Iehova Ena Ura Idia Karaia

Elia ese Dirava Momokanina Ia Abia Isi

ISRAELA dekenai ia idia tahua bada. Bema king ese ia davaria, do ia hamasea. Idia tahua tauna be daika? Iehova ena peroveta tauna, Elia.

King Ahaba bona ena adavana, dirava idaudia ia tomadiho henia hahinena Iesebele, be Israela dekenai Bala tomadiho henia karana idia goadalaia dainai ia bada ia lao. Unai dainai, unai gabu dekenai Iehova ese medu ia koua, hari ia be lagani toi lalonai ia vara vadaeni. Iesebele be mai badu ida Iehova ena peroveta taudia ia tahua idia ia hamasea totona, to Ahaba ia ura Elia ia abia. Lagani toi bamona gunanai Elia ese Ahaba ia hamaoroa: “Paripari bona medu be do ia diho lasi, lagani rua o toi, ela bona ma lau hereva!” (1 King Taudia 17:1) Unai dainai ia vara medu lasi negana ia do noho.

Unai dika bada ia vara negana lalonai, Iehova ese Elia ia hamaoroa: “Oi lao, king Ahaba dekenai do oi hedinaraia, vadaeni medu be tano dekenai do lau hadihoa.” Sibona ena mauri ia haboioa diba, to Elia ese Iehova ena hereva ia kamonaia.​—1 King Taudia 18:​1, 2.

Inai Heheni Taudia Rua Idia Hedavari

Ahaba ese Elia ia itaia neganai, ia gwau, “Elia e, oi mai inai, a? Oi ese Israela oi hadikaia noho, oi be dika herea!” Mai gari lasi ida Elia ia haere, ia gwau, “Lau ese Israela lau hadikaia lasi, to oi ese oi hadikaia noho, oi bona oiemu tamana. Oi ese Lohiabada ena oda oi kamonai henia lasi, bona Bala dirava koikoi dekenai oi tomadiho noho.” Bena Elia ese hereva ia siaia Israela taudia ibounai be Karamele Ororona ai do idia hebou, “Bala ena peroveta taudia 450, bona Asera ena peroveta taudia 400” danu. Vadaeni, Elia ese hutuma ia hereva henia, ia gwau, “Laloa rua ena dala dekenai do umui noho, ela bona edena negai? Bema Lohiabada be Dirava, ia dekenai do umui tomadiho, to bema Bala be Dirava, ia dekenai do umui tomadiho.”​—1 King Taudia 18:17-​21.

Taunimanima idia hereva lasi. Reana edia kerere idia itaia, Iehova sibona idia tomadiho henia lasi. (Esodo 20:​4, 5) Eiava, reana edia lalona be maoromaoro lasi dainai, idia laloa Iehova bona Bala ruaosi idia badinaia toho karana be dika lasi. Herevana dahaka idia laloa, Elia ese taunimanima ia hamaorodia boromakau tau rua do idia mailaia—ta be Bala ena peroveta taudia totona bona ma ta be ia totona. Unai boromakau tau rua be do idia hegaegaelaia boubou totona, to lahi do idia karaia lasi. Elia ia gwau: “Bala ena peroveta taudia ese edia dirava do idia noia, bona lau ese Lohiabada do lau noia, bona edena dirava ese lahi dekena amo do ia haere, ia be Dirava.”​—1 King Taudia 18:23, 24.

Iehova Ia Abia Isi

Bala ena peroveta taudia be “edia boubou patana dekenai idia mavaru hagegea noho.” Daba ibounai lalonai idia boiboi: “Bala e, ai dekenai do oi haere.” To Bala be ia haere lasi. (1 King Taudia 18:26) Bena Elia ese idia dekenai ia hevaseha, ia gwau: “Do umui boiboi bada, badina ia be dirava ta.” (1 King Taudia 18:27) Bala ena peroveta taudia ese kaia amo sibodia edia kopina idia ivaia matamaia—nega momo dirava idaudia idia tomadiho henia taudia ese unai kara idia karaia edia dirava ese do ia hebogahisi henidia totona.a—1 King Taudia 18:28.

Hari ia be dina tubua murinai, bona Bala tomadiho henia taudia idia “boiboi bada herea”—unai hereva ena anina iniseniai be kavakava bamona idia kara bona sibona idia biagua lasi. Adorahi dekenai, Elia ese taunimanima ibounai dekenai ia hereva, ia gwau, “Lau dekenai do umui raka kahirakahira.” Ibounai ese Elia idia raraia, ia ese Iehova ena boubou patana ia haginia lou, bona dadaira ia geia, bena boromakau tau ia utua maragimaragi bona boubou patana ai lahi audia ida ia atoa. Gabeai, boromakau tau, boubou patana, bona au be ranu amo ia hapariparia momokani bona dadaira be ranu (Mediterranean Davara amo idia abia ranuna) amo ia hahonua. Bena, Elia ese Iehova ia guriguri henia: “Hari dina do oi hedinaraia momokani oi be Israela ena Dirava, bona lau, oiemu hesiai tauna, ese inai kara oiemu oda dekenai lau karaia noho. Lohiabada e, lau dekenai do oi haere, mani oi haere, vadaeni inai bese taudia do idia diba, oi Lohiabada sibona be Dirava momokani. Bona oi ese idia edia lalona do oi hagiroa lou oi dekenai.”​—1 King Taudia 18:29-​37.

Karaharaga, lahi be guba amo ia diho bona “unai boubou gauna ia gabua ore, bona au, bona nadi, bona dadaira ena tano danu, ranu ibounai danu be ia kaukau momokani.” Idia raraia taudia ibounai be tano dekenai idia moru diho, idia gwau, “Lohiabada, ia be Dirava, Lohiabada, ia be Dirava!” Elia ena oda dainai, Bala ena peroveta taudia idia dogoatao bona Kisona ena kourana dekenai idia hakaua lao, unuseniai idia aladia mase.​—1 King Taudia 18:38-​40.

Ita Dibaia Gaudia

Toana be Elia ese gari lasi karana bada herea ia hahedinaraia. To, Baibel torea tauna Iamesi ese ita ia hadibaia “Elia be taunimanima sibona, ita bamona.” (Iamesi 5:17) Ia gari bona lalo-hekwarahi danu. Hegeregere, Iesebele ese Bala ena peroveta taudia ia hamasea karana ena davana ia henia gwauraia neganai, Elia ia heau mauri bona Iehova dekenai ia guriguri, ia gwau: “Mani lauegu mauri do oi hadokoa, lau mase namo!”​—1 King Taudia 19:4.

Iehova ese Elia ia hamasea lasi. To mai hebogahisi ida heduru ia henia. (1 King Taudia 19:​5-8) Hari inai negai Iehova ena hesiai taudia idia diba, lalo-hekwarahi idia davaria neganai, reana haida ese idia dagedage henidia dainai, Iehova ese idia do ia durua danu. Momokani, bema Iehova ena heduru totona idia noia, ia ese “siahu badana” do ia henia, bona bema “kahana ibounai dekena amo, hisihisi bona metau” idia davaria, unai gaudia ese do idia “hadikaia momokani lasi.” Unai dainai, Elia bamona, heduru do idia abia idia haheauka totona.​—2 Korinto 4:​7, 8.

[Footnote]