Iesu Ena Dina Ginigabedia Tanobada Dekenai Ita Lalohadailaia Lou

INAI nega be Iuda taudia edia hua Nisan ena dina namba 7, lagani 33 C.E. ai. Mani oi laloa, oi be Roma ena provinsi Iudea lalonai idia vara gaudia oi raraia. Iesu Keriso bona iena hahediba taudia be Ieriko bona ena au namodia idia rakatania, bona mai ena kahu dala gagevana ta dekenai idia raka. Ma taunimanima momo be Ierusalema dekenai idia lao noho danu, lagani ta ta iboudiai idia karaia Pasova Ariana totona. To, Keriso ena hahediba taudia be unai ororo idia daekau dainai idia hesiku sibona lasi, to ma gau ta idia laloa noho.

Iuda taudia idia ura dikadika Roma ena gavamani ena metau amo idia ia ruhaia Mesiana ta do ia mai. Momo idia laloa Nasareta tauna Iesu be nega daudau lalonai idia naria Hamauria tauna unai. Lagani toi mai kahana lalonai, ia ese Dirava ena Basileia ia herevalaia. Ia ese gorere taudia ia hanamoa bona hitolo taudia ia ubua. Momokani, ia ese taunimanima momo edia lalona ia hagoadaia. To Iesu ese tomadiho gunalaia taudia ia samania auka dainai idia badu bona idia ura dikadika ia idia hamasea. To, hari ia be dala kaukauna dekenai ia raka noho mai goada ida bona iena hahediba taudia be ia murinai idia raka.​—⁠Mareko 10:⁠32.

Dina be Olive Ororona murinai ia diho neganai, Iesu bona ia idia bamoa taudia be Betania ena hanua dekenai idia ginidae, hanuaboi 6 unuseniai do idia noho. Unuseniai edia lalokau turadia Lasaro, Maria, bona Mareta idia noho, idia abidia dae totona. Edia laolao mai siahuna murinai, unai adorahi ena keruma ese idia ia hagoadaia, bona Nisan 8 ena Sabati dinana ia hamatamaia.​—⁠Ioane 12:​1, 2.

Nisan 9

Sabati murinai, Ierusalema be gaukara regena amo ia honu. Vadivadi taudia tausen momo be Pasova Ariana totona unai siti dekenai idia mai vadaeni. To ita kamonai regerege badana be lagani momo edia Pasova ia kahirakahira negadia amo ia idau. Idia ura idia vara gaudia idia itaia taudia hutuma be siti ena ariara maragidia dekenai idia heau, siti ena vareai gabudia dekenai. Vareai gabudia ai idia noho taunimanima hutuma edia huanai murimurinai idia doria lao neganai, gau namona idia itaia! Taunimanima momo be mai moale ida Olive Ororona amo idia diho mai, Betepage amo ia mai dalana dekenai. (Luka 19:⁠37) Unai ibounai ena anina be dahaka?

Itaia! Nasareta tauna, Iesu, be doniki ena natuna latanai ia guia mai. Taunimanima be ia vairanai dabua dala dekenai idia atoa. Haida be idia utua pama au rigidia idia davea bona mai moale ida idia boiboi: “Lohiabada ena ladana dekenai ia mai tauna ita hanamoa! Ia be Israela ena King!”​—⁠Ioane 12:​12-15.

Taunimanima hutuma be Ierusalema kahirakahira dekenai idia mai neganai, Iesu ese siti ia itaia bona iena lalona ia marere. Ia tai matamaia, bona ita kamonai inai siti be do idia hadikaia ore ia perovetalaia. Nega daudau lasi murinai Iesu be dubu dekenai ia ginidae neganai, ia ese taunimanima hutuma ia hadibaia bona ia dekenai idia mai matakepulu bona aena dika taudia ia hanamoa.​—⁠Mataio 21:14; Luka 19:​41-44, 47.

Hahelaga taudia badadia bona taravatu hadibaia taudia ese unai idia itaia. Iesu ena hoa karadia bona hutuma taudia edia moale bada idia itaia neganai idia badu dikadika! Farisea taudia ese edia badu idia hunia diba lasi, idia gwau: “Hadibaia tauna e, emu diba tahua taudia dekenai oi gwau henia.” Iesu ia haere, ia gwau, “Lau hamaoroa umui dekenai, bema idia be mai regerege lasi, inai nadi do idia boiboi.” Ia lao gwauraia neganai, Iesu ese dubu lalonai idia karaia hoihoi karadia ia itaia.​—⁠Luka 19:​39, 40; Mataio 21:​15, 16; Mareko 11:⁠11.

Nisan 10

Iesu be daba momokani ai dubu dekenai ia ginidae. Varani, iena Tamana, Iehova Dirava, ena tomadiho be hoihoi goadalaia karadia ai idia halaoa dainai ia badu. Unai dainai, mai lalo-goada ida ia ese dubu lalonai idia hoihoi taudia ia luludia matamaia. Bena moni idia haidaua mataganigani taudia edia pata bona pune idia hoihoilaia taudia edia helai gaudia ia bubua. Iesu ia gwau: “Buka Helaga lalonai ia torea vadaeni, ‘Lauegu Ruma be guriguri Rumana do idia gwauraia.’ To umui ese henaoa taudia edia ruma dekenai umui halaoa.”​—⁠Mataio 21:​12, 13.

Hahelaga taudia badadia, taravatu hadibaia taudia, bona hanua ena tau badadia be Iesu ena kara bona taunimanima vairanai ena hadibaia herevadia idia ura lasi momokani. Idia ura dikadika ia idia hamasea! To taunimanima hutuma ese edia dala idia koudia badina Iesu ena hadibaia herevadia dainai idia hoa bona “idia ura Iesu ena hereva idia kamonai.” (Luka 19:​47, 48) Hanuaboi ia mai noho neganai, Betania dekenai hanuaboi laga-ani namona idia abia totona Iesu bona ia idia bamoa taudia ese edia raka namona idia moalelaia.

Nisan 11

Hari be daba momokani, bona Iesu bona iena hahediba taudia be Olive Ororona idia hanaia noho, Ierusalema dekenai idia lao totona. Dubu dekenai idia ginidae neganai, hahelaga taudia badadia bona hanua tau badadia be haraga herea Iesu idia samania. Iesu ena kara dubu lalonai, moni idia haidaua taudia bona hoihoi taudia dekenai, idia laloatao goevagoeva. Iena inai taudia be mai badu ida idia gwau: “Edena siahu dekenai inai kara oi karaia, bona inai siahu be daika ia henia oi dekenai, a?” Iesu ia haere: “Lau danu lau nanadaia umui dekenai, do umui haere henia lau dekenai, vadaeni inai kara lau karaia ena siahu be do lau hamaoroa umui dekenai. Ioane ena bapatiso be edeseni dekena amo? Guba dekena amo, o taunimanima dekena amo?” Unai dagedage taudia be idia gini hebou bona idia hereva: “Bema ita gwau, ‘Guba dekena amo,’ do ia gwau, ‘To edena bamona umui kamonai lasi ia dekenai.’ Bema ita gwau, ‘Taunimanima dekena amo,’ inai taunimanima momo dekenai do ita gari, badina be idia ibounai idia laloa Ioane be peroveta tauna?” Edia dala ia koua dainai mai manoka ida idia haere: “Ai diba lasi.” Iesu be mai manau ida ia haere: “Lau danu inai kara lau karaia ena siahu be do lau hamaoroa lasi umui dekenai.”​—⁠Mataio 21:​23-27.

Hari Iesu ena inai taudia be iena hereva amo ia idia hakererea toho bena ia idia dogoatao diba. Idia henanadai: “Kaisara dekenai takisi moni henia be ia maoro o lasi?” Iesu ia haere: “Takisi monina ta umui mailaia, lau itaia.” Ia henanadai: “Inai be daika ena laulau bona daika ena revareva?” Idia gwau, “Kaisara.” Iesu ese idia ia hakoikoia, taunimanima iboudiai idia kamonaia totona ia hereva goevagoeva, ia gwau: “Kaisara ena gau, Kaisara dekenai umui henia, to Dirava ena gau be Dirava dekenai umui henia.”​—⁠Mataio 22:​15-22.

Aonega herevadia amo iena inai taudia edia hereva ia koua, bona hari Iesu be taunimanima hutuma bona iena hahediba taudia vairanai idia ia gwauraia dika. Ia ese mai gari lasi ida taravatu hadibaia taudia bona Farisea taudia ia gwau henia mani oi kamonai. Ia gwau: “Idia karaia bamona do umui karaia lasi. Badina be idia hereva, to idia karaia lasi.” Mai gari lasi ida ia gwau dika idauidau do idia davaria, ia hahedinaraia idia be matakepulu hakaua taudia bona koikoi taudia. Iesu ia gwau: “Gaigai e! Koria gaigai edia natuna! Dirava ena Kota Badana dekena amo hel [“Gehena,” NW] ena panisi edena bamona do umui heau mauri diba?”​—⁠Mataio 23:​1-33.

Unai gwauraia dika herevadia dainai ita laloa lasi Iesu ese haida edia kara namodia ia itaia lasi. Gabeai, ia ese taunimanima ia itaia idia be moni idia udaia dubu ena maua lalonai. Ia ese vabu ogogamina ta ia itaia iena moni ibounai​—⁠davana bada lasi moni maragi rua​—⁠ia udaia neganai, Iesu ena lalona ia marere! Iesu be unai kara ia laloa bada bona ia hahedinaraia unai vabu ese ia udaia monina be moni bada herea idia udaia taudia ibounai edia moni ia hereaia, badina be “idia ese edia moni bada herea dekena amo sisina sibona . . . idia udaia.” Iesu be mai ena hebogahisi dainai, ta ese ia karaia diba karadia ia laloa bada.​—⁠Luka 21:​1-4.

Hari Iesu be nega ginigabena dubu ia rakatania. Iena hahediba taudia haida ese dubu ena hairai idia herevalaia, ena “herahera karaia nadi namodia bona harihari gaudia mai helaga danu idia herevalaia.” Idia hoa, badina Iesu ia haere, ia gwau: “Nega gabeai do idia moru diho, nadi ta nadi ta latanai do ia noho lasi.” (Luka 21:​5, 6) Aposetolo taudia be Iesu murinai, taunimanima amo ia honu siti ena murimurina idia lao neganai, idia laloa ena hereva ena anina be dahaka.

Nega sisina murinai, Iesu bona iena aposetolo taudia idia helai bona Olive Ororona ena maino bona regerege lasi idia moalelaia. Ierusalema bona ena dubu ena toana namona idia raraia neganai, Petero, Iamesi, Ioane, bona Andrea be Iesu ena peroveta herevana ena anina idia tahua. Idia gwau: “Mani oi hamaoroa ai dekenai, oiemu hereva gauna edena negai do idia vara? Do oi giroa mai, bona tanobada dokona danu, ena toana be dahaka?”​—⁠Mataio 24:⁠3; Mareko 13:​3, 4.

Iena haere dekenai Hadibaia Tauna Badana ese peroveta idau hereana ta ia gwauraia. Tuari badadia, tano mareremarere, hitolo, bona daihanai goreredia ia perovetalaia. Danu Iesu ia peroveta Basileia ena sivarai namona be tanobada hegegemadai do idia harorolaia. Ia gwau: “Hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.”​—⁠Mataio 24:​7, 14, 21; Luka 21:​10, 11.

Iesu be ena “giroa mai” negana ena toa ma haida ia herevalaia neganai, unai aposetolo taudia hani idia kamonai namonamo. Ia hahedinaraia namona be idia “naria” noho. Dahaka dainai? Ia gwau: “Badina be umui emui Lohiabada do ia mai negana be umui diba lasi.”​—⁠Mataio 24:42; Mareko 13:​33, 35, 37.

Inai dina be Iesu bona iena aposetolo taudia ese idia laloaboio diba lasi dinana ta. Ia be Iesu ena hesiai gaukara dinana ginigabena, idia do dogoatao, kota henia, bona hamasea lasi neganai. Dina ena dokona be kahirakahira dainai, ororo hanaia dalana kwadogina Betania dekenai, idia raka lao matamaia.

Nisan 12 Bona 13

Nisan 12 ai, Iesu be ena hahediba taudia ida idia laga-ani. Ia diba tomadiho gunalaia taudia idia ura dikadika ia idia hamasea, bona ia ura lasi idia be kerukeru hanuaboi ena Pasova ariana idia hadikaia. (Mareko 14:​1, 2) Unai dina murinai, Nisan 13 ai, taunimanima idia bisi, Pasova Ariana totona gau haida idia karaia hegaegae. Adorahi ena matamaia kahanai, Iesu ese Petero bona Ioane ia siaia lao Pasova Ariana idia karaia hegaegae totona, ataiai daiutu dekenai, Ierusalema ai. (Mareko 14:​12-16; Luka 22:⁠8) Dina ia diho gwauraia neganai, Iesu bona aposetolo oredia 10 be unuseniai idia hedavari edia Pasova ariana ginigabena idia karaia totona.

Nisan 14, Dina Ia Diho Murinai

Adorahi ena diari namona ese Ierusalema ia hadiaria, hua kuboruna be Olive Ororona ataiai ia daekau neganai. Ruma gaudia idia noho vadaeni daiutuna badana lalonai, Iesu bona unai 12 be idia hegaegaelaia vadaeni patana dekenai idia helai. Ia gwau: “Lau ura bada hari inai Pasova do ita ania hebou guna, gabeai hisihisi do lau davaria.” (Luka 22:​14, 15) Nega sisina murinai aposetolo taudia idia hoa badina Iesu be ia toreisi bona ataiai ia karaia dabua ia kokia bona kahana ta dekenai ia atoa. Tauele bona disi mai ranuna ia abia, bena edia aena ia huria matamaia. Unai lalo-manau ena anina ia hadibaia karana idia laloaboio diba lasi!​—⁠Ioane 13:​2-15.

To, Iesu ia diba unai tatau amo ta​—⁠Iuda Iskariote​—⁠ese dala ia hegaegae vadaeni tomadiho gunalaia taudia dekenai ia do ia samania totona. Unai dainai, ia lalohisihisi bada. Ia gwau: “Umui ta ese lauegu mase dala do ia karaia.” Unai dainai aposetolo taudia idia lalohisihisi bada herea. (Mataio 26:​21, 22) Pasova idia karaia murinai, Iesu ese Iuda ia hamaoroa, ia gwau: “Oi ura karaia gauna be do oi karaia haraga.”​—⁠Ioane 13:⁠27.

Iuda ia raka lasi murinai, Iesu ese do ia mase laloatao ariana ta ia hamatamaia. Hatubua muramura lasi paraoana ta ia abia, guriguri amo tanikiu herevana ia gwauraia, ia makohia, bena unai tatau 11 ia hamaorodia paraoa idia ania. Ia gwau: “Lauegu tauanina be inai, umui totona ia henia vadaeni. Inai bamona do umui karaia, lau dekenai do umui laloa totona.” Bena ia be uaina kakakakana ena kapusi ta ia abia. Ia guriguri murinai, kapusi ia henidia, ia hamaorodia kapusi amo idia inua. Ma Iesu ia gwau: “Inai be lauegu rarana, maino karaia ena rara, taunimanima momo totona do ia bubua, dika gwauatao totona.”​—⁠Luka 22:​19, 20; Mataio 26:​26-28.

Unai mai anina bada hanuaboina ai, Iesu ese iena aposetolo taudia mai edia kamonai dekenai mai anina bada gaudia momo ia hadibaia, bona unai gaudia amo ta be tadikaka lalokau henia karana ena anina bada. (Ioane 13:​34, 35) Ia hamaorodia idia be ‘durua tauna,’ lauma helaga unai, do idia abia. Unai ese idia dekenai ia hamaoroa vadaeni hereva iboudiai be edia lalona ai do ia hahedinaraia lou. (Ioane 14:26) Gabeai hanuaboi ai, idia kamonai Iesu be idia totona ia guriguri bona reana unai ese idia ia hagoadaia bada. (Ioane, karoa 17) Hanamoa anedia idia abia murinai, ataiai daiutuna idia rakatania bona Iesu idia badinaia murimuri ai, hanuaboi ena hodahoda keruma dekenai.

Iesu bona ena aposetolo taudia ese Kiderona Kourana idia hanaia lao idia ura henia gabuna, Getesemane uma gabuna dekenai. (Ioane 18:​1, 2) Iena aposetolo taudia idia naria neganai, Iesu be kahirakahira gabuna dekenai ia lao ia guriguri totona. Heduru abia totona Dirava ia guriguri henia goadagoada neganai, ena lalo-hekwarahi ena bada be hereva amo ita gwauraia diba lasi. (Luka 22:44) Bema ia kwalimu lasi iena lalokau guba Tamana ia hahemaraia lalohadaina ese ia hahisia bada herea.

Iesu be iena guriguri ia haorea murinai maoromaoro Iuda Iskariote ia ginidae bona kaia, au, bona lamepa idia huaia taunimanima hutuma ese ia idia bamoa. Iuda ia gwau: “Hadibaia tauna e, oi namo?” Bona Iesu ia kisi henia mai manau ida. Unai be Iesu idia dogoatao ena toana unai tatau totona. Haraga herea, Petero be iena kaia ia gaukaralaia bona hahelaga tauna badana ena hesiai tauna ena taiana ia utua oho. Iesu be unai tau ena taiana ia hanamoa neganai, ia gwau: “Emu tuari kaia be ena gabu dekenai oi atoa lou, badina be tuari kaia idia iusilaia taudia ibounai, be tuari kaia dekenai do idia mase.”​—⁠Mataio 26:​47-52.

Gau ibounai ia vara haraga! Iesu idia dogoatao bona idia guia. Idia gari bona idia daradara dainai, aposetolo taudia be edia Biaguna idia heautania. Iesu idia hakaua lao Ana dekenai, guna ia be hahelaga tauna badana. Bena Kaiapa, hari ia be hahelaga tauna badana, dekenai ia idia abia lao idia kota henia totona. Daba momokani ena hora lalodiai, Kaunsolo taudia ese Iesu idia samania koikoi, idia gwau ia ese ena hereva amo Dirava ia hadikaia. Unai murinai, Kaiapa ese ia siaia Roma ena gavana Pontio Pilato dekenai. Ia ese Iesu ia siaia Heroda Antipa, Galilea ena lohia tauna dekenai. Heroda bona iena tuari taudia ese Iesu idia kirikirilaia. Bena Pilato dekenai idia siaia lou. Pilato ia hahedinaraia Iesu be kerere lasi tauna. To Iuda tomadiho gunalaia taudia ese ia idia doria Iesu hamasea herevana ia gwauraia totona. Edia hereva amo Iesu idia hadikaia bona idia dadabaia murinai, ia idia abia lao Gologota dekenai, unuseniai mai hebogahisi lasi ida au dekenai ia idia kokoa kau bona mai ena hisihisi bada herea ida ia mase.​—⁠Mareko 14:​50–15:39; Luka 23:​4-25.

Bema Iesu ena mase ese ena mauri ia hadokoa vaitani unai be histori ena lalohisihisi gauna badana. Ita moale, badina ia be unai bamona lasi. Nisan 16, lagani 33 C.E. ai, iena hahediba taudia idia davaria mase amo ia toreisi lou dainai idia hoa. Unai murinai, taunimanima 500 mai kahana ese idia hamomokania diba Iesu ia mauri lou. Bona dina 40 iena toreisi lou murinai, kamonai hahediba taudia haida ese idia itaia ia be guba dekenai ia daekau.​—⁠Kara 1:​9-11; 1 Korinto 15:​3-8.

Iesu Ena Mauri Bona Oi

Unai ena anina oi dekenai​—⁠momokani, ita ibounai dekenai​—⁠be dahaka? Iesu ena hesiai gaukara, mase, bona toreisi lou ese Iehova Dirava idia hanamoa, bona idia be mai anina bada Iena ura badana ia hagugurua lalonai. (Kolose 1:​18-20) Idia be mai anina bada ita dekenai, badina be Iesu ena boubou dainai Iehova Dirava ese iseda kara dika ia gwauatao diba bona ita be iena turadia ai ita lao diba.​—⁠Ioane 14:6; 1 Ioane 2:​1, 2.

Idia be mai anina mase taudia dekenai danu. Iesu ena toreisi lou ese dala ia kehoa Dirava ena gwauhamata tanobada Paradaisona lalonai do idia toreisi lou totona. (Luka 23:​39-43; 1 Korinto 15:​20-22) Bema oi ura unai gaudia dekenai oiemu diba oi habadaia, oi ai boiria mai, April 11, lagani 1998 ai, Keriso ena mase laloa lou hebouna dekenai, emu gabu ai idia noho Iehova ena Witness taudia edia Kingdom Hall dekenai.

[Box on page 6]

“HENAOA TAUDIA EDIA RUMA”

IESU be mai ena badina momo dainai ia gwau diba mataganigani hoihoi taudia ese Dirava ena dubu be “henaoa taudia edia ruma” ai idia halaoa. (Mataio 21:​12, 13) Iuda taudia bona tano ma haida amo Iuda tomadiho idia abia dae taudia ese dubu ena takisi moni do idia henia totona, edia moni idia haidaua be namo. Alfred Edersheim be ena buka ladana, The Life and Times of Jesus the Messiah lalonai, ia gwau, Adar 15 dekenai, hua tamona Pasova vairanai, moni haidaua taudia be provinsi lalonai edia bisinesi idia haginia. Adar 25 ai, idia be dubu ena gabu Ierusalema ai idia lao matamaia, unuseniai idia mai Iuda bona Iuda tomadiho idia abia dae taudia momo amo edia moni idia habadaia totona. Unai taudia edia bisinesi idia heau namo herea, badina moni ta ta ibounai idia haidaua be mai davana. Iesu ese idia ia gwauraia henaoa taudia ese ia hahedinaraia idia atoa davana be bada herea dainai idia be ogogami taudia amo moni idia henaoa bamona.

Haida be sibona idia bouboulaia animal idia mailaia diba lasi. Bema ta be unai bamona ia karaia, dubu ai ia noho inspekta ta ese unai animal ia tahua​—⁠unai kara be mai ena davana. Idia ura lasi gabu daudau amo idia mailaia animal do idia dadaraia dainai, taunimanima momo ese dubu dekenai hoihoi taudia dikadia amo Levi taudia idia “gwauraia namo” animal ta idia hoia. Diba momo tauna ta ia gwau: “Unuseniai moni bada herea ogogami taudia momo amo idia veria.”

Hamomokania gaudia ese idia hahedinaraia hahelaga tauna badana Ana bona ena ruma bese taudia ese dubu dekenai idia hoihoi taudia amo sibona edia namo idia habadaia. Rabi taudia edia toretore be “Ana ena natudia tau edia [dubu] Hoihoi Gabudia” idia herevalaia. Dubu ena gabu lalonai moni idia haidaua taudia bona animal hoihoilaia karana amo moni bada idia abia, unai be Ana bona iena ruma bese taudia edia moni abia dalana badana. Diba momo tauna ta ia gwau Iesu ena kara, hoihoi taudia ia lulua karana “ena badina be hahelaga taudia edia ladana badana abia dalana ia koua sibona lasi to edia moni abia dalana danu ia koua.” Herevana ena badina be dahaka, to momokani iena inai henia taudia idia ura ia idia hamasea!​—⁠Luka 19:​45-48.

[Chart on page 4]

IESU ENA TANOBADA MAURINA ENA DINA GINIGABEDIA

Nisan 33 C.E. Idia Vara Gaudia Tau Hereadaena*

Saturday Sabati (Monday, April 6, 1998) 101, par. 4

henia totona

16 Sunday Iesu ia toreisi lou 128

* Iniseniai namba idia noho, idia be Tau Hereadaena bukana ena karoa idia hahedinaraia. Iesu ena hesiai gaukara dokona idia gwauraia Baibel siridia ena mapu ta itaia totona, “All Scripture Is Inspired of God and Beneficial” bukana, rau 290 itaia. Watchtower Bible and Tract Society of New York, Inc. ese unai buka ia halasidia.