Dahaka Dainai Oi “Moale”?
1. Dahaka dainai hua ta ta ena dokonai ita “moale”?
1 Hua ta ta ena dokonai, emu haroro gaukara ena ripoti oi henia neganai, dahaka dainai oi “moale”? (Gal. 6:4) Herevana spesel painia taudia ese hora 130 idia ripotilaia, o elda amo gwaumaoro idia abia gorere taudia ese miniti 15 idia ripotilaia, to ita ibounai ita moale badina mai kudouna ibounai ida Iehova ita hesiai henia.—Sal. 100:2.
2. Dahaka dainai Iehova ita hesiai henia be namo?
2 Iehova be guba bona tanobada ena Siahu Ibounai Lohiabadana dainai, mai kudouna ibounai ida Ia ita hesiai henia be maoro. (Mal. 1:6) Ia ita lalokau henia dainai, eda mauri ita gwauhamatalaia iena ura ita karaia totona. Unai dainai, dina ta ta o hua ta ta ena dokonai, bema ita diba Iehova dekenai ita be gau “namodia” ita henia, hegeregere eda taim, diba bona goada, vadaeni ita moale be namo. (Aon. 3:9) To, bema eda lalomamina ese ita ia hadibaia eda haroro ita hanamoa be namo, vadaeni hanamoa daladia ita laloa.—Roma 2:15.
3. Dahaka dainai ma ta ida sibona ita hahegeregerea be aonega karana lasi?
3 ‘Ma Ta ida Sibona Do Ita Hahegeregerea Lasi’: Bema eda goada be ma ta ena goada ida ita hahegeregerea, o guna ita karaia gaukarana be hari ita karaia gaukarana ida ita hahegeregerea, unai be aonega karana lasi. Badina eda noho daladia be idia idau idia lao. Danu, eda goada bona diba be ma haida edia bamona lasi. Nega momo, ma ta ida sibona hahegeregerea karana ese hekokoroku o lalomanoka ia havaraia. (Gal. 5:26; 6:4) Iesu ese ta ena goada be ma ta ena ida ia hahegeregerea lasi, to ta ta ese ia karaia diba gauna ia moalelaia.—Mar. 14:6-9.
4. Iesu ena parabole amo dahaka mai anina bada gauna ita dibaia?
4 Iesu ena parabole ta ese ia hahedinaraia, gaukara taudia ta ta be “edia diba hegeregerena” talent idia abia. (Mat. 25:15) Oibe, unai gaukara taudia be edia diba bona noho dalana hegeregerena gaukara idia karaia dainai, edia biaguna ia giroa lou bona edia gaukara ena ripoti ia itaia neganai, ia moale bona ia hanamodia. (Mat. 25:21, 23) Unai hegeregerena, bema Basileia harorolaia gaukarana ai ita bisi noho, ita diba momokani Dirava do ia moale!