Tuari be Edena Nega ai Do Ia Doko?—Baibel be Dahaka Ia Gwau?

“Hari be tuari karadia ita koua negana, unai amo do ia bada ia lao lasi. Namona be hari iseda kara ita biagua.” United Nations Secretary-General António Guterres be Iran ese Saturday, April 13, 2024 ai Israel ia tuari henia neganai, unai hereva ia gwauraia.

Middle East sibona ai tuari ia vara lasi, to tanobada ena kahana ibounai ai ia vara noho.

“Tanobada Tuari Iharuana ia vara negana amo tanobada ai dagedage karadia idia bada idia lao noho bona taunimanima 2 bilioni bamona be unai hekwakwanai dainai dika idia davaria.”​—United Nations Security Council, January 26, 2023.

Tuari idia vara gabudia be Israel, Gaza, Syria, Azerbaijan, Ukraine, Sudan, Ethiopia, Niger, Myanmar, bona Haiti.a

Tuari be edena negai do ia doko? Tanobada ena lohia taudia ese maino idia havaraia diba, a? Baibel be dahaka ia gwau?

Tanobada ai tuari idia vara noho

Tanobada ibounai ai idia vara tuari karadia ese ia hahedinaraia tuari ibounai be kahirakahira do idia doko. Idia vara noho tuaridia ese idia hahedinaraia ita be Baibel ese ia perovetalaia negana ai ita noho. Baibel ese iseda nega ia gwauraia “inai nega oromana ena dokona.”​—Mataio 24:3.

• “Tuari sivaraidia do umui kamonai. . . . Bese ta do ia toreisi bese ta do ia tuari henia, bona basileia ta ese basileia ta do ia tuari henia.”​—Mataio 24:6, 7.

Inai atikol “‘Dina Gabedia’ Eiava ‘Dokona Negana’ Ena Toa be Dahaka?” duahia, bona itaia edena dala ai hari idia vara tuaridia ese Baibel ena peroveta herevadia idia hagugurua.

Tuari ta ese tuari ibounai do ia haorea

Baibel ia peroveta tuari ibounai do ia ore. Unai be edena bamona do ia vara? Taunimanima ese do idia havaraia lasi, to Aramagedono, “Siahu Ibounai Diravana ena dina badana ena tuari” ai unai do ia vara. (Apokalupo 16:14, 16) Unai tuari ese dala do ia kehoa Dirava ese ena gwauhamata ia hagugurua totona, unai be taunimanima ibounai be maino ai do idia noho hanaihanai.​—Salamo 37:10, 11, 29.

Dirava ena tuari ese tuari ibounai ia haorea amo diba ma haida oi abia totona, inai atikol “Aramagedono Ena Tuari be Dahaka?” oi duahia.