Mai Badinaia Karana ida Gaukara Karaia Iehova Ena Orea Danu

“Oi dekenai idia abidadama henia taudia, be oi ese unai taudia oi durua noho.”​—⁠2 SAMUELA 22:⁠26.

1, 2. Kongregesen lalonai, ita itaia diba badinaia karana ena haheitalai haida be dahaka?

HANUABOI ta ai, Keristani hebou totona elda tauna ese hereva ta ia hegaegaelaia. Ia ura ia doko bona ia laga-ani; to ia gaukara noho, Baibel amo haheitalai bona lalona veria sivaraidia ia tahua, mamoe taudia ia hagoadaia totona. Hebou adorahina ai, unai kongregesen dekenai idia lao tamana ta bona sinana ta idia hesiku bada, idia ura ruma dekenai idia noho; to, mai edia haheauka ida edia natudia idia hegaegaelaia bona hebou dekenai idia lao. Hebou murinai, Keristani tadikaka haida ese unai elda tauna ena hereva idia kikilaia. Taihu ta ia dibagania gauna be, guna unai tadikaka ena hereva ese ia hahisia sivaraina ia ura ia kikilaia; to, ena tok ena hereva ta be mai ena ura ida ia hanamoa. Unai sivarai toi ai sinado tamona ia hedinarai, oi itaia ia be dahaka?

² Unai sinado tamona be badinaia karana. Unai elda tauna ese Dirava ena mamoe oreana hesiai henia gaukarana ia badinaia; unai tama sina ese kongregesen ena hebou negana idia badinaia; unai taihu ese elda oreana ia durua bona ia badinaia. (Heberu 10:​24, 25; 13:17; 1 Petero 5:⁠2) Dala idauidau ai ita itaia, Dirava ena taunimanima idia ura mai edia badinaia karana ida hesiai gaukara idia karaia Iehova ena orea danu.

3. Dahaka dainai Iehova ena tanobada oreana ita badinaia noho be mai anina bada gauna?

³ Iehova be inai kara gageva tanobadana ia itaia neganai, ia itaia badinaia karana be bada lasi. (Mika 7:⁠2) To iena orea taudia edia badinaia karana ia itaia neganai, ena kudouna ia moale bada! Oibe, oi hahedinaraia badinaia karana ese Dirava ia hamoalea bada. To, Satani, gwau-edeede tauna ginigunana, ia habadua, bona ia hamomokania ia be koikoi tauna. (Aonega Herevadia 27:11; Ioane 8:​44) Oi diba Satani ese oiemu badinaia karana Iehova dekenai bona ena orea dekenai do ia hadikaia toho. Namona be Satani ia karaia daladia haida ita laloa. Unai amo do ita diba namonamo edena dala ai badinaia karana do ita dogoatao diba ela bona dokona.​—⁠2 Korinto 2:​11.

Kerere Laloa Momo ese Badinaia Karana Ia Hadikaia Diba

4. (a) Dahaka dainai mai dagi taudia ita maumauraia be auka lasi? (b) Kora be edena dala ai Iehova ena orea ia badinaia lasi?

⁴ Tadikaka ta ese dagi ta ia abia neganai, reana ena kerere ita itaia momokani diba. ‘Au ena momoru iseda tadikaka ena matana lalonai ita itaia, to au badana iseda matana lalonai laloa lasi’ karana matamaia be auka lasi! (Mataio 7:​1-5) Ta ena kerere laloa momo ese badinaia lasi karana ia havaraia diba. Hegeregere, Kora bona Davida edia idau mani oi laloa. Lagani momo lalodiai mai ena badinaia karana ida Kora be maduna idauidau momo ia huaia, to gabeai ia ura dagi badana ia abia. Iena kasin, Mose bona Arona, ese idia abia siahu ia badulaia. Ena be Mose be manau herea tauna, to Kora ese ena kerere ia tahua matamaia. Reana Mose ena kara lalonai kerere haida ia davaria. To unai kerere dainai Kora ese Iehova ena orea ia badinaia lasi be maoro lasi. Ia be Israela taudia edia huana dekena amo idia hamasea ore.⁠—⁠Numera 12:3; 16:​11, 31-​33.

⁵ To, Davida be King Saulo henunai hesiai gaukara ia karaia. Matamanai Saulo be king namona, to gabeai ena kara ia dika. Davida ese mama tauna Saulo ena dagedage amo ia roho mauri totona, namona be abidadama, haheauka, bona aonega ia hahedinaraia. To davana henia dalana ia kehoa neganai, Davida ia gwau ‘Iehova ese ena dala ia koua’ bona badinaia lasi karana, Iehova ia horoa king hadikaia karana ta, ia karaia lasi.​—⁠1 Samuela 26:⁠11.

6. Ena be elda taudia edia manoka gaudia bona edia kerere ita itaia, to dahaka ita karaia lasi be namo?

⁶ Bema toana be ita idia hakaua taudia haida ese abia hidi kererena, hereva auka, eiava haida ura henia bada to ma haida ura henia maragi karana idia karaia, do ita maumauraidia bona kongregesen lalonai unai bamona hereva do ita durudia, a? Kongregesen hebou do ita reaia, badina ita ura ita hahedinaraia edia kara ita badulaia, a? Lasi momokani! Davida bamona, Iehova bona ena orea do ita rakatania lasi, ma ta ena kerere dainai!​—⁠Salamo 119:165.

7. Ierusalema ena dubu dekenai, dahaka kara gagevadia idia matamaia, bona Iesu ena lalohadai idia dekenai be dahaka?

⁷ Badinaia karana ia haheitalaia tauna hereadaena be Iesu Keriso, bona peroveta herevana ese ia gwauraia Iehova “ia badinaia tauna.” (Salamo 16:​10, NW) Ierusalema ena dubu idia gaukaralaia kerere dainai, idia badinaia be auka. Iesu ia diba helaga tauna badana ena gaukara bona idia karaia bouboudia ese iena hesiai gaukara bona mauri bouboulaia karaia idia laulaulaia, bona ia diba danu taunimanima ese unai gaudia amo diba idia abia be mai anina bada. Unai dainai mai maoro ida ena badu ia hahedinaraia badina ia itaia unai dubu be “henaoa taudia edia ruma” ai idia halaoa. Dirava ia henia gwaumaoro ida, nega rua hagoevaia karadia ia karaia.a​—⁠Mataio 21:​12, 13; Ioane 2:​15-​17.

8. (a) Iesu be edena dala ai ia hahedinaraia dubu ena heau dalana ia badinaia? (b) Edena dala ai ita hahedinaraia ita be Iehova ita tomadiho henia ena goeva oreana ida karana ita laloa bada?

⁸ To, Iesu ese unai dubu ena heau dalana ia badinaia. Ia maragi negana amo, dubu ena ariadia ia lao henia bona nega momo unuseniai ia hadibaia. Dubu takisi ia henia danu​—⁠ena be unai be iena maduna ta lasi. (Mataio 17:​24-​27) Iesu ese ogogami vabu ta ia hanamoa badina dubu moni mauana dekenai “iena moni ibounai ia henia.” To daudau lasi murinai, Iehova ese unai dubu ia rakatania vaitani. To ela bona ia karaia, Iesu ese ia badinaia. (Mareko 12:​41-​44; Mataio 23:38) Hari inai nega ai Dirava ena tanobada oreana ese Iuda oreana mai ena dubu ia hereaia. Momokani, ia goevadae lasi; unai dainai nega ta ta gau haida idia haidaua. To unai orea ia gageva lasi, bona Iehova Dirava ese ena gabu ai ma orea ta do ia haginia gwauraia lasi. Unai orea lalonai taunimanima edia kerere ita itaia neganai, badu henia eiava lalo-dika henia o maumauraia karana ita hamatamaia be namo lasi. Namona be Iesu Keriso ia hahedinaraia badinaia karana ita tohotohoa.​—⁠1 Petero 2:​21.

Iseda Kerere

9, 10. (a) Satani ena tanobada ese edena dala ai iseda kerere gaudia ia gaukaralaia, ita ia veria badinaia lasi karana do ita karaia totona? (b) Kara dika badana ta ia karaia tauna ese dahaka ia karaia be namo?

⁹ Satani be iseda kerere ia gaukaralaia badinaia lasi karana ia hagoadaia totona. Iena tanobada ese iseda manoka gaudia ia gaukaralaia, ita ia dibagania Iehova ia gwau ia dika gauna ita karaia totona. Madi, lagani ta ta ai tausen momo idia moru sihari kava karana dainai. Haida be unai kerere idia habadaia, toana be idia be abidadama Keristani taudia, to hunia dalana ai kara dika idia karaia. Noga! magasin ena “Matamata Taudia Idia Henanadai . . .” herevadia haida ese unai kara idia herevalaia. Ia duahia hahinena matamatana ta ia gwau: “Edia hereva be egu mauri ena sivarai bamona.” Hunia dala amo hebamo dikana ia tahua Iehova idia lalokau henia lasi memero kekeni ida. Dahaka ia vara? Ia gwau: “Egu mauri ia dika ia lao, bona sihari kava karana lau karaia bena tadikaka ese lau idia sisiba henia. Iehova tura henia karana lau hadikaia, bona egu tama sina bona elda taudia ese guna lau idia abidadama henia, to hari unai ia ore.”b

¹⁰ Unai hahine matamatana ese elda taudia amo heduru ia abia bona Iehova badinaia karana ia karaia lou. Madi, momo ese edia kara amo idia davaria dika ese unai hahine ia davaria dika idia hereaia, bona haida be kongregesen dekenai do idia giroa lasi. Namona be badinaia karana oi karaia noho bona inai tanobada ena hedibagani oi dadaraia! Gima Kohorona bona Awake! magasin edia sisiba tanobada taudia hebamo bona moale karadia dikadia dekenai oi kamonaia. Namona be badinaia lasi karana ena tarapu lalonai oi moru lasi. To bema ia vara, namona be toana koikoina oi hahedinaraia lasi. (Salamo 26:⁠4) Heduru oi tahua be namo. Keristani tama sina bona elda taudia idia noho unai heduru henia totona.​—⁠Iamesi 5:​14.

¹¹ Ma dala ta ai iseda ura kereredia ese ita idia hamorua diba. Badinaia lasi karana ta idia lalohisihisilaia taudia haida ese Iehova hamoalea toho karana idia rakatania. Laloaboio lasi, Davida ese kara dika rohorohodia ia karaia. To, Davida ia mase daudau murinai, Iehova ese ia laloatao neganai ia gwauraia ena abidadama hesiai tauna. (Heberu 11:32; 12:⁠1) Dahaka dainai? Badina be Iehova hamoalea toho karana ia rakatania lasi. Aonega Herevadia 24:16 ia gwau: “Kara maoromaoro tauna, be nega momo do ia moru, to ma do ia toreisi.” Bema kerere maragidia ita karaia​—⁠reana ita karaia loulou​—⁠manoka ta ita hadokoa toho dainai, Iehova ena matana ai ita kara maoromaoro noho bema ita “toreisi”​—⁠ena anina be, ita helalo-kerehai momokani bona ia ita badinaia noho lou.​—⁠2 Korinto 2:⁠7 itaia.

Badinaia Lasi Karana Ena Dala Hehunidia Dainai Oi Naria!

12. Farisea taudia edia lalohadai aukadia be edena dala amo idia ia veria lao, badinaia lasi karana idia karaia totona?

¹² Badinaia lasi karana ena dala hehunidia idia noho. Reana edia toana be badinaia karana! Hegeregere, Iesu ena nega ai, Farisea taudia idia laloa badinaia karana idia hahedinaraia momokani.c To badinaia karana bona taunimanima idia haginia taravatu tahua goadagoada karana edia idau idia lalo-pararalaia lasi, badina edia kara be auka bona ma haida idia hahemaoro henia haraga. (Hadibaia Tauna 7:​16 itaia.) Unai dala amo badinaia lasi karana idia hahedinaraia​—⁠idia hesiai henia toho taudia dekenai, idia gwau idia hadibaia Taravatu ena anina dekenai, bona Iehova dekenai. To, Iesu be Taravatu ena anina ia badinaia, ena badina be lalokau. Unai dainai ia ese taunimanima ia hagoadaia, Mesia idia gwauhamatalaia herevadia ese idia perovetalaia hegeregerena.​—⁠Isaia 42:3; 50:4; 61:​1, 2.

¹³ Mai ena dagi Keristani taudia ese Iesu ena haheitalai amo namo bada idia davaria. Hegeregere, abidadama tama sina taudia idia diba edia natudia idia matakani henia be namo. (Aonega Herevadia 13:24) To idia naria namonamo edia natudia idia habadua kava lasi, matakani henia aukana eiava do idia gwauraia dika loulou karana amo. Bema natudia idia laloa edia tama sina idia hamoalea diba lasi, eiava idia laloa edia tama sina edia tomadiho dainai idia be kerere maumauraia taudia bona taunimanima edia kerere sibona idia itaia diba taudia ai idia lao, unai natudia do idia hesiku, bena unai hesiku dainai abidadama momokanina do idia rakatania.​—⁠Kolose 3:​21.

14. Edena dala ai Keristani mamoe naria taudia idia hahedinaraia idia be mamoe taudia idia badinaia?

¹⁴ Unai hegeregerena, Keristani elda taudia bona sekit o distrik naria taudia ese mamoe taudia idia davaria hekwakwanai bona idia garilaia gaudia do idia laloa. Idia be abidadama mamoe naria taudia dainai, sisiba do idia henia ia maoro neganai, to do idia naria namonamo sivarai ibounai do idia abia guna bona edia haere be Baibel bona Society ena buka amo idia abia. (Salamo 119:105; Aonega Herevadia 18:13) Idia diba danu, unai mamoe taudia ese idia dekenai do idia tabekau, lauma dalanai goada bona aniani abia totona. Unai dainai Mamoe Naria Tauna Badana, Iesu Keriso, idia tohotohoa. Wiki ta ta ai, idia ese Keristani hebou ai mamoe taudia idia hesiai henia mai edia badinaia karana ida​—⁠idia hamanokaia lasi, to edia abidadama idia hagoadaia.​—⁠Mataio 20:28; Efeso 4:​11, 12; Heberu 13:​20, 21.

15. Aposetolo taudia edia nega ai, edena dala ai haida be edia badinaia karana kererena idia hahedinaraia?

¹⁵ Badinaia lasi dalana hehunina ma ta be badinaia kerere karana. Badinaia karana momokanina Baibel lalonai be Iehova Dirava ita badinaia guna, ma tau ta o gau ta do ita atoa guna lasi. Aposetolo taudia edia nega ai, Iuda taudia momo ese Mose ena Taravatu bona Iuda oreana ena heau dalana idia ura idia dogoatao noho. To Iehova ese ena hahenamo be unai gwau-edeede besena amo ia kokia lao bona lauma Israela besena dekenai ia atoa negana ia ginidae. Idia haida sibona be Iehova idia badinaia bona ia haidaua gaudia idia abia dae. Keristani momokani taudia ihuanai danu, Iuda taudia idia tohotohoa taudia idia ura “manoka bona anina lasi” gaudia Mose ena Taravatu amo, Keriso ia hagugurua vadaeni gaudia, dekenai idia ura idia giroa.​—⁠Galatia 4:9; 5:​6-​12; Filipi 3:​2, 3.

16. Iehova ena orea ese gau ta ia haidaua neganai, ena abidadama hesiai taudia be dahaka idia karaia?

¹⁶ To, hari inai nega ai, Iehova ena orea taudia idia hahedinaraia gau ta ia haidaua neganai, do idia badinaia noho. Hereva momokani ena diari ia bada ia lao neganai, gau haida do idia haidaua. (Aonega Herevadia 4:18) Vanegai, ‘hesiai tauna mai ena kamonai bona mai ena kara maoromaoro’ oreana ese ita idia durua Mataio 24:34 ia gwauraia “inai nega idia noho taudia” ena anina korikorina, Mataio 25:​31-​46 ia gwauraia “mamoe bona nanigosi” hapararaia neganai, bona ami gaukara ita karaia lasi neganai idia henia gaukara idaudia ita lalo-pararalaia totona. (Mataio 24:45) Reana hereva momokani negea taudia haida idia moale bada bema Iehova ena Witness taudia haida be guna idia abia dae lalohadai idia badinaia auka noho. To unai ia vara lasi. Badina be dahaka? Badina be Iehova ena orea taudia be badinaia karana idia hahedinaraia taudia.

17. Nega haida iseda lalokau taudia be edena dala ai iseda badinaia karana do idia tohoa?

¹⁷ To reana ita ia hadikaia diba gauna be badinaia kerere karana. Iseda turana momokanina o ruma bese tauna ta ese Baibel ena hakaua herevadia hamakohia dalana ia abia hidi neganai, reana ita laloa iseda badinaia karana ia tohoa auka. Vaia, iseda hemami be famili taudia ita badinaia be namo. To namo lasi idia ita badinaia guna bona Iehova ita badinaia murinai! (1 Samuela 23:​16-​18 itaia.) Kara dika badana idia karaia taudia do ita durua lasi edia kara dika hunia totona eiava edia maumau herevadia “mai manau danu” idia “hakaua lou” toho elda taudia dekenai, do ita durua lasi danu. (Galatia 6:⁠1) Bema idia ita durua, Iehova, iena orea, bona iseda lalokau tauna ita badinaia lasi. Momokani, bema kara dika tauna ia abia be namo matakani karana ita koua, Iehova ena lalokau hahedinaraia dalana ta ia dekenai do ita koua. (Heberu 12:​5-7) Laloaboio lasi danu, “oiemu turana ese oi ia hahisia neganai, unai be oi do ia hanamoa.” (Aonega Herevadia 27:⁠6) Sisiba aukana mai lalokau ida, Dirava ena Hereva amo, dainai reana iseda lalokau tauna ia lalo-hisihisi, to gabeai unai hereva ese ia hamauria diba!

Dagedage Negana ai Badinaia Karana Rakatania Lasi

¹⁸ Nega haida Satani ese iseda badinaia karana ia dagedage henia be hunia dalana amo ia karaia lasi. Naboto ena sivarai mani oi laloa. King Ahaba ese ia doria ena vain umana ia hoia totona neganai, ia haere henia, ia gwau: “Lohiabada ia ura lasi lauegu tubuna taudia edia tano oi dekenai do lau henia.” (1 King Taudia 21:⁠3) Naboto ia gwau-edeede lasi; ia be badinaia karana ia hahedinaraia. Mose ena Taravatu ena hahegani ta be Israela tauna be ena famili ena tano ia hoia lao diba lasi. (Levitiko 25:​23-​28) Naboto ia diba unai dagedage king ta, Ahaba, ese ia alaia diba, badina ena adavana, Iesebele, be Iehova ena peroveta taudia ia alaia neganai ia koua lasi! To Naboto ia gini goada.​—⁠1 King Taudia 18:⁠4.

18, 19. (a) Ahaba be Naboto amo dahaka ia ura ia abia, bona dahaka dainai Naboto ese ia dadaraia? (b) Naboto ia abia davana dainai, ita gwau diba badinaia karana ena namo be hegeregere lasi, a? Mani oi gwauraia.

¹⁹ Badinaia karana hahedinaraia be nega haida mai ena davana. Iesebele be “kara dika herea taudia rua” edia heduru amo Naboto ia samania koikoi, idia gwau ia karaia lasi kara dikana ta ia karaia. Unai koikoi dainai, ia bona ena natudia memero idia alaia. (1 King Taudia 21:​7-​16; 2 King Taudia 9:​26) Ena anina be Naboto ena badinaia karana be kererena, a? Lasi! Naboto be Iehova ese ia laloatao abidadama tatau bona hahine momo ida ia noho; Dirava ena lalona ai idia “mauri,” to guri gabuna dekenai do idia mahuta ela bona toreisi lou negana ia ginidae.​—⁠Luka 20:38; Kara 24:⁠15.

20. Iseda helaro be edena dala ai ita ia durua badinaia karana ita karaia noho totona?

²⁰ Unai gwauhamata ese hari inai negai Iehova idia badinaia taudia ia hagoadaia. Ita diba hari inai tanobada dikana lalonai ita noho dainai iseda badinaia karana dainai reana davana do ita henia. Iesu Keriso ese ena badinaia karana dainai ia henia davana be ena mauri, bona ia murinai idia raka taudia ia hamaoroa unai bamona dagedage karana do idia davaria danu. (Ioane 15:20) Iena nega vaira helarona ese ia durua hegeregerena, iseda helaro ese ita ia durua. (Heberu 12:⁠2) Unai helaro dainai herevana edena bamona dagedage ita davaria, iseda badinaia karana do ita rakatania lasi.

21. Iehova ese ia idia badinaia taudia dekenai ia henia hagoadaia herevadia be dahaka?

²¹ Momokani, hari inai nega ai reana ita momo lasi ese iseda badinaia karana dainai dagedage bada ita davaria. To dokona ia do ginidae lasi neganai, reana Dirava ena orea taudia ese dagedage ma haida do idia davaria. Iseda badinaia karana ita rakatania lasi dalana be dahaka? Namona be iseda badinaia karana ita goadalaia hari. Iehova ese gaukara badana ta ia henia​—⁠iena Basileia harorolaia bona hadibaia gaukarana. Namona be mai iseda badinaia karana ida unai mai anina gaukarana ita karaia noho. (1 Korinto 15:58) Bema taunimanima edia kerere dainai Iehova ena orea ita rakatania lasi bona bema ita naria namonamo badinaia lasi karadia hehunidia, hegeregere badinaia karana kererena ita karaia lasi, iseda badinaia karana idia tohoa gaudia idia vara neganai, ita hegaegae vadaeni do ita kwalimu totona. Herevana dahaka ia vara, ita diba Iehova ese ena hesiai taudia mai edia badinaia karana do ia badinaia. (2 Samuela 22:26) Oibe, ia idia badinaia taudia do ia gimaia!​—⁠Salamo 97:⁠10.

[Footnotes]

Emu Haere be Dahaka?

◻ Haida edia kerere ese ita idia veria badinaia lasi karana ita karaia totona, to ena reaia dalana be dahaka?

◻ Edena dala ai iseda kerere ese ita idia veria badinaia lasi karana karaia totona?

◻ Badinaia karana kererena dadaraia totona, dahaka ita karaia be namo?

◻ Dagedage negadiai, iseda badinaia karana ita rakatania lasi totona, durua gauna be dahaka?

5. Dahaka dainai Davida be reana ia ura Saulo ia gwau-edeede henia?

11. Bema ita laloa ita dika sibona, dahaka dainai unai be maoro lasi, bona Baibel lalonai edena haheitalai be ita ia durua diba iseda lalohadai kererena ita hanamoa totona?

13. (a) Edena dala ai Keristani tamadia bona sinadia be badinaia lasi karana idia hahedinaraia diba? (b) Dahaka dainai tama sina be edia natudia idia matakani henia neganai, dala aukana ai, gwauraia dika dalanai, eiava kerere sibona idia tahua dalanai idia karaia lasi?

[Box on page 9]

Mai Badinaia Karana ida Betele ai Hesiai Gaukara Karaia

Aposetolo Paulo ia torea: “Ekalesia ena gaukara ibounai umui karaia namonamo, mai dala maorona, karaia kava lasi.” (1 Korinto 14:40) Paulo ia diba kongregesen ia heau namonamo totona, namona be idia “karaia kava lasi,” to idia karaia namonamo. Hari inai negai danu, elda taudia ese abia hidi idauidau idia karaia, hegeregere daika do ia lao edena buka stadi gabuna dekenai, haroro hebou idia hegaegaelaia, bona teritori idia karaia haorea namonamo, eiava, idia sekea. Nega haida unai gaudia be iseda badinaia karana idia tohoa diba. Unai bamona hahegani be Dirava amo lasi, bona idia be tadikaka ta ta iboudiai edia lalohadai hegeregerena lasi.

Nega haida, Keristani kongregesen lalonai idia haginia naria daladia oi badinaia be auka, a? Bema oi gwau io, reana Betele taudia edia haheitalai ese oi ia durua. Unai ladana Betele be Heberu gado herevana, ena anina be “Dirava ena ruma,” bona Watch Tower Society ena brens opesi 104, U.S. hedikwota danu, dekenai unai ladana idia hatoa.* Betele dekenai idia gaukara bona unuseniai idia mahuta volantia taudia idia ura unai gabudia be Iehova hemataurai bada karana idia hahedinaraia. Unai idia karaia totona, namona be idia ta ta be badinaia karana idia hahedinaraia.

Betele idia vadivadi henia taudia be nega momo ena goeva bona noho namonamo toana idia itaia bona idia herevalaia. Ena gaukara taudia be sediual namona idia badinaia bona idia moale; edia hereva, edia kara, bona edia toana idia hahedinaraia Baibel idia gaukaralaia edia lo vadaeni Keristani lalona hadibaia totona. Betele famili taudia be mai edia badinaia karana ida Dirava ena Hereva ena taravatu idia kamonaia.

Danu, Hakaua Oreana ese buka ta, Dwelling Together in Unity, ia henia bona ia ese hakaua herevadia ia gwauraia, famili badana be idia gaukara hebou namonamo totona. (Salamo 133:1) Hegeregere, ia ese daiutu naria, aniani abia dalana, tauanina ia miro lasi, dabua bona tauanina ena toana, bona unai bamona gaudia ia herevalaia. Betele famili taudia ese mai edia badinaia karana ida ena naria daladia idia durua bona idia kamonaia, ena be edia ura be idau. Idia laloa unai buka be taravatu bona hahegani bukana sibona lasi, to idia laloa ia ese lalo-tamona bona maino havaraia hakaua herevadia ia henia. Dipatmen naria tadikaka ese unai Baibel amo idia abia heau daladia idia badinaia bona dala namona ai idia gaukaralaia Betele famili taudia idia hagoadaia bona durua edia Betele hesiai gaukara helagana hagugurua totona.

* Unai faktori, opesi, bona mahuta rumadia be Dirava ena lauma dubu o ruma helagana badana lasi. Dirava ena lauma dubuna be ia henia tomadiho goevana karaia dalana. (Mika 4:⁠1) Ia be tanobada ruma ta lalonai ia noho gauna lasi.

[Box on page 10]

Badinaia Karana Hahedinaraia Tauna Bona Taravatu Tahua Tauna

Lagani 1916 ai, Encyclopædia of Religion and Ethics ia gwau, “badinaia karana ia karaia tauna bona taravatu ia tahua tauna edia idau be nega bona gabu iboudiai dekenai ita davaria.” Ia gwau: “Taravatu tahua tauna ese idia hamaoroa gauna ia karaia, bona taravatu ta ia utua lasi; idia torea hereva, ia duahia diba gauna unai, ia karaia. Badinaia karana hahedinaraia tauna ese unai ia karaia danu to . . . unai sibona lasi, mai ena lalona ibounai ida ena maduna ia huaia, ena kara ena anina be unai gaukara ena anina hegeregerena ia haidaua.” Murinai, unai buka ia gwau: “Badinaia karana be taravatu utua lasi karana sibona lasi. . . . Badinaia karana ia hahedinaraia tauna be taravatu utua lasi tauna amo ia idau, badina ia gaukara mai ena kudouna bona lalona ibounai ida . . . Mai ena ura ida kara dika ia karaia lasi, gaukara namona ta do ia reaia lasi, bona ia diba namonamo lasi dainai kerere ia karaia lasi.”