Oi Ura Dikadika Gaukara Ma Haida Do Oi Karaia, A?

LAURA ia gwau: “Iehova lau badu henia. Lau noia loulou ai do ia durua, aiemai hekwakwanai moni ena kahana dekenai do ia hanamoa bena painia gaukarana do lau karaia noho diba​—to heduru ai abia lasi. Dokonai painia gaukarana lau rakatania. Bona painia gaukarana idia karaia noho diba taudia lau mama henidia.”

Michael, hesiai tauna ta Iehova ena Witness taudia edia kongregesen ta lalonai, ena sivarai danu be mani oi laloa. Elda dagina ia tahua. (1 Timoteo 3:1) Lagani momo lalodiai iena ura ia hagugurua lasi dainai ia badu, ia ura lasi ia do idia laloa lou unai dagi do idia henia eiava lasi. Ia gwau: “Lau dekenai dagi idia henia lasi dainai ia vara lalohisihisina be lau haheaukalaia lou diba lasi.”

Nega ta unai bamona gauna be oi dekenai ia vara, a? Oi ura henia gaukarana ta Dirava ena orea lalonai be oi rakatania, a? Unai hegeregerena, painia gaukarana, nega ibounai Basileia harorolaia gaukarana, be gau ta dainai oi rakatania, a? Eiava kongregesen gaukaradia haida, ma haida idia abia vadaeni gaukaradia, be oi ura henidia, a? Reana oi ura dikadika Betele dekenai do oi gaukara eiava misinari gaukarana do oi karaia, to emu noho dainai oi hegeregere lasi.

Aonega Herevadia bukana ia gwau: “Bema tau ta ia laloa gau namona ta do ia abia, to unai gau totona nega daudau ia naria kava, unai be lalohisihisi ia davaria noho.” (Aonega Herevadia 13:12) Reana unai be momokani, oi ura henia gaukaradia bema ma haida ese idia abia neganai. Unai gaudia dainai idia lalohisihisi taudia be Dirava ena Hereva ese lalo-parara, goada, bona helaro ia henidia, a? Oibe. Salamo 84 ese Iehova ena hesiai tauna ta, Iehova ena hesiai lao henia gaukarana ai mai ena ura haida to ia hagugurua lasi tauna, ena hemami ia hahedinaraia.

Levi Tauna ta Ena Moale

Salamo namba 84 idia torea taudia be Kora ena natuna; idia be Levi taudia, Iehova ena dubu helaga ai idia gaukara bona unai gaukara idia laloa bada taudia. Idia ta ia gwau: “Siahu Ibounai Dirava e, lau ese oiemu Dubu Helaga lau ura henia bada! Lau ura bada unuseni do lau noho. Egu lalona ibounai ese, Lohiabada ena Dubu Helaga ia ura henia noho. Egu tauanina bona egu kudouna dekena amo, Mauri Diravana dekenai ane lau abia noho, mai moale ena boiboi danu.”​—Salamo 84:​1, 2.

Unai Levi tauna ia ura dikadika Iehova ena dubu helaga ai do ia gaukara, unai dainai, Ierusalema lao henia dalana ai ia raka neganai, dala amo ia itaia gabuna ena toana be namo iena matana ai, herevana ia be namo momokani lasi. Ia gwau: “Baka Koura gabuna idia raka hanaia neganai, ranu lohilohi gabudia idia davaria.” (Salamo 84:6) Oibe, unai gabu be vaia ia kaukau, to ia laloa ia be ranu bada gabuna bamona.

Hari tau, salamo torea tauna, be Levi tauna ta, to ia be hahelaga tauna dagina ia abia lasi dainai, hua 6 6 amo pura tamona sibona lalonai dubu helaga ai ia gaukara diba. (1 Sivarai 24:​1-19; 2 Sivarai 23:8; Luka 1:​5, 8, 9) Pura oredia lalonai iena ruma ai ia noho, Levi taudia edia hanua ta lalonai. Unai dainai ane ia abia, ia gwau: “Siahu Ibounai Dirava e, oi be lauegu King bona lauegu Dirava. Manu maragidia ese edia ruma, be oiemu boubou patana ena badinai idia karaia. Unuseni edia natudia idia naria noho.” (Salamo 84:3) Bema Levi tauna be unai manu, nega daudau dubu helaga ai idia noho gaudia bamona, do ia moale bada!

Unai Levi tauna be nega momo dubu helaga ai ia gaukara diba lasi dainai, do ia badu be haraga. To, ia karaia diba gaukarana dainai ia moale, bona ia diba Iehova tomadiho henia mai lalona ibounai ida karana do ia goadalaia be namo. Dahaka ese hari Levi tauna mai ena kamonai ia durua, idia henia hesiai gaukaradia do ia moalelaia?

Moale Dalana Do Oi Dibaia

Levi tauna ia gwau: “Lohiabada e, bema dina tamona sibona Dubu Helaga lalonai lau noho, unai dina ese, dina 1000 idau gabu dekenai ia hereaia noho. Momokani, lauegu Dirava ena Ruma ena iduara badinai, do lau gini be namo herea, to kara kerere taudia edia ruma lalonai lau noho be dika.” (Salamo 84:10) Ia laloa bema dina tamona sibona Iehova ena ruma ai do ia noho, unai be hahenamo badana. To hari Levi tauna be dina tamona lasi, to dina momo lalodiai dubu helaga ai ia gaukara. Iena gaukara ia moalelaia dainai, ane ia abia mai moalena ida.

Ita be edena bamona? Iehova ena hesiai lao henia gaukarana ai ita abia vadaeni hahenamodia ita laloa a, eiava ita laloaboio? Iehova ena orea taudia ese ia idia badinaia dainai, hahenamo bona gaukara idauidau momo ia henidia. Idia haida be inai gaukara metaudia: kongregesen taudia gunalaia, naria, bona hadibaia gaukaradia, bona ful-taim hesiai gaukaradia idauidau. To idia ma haida be Iehova tomadiho henia karana lalonai idia karaia gaukaradia.

Hegeregere, Keristani hesiai gaukarana, mani oi laloa. Aposetolo Paulo ia gwau iseda gaukara, sivarai namona harorolaia gaukarana, be ‘hodu lalonai ita abia kohuna namona’ bamona. (2 Korinto 4:7, NW) Oi laloa unai gaukara be dava bada kohuna bamona, a? Iesu Keriso, Basileia harorolaia gaukarana ia gunalaia tauna, ese unai bamona ia laloa; do ita laloa dalana ia hahedinaraia unai. (Mataio 4:17) Paulo ia gwau, Dirava ese “inai haroro gaukara ai dekenai ia henia, unai dainai ai be hesiku lasi.”​—⁠2 Korinto 4:1.

Keristani heboudia danu be Dirava ese ia henia gaudia helagadia, bona ita lalodia maragi be namo lasi. Iseda hebou lalodiai hahediba mai anina bada ita abia bona hebamo namona ita moalelaia. Hebou lalodiai bema nega momo ita haere bona program lalonai heduru ma haida ita henia, unai amo iseda abidadama bona iseda helaro ita gwauraia hedinarai diba. (Heberu 10:23-​25) Momokani, iseda hebou ita lalodia bada be namo!

Michael, ai gwauraia vadaeni tauna, ese unai hahenamo ia lalodia bada. To elda dagina ia abia lasi dainai, ena lalona ia hisihisi, bena unai hahenamo be nega kwadogi lalonai ia lalodia maragi. Bena ia lalodia maoromaoro lou dainai, ena lalona ia namo lou, bena Iehova ia naria mai ena haheauka ida.

Ita ura henia hahenamo ta bema ita abia lasi, namo lasi unai do ita lalohisihisilaia, to Iehova ese ita ia hanamoa daladia do ita laloa lou be namo, salamo torea tauna ia kara hegeregerena.a Bema unai dala momo ita laloa diba lasi, namona be do ita tahudia lou, bona Iehova do ita noia iseda matana do ia kehodia, ita abia vadaeni gaukara namodia bona ita ia hanamoa noho daladia bona ita ia gaukaralaia ia do ita hanamoa totona daladia, do ita itaia totona.​—Aonega Herevadia 10:22.

Namona be inai danu do oi diba: Dagi badadia, kongregesen gunalaia dagina bona unai bamona dagi ma haida, be mai edia taravatu. (1 Timoteo 3:​1-7; Tito 1:​5-9) Unai dainai namona be siboda eda kara do ita tahua, bona unai ita karaia lalonai, iseda manoka gabudia do ita laloa bena hanamoa daladia do ita goadalaia mai eda momokani ida.​—1 Timoteo 4:​12-​15.

Do Oi Lalohisihisi Lasi

Bema hesiai gaukarana ta be ita idia henia lasi, namo lasi ita laloa unai gaukara idia abia taudia be Iehova ese ia laloa bada to ita ia laloa maragi, eiava namo do ita abia dalana be ia koua noho. Momokani, namo lasi ita be mai eda mama ida ita laloa Dirava ese ia gwauraia dalana amo idia abidia hidi lasi to idia ura henidia dainai idia abidia hidi. Bema unai bamona lalohadaidia ita laloa momo, reana do ita mama, do ita heai, eiava do ita lalo-hesiku momokani.​—1 Korinto 3:3; Iamesi 3:​14-16.

Laura, inai hereva ena matamanai ai gwauraia vadaeni hahinena, ia hesiku lasi. Gabeai iena badu bona iena mama ia hadokoa. Dirava ia noia loulou, do ia durua iena lalo-manoka, painia gaukarana ia karaia noho diba lasi dainai ia abia mamina, do ia hadokoa. Ia ese danu diba tataudia kongregesen lalonai edia heduru ia tahua bona Dirava ena lalokau ena mamina ia abia lou. Ia gwau: “Iehova ese egu lalona ia hamainoa. Ena be egu adavana bona lau ese painia gaukarana be hari ai karaia diba lasi, to ai karaia negana ai laloa bada bona emai ekspiriens idauidau unai nega lalonai ese ai idia hagoadaia. Bona emai natuna, ia bada vadaeni tauna, be ena painia gaukarana lalonai ai durua danu.” Laura ena lalona be ia hegeregere dainai, hari ia be edia painia gaukarana ai idia ‘moale taudia danu ia moale.’​—⁠Roma 12:15.

Oi Davaria Diba Gaudia Oi Tahua

Ena be hari ita karaia hesiai gaukaradia ita moalelaia, to namo lasi ita laloa tiokratik gaukaradia ma haida do ita tahua be anina lasi. Paulo ese guba ena toreisi lou ia herevalaia lalonai ia gwau: “Vaira neganai gaudia do lau goadalaia.” Ma ia gwau: “Guna ita abia dae hadibaia hereva ena dala do ita badinaia noho be namo.” (Filipi 3:​13-​16) Tiokratik gaukaradia ma haida bema ita tahua, unai ese ita do ia durua, vaira negana gaudia do ita goadalaia. To ita davaria diba gaudia sibona do ita tahua mai eda lalo-manau ida be namo.

Ita tahua gauna bema ita dekenai ia hegeregere, do ita abia diba. (Filipi 4:5) Bema ita tahua gauna be lagani momo lalodiai do ita gaukara do ita davaria totona gauna, unai danu be namo. Unai gau davaria totona ita do idia durua gaudia ma haida be ta ta ena nega ena nega ai do ita tahua be namo. Oi idia durua diba lauma dalanai oi goada oi lao. Idia ta ta be mai eda kwalimu ida ita davaria neganai, eda lalona do idia hegeregere, do idia hisihisi lasi.

Lalohadai Maorona

To namona be ita diba, iseda noho dalana dainai eiava iseda diba o goada be hegeregere lasi dainai, dagi o hahenamo haida be reana do ita abia diba lasi. Bema ita tahudia, unai ese eda lalona do ia hahisia. Namona be unai dagi o hahenamo be hari do ita tahudia lasi. Unai bamona do ita karaia be auka lasi, bema Dirava ita noia eda lalona do ia hanamoa, bona Iehova ena ura karaia dalana do ita tahua guna neganai. Dagi ita tahudia neganai, Iehova hanamoa karana​—siboda eda kwalimu lasi​—be mai anina bada. (Salamo 16:​5, 6; Mataio 6:​33) Baibel ia gwau: “Oi ura karaia gaudia ibounai totona, Lohiabada do oi noia, ia ese do ia hanamoa gwauraia, unai neganai oiemu palani ibounai edia anina do idia vara momokani.”​—Aonega Herevadia 16:3.

Salamo namba 84 ita tahua neganai, ita davaria ia torea tauna ese hesiai dagidia be unai bamona ia laloa, bona Iehova ese ia hanamoa bada. Inai danu, unai salamo ese Iehova ena orea taudia ia hanamoa noho ema bona hari.

Bema Iehova dekenai oi tabekau mai emu guriguri ida, oiemu ura, gaukara ma haida karaia urana, bona hari oi karaia gaukaradia danu be do oi laloa namonamo diba. Namo lasi gaukara ma haida karaia urana ese hari oi abia noho hahenamodia dainai oi abia moalena bona Iehova ena hesiai lao henia hanaihanai karana amo oi abia moalena do ia kokia. Iehova oi abidadama henia, badina be unai amo moale do oi davaria, Levi tauna ena hereva ese ia hahedinaraia hegeregerena; ia gwau: “Siahu Ibounai Diravana e, oi dekenai idia abidadama taudia ibounai, be do idia moale bada noho.”​—Salamo 84:12.

[Footnotes]

[Box on page 11]

Ita Tahudia Diba Gaudia

Dina ta ta iboudiai Baibel do ita duahia.—Iosua 1:8; Mataio 4:4

Baibel ena hereva amo iseda lalona do ita hadibaia, do ia namo ia lao totona.—Heberu 5:14

Dirava ita tura henia dalana do ita hanamoa.—Salamo 73:28

Lauma ena huahua ta ta iboudiai do ita havaraia.—Galatia 5:22, 23

Iseda guriguri edia anina do ita hanamoa.—Filipi 4:6, 7

Iseda haroro bona hahediba gaukarana lalonai anina bada do ita havaraia toho.—1 Timoteo 4:15, 16

Gima Kohorona bona Awake! magasin ta ta iboudiai do ita duahia bona do ita laloa dobu..—Salamo 49:3

[Picture on page 9]

Do oi tahua gaudia oi abia hidi lalonai, Dirava ena ura karaia dalana oi atoa guna