KAHANA 7
Oi be Sibona Oi Noho Dainai Oi Gari, A?
Inai laulau dekenai ia noho mero maragina oi itaia. Toana be sibona ia noho dainai ia gari, ani? Nega ta unai bamona oi mamia, a?— Nega ta ta ita ibounai be unai bamona hemami ita abia. Baibel ese Iehova ena turadia haida edia sivarai ia herevalaia, idia danu be sibona idia noho dainai idia gari. Idia ta be Elia. Mani ena sivarai ita herevalaia.
Iesebele ia ura Elia ia alaia mase
Idaunegai, Iesu ia do vara lasi neganai, Elia be Israela tanona ai ia noho. Israela besena ena king Ahaba be Dirava momokani, Iehova, ia tomadiho henia lasi. Ahaba bona ena adavana Iesebele be dirava koikoina, Bala, idia tomadiho henia. Unai dainai, Israela taudia momo ese Bala idia tomadiho henia matamaia danu. Kwini Iesebele be hahine dikana bona ia ura Iehova idia tomadiho henia taudia ibounai do ia alaia mase, Elia danu! Oi diba Elia be dahaka ia karaia?—
Elia ia heau boio! Ia heau lao tano gagaena dekenai bona nadi matuna ta lalonai ia hunia. Oi laloa dahaka dainai unai bamona ia karaia?— Oibe, ia gari dainai. To, Elia ia gari lasi be namo. Dahaka dainai? Badina ia diba Iehova ese do ia durua. Guna, Iehova ese Elia dekenai ena siahu ia hahedinaraia. Nega ta, Iehova ese Elia ena guriguri ia haerelaia bona guba amo lahi ia siaia diho. Unai dainai, hari danu Iehova be Elia ia durua diba!
Iehova ese edena bamona Elia ia durua?
Elia be nadi matuna dekenai ia noho neganai, Iehova ese ia nanadaia: ‘Elia e, oi be iniseniai dahaka oi karaia noho?’ Elia ia haere: ‘Lau sibona lau mauri bona oi lau tomadiho henia noho. Sibona lau noho dainai, lau gari lau do idia alaia mase.’ Elia ia laloa Iehova idia tomadiho henia taudia ibounai idia alaia mase vadaeni. To Iehova ese Elia ia hamaoroa: ‘Lasi, unai bamona ia vara lasi. Taunimanima 7,000 mai kahana be lau idia tomadiho henia noho. Oi gari lasi. Gaukara ma haida oi dekenai do lau henia!’ Oi laloa Elia be unai ia kamonai neganai ia moale, a?—
Elia ena sivarai amo dahaka oi dibaia?— Oi be sibona oi noho lasi bona oi gari lasi. Oi be mai emu turadia, idia be Iehova bona oi idia lalokau henia. Danu, Iehova ena siahu be bada bona hanaihanai oi do ia durua! Hari oi diba oi be sibona oi noho lasi dainai oi moale, a?—