Toana ese Ita Ia Koia Diba

“TOA ese ita ia koia diba.” Unai be Ireland ena drama torea tauna ta ladana Richard Sheridan ese ia gwauraia herevana. Taunimanima ena toana danu ese ita ia koia diba.

Lagani 33 C.E., ena March hua dinana ta ai, Iesu Keriso be ena diba tahua taudia danu Betania amo idia raka lao Ierusalem dekenai bona ia ese suke [fig] auna ta ia itaia. Idia itaia unai au ena rigi ibounai be rau ese ia hahonua, to au kahirakahira dekenai idia lao neganai huahua ta idia davaria lasi. Unai dainai Iesu be inai bamona ia hereva unai au dekenai: “Oiemu huahua tau ta do ia ania lasi ela bona hanaihanai.”​—Mareko 11:​12-14.

Dahaka dainai Iesu be unai au dekenai unai bamona ia hereva dika, badina Mareko be ia gwau, “inai au ena huahua atoa negana ia do mai lasi”? (Mareko 11:13) Ita diba bema suke auna ai rau matamata idia vara neganai suke huahua matamata danu nega tamona idia vara hebou. To unai nega be suke au ena rau edia vara negana lasi. Rau momo ia itaia dainai Iesu ia laloa huahua danu idia vara be maoro. (Atai dekenai mani laulau oi itaia.) Unai au be rau sibona ia havaraia anina be ia ese huahua namona ta do ia havaraia diba lasi. Oibe, unai au ena toana ese taunimanima ia koia. Huahua idia havaraia audia dainai takisi idia henia bona huahua ia havaraia lasi auna be maduna momo ia henia biaguna dekenai, unai dainai idia utua be namo.

Unai suke auna amo Iesu ese haheitalai badana ia henia abidadama karana dekenai. Murina dinana ai ena diba tahua taudia be idia hoa dikadika badina hari au be ia marai bona ia mase. Iesu ese ia haganidia, ia gwau: “Dirava umui abidadama henia. . . . Dahaka gau umui ura, guriguri dekenai umui noia neganai, bema umui abidadama henia momokani be do umui abia, vadaeni, umui ese do umui abia.” (Mareko 11:​22-24) Unai au ia marai bona ia mase ese ia hahedinaraia dahaka do ia vara bema bese ta ena abidadama ia manoka neganai.

Idia hanaia vadaeni huadia ai Iesu ese Iuda besena be huahua havaraia lasi suke auna danu ia hahegeregerea, bona ia gwau unai au be lagani toi lalonai huahua ta ia havaraia lasi bona vaira huadiai bema huana ia karaia lasi neganai idia utua be namo. (Luka 13:​6-9) Io, Iesu ese ia gwau dika henia suke auna be Iuda besena danu ia hahegeregerea, badina unai bese taudia be idia helalo-kerehai lasi dainai idia ese huahua namona ta idia havaraia lasi bona unai dainai do idia hamasedia be maoro. Ena be unai bese​—suke auna hegeregerena—​ena toana be namo herea, to idia itaia namonamo neganai abidadama manoka manoka ia hedinarai bona unai dainai idia ese Mesia idia dadaraia.​—Luka 3:​8, 9.

Ororo ai ia haroro neganai Iesu ia gwau: “Edia kara toana dekena amo do umui diba. Au ginigini ese vain ena anina ia atoa lasi, bona ava ginigini be fig huahua ena anina ia atoa lasi. Oibe, bona au namona ena huahua be ia namo, to au dikana ena huahua be ia dika. Au namona ese huahua dika ia havaraia diba lasi, bona au dikana be huahua namo ia havaraia diba lasi. Au ibounai huahua namona idia havaraia lasi gaudia be do idia utua, lahi dekenai do idia negea. Unai dainai peroveta koikoi taudia edia kara dekena amo do umui diba.” (Mataio 7:15-20) Unai hereva bona Iesu ena suke auna haheitalaina ese ia hahedinaraia ita ta ta ibounai be lauma dalanai iseda raka dalana ita naria namonamo badina tomadiho karana ena toana ese ita ia koia diba.