 duahia.) Laloa namonamo tauna be ta ena kara dainai do ia badu haraga lasi. Ena be ta ia badu, to laloa namonamo tauna be do ia ura diba dahaka dainai unai tauna ia badu. Momokani, gorere haida ese ta ena kara o laloa dalana ia haidaua diba dainai, ia kara kava diba. (Had. 7:7) Hegeregere, guna kara namo ia hahedinaraia bona laloa namonamo tauna be ia hepapahuahu eiava badu tauna ai ia lao diba. Eiava gau momo do ia ura, ia maumau momo, eiava gau momo dekenai do ia moale lasi. Bema gorere bada tauna ta oi naria, ena gorere oi diba namonamo be namo. Unai amo do oi laloparara ena gorere dainai ena kara haida be do idia idau.—Aon. 14:29.

11. Dina ta ta ai gorere o buruka taudia idia naria taudia be dahaka mai anina bada gaudia totona nega idia atoa be namo? (Salamo 132:​4, 5)

¹¹ Nega oi atoa emu hetura karana Iehova ida oi hagoadaia totona. Nega haida ai, nega oi atoa be namo “mai anina bada gaudia” haida oi karaia totona. (Fili. 1:10) Hegeregere, emu hetura karana Iehova ida oi hagoadaia. Mani King Davida oi laloa. Ia be ia bisi, to Iehova tomadiho henia karana ia atoa guna. (Salamo 132:​4, 5 duahia.) Unai hegeregerena, dina ta ta ai Baibel duahiduahi bona guriguri totona, nega oi atoa be namo. Taihu ta ladana Elisha ia gwau: “Guriguri bona Salamo bukana duahia bona laloa dobu karana dainai lau moale noho diba. Iehova guriguri henia karana ese lau ia durua bada. Dina ibounai lalonai lau guriguri dainai, lalomaino lau abia diba.”

12. Dahaka dainai gorere o buruka tauna idia naria taudia be sibona edia helt idia laloa bada be namo?

¹² Gau haida oi karaia emu helt ia namo totona. Gorere o buruka taudia idia naria taudia be idia bisi dainai, edia helt totona gau haida idia karaia be auka. To, emu helt ia namo totona, eksasais bona aniani namonamo karana be mai anina bada. Unai dainai nega oi gaukaralaia namonamo, unai amo oi aniani bona oi eksasais diba. (Efe. 5:​15, 16) Ma danu, oi mahuta namonamo. (Had. 4:6) Tahua gaukara ta ese ia hahedinaraia mahuta karana ese ita ia durua, iseda harana amo miro gaudia idia kokia totona. Medikol atikol ta ia gwau bema ta ia mahuta namonamo, do ia lalohekwarahi momo lasi bona nega aukadia ai ia laloa namonamo diba. Danu nega oi atoa moale karadia haida oi karaia totona. (Had. 8:15) Taihu ta be ia moale noho totona ia karaia gaudia ia herevalaia. Ia gwau: “Weda ia namo neganai, murimuri dekenai lau lao bona dina ena siahu lau abia. Hua ta lalonai dina ta lau abia hidi turana ta ida ai moale hebou totona.”

13. Dahaka dainai kiri be namo? (Aonega Herevadia 17:22)

¹³ Oi kiri be namo. (Aonega Herevadia 17:22 duahia; Had. 3:​1, 4) Oi kiri neganai, unai ese emu helt ia durua. Ta oi naria neganai, nega momo gau momo be emu ura hegeregerena do idia vara lasi. Unai dainai ena be idia vara gaudia haida be oi idia habadua diba, to oi kiri neganai, unai ese oi dekenai lalomaino ia havaraia diba. Bona oi naria tauna ida umui kiri hebou neganai, unai ese emui hetura karana ia hagoadaia diba.

14. Edena dala ai tura namona hereva henia karana ese oi ia durua diba?

¹⁴ Tura namona ta oi hereva henia. Ena be oi moale noho totona gau haida oi karaia, to nega haida do oi laloa momo diba. Unai bamona negadia ai, reana emu turana namona ta ida oi herevahereva diba. (Aon. 17:17) Emu turana ena kamonai karana eiava ena hagoadaia herevadia ese oi ia hagoadaia diba, oi moale noho totona.—Aon. 12:25.

15. Edena dala ai Paradaiso oi herevalaia karana ese oi ia durua oi moale noho totona?

¹⁵ Paradaiso ai umui noho hebou karana oi laloa. Laloatao, oi karaia naria gaukara be do ia ore. Bona Iehova ese taunimanima ia havaraia neganai, ia ura lasi unai gaukara idia karaia. (2 Kor. 4:​16-18) Danu “mauri korikorina” be vaira nega ai do ita abia. (1 Tim. 6:19) Reana emu lalokau tauna ida Paradaiso ai do umui karaia gaudia umui herevalaia hebou neganai, do oi moale bada. (Isa. 33:24; 65:21) Taihu ta ladana Heather ia gwau: “Nega momo lau naria taudia lau hamaoroa, daudau lasi do ita turituri hebou, do ita heau hebou, bona motabaik do ita taria. Bona do idia toreisi lou lalokau taudia totona, paraoa do ita gabua bona aniani namodia do ita nadua. Iseda helaro namona dainai Iehova do ita tanikiu henia hebou.”

HAIDA ESE HEDURU DO IDIA HENIA DALANA

16. Edena dala ai gorere o buruka taudia idia naria taudia ita durua diba? (Laulau itaia danu.)

¹⁶ Naria taudia ita durua, unai amo idia laga-ani diba. Ita ese gorere o buruka taudia idia naria taudia ita durua diba. Hegeregere, nega haida gorere o buruka taudia ita naria. Unai amo edia naria taudia idia laga-ani diba eiava edia ura gaudia haida idia karaia diba. (Gal. 6:2) Pablisa haida be sediual idia karaia unai maduna haida idia huaia totona. Taihu ta ladana Natalya be ena paralais adavana ia naria, ia gwau: “Kongrigeisen amo tadikaka ta be wiki ta lalonai nega tamona eiava rua ia mai, unai amo egu adavana ida idia haroro hebou, idia herevahereva hebou, bona muvi idia itaia hebou. Egu adavana dekenai unai be nega namodia, bona lau be mai egu nega gau haida lau karaia totona, hegeregere, lau loaloa sisina.” Nega haida, dala oi karaia diba hanuaboi ta ai edia ruma ai oi noho totona, unai amo naria tauna be ia mahuta namonamo diba.

17. Hebou lalonai, edena dala ai heduru ita henia diba?

¹⁷ Hebou lalonai idia ita durua diba. Gorere o buruka taudia idia naria taudia be kongrigeisen heboudia, sekit hebouhebou, bona rijinol hebouhebou ai tok idia kamonai namonamo lasi. Unai dainai kongrigeisen taudia ese heduru idia henia diba. Hegeregere, hebou lalonai eiava kahana haida lalonai, buruka o gorere taudia ida idia helai. Bema gorere eiava buruka taudia be ruma sibona ai idia noho, edia ruma dekenai oi lao diba bona fon amo hebou umui kamonai, unai amo edia naria taudia be Kingdom Hall dekenai idia lao diba.

18. Dahaka gau ma haida ita karaia diba, gorere o buruka taudia idia naria taudia ita durua totona?

¹⁸ Idia oi hanamoa bona idia totona oi guriguri. Elda taudia be gorere o buruka taudia idia naria taudia idia vadivadi henia be namo. (Aon. 27:23) Herevana kongrigeisen taudia ibounai edia noho daladia be idauidau, to naria taudia dekenai tanikiu herevadia bona hanamoa herevadia idia gwauraia be namo. Danu Iehova ita noia idia dekenai goada ia henia bona idia moale noho totona.—2 Kor. 1:11.

19. Dahaka ita naria noho?

¹⁹ Daudau lasi, Iehova be hisihisi ese ia havaraia mata ranu ibounai do ia dahua ore. Gorere bona mase be do idia ore momokani. (Apok. 21:​3, 4) “Aena dika taudia be dia bamona do idia roho isi.” (Isa. 35:​5, 6) Nega matamata ai, buruka bona gorere taudia naria karana ena hisihisi be “gau gunadia” sibona. (Isa. 65:17) Hari, unai gwauhamata namodia do idia guguru negana ita naria noho lalonai, Iehova be ita do ia rakatania lasi. Bema ita ia durua totona ia dekenai ita tabekau, ia ese ita do ia durua ‘mai boga-auka bona moale ida gau ibounai ita haheaukalaia’ totona.—Kol. 1:11.