Baibel Hadibaia Bukana Idia Abia Dae Lasi Taudia Durua Dalana
1. Baibel Hadibaia bukana be taunimanima ibounai ese do idia abia dae, a? Herevalaia.
1 Ta be Iehova tomadiho henia tauna ai ia lao totona, Baibel ena hadibaia herevadia ia dibaia be namo. To, haida be tomadiho idia laloa bada lasi o idia laloa Baibel be Dirava ena Hereva lasi. Ma haida idia laloa Dirava ia noho lasi bona Baibel idia matauraia lasi. Unai bamona taudia ese nega ginigunana ai Baibel Hadibaia bukana idia abia dae lasi neganai, edena pablikeisen ese idia do ia durua? Tano idauidau 20 ai idia noho pablisa haida edia hereva ese ita do ia durua.
2. Bema ta ia gwau Dirava be lasi, dahaka dainai iena hereva ena badina ita tahua be namo?
2 Dirava Idia Laloa Bada Lasi Taudia: Bema ta ia gwau ia laloa Dirava be lasi, namona be ena hereva ena badina ita tahua. Ia be evolusen ia abia dae, a? Ia be Dirava ia abidadama henia lasi badina tanobada ai kara gageva ia bada eiava dubu taudia idia koikoi, a? Eiava ena tano taudia idia laloa Dirava be lasi, a? Eiava ia diba Dirava ia noho, to ia laloa Dirava ia abia dae be anina lasi. Pablisa momo ese unai bamona taudia idia nanadaia, “Hanaihanai unai bamona oi laloa, a?” Unai henanadai dainai, ruma taudia ese edia lalohadai idia herevalaia. Kamonai bona hereva utua lasi. Ruma tauna ena hereva ena badina ita lalopararalaia neganai, ita diba edena bamona ita haere bona edena pablikeisen do ita hariharilaia.—Aon. 18:13.
3. Edena dala ai ita hahedinaraia ruma tauna ena lalohadai ita matauraia?
3 Ita haere neganai, namona be ita naria namonamo, badina ita ura lasi ruma tauna ia laloa iena lalohadai ita gwauraia dika. United States ai, pablisa ta ia gwau: “Taunimanima edia lalohadai ita matauraia be gau badana. Namo lasi idia ida ita hepapahuahu, to henanadai amo taunimanima ita durua edia lalohadai idia herevalaia totona.” Loaloa naria tauna ta be ruma tauna ena lalohadai ia kamonai murinai, ia nanadaia: “Nega ta inai oi laloa, a?”
4. Edena dala ai Buddhist taudia ita durua?
4 Britain ai, pablisa haida be Buddhist taudia idia haroro henia neganai, buklet ladana Lasting Peace and Happiness—How to Find Them idia gaukaralaia. Buklet ena hamatamaia herevana idia gwauraia murinai, kahana ta ladana “Is There Really a Most High Creator?” bona “A Guidebook for the Blessing of All Mankind” idia herevalaia. Gabeai, Baibel Hadibaia bukana idia hahedinaraia bona ruma tauna idia hamaoroa, “Ena be oi laloa Dirava be lasi, to Baibel oi stadilaia be namo, badina taravatu namodia momo do oi dibaia.” United States ai, China taudia ia haroro henia painia ta ia gwau: “Emai teritori ai momo idia ura buka idia duahia. Unai dainai, lou henia ai karaia neganai ai idia hadibaia buka ibounai idia duahia haorea vadaeni. To, reana Baibel stadilaia dalana idia lalopararalaia lasi. Unai dainai, nega ginigunana lou henia lau karaia neganai, Sivarai Namona! buklet lau gaukaralaia, badina idia torea dalana ta be taunimanima ida ita herevahereva totona.” United States ai, China gado edia sekit ia naria sekit tauna ta ia gwau, eda vadivadi ginigunana ai Baibel Hadibaia bukana ita herevalaia diba. To, Baibel Hadibaia bukana ena karoa 2 amo stadi ita hamatamaia be namo, badina unai karoa ese Baibel ia herevalaia, to karoa 1 be Dirava ia herevalaia.
5. Dahaka dainai ita haheauka be namo?
5 Haida be lagani haida murinai Dirava do idia abidadama henia dainai, ita haheauka be namo. Herevana vadivadi ginigunana ai ita hahedinaraia Dirava ia noho, to unai negai unai do idia abia dae lasi. To gabeai do idia gwau, reana Dirava ia noho, eiava do idia gwau, taunimanima ese Dirava idia abia dae lasi ena badina idia lalopararalaia.
6. Dahaka dainai haida be Baibel idia laloa bada lasi?
6 Baibel Idia Laloa Bada Lasi Taudia: Haida idia gwau Dirava ia noho, to Baibel idia dadaraia badina idia laloa ia be Dirava ena Hereva lasi. Reana edia gabu taudia be Baibel idia laloa maragi bona idia gwau ia be Kerisendom ena buka. Eiava edia gabu idia gwauraia Keristani tanona bona idia laloa Baibel idia gaukaralaia be anina lasi. Edena dala ai unai bamona taudia ita durua Baibel idia laloa bada bona gabeai Baibel Hadibaia bukana amo ita stadi henia?
7. Edena dala ta ai taunimanima ita durua Baibel idia laloa bada totona?
7 Greece ena brens ofesi ia gwau: “Baibel idia laloa maragi taudia ita durua dala namona be inai: Baibel ita kehoa bona ena hereva ita hahedinaraia. Pablisa momo idia gwau, iseda uduna hereva be siahu lasi to Dirava ena hereva be mai ena siahu bona ta ena kudouna ia hamarerea diba. (Heb. 4:12) Momo be Baibel ai Dirava ena ladana idia itaia murinai, idia ura Baibel idia stadilaia.” India ena brens ofesi ia gwau: “Hindu taudia momo idia ura mauri bona mase ena hereva momokani idia dibaia. Bona Baibel ia gwauhamata tanobada ai bese idia inai heheni karana do ia ore.” Pablisa be taunimanima idia laloa bada gaudia idia herevalaia bena Baibel amo idia hahedinaraia Dirava ena Basileia ese gau ibounai do ia hamaoromaoroa.
8. Kerisendom dainai Baibel idia dadaraia taudia be edena bamona ita durua diba?
8 Bema ta be Kerisendom dainai Baibel ia dadaraia, namona be ita hadibaia Kerisendom ese Baibel ena hahediba herevadia idia hagagevaia. India ena brens ofesi ia gwau: “Nega haida ta ita durua ia laloparara Baibel be dubu ta ena buka lasi.” Ma ia gwau, Hindu taudia ese idia ura henia gauna be Mauri ena Anina be Dahaka? Edena Bamona Oi Davaria Diba? buklet ena kahana 4, badina unai kahana ese ia hahedinaraia dubu momo be Dirava ena Hereva idia hadikaia toho. Brazil ai, painia ta be taunimanima ia hamaoroa: “Namona be Baibel ena hereva ma haida oi stadilaia. Momo be unai bamona idia karaia, bona idia sibona ese dubu ta idia abia hidi. Reana oi danu be do oi stadilaia gaudia dainai do oi hoa.”
9. Ena be matamanai oi itaia ta ese Baibel ia dadaraia, dahaka dainai ita haheauka be namo?
9 Iehova be taunimanima edia kudouna ia itaia. (1 Sam. 16:7; Aon. 21:2) Ia ese kudou-maoro taudia be tomadiho momokani dekenai ia veria mai. (Ioa. 6:44) Unai bamona taudia momo be guna Dirava o Baibel idia abia dae lasi. Iseda haroro gaukara ese unai taudia “do ia hamauria bona hereva momokani ena diba maoromaoro do idia abia.” (1 Tim. 2:4) Unai dainai, bema matamanai oi itaia ta ese Baibel ia dadaraia, oi haheauka! Namona be emu gado ai ia noho pablikeisen ta amo unai bamona tauna oi durua. Reana unai ese dala do ia kehoa Baibel stadi bukadia hegeregere, Baibel be Dahaka Ia Hadibaia? bukana amo do oi stadi henia totona.
[Box on page 4]
Bema ruma tauna ia gwau ia laloa Dirava be lasi, mani inai tohoa:
• Oi nanadaia, “Hanaihanai unai bamona oi laloa, a?”
• Buddhist tauna dekenai oi gaukaralaia buklet be inai: Lasting Peace and Happiness—How to Find Them, rau 9-12.
• Evolusen ia abia dae tauna dekenai oi gaukaralaia gaudia be inai:
Awake! ena atikol ladana,“Was It Designed?”
DVD ladana, The Wonders of Creation Reveal God’s Glory
Buklet ladana, A Satisfying Life—How to Attain It kahana 4; Was Life Created?; bona The Origin of Life—Five Questions Worth Asking
• Bema ia gwau Dirava ia abidadama henia lasi badina tanobada ai kara gageva bona hisihisi be bada, ia dekenai oi gaukaralaia gaudia be inai:
Buka ladana, Is There a Creator Who Cares About You?, karoa 10
Buklet ladana, Dirava ese Ita Ia Laloa Eiava?, kahana 6, bona Mauri ena Anina be Dahaka?, kahana 6
• Bema ruma tauna ia gwau Dirava ia noho, maoromaoro Baibel Hadibaia bukana oi gaukaralaia. Namona be karoa 2 eiava ruma tauna ese ia laloa bada karoa ta oi herevalaia.
[Box on page 5]
Bema ruma tauna ia gwau Baibel ia abia dae lasi, mani inai tohoa:
• Buka ladana, Life—How Did It Get Here? By Evolution or by Creation?, karoa 17 bona 18
• Hindu tauna dekenai oi gaukaralaia buklet be inai: Why Should We Worship God in Love and Truth?
• Jew tauna dekenai oi gaukaralaia buklet be inai: Will There Ever Be a World Without War?, rau 3-11.
• Baibel ena hakaua herevadia badinaia karana ena namo oi herevalaia. Ia dekenai oi gaukaralaia gaudia be inai:
Awake! ena atikol ladana, “Help for the Family”
DVD ladana, The Bible—Its Power in Your Life
Buklet ladana, Dirava ena Sivarai Namona!, karoa 9 bona 11; A Book for All People, rau 22-26; bona A Satisfying Life—How to Attain It, kahana 2
Buddhist tauna dekenai oi gaukaralaia buklet be inai: The Pathway to Peace and Happiness, rau 3-7.
Muslim tauna dekenai oi gaukaralaia buklet be inai: Real Faith—Your Key to a Happy Life, kahana 3.
Bema oi haroro henia tauna be Baibel ia dadaraia, namona be Baibel oi gaukaralaia lasi ela bona vadivadi haida murinai Baibel oi gaukaralaia.
• Baibel ena peroveta herevadia idia guguru dalana oi herevalaia. Oi gaukaralaia diba gaudia be inai:
DVD ladana, The Bible—Accurate History, Reliable Prophecy
Buklet ladana, A Book for All People, rau 27-29
• Ta ese Baibel ia hadibaia gauna ta ia henanadailaia neganai, maoromaoro Baibel Hadibaia bukana oi gaukaralaia.
[Box on page 6]
Bema ruma tauna ia gwau, ‘Dirava ia noho lasi,’ reana oi gwau:
• “Ia namo oi lau hadibaia dahaka dainai lau abia dae Dirava ia noho?” Bena Herevalaia bukana, rau 125-127 ai point haida oi herevalaia, o oi hadibaia gabeai iena buka ta do oi mailaia.
• “To bema Dirava ia noho, oi ura ia be edena bamona?” Nega momo ruma taudia idia gwau, idia ura lalokau, hahemaoro goeva, hebogahisi bona taunimanima edia toana ia laloa lasi Diravana kahirakahira idia lao. Baibel amo oi hahedinaraia Dirava be unai bamona karadia ia hahedinaraia. (Reana Baibel Hadibaia bukana ena karoa 1, paragraf 6 amo oi matamaia.)
Bema ruma tauna ia gwau, ‘Baibel lau abia dae lasi,’ reana oi gwau:
• “Momo be unai bamona idia hereva. Haida idia gwau Baibel be saiens bukana lasi o ena taravatu be taunimanima ia durua lasi. To nega ta Baibel oi duahia, a? [Haere naria. Bena Book for All People buklet ena rau 3 ena hamatamaia herevana oi duahia, bona hariharilaia.] Momo be Baibel idia duahia lasi, badina dubu ese Baibel ena hadibaia herevadia idia hagagevaia. Lau ura gabeai rau 4 bona 5 ai ia noho haheitalai ta lau herevalaia.”
• “Momo be unai bamona idia hereva. Ia namo Baibel lau abia dae ena badina ta lau hahedinaraia? [Iobu 26:7 o Isaia 40:22 oi duahia, idia hahedinaraia Baibel ia gwauraia gaudia momo be saiens taudia ese idia hamomokania.] Danu, Baibel ese famili ia durua. Lau ura gabeai haheitalai ta lau herevalaia.”
• “Tanikiu. Bema Dirava be buka ta ia torea taunimanima durua totona, oi laloa ia lalonai dahaka ia torea?” Bena ia abia dae gauna ta be Baibel amo oi hahedinaraia.