Lauma Edia Gabu Dekenai Idia Lohia Taudia

DAIKA ese tanobada ia lohiaia? Taunimanima edia goada ia hereaia gauna ta ese ia naria, a? Eiava, Dirava ese taunimanima ia rakatania sibodia idia naria totona, a? Unai henanadai edia haere tahua totona, Iesu Keriso be tanobada dekenai ia noho neganai, ia dekenai ia vara gauna ta do ita laloa.

Iesu ia bapatiso murinai, ita itaia diba lasi lauma ta, ladana Satani Diabolo, ese ia dibagania. Baibel ese unai hedibagani ta, inai bamona ia gwauraia: “Satani ese ororo bada herea ta ena atai dekenai [Iesu] ia hakaua daekau, tanobada edia basileia ibounai mai edia hairaina danu ia itaia.” (Mataio 4:8) Bena Satani ese Iesu ia hereva henia, ia gwau: “Oi dekenai siahu do lau henia, inai gau ibounai do oi naria, vadaeni ladana bada do oi abia. Inai gau ibounai be lauegu, bona lau ura henia tauna dekenai do lau henia diba. Unai dainai, bema oi tomadiho henia lau dekenai, inai gau ibounai be do oi abia oiemu.”​—Luka 4:​6, 7.

Satani ia gwau inai tanobada ena basileia eiava gavamani ibounai ia biagua. Iesu ese unai hereva ia hakoikoia, a? Lasi. To ma nega ta ai unai ia hamomokania badina Satani ia gwauraia “tanobada ena lohia.”​—Ioane 14:30.

Baibel ese ia hahedinaraia, Satani be mai ena siahu bada aneru dikana ta. Keristani aposetolo tauna, Paulo, ese Satani be “lauma dikadia” danu ia herevalaia bona ia gwauraidia idia be “siahu taudia, bona tanobada ena dibura lohiadia.” (Efeso 6:​11, 12) Bona aposetolo Ioane ia gwau “Satani ese tanobada taudia ibounai ia gunalaia noho.” (1 Ioane 5:19) Baibel ena buka ta, Apokalupo, ia gwau Satani ese “tanobada taudia ibounai ia koia noho.” (Apokalupo 12:9) Laulau dalanai, Apokalupo ese Satani ia gwauraia huala ta, bona ‘ena siahu, ena helai gabuna badana bona ena goada bada herea danu ia henia’ inai tanobada ena politikol oromana dekenai.​—Apokalupo 13:2.

Tanobada dekenai idia vara gaudia ese idia hahedinaraia danu, siahu dikana ta ese taunimanima edia lalona ia ania idia kara dika totona. Tanobada edia gavamani ese maino idia havaraia diba lasi ena badina ma ta be dahaka? Ma dahaka gau ta ese taunimanima do ia doridia idia inai heheni bona idia ala-ala heheni totona? Tuari lalonai ala-ala bada bona mase ia itaia dainai, hahine ta ia hoa maragi lasi bona inai bamona ia hereva: “Lau diba lasi edena dala ai unai bamona dika ia vara diba. Inai kara be ma ta inai henia karana ia hanaia. Lauma dikana ta ese taunimanima ia gaukaralaidia sibodia idia hadikaia heheni totona.”

Lauma Korikorina ta ese Dirava Ia Badu Henia

Inai nega ai, momo idia laloa Satani Diabolo be ia noho lasi. Haida idia laloa ia be taunimanima lalodiai ia noho dika ena siahu sibona, to ia be unai bamona lasi. Baibel bona tanobada dekenai idia vara gaudia ese idia hahedinaraia ia be lauma korikorina ta. Danu, Satani be Iehova Dirava ia badu henia momokani. Oibe, Satani be Dirava danu ia hegeregere lasi. Iehova be siahu ibounai Havaraia Tauna dainai, ia be ia havaraia gaudia ibounai edia Lohia maorona.​—Apokalupo 4:11.

Dirava be lauma dikana ta ia havaraia lasi Ia ia badu henia totona. Lasi, to ‘Dirava ena aneru’ natuna ta ena mataganigani urana dainai, ia ura Iehova be mai ena maoro ida ia abia tomadiho karana be ia sibona ese do ia abia. (Iobu 38:7; Iamesi 1:​14, 15) Unai ura ese ia veria Dirava ia gwau-edeede henia totona. Ia gwau-edeede dainai, unai aneru be sibona Satani ai ia halaoa (anina be “tuari henia tauna”) bona Diabolo (anina be “ladana hadikaia tauna”). Unai gaudia ibounai dainai, reana oi laloa dahaka dainai Satani ese tanobada ia lohiaia noho bona idia koua lasi.

Satani Ena Lohia Karana Idia Koua Lasi Ena Badina

Satani be Iesu dekenai tanobada ia lohiaia dalana ia herevalaia neganai, dahaka ia hereva oi laloatao, a? Satani ia gwau: “Oi dekenai siahu do lau henia, inai gau ibounai do oi naria, . . . Inai gau ibounai be lauegu.” (Luka 4:6) Unai hereva ese ia hahedinaraia Satani Diabolo ia lohia badina tamona be Dirava ese ia koua lasi dainai. To, dahaka dainai Dirava ese Satani ia do koua lasi?

Unai henanadai ena haere davaria totona, Eden umana, Satani ese ena tanobada lohia gaukarana ia hamatamaia gabuna lalonai ia vara gauna ita laloa. Unuseniai, Satani ia gwau, Dirava be dala dikana ai ia lohia badina ia ese tau bona hahine ginigunadia, Adamu bona Heva, amo gau namona ta ia hunia. Satani ia gwau, bema Dirava ese ia taravatua au huahua idia ania, Dirava ena siahu henunai amo do idia siri. Unai neganai, Iehova ese Adamu bona Heva do ia biagudia lasi bona sibodia idia naria diba. Idia be Dirava bamona ai do idia lao!​—Genese 2:​16, 17; 3:​1-5.

Satani ese Heva ena lalona ia ania, bena Heva ese Adamu ia ha-uraia Dirava ena taravatu idia makohia totona; unai koikoi dalana amo Satani ese taunimanima ginigunadia ruaosi ia lohiadia bona ia biagudia matamaia. Vadaeni, Iehova ia badu henia tauna, Diabolo, be edia dirava ai ia lao. To, unai kara ese Adamu bona Heva ia ruhaia lasi, to idia be Satani, kara dika, bona mase edia igui hesiai taudia ai idia lao.​—Roma 6:16; Heberu 2:​14, 15.

Iehova ena hahemaoro goevana hegeregerena ai, karaharaga ia ese Satani bona ena hesiai taudia matamatadia rua ia hamasedia diba. (Deuteronomi 32:4) To, hepapahuahu badana ta ia noho. Satani ese Iehova ena lohia dalana ena maoro ia dagedage henia. Dirava be aonega dalanai ai, nega ia henia bena unai amo do ia hedinarai, Dirava badinaia lasi ura kwalimu karana ese dika do ia mailaia. Iehova ese unai gwau-edeede taudia ia hamasedia haraga lasi dainai, Adamu bona Heva be natudia idia havaraia diba.​—Genese 3:​14-19.

Ena be Adamu ena natudia momo be Iehova ena lohia siahuna idia abia dae lasi, to Iehova ena kara Ia idia tomadiho henia taudia dekenai ese ia hahedinaraia iena lohia dalana be herea. Iehova ena lohia dalana abia dae karana ese moale bona noho namo ia havaraia. To, Satani henunai idia noho taudia edia mauri ia dika bona idia noho namo lasi. Oibe, “taunimanima haida ese ma haida idia biagua noho, bona idia hisihisi henidia noho.” (Hadibaia Tauna 8:9) Satani ena siahu henunai, inai tanobada lalonai taunimanima be noho namona bona moale korikori idia davaria lasi. To, badina namona dainai ita moale diba.

Satani Ena Nega Ia Kwadogi!

Satani ena siahu tanobada dekenai be nega sisina sibona gauna. Iehova ese Satani ena lohia dalana do ia haheaukalaia daudau lasi! Kahirakahira, Diabolo ena gaukara do idia hadokoa. Dirava ese ia abia hidi lohia tauna matamatana ese tanobada do ia biagua. Unai Pavapava be Iesu Keriso. Apokalupo ese guba dekenai lohia dagina ia abia dalana inai bamona ia gwauraia: “Tanobada biagua siahuna be iseda Lohiabada bona iena Keriso idia abia vadaeni.” (Apokalupo 11:15) Baibel ena deit duahia dalana bona Baibel ena peroveta herevadia idia momokani ese idia hahedinaraia lagani 1914 ai unai ia vara.​—Mataio 24:​3, 6, 7.

Iesu ena lohia dagina ia abia murinai dahaka ia vara be Baibel ese ia gwauraia danu. Ia gwau: “Guba dekenai tuari ia vara. Mikaela [Iesu Keriso] mai ena aneru momo danu ese huala [Satani Diabolo] idia tuari henia. Huala mai ena aneru momo danu ese Mikaela idia tuari henia. To huala ena goada hegeregere lasi dainai ia kwalimu lasi. Unai dainai huala mai ena aneru be dala lasi guba dekenai do idia noho. Vadaeni unai huala badana, be Dirava ena aneru ese idia nega diho. Ia be unai idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna. Oibe, ia, mai ena aneru ibounai danu, be idia ese tanobada dekenai idia negea diho.”​—Apokalupo 12:​7-9.

Guba dekenai Satani idia lulua neganai, dahaka do ia vara? Guba dekenai idia noho taudia idia moale diba, to tanobada dekenai idia noho taudia be edena bamona? Apokalupo 12:12 ia gwau: “Tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” Momokani, Satani be guba amo idia negea diho dainai, tanobada dekenai hisihisi ia havaraia. Buka ta ladana, The Columbia History of the World, ia gwau: “Lagani Hani Tuarina 1914​—1918 ena dika bada . . . ese ia hahedinaraia Western tanodia ese sibodia idia havaraia kavakava bona kara dika amo sibodia idia naria diba lasi. Western tanodia edia lalo-goada be Tanobada Ibounai Tuarina Ginigunana ese ia hamanokaia bona ia do goada lou momokani lasi.”

Unai uru ena hekwakwanai toana be edia lalo-goada sibona amo ia ore lasi. Iesu ia peroveta: “Bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia. Gabu idauidau dekenai hitolo bada do ia vara, tano danu do ia mareremarere.” Bona daihanai gorere ia gwauraidia danu. (Mataio 24:​7, 8; Luka 21:11) Danu, Baibel ia gwau Satani ena tanobada oromana ena “nega ena dokona” dekenai, taunimanima momo be “edia ura sibona do idia tahua, moni do idia mataganigani henia, . . . tamana bona sinana do idia kamonai henia lasi, . . . do idia bogahisihisi lasi.” Bona taunimanima be “lebulebu karadia idauidau do idia ura henia bada, to Dirava do idia ura henia maragi.”​—2 Timoteo 3:​1-5.

Tuari, daihanai gorere, hitolo, tano mareremarere, bona mauri ena kara goevadia be idia dika idia lao​—unai gaudia ibounai be lagani 1914 amo idia dika momokani idia lao, Baibel ia hereva bamona. Idia hahedinaraia, ia badu dikadika Dirava bona taunimanima edia inai tauna​—Satani Diabolo​—be tanobada dekenai idia negea diho bona hari ena badu be tanobada dekenai ia halasia noho. To, Baibel ia hahedinaraia danu, Satani be nega daudau lalonai do ia lohia lasi. Iena “nega be ia kwadogi sibona” ela bona Aramagedono do ia mai, bena Dirava ese Satani ese ia lohiaia tanobadana do ia haorea vaitani.

Unai nega kwadogina ia ore neganai, Satani dekenai dahaka do ia vara? Aposetolo Ioane be inai bamona ia torea: “Aneru ta lau itaia, guba dekena amo ia diho. Iena imana dekenai guri dobu masemase ena ki ia dogoatao, bona auri seini badana ta danu. Inai aneru ese unai huala, unai idaunegai gaigaina, ma iena ladana be ‘Diabolo’ bona ‘Satani,’ ia dogoatao, seini dekenai ia guia. Vadaeni do ia guia noho, ela bona lagani 1,000 idia ore. Aneru ese unai huala be guri dobu masemase lalonai ia negea diho. Vadaeni unai guri ia lokaia, bona koua toana ia karaia.” (Apokalupo 20:​1-3) Unai be hahenamo badana taunimanima totona!

Basileia Ena Lohia Siahuna Henunai Ita Moale

Satani ia lohia lasi lalonai, Dirava ena Basileia Iesu Keriso henunai ese taunimanima do ia biagudia. Tanobada dekenai gavamani momo do idia lohia lasi to guba gavamani tamona sibona ese tanobada ibounai do ia lohiaia. Tuari do ia ore, bona gabu ibounai dekenai maino do ia noho. Dirava ena Basileia henunai, taunimanima ibounai be lalokau tadikaka oreana bamona ai do idia noho.​—Salamo 72:​7, 8; 133:1; Daniela 2:44.

Iesu be edena bamona lohia ai do ia lao? Tanobada dekenai ia noho neganai, taunimanima totona lalokau bada ia hahedinaraia. Hitolo taudia dekenai mai hebogahisi ida Iesu ese aniani ia henia. Gorere taudia ia hanamodia, matakepulu taudia matadia ia kehoa, idia hereva diba lasi taudia bona idia raka diba lasi taudia ia hanamodia. Iesu ese mase taudia ia hamauridia lou danu! (Mataio 15:​30-38; Mareko 1:34; Luka 7:​11-17) Unai hoa karadia be gabeai do ia Pavapava neganai do ia karaia gaudia idia laulaulaia. Unai bamona lohia namona ia lohia be moale bada gauna!

Iehova ena lohia siahuna henunai idia noho taudia ese idia doko diba lasi hahenamo do idia davaridia. Baibel ia gwauhamata: “Matakepulu taudia ese do idia itaia diba, bona taia kudima taudia, be do idia kamonai diba. Edia aena idia dika taudia be do idia roho bona mavaru, bona hereva diba lasi taudia, be mai moale bada do idia boiboi.” (Isaia 35:​5, 6) Aposetolo Ioane ese unai dina badana be inai bamona ia toretorelaia: “Gado ta lau kamonai, helai gabuna badana dekenai amo ia mai, ia hereva badabada, ia gwau, ‘Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.’ ”​—Apokalupo 21:​3, 4.

Iehova Dirava ena lohia siahuna ena Natuna, Iesu Keriso, henunai ese do ia havaraia hahenamodia be hari Satani Diabolo ena tanobada lalonai ita mamia vadaeni hisihisi ibounai do idia hereaia momokani. Dirava ena gwauhamata tanobada matamatana lalonai, taunimanima do idia laloa daradara lasi, ‘Daika ia lohia noho?’ (2 Petero 3:13) Lauma edia gabu amo, mai hebogahisi ida idia Lohia Taudia, Iehova bona Keriso, ese tanobada idia lohiaia neganai, kamonai taudia do idia moale bona idia noho namo. Edia lohia siahuna henunai do oi noho helarona oi abia be namo, ani?

[Picture on page 7]

Taunimanima do idia noho namonamo Dirava ena Basileia ese ia lohiaia tanobadana lalonai

[Picture Credit Line on page 4]

NASA photo