Iehova Ena Witness Taudia Tanobada Hegegemadai—Puerto Rico

CARIBBEAN Davarana bona Atlantic Davarana huanai Puerto Rico, mai ena tubutubu gaudia momo siahu motumotuna, ia noho. Lagani 1493 ai Christopher Columbus ese unai motumotu ia gwauraia Spain ena, bona ena ladana ta ia henia San Juan Bautista, Ioane Bapatiso ena ladana laloatao totona. Lagani momo lalodiai ena siti badana idia gwauraia Puerto Rico, anina be “Rich Port”. Nega ia hanai murinai unai siti ena ladana be motumotu ibounai ena ladana ai idia halaoa, bona siti ena ladana idia haidaua, idia gwauraia San Juan.

Dala idauidau ai Puerto Rico be bouti idia vareai taga gabuna. Gunaguna Spain ese ia biagua negana ai, golo bada herea idia siaia lao unai bouti vareai gabuna amo. Harihari unai motumotu ese tohu, kofe, biku, bona siporo bamona au huahuadia idia siaidia ma tano haida dekenai, to edia moni gogoa karana badadia be gau haida idia karadia bona hoidia, bona vadivadi taudia idia naridia gaukarana. To, idau dalana ta amo Puerto Rico be bouti idia vareai taga gabuna ai ia lao vadaeni.

Dirava ena Basileia ena sivarai namona be lagani 1930 murinai idia harorolaia matamaia. Harihari, pablisa 25,000 be Puerto Rico ai sivarai namona idia harorolaia noho. Lagani 1993 ai, Watch Tower Society ena brens unai gabu dekenai, ena gaukara taudia be 23 amo ia daekau bona 100 ia hanaia. Unai bamona idia karaia badina unai brens ese Spain gado hahanaia gaukarana idia naria matamaia, bona Spain ena gado ai duahiduahi gaudia idia halasia tanobada hegegemadai, Spain gado idia diba taudia 350,000,000, idia abia totona.

Haroro Gabu Matamatana

Unai brens taudia idia gwau: “Haroro gabu matamatana ta ia kehoa vadaeni badina hari ai gaukara noho taia kudima taudia dekenai Basileia sivaraina ai harorolaia totona. Taihu ta be inai ekspiriens ia gwauraia: ‘Lau be taia kudima taudia dekenai lau haroro bona hahine ta mai ena natuna maragidia rua lau vadivadi henidia. Ia diba lau be Witness neganai, maoromaoro lau ia dadaraia badina ena adavana, ia danu taia kudima tauna, ese Iehova ena Witness taudia ia ura henia lasi.

“ ‘Hua haida murinai unai hahine be ena turana ta ia vadivadi henia. Ena turana be Witness taudia ida Baibel idia stadilaia. Ia be unai stadi lalonai ia vareai bona ia moalelaia. Gabeai lau ese unai hahine lau vadivadi henia lou, bona ma ia gwau ena adavana ese Witness Taudia ia ura henidia lasi. To, ia ura Baibel ena anina ia diba bona ena dubu ena haroro taudia dekenai ia hesiku, badina idia amo Baibel ena diba ta ia abia lasi. Pepapepa ta amo ia dekenai stadi ta lau hamatamaia. Nega ta ai ia gwau namona be Saturday ta do lau mai ia dekenai badina iena adavana be do ia noho. Lau henanadai henia, lau gwau: “Ia ese ai ia ura henia lasi, ani?” Ia haere, ia gwau: “Ia ura ia diba Iehova Witness Taudia ese dahaka idia hahedibalaia.”

“ ‘Unai dina murinai idia ruaosi be lauegu iduara dekenai idia pidipidi! Unai hahine ena adavana be mai ena henanadai momo, unai dainai lau hamaorodia namona be aiemai taia kudima taudia edia hebou dekenai do idia mai. Murinai hebou dekenai lau do mai lasi neganai ia ginidae guna, bona unai negana amo hebou ta ia reaia lasi. Hari ia be taia kudima taudia ma haida dekenai ia haroro, hebouhebou badana ta dekenai ia mai, bona ia ura dikadika do ia bapatiso.’ ”

Unai brens taudia edia sivarai be ma ia gwau: “Inai lagani ena distrik hebouhebouna dekenai, hereva ibounai idia hahanaia taia kudima taudia ese idia itaia totona, unai dainai taia kudima taudia momo, mai edia ruma bese taudia ida, idia mai. Iboudiai idia hebogahisi bada hereva dokona ia henia tauna ese taia kudima taudia huanai iseda gaukara ia herevalaia neganai, bona ia gwau taia kudima taudia 70 bamona hebou dekenai idia mai. Hebou taudia iboudiai ese imadia idia patapataia, to, ia hereva tauna ia gwau bamona, taia kudima taudia ese ena regerege idia kamonai diba lasi. Unai dainai, ia ese taia kudima taudia ia hadibadia namona be helai taudia idia raraidia, bena ma ia henanadai, ‘Emui taia kudima tadikaka be umui ida idia hebou umui moalelaia, a?’ bona helai taudia ia hamaorodia bema idia laloa ‘Oibe’ namona be imadia idia davedavea. Bona tadikaka bona taihu 11,000 ese edia imadia idia davedavea. Emai taia kudima tadikaka bona taihu iboudiai idia moale bada herea badina idia diba idia be tamona edia tadikaka iboudiai ida. Idia momo be moale dainai idia tai.”

Puerto Rico dekenai Iehova ena Witness Taudia ese huahua gogoa gaukarana idia karaia noho lalonai, ia be bouti vareai gabuna mai ena taga gabunai do ia lao noho. Dirava ena “mamoe,” ia gwauraidia “bese iboudiai edia kohu namodia,” be do idia mai noho Iehova ena ruma be hairai amo do ia honu totona.​—Ioane 10:16; Hagai 2:7.

[Box on page 22]

TANO RIPOTINA

Hesiai Laganina 1994

HARORO TAUDIA EDIA NAMBA BADANA: 25,428

WITNESS TAUNA TAMONA INAI NAMBA AI: 139

MEMORIAL AI IDIA HEBOU TAUDIA: 60,252

PAINIA TAUDIA EDIA AVERES: 2,329

BAIBEL STADI EDIA AVERES: 19,012

BAPATISO ABIA MATAMATA TAUDIA: 919

KONGREGESEN EDIA MOMO: 312

BRENS OPESI: GUAYNABO