Sivarai Namona Harorolaia Daladia

IESU be sivarai namona ia harorolaia goadagoada tauna dainai iena murinai idia raka taudia dekenai ia be haheitalai namona. Ia be taunimanima haroro henia bona hadibaia totona edia ruma ai bona pablik gabudia dekenai ia lao. (Mat. 9:35; Luka 8:1) Iesu ese taunimanima ta ta ia hereva henia, sibona ia noho neganai ena hahediba taudia ia hadibadia, bona hutuma ia haroro henidia danu. (Mat. 13:36; Mar. 4:10-13; 6:35-44; Ioa. 3:2-21) Hanaihanai dala ia tahua ena hereva amo taunimanima ia hagoadaia bona helaro ia gwauraia hedinarai totona. (Luka 4:16-19) Ena be nega haida ia ura laga-ani, to unai nega ia gaukaralaia taunimanima ia haroro henia totona. (Mar. 6:30-34; Ioa. 4:4-34) Iesu ena hesiai gaukara ena sivarai ita duahia neganai, unai ese iseda lalona ia veria iena haheitalai ita tohotohoa totona, a? Oibe, ita be aposetolo taudia bamona ita kara.​​—Mat. 4:19, 20; Luka 5:27, 28; Ioa. 1:43-45.

² Iesu Keriso ese lagani 2,000 bamona gunanai ia hamatamaia gaukarana be hari Keristani taudia ese idia karaia, ena dala haida mani ita itaia.

RUMA-TA-RUMA-TA HARORO GAUKARA

³ Ita be Iehova ena Witnes taudia dainai, ruma-ta-ruma-ta ai Basileia ena sivarai namona ita harorolaia be mai anina bada. Nega momo unai dala ita badinaia dainai, taunimanima idia gwau unai be Witnes taudia sibona edia gaukara. Nega kwadogina lalonai, taunimanima milioni momo ita haroro henia totona inai aonega dalana ita gaukaralaia dainai anina namona ia vara noho. (Mat. 11:19; 24:14) Ruma-ta-ruma-ta haroro gaukarana be dala namona iseda lalokau, Iehova bona iseda dekena taudia dekenai ita hahedinaraia totona.​​—Mat. 22:34-40.

⁴ Ruma-ta-ruma-ta haroro gaukarana be hari inai negai Iehova ena Witnes taudia ese idia hamatamaia lasi. To ia be aposetolo taudia edia negai amo ia matamaia. Efeso ai, Paulo be naria taudia dekenai ena hesiai gaukara ia herevalaia neganai, ia gwau: “Dina ginigunana Asia provinsi dekenai lau mai negana amo, . . . Lau ese umui durua herevana ta lau hunia lasi, to umui dekenai lau gwauraia . . . ruma ta ruma ta ai.” Unai dala bona dala ma haida ai, ia ese ‘Iuda taudia bona Grik taudia dekenai ia hahedinaraia goevagoeva, namona be idia helalo-kerehai bona Dirava dekenai idia giroa, bona iseda Lohiabada Iesu idia abidadama henia.’ (Kara 20:18, 20, 21) Unai negai, Roma ena lohia taudia ese taunimanima idia hagoadaia kaivakuku idia tomadiho henia totona, bona momo be ‘dirava idauidau idia badinaia goadagoada.’ Gau badana be taunimanima ese “tanobada bona ia lalonai idia noho gaudia ibounai ia karaia Diravana” do idia tahua, badina ia ese “taunimanima ibounai ia hadibaia noho idia helalo-kerehai be namo.”​​—Kara 17:22-31.

⁵ Hari inai negai, taunimanima ibounai dekenai sivarai namona ita harorolaia gaukarana be mai anina bada. Inai nega oromana dikana ena dokona be ia kahirakahira momokani. Unai dainai iseda haroro gaukara ita habadaia be namo. Namona be nega ia do noho lalonai, dala ita tahua ruma ta ruma ta haroro gaukarana ai hereva momokani totona idia hitolo taudia ita durua. Hari inai negai, unai haroro dalana ese anina namona ia havaraia, Iesu bona aposetolo taudia edia negai bamona.​​—Mar. 13:10.

⁶ Ruma-ta-ruma-ta haroro gaukarana oi karaia goadagoada noho, a? Bema oibe, namona be oi diba Iehova be oi dekenai ia moale bada. (Ese. 9:11; Kara 20:35) Nega haida oi dekenai ruma-ta-ruma-ta haroro gaukarana be do ia auka. Reana oiemu tauanina ia goada lasi eiava oi haroro teritori lalonai taunimanima momo idia ura lasi kamonai. Reana gavamani ese iseda gaukara idia taravatua. Eiava oi hemarai, bona idau taudia ida herevahereva oi hamatamaia be auka. Unai dainai nega haida ruma-ta-ruma-ta ai oi haroro neganai, do oi lalohekwarahi. Oi lalomanoka lasi. (Eso. 4:10-12) Oiemu hemami be gabu momo ai tadikaka bona taihu edia hemami bamona.

⁷ Iesu ese ena hahediba taudia dekenai ia gwauhamata: “Lau be dina iboudiai umui ida do lau noho ela bona inai nega oromana ena dokona.” (Mat. 28:20) Unai gwauhamata ese ita ia hagoadaia hahediba taudia halaoa gaukarana ita karaia totona. Paulo bamona ita mamia, ia gwau: “Lau dekenai siahu ia henia tauna amo goada lau abia gau ibounai lau karaia totona.” (Fili. 4:13) Namona be wiki ibounai kongrigeisen ese idia hegaegaelaia ruma-ta-ruma-ta haroro gaukarana lalonai oi vareai. Tadikaka ma haida ida oi gaukara neganai, oi do idia hagoadaia bona durua. Oi davaria koua gaudia idauidau oi hanaia totona oi guriguri, bona oi gaukara goada sivarai namona harorolaia tauna goadana ai oi lao totona.​​—1 Ioa. 5:14.

⁸ Ma haida dekenai sivarai namona oi herevalaia neganai, ‘emu helaro’ ena badina do oi gwauraia hedinarai. (1 Pet. 3:15) Danu, Basileia helarona do idia abia taudia bona do idia abia lasi taudia edia idau do oi lalopararalaia namonamo. (Isa. 65:13, 14) Do oi moale badina oi diba Iesu ena hereva, “emui diari umui hahedinaraia” ena hahegani oi badinaia, bona reana ma haida oi durua Iehova bona mauri hanaihanai idia abia diba ena hereva momokani idia dibaia.​​—Mat. 5:16; Ioa. 17:3; 1 Tim. 4:16.

⁹ Wikeni bona wiki lalonai ruma ta ruma ta haroro gaukara idia karaia. Gabu haida ai, dina ai taunimanima be edia ruma ai idia davaria lasi dainai, kongrigeisen haida be dala idia karaia adorahi ai idia haroro totona. Taunimanima momo be adorahi kahana ai vadivadi taudia idia abia dae, to dabai kahanai lasi.

KAMONAI TAUDIA TAHUA NOHO

¹⁰ Iesu ese ena hahediba taudia ia hadibaia kamonai taudia do idia “tahua” totona. (Mat. 10:11) Iesu be ruma-ta-ruma-ta haroro gaukara sibona amo kudou-maoro taudia ia tahua lasi. To dala ia kehoa negadiai nega bona gabu idauidau ai ia haroro. (Luka 8:1; Ioa. 4:7-15) Aposetolo taudia danu be gabu idauidau ai taunimanima idia haroro henia.​​—Kara 17:17; 28:16, 23, 30, 31.

¹¹ Hari inai negai danu, iseda tahua gauna be taunimanima ibounai ese Basileia ena sivarai do idia kamonai. Anina be Iesu bona ena aposetolo ese hahediba taudia halaoa gaukarana idia karaia dalana ita tohotohoa bona nega bona teritori ai noho daladia idia idau hegeregerena iseda haroro daladia ita haidaua danu. (1 Kor. 7:31) Hegeregere, pablisa momo be bisinesi gabudia ai taunimanima momo idia haroro henia. Tano momo dekenai dala ai haroro karana ese anina namona ia havaraia, bona loaloa gabudia, motuka atoa gabudia, eiava taunimanima idia noho gabudia ai danu. Kongrigeisen haida edia teritori ai idia ese teibolo o troli idia gaukaralaia haroro totona. Danu, brens ofesi ese siti lalonai spesel pablik haroro daladia idia hegaegaelaia bona kongrigeisen haida amo tadikaka taihu idia gaukaralaia. Unai dainai edia ruma dekenai idia noho lasi taudia be unai dala idauidau amo sivarai namona idia kamonai diba.

¹² Pablik gabudia ai Baibel ena hereva idia ura kamonai taudia ita davaria neganai, pablikeisen maorona ita hariharilaia diba. To unai kamonai tauna ena ura habadaia totona, reana emu adres eiava fon namba be ia dekenai oi henia bona dala oi karaia oi lou henia totona bona ia dekenai jw.org oi hahedinaraia eiava kahirakahira ia noho kongrigeisen heboudia idia abia gabuna ena adres oi henia. Do oi davaria pablik gabudia ai haroro karana be emu hesiai gaukara habadaia dalana namona ta.

¹³ Hari, Keristani taudia be sivarai namona do idia harorolaia sibona lasi. To bema ita ura ma haida ita durua mauri ia lao henia hereva momokanina idia abia dae, gau badana be kamonai taudia ita vadivadi henia loulou, unai amo lo Keristani taudia ai idia lao diba.

LOU HENIA KARAIA

¹⁴ Iesu ese ena murinai idia raka taudia ia hamaoroa: “Tanobada ena daudau momokani gabudia dekenai lau do umui gwauraia hedinarai.” (Kara 1:8) To ia hamaorodia danu: “Unai dainai umui lao, bese ibounai taudia be hahediba taudia ai umui halaoa, . . . bona idia umui hadibaia, umui dekenai lau henia hahegani ibounai idia badinaia totona.” (Mat. 28:19, 20) Iehova ena hesiai gaukara lalonai lou henia karaia karana amo moale bada ita davaria diba. Vadivadi ginigunana ai sivarai namona idia kamonai taudia be oi idia itaia lou neganai do idia moale. Idia ida Baibel ena sivarai ma haida oi kikilaia neganai, edia abidadama Dirava dekenai oi hagoadaia diba bona do ok durudia Dirava dibaia karana idia lalopararalaia totona. (Mat. 5:3) Bema oi hegaegae namonamo bona idia abia hidi negana ai oi lou henidia, reana Baibel stadi ta oi hamatamaia diba. Unai oi karaia badina oi ura bada lou henia oi karaia. Hereva momokani ena uhe ita hadoa sibona lasi to ita dairia danu.​​—1 Kor. 3:6.

¹⁵ Haida dekenai lou henia karaia be mai ena hekwarahi. Reana kiki hereva kwadogina amo sivarai namona gwauraia karana oi manadalaia vadaeni, bona unai hesiai gaukara ena kahana oi moalelaia. To reana ruma tauna do oi lou henia bona Baibel ena hereva ma haida do umui kikilaia karana oi laloa neganai, do oi laloa oi be hegeregere lasi. Hegaegae namonamo karana ese oi do ia durua. Wiki ena hebou dekenai ita herevalaia haroro daladia oi gaukaralaia be namo. Danu ekspiriens pablisa ta oi noia diba oi ia bamoa totona.

BAIBEL STADI KARAIA

¹⁶ Iuda tomadiho ia abia dae tauna be Dirava ena Hereva ia duahia neganai, Filipo ese ia nanadaia: “Oi duahia gaudia oi diba, a?” Unai tauna ia haere: “Edena bamona do lau diba bema ta ese lau ia hadibaia lasi?” Baibel ai Kara karoa 8 ese ia hahedinaraia, Filipo be unai tau ese ia duahia Baibel sivaraidia amo “ia dekenai . . . Iesu ena sivarai namona ia gwauraia.” (Kara 8:26-36) Filipo ese unai tau ia hadibaia negana ena daudau be ita diba lasi, to sivarai namona ia gwauraia hedinarai namonamo dainai, unai tauna be abidadama tauna ai ia lao bona ia ura ia bapatiso. Iesu Keriso ena hahediba tauna ta ai ia lao.

¹⁷ Hari inai negai momo be Baibel idia do diba namonamo lasi, unai dainai reana nega momo do ita lou henidia bona wiki haida, hua haida eiava lagani haida lalonai idia ida Baibel ita stadilaia murinai edia abidadama do ia goada bena do idia hegeregere idia bapatiso totona. To mai haheauka bona lalokau ida kudou-maoro taudia oi durua hahediba taudia ai idia lao be mai ena ahuna namona, Iesu ena hereva bamona: “Henia kara ena moale be bada, to abia kara ena moale be maragi.”​​—Kara 20:35.

¹⁸ Namona be stadi totona idia karaia buka ta oi gaukaralaia Baibel stadi oi karaia totona. Wiki ena hebou ai haroro karaia dalana ena hadibaia herevadia oi badinaia bona kongrigeisen ai stadi naria karana idia diba momo taudia ida oi gaukara hebou neganai, stadi namodia do oi karaia bona ma haida oi durua diba Iesu Keriso ena hahediba taudia ai idia lao totona.

¹⁹ Bema oi ura ta ese oi ia durua Baibel stadi oi hamatamaia bona karaia totona, namona be elda ta eiava Baibel stadi karana ia manadalaia Witnes ta oi hereva henia diba. Iseda Haroro Bona Mauri Dalana Ena Hebou Pepana lalonai idia atoa heduru herevadia bona hebou dekenai idia karaia haheitalai ese oi ia durua diba. Iehova dekenai oi tabekau bona guriguri amo unai ura oi gwauraia hedinarai. (1 Ioa. 3:22) Bona bema hegeregere, tahua gauna oi atoa emu ruma bese taudia bona ma haida danu Baibel stadi oi karaia. Baibel stadi momo oi karaia neganai, emu hesiai gaukara do oi moalelaia.

IEHOVA ENA OREA DEKENAI KAMONAI TAUDIA HAKAUA MAI

²⁰ Taunimanima ita durua Iehova Dirava idia dibaia bona Iesu Keriso ena hahediba taudia ai idia lao neganai, kongrigeisen taudia ai idia lao. Baibel Stiuden taudia be Iehova ena orea idia diba bona unai orea ida idia gaukara hebou neganai, hereva momokani dekenai do idia goada bona lo taudia ai do idia lao. Unai ia karaia totona ita hadibaia be gau badana. Vidio idauidau bona Daidia be Iehova Ena Ura Idia Karaia Noho? buklet ese unai gaudia idia herevalaia. Inai buka ena Karoa 4 dekenai idia noho hereva haida ese oi ia durua diba.

²¹ Kamonai tauna ida Baibel umui kikilaia matamaia neganai, namona be oi hadibaia hari inai negai Iehova be orea ta ia gaukaralaia tanobada dekenai haroro gaukara idia karaia totona. Namona be Baibel stadilaia bukadia edia namo oi herevalaia bona oi hahedinaraia unai buka be Dirava idia gwauhamata henia volantia taudia ese idia karaia bona tanobada ibounai dekenai idia siaia. Emu Baibel stadi oi boiria Kongrigeisen heboudia dekenai umui lao totona. Unuseniai emu turadia danu idia hedavari henia, bona hebou karaia daladia oi gwauraia hedinarai. Namona be oi durua sekit bona rijinol hebouhebou dekenai Iehova ena Witnes Taudia ma haida ia dibaia totona. Unai bamona hebou bona nega ma haida ai, namona be ia sibona ese Iehova ena hesiai taudia idia hahedinaraia lalokauna idia itaia, unai be Keristani taudia momokani edia toana badana. (Ioa. 13:35) Kamonai taudia be Iehova ena orea idia laloa bada matamaia neganai, edia hetura kara Iehova ida do ia goada.

BAIBEL LITRISA GAUKARALAIA

²² Keristani taudia ginigunadia be Dirava ena Hereva harorolaia goadagoada taudia. Idia ese Revareva Helagadia edia kopi idia karaia, idia sibona ese do idia stadilaia totona bona kongrigeisen ena stadi totona. Dirava ena Hereva momokani be ma haida dekenai idia hadibaia. Edia imana amo idia torea revareva be momo lasi bona idia naridia namonamo. (Kol. 4:16; 2 Tim. 2:15; 3:14-17; 4:13; 1 Pet. 1:1) Hari, Iehova ena Witnes taudia ese printa masini badadia idia gaukaralaia Baibel bona Baibel stadi bukadia handred milioni momo idia printaia totona. Bona gado handred haida ai pepapepa, buklet, buka, bona magasin idia printaia danu.

²³ Ma haida dekenai sivarai namona oi harorolaia neganai, Baibel stadi totona Iehova ena orea ese ia halasia gaudia oi gaukaralaia be namo. Iehova Ena Witnes taudia ese idia halasia pablikeisen oi duahia bona stadilaia ena namo oi diba dainai, oi ura unai gaudia be ma haida dekenai oi hahedinaraia danu.​​—Heb. 13:15, 16.

²⁴ Taunimanima momo be Intanet idia gaukaralaia infomeisen abia totona. Unai dainai, iseda websait, jw.org be tulu namona ma ta sivarai namona halasia totona. Tanobada hegegemadai, haida be edia kompiuta amo gado idauidau ai Baibel bona Baibel pablikeisen idauidau idia duahia bona idia rekodia gaudia idia kamonai diba. Idia ura lasi ita idia hereva henia o Iehova ena Witnes taudia davaria be auka gabudia ai idia noho taudia be edia ruma dekenai jw.org amo ita abia dae gaudia idia sekea diba.

²⁵ Unai dainai, namona be dala idia kehoa negadia ibounai jw.org ita herevalaia. Bema ruma tauna ese ita abia dae gauna ta ia henanadailaia, maoromaoro mobael eiava kompiuta amo haere ita hahedinaraia diba. Bema gado ma ta ia hereva tauna eiava taia kudima tauna ta ita davaria, ia ita hadibaia iseda Web sait dekenai ena gado ai Baibel o Baibel litrisa ia tahua diba. Pablisa momo ese Web sait amo vidio ta idia gaukaralaia Baibel idia herevalaia totona.

NEGA BONA GABU IDAUIDAU AI HARORO

²⁶ Iesu ese iena hereva idia kamonai taudia ia hamaoroa: “Umui be tanobada ena diari. . . . Taunimanima vairanai emui diari umui hahedinaraia, vadaeni emui kara namodia do idia itaia bona emui Tamana guba ai ia noho do idia hanamoa.” (Mat. 5:14-16) Unai hahediba taudia ese Iesu idia tohotohoa karana amo Dirava ena kara idia hahedinaraia, badina Iesu ia gwau: “Lau be tanobada ena diari.” Keristani taudia dekenai Iesu ese haheitalai namona ia hahedinaraia badina ia ese “mauri ia henia diari” ia halasia, unai amo kamonai taudia ibounai be namo do idia davaria.​​—Ioa. 8:12.

²⁷ Aposetolo Paulo danu be haheitalai namona ia hahedinaraia. (1 Kor. 4:16; 11:1) Atena dekenai ia noho neganai, dina ibounai maketi dekenai idia noho taudia ia haroro henidia. (Kara 17:17) Filipi dekenai idia noho Keristani taudia ese Paulo idia tohotohoa. Unai dainai idia dekenai ia gwau: “Inai uru gagevana bona dikana huanai umui be Dirava ena natudia bona umui goeva. Inai tanobada ai, umui be diari bamona umui diaridiari noho.” (Fili. 2:15) Hari inai negai, ita danu ese Basileia ena hereva momokani ena diari be eda hereva bona kara amo ita hahedinaraia diba bema dala ia kehoa negadiai ma haida dekenai sivarai namona ita gwauraia. Bema ita koikoi lasi bona ita kara maoromaoro, taunimanima do idia diba ita be tanobada amo ita idau. To, bema idia dekenai sivarai namona ita herevalaia, tanobada amo ita idau ena badina do idia diba.

²⁸ Iehova ena taunimanima ese sivarai namona be edia gaukara gabuna ai, sikuli ai, PMV ai, eiava edia dina ta ta gaukara lalonai idia davaria taudia dekenai idia herevalaia. Gabu ta dekenai ita lao neganai, ita danu idia guia taudia ita hereva henidia diba. Namona be ita hegaegae nega maorodia ai iseda herevahereva lalonai ita haroro totona.

²⁹ Do ita ura ma haida ita durua bema ita laloatao, iseda Havaraia Tauna ita hanamoa bona ena ladana ita matauraia. Danu, kudou-maoro taudia do ita durua diba Iehova idia dibaia totona, unai amo idia ese Ia do idia hesiai henia diba bona Iesu Keriso abidadama henia karana amo ia mai mauri hanaihanai helarona do idia abia. Iehova be unai kara ia moalelaia bona ia dekenai unai be hesiai gaukara helagana.​​—Heb. 12:28; Apok. 7:9, 10.

TERITORI

³⁰ Iehova ena ura be Basileia sivaraina be tanobada ibounai lalonai, siti bona hanua lalodiai do ita harorolaia. Unai dainai, kongrigeisen ta ta, bona gunika gabudia dekenai idia haroro taudia be brens ofesi amo teritori asainmen idia abia. (1 Kor. 14:40) Aposetolo edia negai, Dirava ese ena orea be unai bamona dala ai ia hakaudia danu. (2 Kor. 10:13; Gal. 2:9) Inai nega dokona ai Basileia gaukarana ia tubu haraga dainai, haroro gaukara do idia hagugurua diba bema teritori idia haria namonamo.

³¹ Kongrigeisen ena haroro teritori be haroro naria tauna ese ia naria. Hesiai tauna ta ese do idia karaia teritori ia haria diba. Haroro teritori be rua, ta be grup teritori bona ta be oi sibona oi abia hidi diba teritori. Bema teritori be momo lasi, grup naria taudia ese edia grup teritori ta ta dekenai idia noho pablisa taudia ida do idia gaukara hebou. Bema emu kongrigeisen be mai ena teritori momo, reana sibona emu teritori dekenai oi gaukara diba.

³² Pablisa ese haroro totona sibona ena teritori ia abia hidi diba bema haroro grup hebouna be lasi o bema ia auka haroro grup ia bamoa totona. Hegeregere, pablisa haida be edia gaukara gabuna badinai ia noho teritori ta ai, dina tubu ai o gaukara murinai idia haroro diba. Ruma bese haida be edia noho gabuna ai teritori ta idia abia hidi bona adorahi haida ai idia haroro. Sibona ese ia abia hidi be namo teritori ese pablisa ta ia durua diba haroro gaukara dekenai ena nega ia gaukaralaia namonamo totona. Danu, sibona idia abia hidi teritori be haroro grup ese idia gaukaralaia diba. Bema oi ura sibona emu teritori ta oi abia hidi, teritori naria tauna oi noia diba.

³³ Herevana grup naria tauna eiava pablisa ta ese ia abia hidi teritori ta ai haroro gaukara idia karaia, namona be ia hekwarahi inai teritori ai idia noho ruma ibounai idia karaia totona. Bema ruma ai ta ia noho lasi, dala ia tahua nega ma ta ai unai ruma ia lou henia totona, to namona be ruma tauna ena infomeisen gimaia taravatu ia badinaia. Grup naria tauna o pablisa ese teritori ta ia abia hidi neganai, namona be hua foa lalonai unai teritori ia karaia guguru. Unai teritori ia hagugurua murinai teritori naria tauna ia hadibaia be namo. Bema gau haida dainai unai teritori ia hagugurua lasi, grup naria tauna o pablisa ese unai teritori be iena ladana henunai ia noho diba ia karaia lou totona eiava teritori naria tauna dekenai do ia henia hanai.

³⁴ Bema Kongrigeisen taudia ibounai idia gaukara hebou, teritori ibounai idia hagugurua diba. Unai amo pablisa rua o momo ese idia karaia rumadia do ita karaia lou lasi, badina unai ese ruma taudia haida do ia habadua diba. Namona be iseda teritori ai idia noho taudia bona iseda tadikaka ita laloa bada.

GAUKARA HEBOU GADO IDAUIDAU TAUDIA HARORO HENIA

³⁵ Taunimanima ibounai ese Iehova Dirava, ena Natuna, bona Basileia idia diba be gau badana. (Apok. 14:6, 7) Ita ura iseda teritori ai gado idauidau ai idia hereva taudia ita durua hahemauri abia totona Iehova ena ladana ai idia boiboi, bona Keristani mauri dalana idia badinaia. (Roma 10:12, 13; Kol. 3:10, 11) Gado idauidau idia hereva teritori dekenai sivarai namona ita harorolaia neganai, dahaka koua gaudia ita davaria? Edena dala ai unai koua gaudia ita hanaia diba unai amo momo ita durua idia lalopararalaia gadona ai Basileia ena sivarai idia kamonai totona?​​—Roma 10:14.

³⁶ Teritori be gado ta ta ai idia haria, unai amo gado idauidau ai idia hereva pablisa edia kongrigeisen ese unai teritori idia karaia diba. Unai bamona negadiai, namona be kongrigeisen ta ta edia pablisa ese edia gado ai idia hereva diba taudia idia haroro henia. Lagani ta ta ai boiboi pepadia idia hariharilaia negadiai unai dala do idia badinaia danu. To, pablik gabudia bona nega bona gabu idauidau ai idia haroro neganai, pablisa ese taunimanima ibounai idia hereva henia diba bona gado idauidau pablikeisen idia hariharilaia diba.

³⁷ Nega haida gado ma haida kongrigeisen ese edia daudau teritori do idia karaia hanaihanai lasi. Unai bamona ia vara neganai, namona be haroro naria tauna ese unai gabu ai idia haroro kongrigeisen ibounai edia elda ida idia herevehereva bona dala namona ta idia tahua unai gabu ena haroro teritori ibounai idia karaia totona. Unai amo taunimanima iboudiai ese Basileia ena sivarai do idia kamonai bona unai teritori ita karaia loulou lasi dainai ruma taudia do ita habadua lasi​​—Aon. 15:22.

³⁸ Dahaka ita karaia diba bema gado idauna ai ia hereva tauna ita davaria? Namo lasi ita laloa ena gado ai idia hereva pablisa sibona ese do idia hereva henia. Pablisa haida be edia teritori ai idia gaukaralaia momo gado ai haroro hereva kwadogina ta idia dibaia. Ta dekenai iseda websait, jw.org amo ena gado ai pablikeisen ia duahia o daonloud diba dalana ita hadibaia, o ita hadibaia ena gado ai idia halasia litrisa ita abia mai diba.

³⁹ Bema ruma tauna ia kamonai namonamo, namona be ena gado ia lalopararalai tauna ta ita tahua unai ruma tauna ia durua totona. Danu ruma tauna dekenai ena gado korikorina dekenai kongrigeisen heboudia idia abia gabuna ita hadibaia diba. Bema ia ura iena gado dekenai ia hereva tauna ta ese ia ia hereva henia, jw.org ai ena kontek infomeisen ia atoa diba dalana ita hahedinaraia. Unai amo, brens ofesi ese dala do idia karaia kahirakahira ia noho pablisa, grup, eiava kongrigeisen ta amo heduru ma haida ia abia diba.

⁴⁰ Namona be unai kamonai tauna ita vadivadi henia noho ela bona ita ia hadibaia ena gado ai ia hereva pablisa ta ese ia ia hereva henia vadaeni. Nega haida, brens ofesi ese elda taudia do idia hadibaia unai tauna ena gado ia diba pablisa ta idia do tahua noho. Bema unai ia vara, namona be dala ita tahua unai ruma tauna ena ura ita habadaia noho. Bema mai dalana, ena gado ai ia noho pablikeisen ta amo Baibel ita stadilaia. Bema laulau ita gaukaralaia namonamo bona Baibel siridia ia duahia, Baibel ena hereva badadia haida do ia lalopararalaia. Bema ena ruma bese lalonai ta be ena gado bona hanua ena gado ia diba namonamo, gado hahanaia tauna ai ia lao diba.

⁴¹ Dirava ena orea ia dibaia totona, namona be iseda hebou dekenai ita boiria mai, ena be program ibounai do ia lalopararalaia lasi. Siri idia duahia neganai, bema ena gado Baibel ia noho, ia ita durua siri ia tahua bona duahia totona. Kongrigeisen taudia ia bamoa neganai do idia hagoadaia bona hereva momokani dekenai do ia goada ia lao.

⁴² Grup maragidia: Grup maragina ai pablisa haida sibona idia noho bona gado ai idia haroro, inai gado be ia idau kongrgeisen idia gaukaralaia gado amo bona elda o hesiai tauna ta be lasi edia gado ai wiki ta ta heboudia idia karaia totona. Brens ofesi ese unai badina toi amo gwaumaoro idia henia diba kongrigeisen ta ese ia henunai ia noho grup maragina ia gunalaia totona:

1. (1) Namona be inai gabu dekenai taunimanima momo sisina ese inai idau gado idia gaukaralaia.

2. (2) Pablisa haida ese inai gado idia diba eiava idia ura dibaia be namo.

3. (3) Elda oreana be idia hegeregere inai gado dekenai idia karaia haroro gaukara be mai ura bada ida idia gunalaia diba.

Bema elda oreana idia ura grup maragina ta idia hakaua, sekit naria tauna idia hereva henia be namo. Reana sekit naria tauna be kongrigeisen ma haida idia ura inai gado dekenai idia haroro totona ia diba namonamo bona heduru namona ia henia diba edena kongrigeisen be ia hegeregere inai grup maragina ia hakaua totona. Bema abia hidi idia karaia kongrigeisen ta ese unai grup maragina do ia gunalaia, elda taudia ese brens ofesi dekenai revareva do idia siaia gwaumaoro abia totona.

⁴³ Grup: Brens ofesi ese unai badina toi amo gwaumaoro idia henia diba kongrigeisen ta ese ia henunai ia noho grup ta ia gunalaia totona:

1. (1) Teritori ai idia gaukaralaia gado ta ena kamonai taudia idia noho bona idia ura gabeai grup badana ai idia lao diba.

2. (2) Namona be pablisa haida ese unai gado dekenai idia hereva diba o gado idia dibaia noho.

3. (3) Ia hegeregere elda eiava hesiai tauna ta ia noho wiki lalonai grup ia gunalaia bona unai gado ai wiki ena hebou ta eiava ena kahana ta hegeregere, pablik tok eiava Gima Kohorona stadi ia hakaua diba.

Bema unai ibounai idia badinaia, elda oreana ese unai grup ena sivarai be revareva amo do idia torea diho, bena brens ofesi do idia noia unai grup ese edia kongrigeisen henunai do ia noho totona. Unai grup ia gunalaia elda o hesiai tauna be idia gwauraia “grup naria tadikaka” or “grup durua tadikaka.”

⁴⁴ Bema unai grup idia hamomokania, elda oreana ese abia hidi do idia karaia inai grup dekenai kongrigeisen ena hebou ena kahana ma haida idia karaia totona bona hua ta lalonai nega hida hebou do idia karaia diba. Danu dala idia karaia grup ena haroro hebouna idia karaia totona. Grup taudia ibounai be unai grup ia naria elda oreana henunai do idia gaukara. Elda taudia ese hakaua dala namodia do idia gaukaralaia bona abia hidi maorodia do idia karaia grup ena namo totona. Sekit naria tauna be unai grup ia naria kongrigeisen ia vadivadi henia bona unai grup ida ia gaukara hebou neganai, ia ese revareva kwadogina amo unai grup ena sivarai bona do idia abia be namo gaudia be brens ofesi dekenai do ia tore henia. Nega korikori ai, unai grup be do ia hegeregere kongrigeisen ai ia lao totona. Bema pablisa ibounai ese tiokratik dalana idia badinaia, Iehova do ia moale.​​—1 Kor. 1:10; 3:5, 6.

GRUP AI HARORO

⁴⁵ Gwauhamata Keristani taudia be mai edia maduna sivarai namona idia harorolaia totona. Unai idia karaia daladia be momo, to ita momo ita ura ma haida danu ita haroro hebou. (Luka 10:1) Unai badina dainai, kongrigeisen be wikeni bona wiki lalonai haroro totona idia hebou. Holidei negadia danu be nega namona grup ai ita haroro totona, badina tadikaka momo be unai nega ai do idia gaukara lasi. Kongrigeisen Hesiai Komiti ese dina bona adorahi ai haroro grup do idia hebou negadia bona gabudia ia hegaegaelaia.

⁴⁶ Grup ai haroro karana ese pablisa ia durudia idia gaukara hebou bona idia “hagoadaia heheni” totona. (Roma 1:12) Pablisa matamatadia be ekspiriens pablisa danu idia gaukara hebou diba bona idia amo treinini idia abia. Gabu haida ai, dika ia vara diba dainai pablisa rua o momo idia gaukara hebou. Ena be palani oi karaia sibona do oi gaukara, to grup dekenai haroro hebou abia karana ese oi ia hagoadaia diba. Haroro gabuna ai bema oi itaia ma haida ida oi haroro, do oi gari lasi. Bema kongrigeisen ese wiki lalonai haroro hebou be dina ta ta ai idia makaia, namo lasi painia bona pablisa ma haida idia laloa haroro hebou ibounai idia lao henia be maoro. To, haroro hebou ma haida dekenai idia lao henia be namo.

⁴⁷ Namona be ita ibounai ese Iesu bona ena hahediba taudia idia hahedinaraia dalana ita badinaia! Ita diba momokani Iehova ese eda hekwarahi Basileia harorolaia gaukarana dekenai do ia hanamoa.​​—Luka 9:57-62.