Iesu ese Dirava Ia Kamonai Henia Karana Oi Tohotohoa
“Momokani, Dirava ena dala ita badinaia, be hunia gauna badana, ani? Taunimanima dekenai Keriso ia hedinarai.”—1 TIMOTEO 3:16.
1. (a) Lagani 4,000 mai kahana lalonai, dahaka henanadai ena haere be lasi? (b) Edena negai bona edena dala ai haere idia henia?
LAGANI 4,000 lalonai unai henanadai ena haere be lasi. Tau ginigunana, Adam, ese abidadama ia haboioa negana amo, henanadai badana be inai: Taunimanima be edena dala ai Dirava kamonai henia karana idia hahedinaraia diba? Vadaeni, lagani 100 C.E. ia do mai lasi neganai, Dirava ena Natuna be tanobada dekenai ia mai neganai, haere ia hedinarai. Ena lalohadai, ena hereva, bona ena kara iboudiai dekenai Iesu Keriso ia hahedinaraia ia be Iehova ia ura henia bada. Unai amo ia ese ‘Dirava kamonai henia karana ena hunia helaga gauna badana’ ia hahedinaraia, bona gwauhamata taudia dekenai unai kamonai karana ena dala ia hadibaia.—1 Timoteo 3:16.
2 Gwauhamata, bapatiso Keristen taudia bamona Dirava kamonai henia karana ita tahua neganai, namona be Iesu ena haheitalai ita “laloa namonamo.” (Heberu 12:3) Badina be dahaka? Ena badina be rua. Gau ginigunana be, Iesu ena haheitalai ese ita do ia durua Dirava kamonai henia karana ita habadaia totona. Iesu ena diba iena Tamana dekenai ese taunimanima iboudiai edia diba Tamana dekenai ia hanaia. (Ioane 1:18) Bona Iesu ese Iehova ena dala bona ena kara ia tohotohoa namo herea dainai, inai bamona ia hereva diba: “Lau ia itaia tauna ese egu Tamana danu ia itaia.” (Ioane 14:9) Iesu ena mauri dalana bona ena hesiai gaukara amo, ita be Iehova ena hebogahisi karana ita itaia namonamo diba, bona unai amo iseda lalokau Havaraia Tauna dekenai ita ura henia karana ita habadaia diba. Gau iharuana be, Iesu ena haheitalai ese ita ia durua Dirava kamonai henia karana ita hahedinaraia totona. Ia ese Dirava kamonai henia karana ia hahedinaraia goevagoeva. Unai dainai namona be ita laloa edena dala ai ‘Keriso ita atoa,’ eiava iena kara eiava iena haheitalai ita tohotohoa.—-Roma 13:14.
3. Ita sibona Bible ita stadilaia neganai, dahaka ita karaia, bona badina be dahaka?
3 Iesu ena hereva bona ena kara iboudiai idia torea lasi. (Ioane 21:25) Unai dainai, taunimanima be Dirava ena siahu amo idia torea herevadia ita laloa bada. Unai dainai, ita sibona Bible ita stadilaia neganai, namona be Evanelia bukadia 4 dekenai Iesu ena mauri ena sivarai ita duahia hanaihanai. To bema Dirava kamonai henia kara ita tahua totona unai duahiduahi ita karaia, namona be ita duahia gaudia edia anina ita laloa bada. Namona be hehuni gaudia edia anina ita tahua danu.
Natuna be Tamana Bamona
4 Haheitalai ta oi laloa. Iesu be taunimanima ia ura henia hebogahisi tauna. Mareko 10:1, 10, 13, 17, bona 35 dekenai ia hahedinaraia lagani idauidau taudia bona edia noho be idauidau taudia ese idia tahua. Nega tamona sibona lasi, to nega momo ia ese natudia ia rosidia. (Mareko 9:36; 10:16) Badina be dahaka taunimanima, natudia danu, be Iesu ida idia noho neganai idia moale? Badina ia be idia ia lalodia momokani. (Mareko 1:40, 41) Ita itaia unai be momokani badina nega momo ia sibona ese dala ia tahua taunimanima ia durudia totona. Unai dainai, ita duahia Nain ena vabu ena mase natuna idia abia lao neganai, “ia itaia.” Bena “ia raka kahirakahira lao,” bona mero ia hatoreisia lou, bona ita duahia lasi ta ese ia noia unai bamona ia karaia totona. (Luka 7:13-15) Danu, ta ese ia noia lasi, to ia sibona ena ura dainai, ia raka namonamo diba lasi hahinena bona ena tauanina ia gudu ranu ia noho dainai edia gorere ia hanamodia.—Luka 13:11-13; 14:1-4.
5. Iesu ena hesiai gaukara ena sivarai amo, dahaka diba ita abia Iehova ena kara bona ena dala dekenai?
5 Unai bamona sivarai oi duahia neganai, oi sibona oi henanadai henia: ‘Iesu ese ena Tamana ia tohotohoa goevagoeva dainai, unai sivarai amo dahaka lau diba Iehova ena dala bona ena kara dekenai?’ Namona be unai sivarai amo ita abia dae momokani Iehova be hebogahisi bona taunimanima ia ura henia Diravana. Ia be taunimanima edia mauri dalana ia laloa momo, unai dainai sibona ena ura amo ia ese kara momo ia karaia idia totona. Ta ese ia doria lasi iena Natuna ia henia “taunimanima ibounai hamauria totona.” (Mataio 20:28; Ioane 3:16) Ia be dala ia tahua lalokau amo ia dekenai idia hesiai henia taudia ia “abidia dae” totona. (Deuteronomi 10:15) Bible ia hereva hegeregerena: “Iehova ena matana amo tanobada ibounai ia itaia loaloa, edia kudouna ibounai ia dekenai idia henia taudia dainai iena goada ia hahedinaraia totona.”—2 Sisiga 16:9.
6. Iesu ese ia haheitalaia hegeregerena, dahaka ia vara ita be Iehova ena hebogahisi bona taunimanima ia ura henia bada karana, ita laloa momo neganai?
6 Iehova ena hebogahisi bona taunimanima ia ura henidia bada karana, iena Natuna ese ia haheitalaia hegeregerena oi laloa neganai be emu kudouna do ia hamarerea, bona Iena manada karadia do oi diba momo. Bena, unai ese oi ia veria ia dekenai oi lao totona. Oi do ia veria nega ibounai ia dekenai oi guriguri henia totona. (Salamo 65:2) Oiemu ura henia karana ia dekenai do ia hagoadaia.
7. Iehova ena hebogahisi bona taunimanima ia laloa momo karana ita laloa dainai, oi sibona dekenai dahaka henanadai oi henia be namo, bona badina be dahaka?
7 To laloaboio lasi, Dirava kamonai henia karana be tomadiho kara ena mamina namona sibona lasi. Bible ia stadilaia tauna R. Lenski ia gwau unai kara be “iseda hemataurai, iseda tomadiho lalohadai bona idia ese idia havaraia karadia iboudiai.” (Toretore idauna be ai ese ai torea.) Unai dainai, Iesu ese Iehova ena hebogahisi bona taunimanima ura henidia karana ia haheitalaia karana oi laloa namonamo murinai, oi sibona oi henanadai henia inai bamona: ‘Edena dala ai unai kara dekenai lau be Iehova bamona lau karaia diba? Taunimanima ma haida be lau dekenai idia ura idia hereva, a?’ Bema oi be tamana eiava sinana ta, namona be oiemu natudia idia gari lasi to oi idia hereva henia diba. Bona bema oi be kongregesen elda tauna ta, tadikaka be oi dekenai idia hereva henia diba be gau badana. Dahaka ese oi do ia durua taunimanima oi do idia ura hereva henia totona? Hebogahisi bona taunimanima ura henidia karana oi hahedinaraia be namo. Namona be mai emu lalona ibounai danu taunimanima do oi turana henia. Taunimanima ma haida oi ura henidia momokani neganai bona oi sibona emu ura dainai oi durudia neganai, unai mamina do idia abia bona oi dekenai do idia ura turana henia.
8. (a) Iesu ena sivarai Bible lalonai oi duahia neganai, dahaka oi laloa be namo? (b) Rau ena henuna kahana dekenai ia noho hereva amo Iehova dekenai dahaka diba ita abia?
8 Unai dainai Bible dekenai Iesu ena sivarai oi duahia neganai, namona be oi laloatao Iesu ena hereva bona ena kara ia gwauraia sivaraina amo diba momo Iehova dekenai oi abia diba.a Bona Dirava ena kara, Iesu ese ia hahedinaraia hegeregerena, oi laloa momo neganai, do oi ura oi be Ia bamona do oi karaia, bona Dirava kamonai henia karana do oi hahedinaraia.
Dirava Kamonai Henia Karana Emu Ruma Bese Taudia Dekenai Oi Hahedinaraia
9 Iesu Keriso ena mauri bona ena hesiai gaukara ese ita ia hadibaia edena dala ai Dirava kamonai henia kara ita hahedinaraia be namo. Haheitalai namona ta be Ioane 19:25-27 dekenai idia torea, ia gwau: “Satauro badibadinai Iesu ena sinana bona ena sinana maragina bona Maria, Klopa ena adavana, bona Maria, Magadala hahinena, idia gini noho. Iesu ese ena sinana bona ia lalokau henia diba tahua tauna ia itaia, ia kahirakahira idia gini noho. Vadaeni ena sinana dekenai ia hereva henia ia gwau, ‘Hahine e, oi itaia, oiemu natuna be unai.’ Unai diba tahua tauna dekenai danu ia hereva henia, ia gwau, ‘Oi itaia, oiemu sinana be unai.’ Unai negana ia lao, unai diba tahua tauna ese Maria ia abia dae ena ruma dekenai.”
9, 10. (a) Iesu be kahirakahira ia mase neganai, edena dala ai iena lalokau iena sinana, Maria dekenai ia hahedinaraia? (b) Badina be dahaka Iesu ese Maria ia henia aposetolo Ioane ena imana dekenai ia naria totona to sibona ena varavara dekenai ia henia lasi idia naria totona?
10 Unai oi laloa! Kahirakahira ia mase neganai, Iesu ena lalokau bona hebogahisi dainai ia ese iena sinana, Maria, (unai neganai ia be vabu) ia henia ena lalokau aposetolo tauna Ioane dekenai ia ese ia naria totona. To, badina be dahaka Ioane dekenai ia henia naria totona, bona sibona ena varavara ta dekenai ia henia lasi? Badina Iesu ese Maria ena tauanina gaudia sibona ia laloa lasi, to ia ese ena mauri lauma dalana dekenai ia laloa danu. Bona aposetolo Ioane (sedira ia be Iesu ena cousin) ese iena abidadama ia hamomokania, to unai neganai, ia hedinarai lasi Iesu ena tadikaka tauanina dekenai be abidadama taudia.—Mataio 12:46-50; Ioane 7:5.
11. (a) Paulo ena hereva hegeregerena, edena dala ai Keristen tauna be sibona ena ruma bese dekenai Dirava kamonai henia kara ia hahedinaraia diba? (b) Badina be dahaka Keristen korikorina ese ena tama sina burukadia ia durudia?
11 Unai bamona ia karaia neganai, edena dala ai ia ese Dirava kamonai henia karana ia hahedinaraia? Aposetolo Paulo ia gwau: “Vabu taudia do oi durua, bema idia be vabu korikori. To vabu ta, bema ia be mai ena natuna o mai ena tubuna, idia ese edia sinana bona tubuna idia durua be namo. Badina be Dirava do ita hamoalea karana ta be, iseda ruma taudia do ita laloa bona durua.” (1 Timoteo 5:3, 4) Paulo ia gwau iseda tama sina idia hegeregere lasi tauanina dalana ai ita durudia neganai, unai be Dirava kamonai henia karana. Edena dala ai? Iehova be ruma bese Hamatamaia Tauna, bona ia ese natudia ia hadibaia edia tama sina idia matauraia be namo. (Efeso 3:14, 15; 6:1-3) Unai dainai, Keristen korikori tauna ia diba ena ruma bese maduna ia naria neganai, unai ese tama sina lalokau henidia karana ia hahedinaraia sibona lasi, to ia hahedinaraia Dirava ia matauraia bona iena hahegani ia badinaia.—Kolose 3:20 danu hahegeregerea.
12. Oiemu tama sina burukadia dekenai edena dala ai Dirava kamonai henia karana oi hahedinaraia diba, bona badina be dahaka oi karaia be namo?
12 Edena dala ai oiemu ruma bese dekenai Dirava kamonai henia karana oi hahedinaraia diba? Iesu ese ia karaia hegeregerena, namona be tama sina burukadia oi naria tauanina dekenai bona lauma dalana dekenai. Bema unai bamona oi karaia lasi oi be Dirava kamonai henia karana oi hahedinaraia lasi. (2 Timoteo 3:2, 3, 5 oi hahegeregerea.) Gwauhamata Keristen tauna ese ena tama sina edia tauanina gaudia dekenai ia durudia badina ia hebogahisi eiava unai be iena maduna sibona dainai lasi, to ia karaia ia lalokau henidia dainai bona ia diba Iehova be unai maduna naria karana ia laloa bada. Unai dainai, tama sina burukadia ia naridia neganai, unai be Dirava kamonai henia karana.b
13. Keristen tamana be edena dala ai iena ruma bese dekenai Dirava kamonai henia karana ia hahedinaraia diba?
13 Ruma bese lalonai, Dirava kamonai henia karana be dala ma haida dekenai oi hahedinaraia diba. Hegeregere, Keristen tamana ena maduna be iena ruma bese edia tauanina, edia lalona, bona edia lauma mauri dalana ia naria. Unai dainai, tauanina gaudia ia henia sibona lasi, to hanaihanai ia ese ruma bese ena Bible study ia karaia. Ia be nega ia atoa hanaihanai iena ruma bese ida haroro gaukara idia karaia totona. Ia be gaukara iboudiai ia hahegeregeredia badina ia diba idia danu idia laga-ani eiava idia gadara be namo danu. Bona ia be aonega dekenai ia laloa namonamo guna, namo lasi iena kongregesen gaukara dainai iena ruma bese taudia ia laloaboio. (1 Timoteo 3:5, 12) Badina be dahaka unai ibounai ia karaia? Unai be iena maduna dainai sibona lasi, to ia ese iena ruma bese ia lalokau henidia dainai. Ia diba Iehova ese ruma bese naria gaukara ia laloa bada. Unai bamona adavana bona tamana maduna ia huaia neganai, ia ese Dirava kamonai henia karana ia hahedinaraia.
14. Keristen hahine be edena dala ai ruma bese dekenai Dirava kamonai henia karana ia hahedinaraia diba?
14 Keristen hahine danu edia maduna be ruma bese dekenai Dirava kamonai henia karana idia hahedinaraia. Edena dala ai? Bible ia gwau namona be hahine ese iena tau ia “kamonai henia,” bona ia “do ia matauraia” be namo. (Efeso 5:22, 33) Bema iena tau be abidadama tauna lasi, to namona be ia do “kamonai henia.” (1 Petero 3:1) Keristen hahine ese hemataurai karana ia hahedinaraia, ia ese ena tau ia durua iena gaukara dekenai bema unai gaukara ese Dirava ena taravatu ia utua lasi. (Kara 5:29) Badina be dahaka ia ese unai bamona ia karaia? Ia ese iena tau ia lalokau henia sibona dainai lasi, to ia diba “inai be maoro Lohiabada ena vairana dekenai”—anina be, unai be Dirava ese ia dalana ruma bese dekenai. (Kolose 3:18) Ia ese ena tau ia matauraia haraga neganai, ia ese Dirava kamonai henia karana ia hahedinaraia.
“Inai Totona Lau Mai”
15 Iesu ese Dirava kamonai henia karana badana ia hahedinaraia ia be ‘Dirava ena Basileia ena Sivarai Namo’ ia harorolaia neganai. (Luka 4:43) Lagani 29 C.E. ai Ioridane Sinavai dekenai ia bapatiso murinai, Iesu be lagani toi mai kahana lalonai unai mai anina bada gaukara badana ia goadalaia. Ia gwau: “Inai totona lau mai.” (Mareko 1:38; Ioane 18:37) To edena dala ai unai ese iena Dirava kamonai henia karana ia hahedinaraia?
16, 17. (a) Dahaka ese Iesu ia hamarerea haroro bona hadibaia gaukara dekenai ia gaukara goadagoada totona? (b) Badina be dahaka Iesu ena haroro bona hadibaia hesiai gaukarana amo Dirava kamonai henia karana ia hahedinaraia?
16 Inai oi laloa sisina. Dirava kamonai henia karana ena anina be Dirava ia hamoalea mauri dalana oi karaia badina oi lalokau henia bona iena hebogahisi karadia oi ura henia bada. Unai dainai, dahaka ese Iesu ia hamarerea iena lagani ginigabedia tanobada dekenai ia gaukaralaia haroro bona hadibaia gaukara ia karaia goadagoada totona? Unai be iena maduna sibona dainai, a? Ia hedinarai goevagoeva ia be taunimanima ia lalodia bada. (Mataio 9:35, 36) Bona ia diba lauma helaga ese ia horoa dainai iena maduna be unai hesiai gaukara do ia karaia. (Luka 4:16-21) To, unai gaukara ia karaia ena badina namona ma ta ia noho.
17 Tanobada dekenai iena hanuaboi ginigabena neganai, Iesu ese iena aposetolo taudia dekenai ia gwau: “Tamana lau lalokau henia.” (Ioane 14:31) Unai lalokau ena badina be Iehova ena kara ia diba momokani. (Luka 10:22) Unai bamona diba ese iena kudou ia hamarerea, bona Iesu ese Dirava ena ura ia karaia karana ia moalelaia. (Salamo 40:8) Unai gaukara be iena “aniani” bamona—ia mauri totona ia karaia, ena mamina ia dekenai be namo herea. (Ioane 4:34) Ia be haheitalai hereadaena ia karaia, ‘Basileia ia tahua guna’ dainai bona sibona ena ura ia atoa guna lasi dainai. (Mataio 6:33) Unai dainai ia karaia karana eiava ia karaia karadia edia bada be gau badana lasi, to ia karaia karadia edia badina be gau badana. Unai dainai iena haroro bona hadibaia hesiai gaukarana amo Dirava kamonai henia karana ia hahedinaraia.
18. Badina be dahaka bema haroro gaukara sisina sibona ita karaia, reana unai ese Dirava kamonai henia karana ia hahedinaraia guguru lasi?
18 Edena dala ai ita be ‘haheitalai tauna,’ Iesu, ita tohotohoa diba? (1 Petero 2:21) Iesu ena hereva “egu murina dekenai do oi raka” idia badinaia taudia iboudiai be Dirava ena amo hahegani idia abia Basileia ena sivarai namona idia harorolaia bona hadibaia taudia idia karaia totona. (Luka 18:22; Mataio 24:14; 28:19, 20) Unai anina be, bema ita be sivarai namona ita harorolaia sisina, ita be Dirava kamonai henia karana ita tahua noho, a? Sedira. Bema haroro gaukara ita karaia to ita laloa bada lasi, eiava ita karaia iseda ruma bese taudia eiava ma haida ita hamoaledia totona, ita gwau diba lasi unai gaukara be ‘Dirava kamonai henia karana’ ta.—2 Petero 3:11.
19. (a) Namona be haroro gaukara ita karaia ena badina badana be dahaka? (b) Dahaka do ia vara bema Dirava ita lalokau henia dainai ita gaukara?
19 Iesu bamona, namona be unai gaukara ita karaia neganai mai iseda lalona ibounai ida ita karaia. Iesu ia gwau: ‘Iehova oiemu Dirava oi lalokau henia mai emu kudou ibounai ida [tau ta ena lalona ibounai, ena ura momokani] bona oiemu souli ibounai ida [oiemu mauri ena anina ibounai] bona oiemu darana ibounai ida [oiemu lalohadai] bona oiemu goada ibounai ida.’ Aonega toretore tauna ta ese unai hereva ta ia gwauraia danu: “Unai kara be boubou karadia ibounai ia hanaia.” (Mareko 12:30, 33, 34) Unai dainai ita karaia gaudia sibona be gau badana lasi, to ita karaia ena badina danu be gau badana. Dirava ita lalokau henia bada dainai iseda hesiai gaukara ita karaia be gau badana. Unai bamona ia vara neganai, ita be gaukara sisina mo sibona do ita karaia lasi, to do ita ura Dirava kamonai henia karana ita hahedinaraia mai iseda goada ibounai ida. (2 Timoteo 2:15) Unai hegeregerena, bema Dirava ita lalokau henia dainai ita gaukara, iseda hesiai gaukara ena bada be ma taunimanima haida edia hesiai gaukara ena bada dekenai do ita hahegeregerea lasi.—Galatia 6:4.
20. Iesu be haheitalai namona Dirava kamonai henia karana dekenai, bona ita tohotohoa neganai, dahaka namo ita davaria?
20 Ita be Iehova ita tanikiu henia bada badina ia be ita dekenai Dirava kamonai henia karana ena hehuni hereva helagana ia hahedinaraia dainai! Iesu ena hereva bona ena kara ita stadilaia namonamo neganai bona ia ita tohotohoa neganai, ita be Dirava kamonai henia karana ita hahedinaraia bona ita habadaia diba. Iehova ese hahenamo bada ita do ia henia Iesu ena haheitalai ita tohotohoa neganai, ita be gwauhamata, bapatiso Keristen taudia bamona Dirava kamonai henia karana ita tahua noho neganai.—1 Timoteo 4:7, 8.
[Footnotes]
a Bema oi ura emu diba Iehova dekenai oi habadaia, namona be henuai idia noho siri dekenai idia noho haheitalai oi duahia: Mataio 8:2, 3; Mareko 14:3-9; Luka 21:1-4; bona Ioane 11:33-36.
b Tama sina burukadia dekenai Dirava kamonai henia kara hahedinaraia ena hereva oi duahia totona, Gima Kohorona, December 1987, rau 15-20 oi duahia.
Oi Laloatao, A?
◻ Dirava kamonai henia karana ita tahua noho neganai, badina be dahaka Iesu ena haheitalai ita laloa be namo?
◻ Iesu ese hebogahisi bona taunimanima ura henidia karana ia hahedinaraia dainai, Iehova dekenai dahaka ita diba?
◻ Iseda ruma bese taudia dekenai edena dala ai Dirava kamonai henia karana ita hahedinaraia diba?
◻ Iseda hesiai gaukara be Dirava kamonai henia karana ta ita gwauraia diba totona, namona be ita karaia ena badina be dahaka?
2. Dirava kamonai henia karana ita tahua noho neganai, badina be dahaka Iesu ena haheitalai ita laloa be namo?
4. (a) Dahaka ia hahedinaraia Iesu be mai ena hebogahisi bona ia be taunimanima ia lalodia momo tauna? (b) Iesu be dahaka ia karaia taunimanima ia durudia totona?
15. Dahaka kara badana amo Iesu ese Dirava kamonai henia karana ia hahedinaraia?
[Picture on page 21]
Keristen tamana ena maduna be iena ruma bese edia tauanina, edia lalona, bona edia mauri lauma dalana dekenai ia naridia
[Picture on page 23]
“To vabu ta, bema ia be mai ena natuna o mai ena tubuna, idia ese . . . idia durua be namo.”